Markə 4
4
Gusu-tar dɔ nje-nɛ̂n-dubbu tə̂
1Jeju təl aw tɔju nɛ̂n kar tɔkə dangə tə̂ kə̂ Galile. Dəwje kə̂ banya mbɔnje naan rɔɛ̂ tə̂. Yeenn bba naal marə tɔkə to nisi məɛ tə̂. Tɔkə to le to dɔ maann tə̂, a dəwje le arje ta maann tə̂ le ngɔsi. 2N̂-tɔjude nɛ̂nje nya ddəw gusu-tar tə̂. N̂-pa mə nɛ̂n-tɔju tə̂ laa le nan: 3«Ooje, nje-nɛ̂n-dubbu aw ndɔɔ̂ ta dubbu nɛ̂n. 4Naw dubbu nɛ̂n le a, marə kandə-ko le gayn dɔ ddəw tə̂. Əəlje ddeeje ngaâ ɔnje. 5Marə dəbbə kandə-koje le gaynje lo tə̂ kə̂ to ər kə̂ nangə ndəər tə̂ ang. Kandə-koje le teeje njangə baa mba nangə le ndəər ang. 6A kar ɔsu nya a, puru kar le ɔn koje kə̂ teeje le. Koje le tutu mba ngirade andə nangə̂ ang. 7Marə dəbbeje gaynje mə kakə konnje tə̂. Kakə konnje le ngalje ngaâ orede kə nangə̂ arə dandəje kandə ang. 8A marə kandə-koje le gaynje dɔ nangə tə̂ kə̂ maji. N̂-teeje, n̂-nduje ngaâ dandəje. Marɛ̂je andəje dɔmota, marɛ̂je dɔmisan, marɛ̂je dɔdɔku.» 9Ngaa n̂-pa nan: «Dəw kə̂ mbia to a, maji karə oo tar nəənn!»
Jeju tɔju nɛ̂n kə gusu-tar mba ddi wa?
10Kar kə̂ Jeju aw ddəw əw kə dəwje kə̂ banya a, njê-kaw-kulaje kə̂ dɔku gire joo kə dəwje kə̂ aw njaje saa le dujeje nan: Mba ddi bba gusu-tarje â naw tɔju nɛ̂n nɛ̂n wa? 11Nilade tə̂ nan: «Sese, darə ə-gərəje tar kɔn-mbay lə Lubba kə̂ to tar kə̂ iya rɔɛ̂. A kəsə dəwje, gusu-tar â daw pa nɛ̂n tar darəde. 12Baann bba,
‹dâ kaaje lo kə majɛ̂, a dâ kooje nɛ̂n ang ddəm
dâ kooje tar kə mbide kə majɛ̂, a dâ gərəje kandɛ̂ ang.
Baann ang a, dâ təlje rɔ Lubba tə̂ karə ɔru tar dɔde tə̂.› »
Gəl gusu-tar kə̂ dɔ nje-nɛ̂n-dubbu tə̂ le
13Goe tə̂ a, Jeju dujude nan: «Ə-gərəje gəl gusu-tar nəənn ang wa? Yeenn a, â gərəje kandə kəsə gusu-tarje tɔyn tokə baânn wa? 14Nje-nɛ̂n-dubbu le to kâra baa kə dəw kə̂ aw ila mbər tar lə Lubba. 15Marə dəwje toje tokə lə dɔ ddəw kə̂ tar lə Lubba oso tə̂. Koo kə̂ dooje tar le be a, Satan ddee ɔru tar kə̂ n̂-dubbu məde tə̂ le kə ddang. 16Marɛ̂je toje tokə lə lo kə̂ to ər. Dooje tar le a, n̂-taaje tar le njangə baa kə rɔ-nəəl. 17A dinyaje darə tar le ungu ngirɛ̂ məde tə̂ ang. N̂-naynje ddəwe tə̂ ang. Bbo nɛ̂n kəm-to-ndoo wase nɛ̂n-singa ddee ingade mba tar le a, n̂-tusuje dinyaje njangə baa. 18Marɛ̂je taaje tar le tokə lə kandə-ko kə̂ oso horo kakə konnje tə̂. Dooje tar le, 19a kəjə-tar mba nɛ̂nje kə̂ nangə̂ nəənn, kəm-nda nɛ̂n-kingaje kə bbo nɛ̂nje dang dang kə̂ aw ərə dəw andəje məde tə̂ ngaâ ore tar le kə nangə̂ arə andə ang. 20A marɛ̂je taaje tar le tokə kandə-ko kə̂ oso dɔ nangə tə̂ kə̂ maji. Dooje tar le, n̂-taaje tar le ngaâ tar le andə kandə. Marɛ̂je andəje dɔmota, marɛ̂je andəje dɔmisan, a marɛ̂je andəje dɔdɔku.»
