Markə 3
3
Jeju aji marə dingaw kə̂ jia oy
1Jeju təl aw kəy mbɔn-naan tə̂ lə Jiipije. A marə dingaw kə̂ jia oy ee kəy-mbɔ-naan tə̂ le. 2A Parijinyɛje kə̂ eeje tə̂ənn aw ɛɛ̂je ta koo se nâ kaji dingaw le ndɔ-kuwa-rɔ tə̂ wa? Mba n̂-ndikije ta kunda tar dɔɛ̂ tə̂. 3Jeju pa arə dəw kə̂ jia oy le nan: «In ar dannâ nəənn!» 4Goe tə̂ a, n̂-duju dəwje le nan: «Ndu arə ddəw ta dda maji ndɔ-kuwa-rɔ tə̂ wase ta dda maji ang wa? Ta kaji dəw wase ta kinyɛ̂ karə noy wa?» A dəwje le ndikije ta kilɛ̂ tar tə̂ le ang. 5Jeju aade tɔyn kə wungu. Rɔɛ̂ nəəle ang mba dəwje ddaje arə məde kətərə. Yeenn ngaâ n̂-pa narə dəw le nan: «Ə-ndɔju jii.» Dəw le ndɔju jia ngaâ jia le təl ddee maji. 6Parijinyɛje le inje kəy mbɔn-naan tə̂ le teeje be a, uwaje dɔ naan kə dəwje kə̂ mə mbɔn-naan tə̂ lə Erodə ta koo ddəw kə̂ ta tɔl nɛ̂n Jeju.
Dəwje kə̂ banya ddeeje ingaje Jeju
7 Jeju kə njê-njaje goe tə̂ dɔruje rɔde dawje kar dangə tə̂ kə̂ Galile a, dəwje tokə banya ɔruje goe. Dəwje le inje Galile kə Jude, 8Jerujalɛm kə nangə tə̂ kə̂ Idume. Dinje nangə tə̂ kə̂ tura Jurdɛn tə̂ kə bbeje tə̂ kə̂ toje mbɔr Tir tə̂ kə Sidɔn tə̂ tɔ. N̂-ddeeje tokə banya rɔ Jeju tə̂ mba dooje tar nɛ̂nje tɔyn kə̂ Jeju aw dda. 9Yeenn a, Jeju duju njê-njaje goe tə̂ karə dundaje marə tɔkə to ngɔsi darɛ̂je, mba karə dəwje kə̂ banya le ubbɛ̂je ang. 10Mba Jeju aw aji njê-rɔ-toje nya arə dəwje tɔyn kə̂ rɔde tode aw awje kə dɔɛ̂ tə̂ dɔɛ̂ tə̂ ta kɔrɛ̂ kə jide. 11Njê kə̂ ndilje kə̂ maji ang aw ddade ooeje a, n̂-teeje dosoje nangə̂ nɔn gɔlɛ̂ tə̂ ngaâ duruje əkii nan: «Ə-to Ngonn lə Lubba.» 12A Jeju ndɔru mbi dəwje le nya karə n̂-paje darə dəwje gəreje ang.
Jeju mbərə njê-kaw-kulaje kə̂ dɔku gire joo
13Goe tə̂ a, Jeju aal marə ddingiri ngaâ bbar dəwje kə̂ məɛ̂ ndikide arə dawje rɔɛ̂ tə̂. 14N̂-mbərə marɛ̂je dɔku gire joo, nunda ride to njê-kaw-kulaje karə n̂-naynje saa ddəm karə nulade narə daw dilaje mbər Tar kə̂ Maji ddəm. 15Narəde singa kə̂ ta tubba nɛ̂n ndilje kə̂ maji ang. 16Dəwje kə̂ dɔku gire joo kə̂ n̂-mbərəde le to: Simɔn kə̂ Jeju unda ria nan Piyɛr, 17Jakə de kə ngokɔɛ̂n Jan kə̂ n̂-toje to ngann lə Jebede. Jeju unda ride nan Bowanɛrjesə, gəle nan: «Dingawje kə̂ toje tokə lə ndi kə̂ aw ndangə.» 18Andere kə Pilipi, Bartelemi kə Matiye, Toma kə Jakə ngonn lə Alpe, Tade kə Simɔn kə̂ daw bbarɛ̂ nan «Dəw kə̂ ndiki bbe laa nya», 19kə Judas Iskariyotə nje-kunn dɔ Jeju.
