Markə 11
11
Kandə lə Jeju Jerujalɛm
1Jeju kə njê-njaje goe tə̂ n̂-teeje ngɔsi kə Jerujalɛm, ər kə Betepaje kə Betani, dɔ ddingiri Olibəje tə̂ a, Jeju ula njê-njaje goe tə̂ joo nɔɛ̂n tə̂ kete. 2N̂-pa narəde nan: «Awje ngonn bbe tə̂ kə̂ nɔnse tə̂ yoonn. A ta teeje be a, â kingaje marə ngonn kororo kə̂ n̂-tɔɛ̂, dəw nayn isi dɔɛ̂ tə̂ ang bbay. Ə-tuteje ə-ddeeje saa arəmje. 3Bbo dəw dujuse nan: ‹Mba ddi bba ə-ddaje nɛ̂n baann wa?› a, ilɛ̂je tə̂ nan: ‹Əbbə-dəwje â duju karə jaw saa, a nâ karə n-təl saa njangə baa.› »
4Dawje ngaâ dingaje ngonn kororo kə̂ n̂-tɔɛ̂ ta-ndoko tə̂ ddaka mbɔr ddəw tə̂, ngɔsi kə ta-kəy ngaâ n̂-tuteje. 5Marə dəwje kə̂ eeje tə̂ənn dujujede nan: «Ddi â aw ddaje nəənn wa? Mba ddi bba aw tutuje ngonn kororo le wa?»
6Njê-njaje go Jeju tə̂ le ilaje dəwje le tə̂ tokə Jeju pa arəde le. Dəwje le inyade arə dawje kə kororo le. 7Dawje kə ngonn kororo le darə Jeju. N̂-tilaje kubbuje ləde dɔ kororo tə̂ le darə Jeju aal isi dɔɛ̂ tə̂. 8Dəwje nya tilaje kubbuje ləde dɔ ddəw tə̂, a marɛ̂je tətəje kamje mə mu tə̂ tilaje dɔ ddəw tə̂. 9Dəwje kə̂ aw njaje nɔn Jeju tə̂ kə njê kə̂ aw njaje goe tə̂ aw uruje əkii nan: «Jɔsuje gaji Lubba! Maji karə Lubba bbar tar kə̂ maji dɔ dəw tə̂ kə̂ ddee kə ri Əbbə-dəwje. 10Maji karə Lubba bbar tar kə̂ maji dɔ kɔn-mbay tə̂ kə̂ aw ddee, kɔn-mbay lə kajeje Dabbiti. Jɔsuje gaji Lubba kə̂ isi ddutu dara tə̂ nu!»
11Jeju tee Jerujalɛm ngaâ aw andə kəy-polo Lubba tə̂. Nila kəmɛ̂ naa nɛ̂n nɛ̂nje tɔyn mbɔrɛ̂ tə̂ ngaâ, ne kə njê-njaje goe tə̂ kə̂ dɔku gire joo le dawje kə Betani mba lo wul mban.
Kakə pigə kə̂ andə ang
12Lo-karɛ̂ tə̂ kə̂ dinje Betani daw dɔtuje a, bbo dda Jeju. 13Noo marə kakə pigə kə̂ kamɛ̂ to tə̂, ddəw əw. Naw ngɔsi ta koo se kandɛ̂ to wa? A kamɛ̂ dɔrɔ â noo. Mba to nɛyn kandə lə pigə ang bbay. 14Yeenn ngaâ Jeju pa arə kakə pigə le nan: «Dəw a kusa kandi ndɔ kâra ang ngaa!» Njê-njaje go Jeju tə̂ le ooje tar le.
Jeju tubba njê-nɛ̂n-labbəje kəy-polo Lubba tə̂
15N̂-teeje Jerujalɛm a, Jeju andə kəy-polo Lubba tə̂. Nunn kutu tubba njê-nɛ̂n-labbəje kə njê-ndoko nɛ̂nje mə kəy-polo Lubba tə̂ le. N̂-tuta tabələje lə njê kə̂ aw mbəlje narɛ kə nɛ̂n-kisi lə njê-labbə dərje n̂-tila 16ngaâ narə dəw kâra oto marə nɛ̂n nday nɛ̂n mə kəy-polo Lubba tə̂ le ang. 17Goe tə̂ a, n̂-tɔjude nɛ̂n nan: «Lubba pa makəturu tə̂ laa nan: ‹Dâ bbar kəy ləm nan kəy duju Lubba kə̂ gəl-dəwje tɔyn a dujuje Lubba məɛ tə̂›. A sese, ə-ddaje arə ddee to lo kiya-rɔ lə njê-bbokoje wa?»