Gusu-tar dɔ lambe tə̂
21Goe tə̂ a, Jeju pa arəde nan: «Dəw a kila puru lambe tə̂ kaw kunda mə jo tə̂ wase kɔ tira tə̂ wa? Nâ kunda dɔ marə nɛ̂n tə̂ taar ang wa? 22Nɛ̂n tɔyn kə̂ to lo-kiyɛ̂ tə̂ kə̂ a tee kə ddaka ang goto. Nɛ̂n tɔyn kə̂ n̂-kusu dɔɛ̂ a tee kəm dəwje tə̂ kə ddaka. 23Dəw kə̂ mbia to a, maji karə oo tar nəənn!» 24Jeju pa arəde bbay nan: «Ooje tar nəənn kə majɛ̂. Nɛ̂n kə̂ unnje ɔjuje nɛ̂n nɛ̂n a, Lubba a kunn kɔju nɛ̂n nɛ̂n karəse tɔ, dâ kila marɛ̂ dɔɛ̂ tə̂ karəse. 25Mba dəw kə̂ nɛ̂n laa to a, dâ karɛ̂ marɛ̂ dɔɛ̂ tə̂. A dəw kə̂ nɛ̂n laa goto, nɛ̂n kə̂ tɛn baa kara dâ taa jia tə̂.»
Gusu-tar dɔ kandə-ko tə̂ kə̂ tee kə dɔɛ̂ baa
26Jeju pa bbay nan: «Bbe-kɔn lə Lubba to tokə dəw kə̂ dubbu kandə-ko mə ndɔɔ tə̂ laa. 27Goe tə̂ a, le til kə kar dəw le tibbi wase n̂-tibbi ang kara, kandə-ko le aw tee ngaâ ndu. A ne nje-ndɔɔ le n̂-gərə gusu kə̂ kandə-ko le aw tee nɛ̂n ang. 28Nangə njaa dda arə kandə-ko le tee. Dɔngɔrɛ̂ kandə-ko le tee, goe tə̂ a, dɔɛ̂ tee ngaâ bba kandɛ̂ tee dɔɛ̂ tə̂. 29Bbo kandə-ko le sangə kə majɛ̂ a, nje-ndɔɔ le unn kutu kuja kə kiya, mba kar kujɛ̂ asə ngaa.»
Gusu-tar dɔ kandə kakə tə̂ kə̂ ria nan Mutardə
30Jeju təl pa nan: «Ddi bba ja kunn kɔju nɛ̂n Bbe-kɔn lə Lubba wa? Gusu-tar kə̂ baânn bba ja kunn ta pa nɛ̂n tarɛ̂ wa? 31Bbe-kɔn lə Lubba to tokə lə kandə-ko kə̂ ria nan mutardə. Kar dubbe a, to kandə-ko kə̂ tɛn baa uta kəsə kandə-koje tɔyn kə̂ dɔ nangə tə̂. 32Bbo n̂-dubbu a, n̂-tee, n̂-ngal nuta kəsə kandə-koje tɔyn kə̂ mə ndɔɔ tə̂. Barkəmɛ̂je ngalje nya arə əəlje kə̂ darâ asəje ta dda kəy ləde bɛɛ̂n tə̂.»
33 Gusu-tarje kə̂ baann â Jeju aw pa nɛ̂n tarje arəde. Naw tɔju nɛ̂n le kə gusu kə̂ dasəje ta gərə nɛ̂n kandɛ̂. 34Marə tar kâra kə̂ n̂-pa narəde kə gusu-tar ang goto. A bbo ne kə njê-njaje goe tə̂ disije kə karəde baa a, nɔru gəl nɛ̂nje tɔyn narəde.
Jeju ndangə bamburanbo arə əw rɔɛ̂
35Lo-kul a, Jeju pa arə njê-njaje goe tə̂ nan: «Jawje turâ.»
36Yeenn ngaâ dɔtuje dinyaje dəwje kə̂ banya le. Njê-njaje go Jeju tə̂ le arəje tɔkə to kə̂ nisi məɛ tə̂ aw saa. Marə tɔkə toje eeje ngɔsi kə de tɔ. 37A â ta koo a, marə bamburanbo in aw ula kə singa arə maann le aw ləngə ngaâ ungu mə to tə̂ le, nayn ngaji baa karə ddusu. 38A Jeju to aw tibbi kutu tɔkə to tə̂ le. N̂-gətə dɔɛ̂ kə nɛ̂n-gətə-dɔ. Yeenn ngaâ njê-njaje goe tə̂ uruje əkii ndoleje nɛ̂n nan: «Nje-nɛ̂n-tɔju, nayn kə̂ ja ta nayn kə kɔrɔ̂ nəənn osoi tə̂ ang wa?»
39Jeju ndol, n̂-ndangə bamburanbo le ngaâ n̂-pa narə maann le nan: «Ə-to ddekeke, əw rɔi!» Yeenn ngaâ bamburanbo le əw rɔɛ̂ ngaâ lo to nyɛnɛnɛ. 40Goe tə̂ a, Jeju pa arə njê-njaje goe tə̂ nan: «Bbəəl uta dɔse mba ddi wa? Mə-kunn ləse goto bbay wa?» 41A bbəəl uta dɔde arə n̂-dujuje naan nan: «Dəw nəənn to dəw ddi bba ləl kə maann kara aw ooje tɛɛ̂ wa?»
Currently Selected:
Markə 4: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