Njê-nujuje lə Jeju ndikije ta kɔrɛ̂ kɔtuje saa
20Jeju təl kə̂y ngaâ dəwje tokə banya təlje mbɔnje naan arə nɛ̂n-kusa njaa kara ne kə njê-njaje goe tə̂ dingaje ddəw ta kusa ang. 21Njê-nujuje laa ooje tarɛ̂ ngaâ ddeeje ta kuwɛ̂ kaw saa mba n̂-paje nan: «Dɔ Jeju turu.»
Jeju ila tar tə̂ lə dəwje kə̂ undaje tar dɔɛ̂ tə̂
22 Njê-gərəje-Ndu kə̂ inje Jerujalɛm paje nan: «Bɛljebul isi məɛ̂ tə̂.»#3:22 Luku 11:15 N̂-paje bbay nan: «Mbay lə ndilje kə̂ maji ang â arɛ̂ singa tubba nɛ̂n ndilje kə̂ maji ang.»
23Yeenn ngaâ Jeju bbarde ngaâ unn marə nɛ̂n-kɔju-marɛ̂ pa nɛ̂n tar arəde nan: «Satan a kasə tubba Satan tokə baânn wa? 24Bbo dəwje kə̂ mə marə bbe-kɔn tə̂ tinje naan a, bbe-kɔn le a kasə nayn ang. 25Ngaâ bbo dəwje kə̂ mə marə nuju tə̂ tinje naan a, nuju le a kasə nayn ang. 26A bbo Satan aw dda ddɔ kə da-rɔɛ̂ njaa a, yeenn pa nan n̂-tin kə da-rɔɛ̂ njaa arə nâ kasə nayn ang, laa a goto ngaa.»
27«Dəw a kasə kandə mə kəy tə̂ lə nje-singa ta koto nɛ̂n-kingaje laa njaa baann ang. Maji karə nuwɛ̂ n̂-tɔɛ̂ bba. A bbo n̂-tɔɛ̂ a, nâ kasə ta koto nɛ̂nje tɔyn kə̂ to mə kəy tə̂ laa.
28«Tɔkɔrɔ njaa m-pa marəse: Lubba a kɔru tar majangje kə tar nɛ̂n-tajije tɔyn kə̂ dəwje tajɛ̂je dɔde tə̂ kə ddang. 29A dəw kə̂ taji Ndil-mə-nda, tar a kɔru dɔɛ̂ tə̂ ndɔ kâra ang. Mba tar majang kə̂ to kə ndɔ kə ndɔ to dɔɛ̂ tə̂ mban.»
30Jeju pa tar kə de tokə baann mba n̂-paje nan: «Ndil kə̂ maji ang isi məɛ̂ tə̂.»
Kɔn Jejuje kə ngakɔɛ̂nje kə̂ tɔkɔrɔ
31Goe tə̂ a, kɔn Jejuje kə ngakɔɛ̂nje n̂-ddeeje darje ddaka ngaâ dulaje dəw karə bbarɛ̂. 32Dəwje tokə banya isije mbɔr Jeju tə̂ le ngaâ paje arɛ̂ nan: «Kɔinje kə ngakɔin kə̂ dingaw kə ngakɔin kə̂ dɛnɛ̂n deeje ddaka, daw sangije.» 33Jeju ila tə̂ nan: «Nân bba to kɔnʼmje ngaâ njê kə̂ dda bba toje to ngakɔnʼm wa?» 34Goe tə̂ a, naa dəwje kə̂ isije gukeje le ngaâ n̂-pa nan: «Ooje, kɔnʼmje kə ngakɔnʼm â isije nəənn. 35Mba dəw kə̂ dda nɛ̂n kə̂ mə Lubba ndiki â to ngokɔnʼm, to kɔn-nannəm ngaâ to kɔnʼmje.»
Currently Selected:
Markə 3: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