18Mbayje lə njê-poloje Lubba kə njê-gərəje-Ndu ooje tar le ngaâ aw sangəje gusu kə̂ ta tɔl nɛ̂n Jeju. N̂-bbəəlje nya, mba nɛ̂n-tɔju laa aw gangə singa dəwje kə̂ banya le tɔyn. 19Lo-kul a, Jeju kə njê-njaje goe tə̂ dinje mə tɔkə bbe tə̂ le n̂-teeje kə ddang.
Tar kakə pigə kə̂ oy
20Lo-karɛ̂ kə əndɔɔ kə̂ daw ndayje a, dooje kakə pigə le a, oy taar ndərəng ngirɛ̂ tə̂. 21Mə Piyɛr ole dɔ tar tə̂ənn le ngaâ pa arə Jeju nan: «Nje-nɛ̂n-tɔju, oo kakə pigə kə̂ ɔru saa le â oy njan toonn.» 22Jeju pa arəde nan: «Unnje məse arəje Lubba. 23Tɔkɔrɔ njaa m-pa marəse: Bbo dəw pa arə ddingiri toonn nan: ‹Ɔtu lo tə̂ nəənn aw oso baâ›, a bbo kəjə-tar dang to məɛ̂ tə̂ ang, a noo məɛ̂ tə̂ to nɛ̂n le a to a, nɛ̂n le a to njaa. 24Mba yeenn bba, m-pa marəse: Nɛ̂n tɔyn kə̂ aw dujuje Lubba mbɛɛ̂, maji karə ooje məse tə̂ to ingaje nɛ̂n le mban, a Lubba a karəse. 25Bbo arje taar ta duju Lubba, a bbo eeje kə tar kə marə dəw a, ɔruje tar le dɔɛ̂ tə̂, arəje Bɔsese kə̂ isi mə dara tə̂ ɔru tar dɔse tə̂ tɔ. [26A bbo ɔruje tar dɔ dəwje tə̂ ang a, Bɔsese kə̂ darâ a kɔru tar majang kə̂ ə-ddaje dɔse tə̂ ang tɔ.]»
Nân bba arə singa Jeju wa?
27Jeju kə njê-njaje goe tə̂ n̂-təlje Jerujalɛm bbay. Kar tə̂ kə̂ Jeju aw nja mə kəy-polo Lubba tə̂ a, mbayje lə njê-poloje Lubba kə njê-gərəje-Ndu kə tɔkəje lə Jiipije n̂-ddeeje rɔɛ̂ tə̂. 28N̂-dujeje nan: «Nân bba ari ddəw karə ə-dda nɛ̂n nɛ̂njeenn wa? Wase nân njaa bba ari singa karə ə-dda nɛ̂n nɛ̂njeenn wa?» 29Jeju ilade tə̂ nan: «Mâ dujuse tar kâra baa. Bbo ilamje tə̂ a, mâ bbar ri dəw kə̂ arəm singa dda nɛ̂njeenn le karəse tɔ. 30Batɛm lə Jan in dda wa? In rɔ Lubba tə̂ darâ wase in rɔ dəwje tə̂ wa? Ilamje tə̂.»
31A n̂-paje horode tə̂ nan: «Bbo jilaje tə̂ n-pa nan: ‹In rɔ Lubba tə̂ darâ› a, nâ pa nan: ‹Mba ddi bba ə-ndikije tə̂ kə Jan le ang wa?› 32A bbo n-pa nan: ‹Dəwje â ula Jan.› » Ta koo a, mbayje lə njê-poloje Lubba kə Njê-gərəje-Ndu kə tɔkəje lə Jiipije le bbəəlje dəwje kə̂ banya le mba dəwje tɔyn gərəje to Jan to nje-kila mbər tar lə Lubba. 33Yeenn ngaâ dilaje Jeju tə̂ nan: «N-gərə ang.» A Jeju pa arəde nan: «Əman kara mâ bbar ri dəw kə̂ arəm singa ta dda nɛ̂njeenn le karəse ang tɔ.»
Currently Selected:
Markə 11: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
