Markə 8
8
Jeju arə nɛ̂n-kusa dəwje doro sɔ
1Mə ndɔje tə̂ənn, dəwje kə̂ banya təl mbɔnje naan bbay, a dingaje nɛ̂n-kusa ang. Yeenn ngaâ Jeju bbar njê-njaje goe tə̂ pa arəde nan: 2«Dəwje kə̂ banya nəənn ddamje ndoo. Mba ndɔ mota njaa ngaa kə̂ n̂-naynje səm lo tə̂ nəənn, a dingaje nɛ̂n-kusa ang. 3Bbo m-tubbade marə n̂-təlje bbeê ləde məde bbo baa a, dâ kosoje labbə kə ddəw, mba marɛ̂je inje ddəw əw.» 4Njê-njaje goe tə̂ ilɛ̂je tə̂ nan: «Lo kə̂ dda bba ja kasə kinga nɛ̂n-kusa tə̂ ta karə dusaje darə məde ndann mə kɔr tə̂ nəənn wa?» 5Jeju dujude nan: «Mapa baânn â to jise tə̂ wa?» Dilɛ̂je tə̂ nan: «Siri.»
6Yeenn ngaâ n̂-duju dəwje kə̂ banya le karə disije nangə̂. Goe tə̂ a, n̂-jin mapaje kə̂ siri le, narə wooyo Lubba ngaâ n̂-tətə narə njê-njaje goe tə̂ karə n̂-kaynje ngaâ n̂-kaynje dəwje kə̂ banya le. 7Njê-njaje goe tə̂ le eeje kə marə ngann kanjije tɔ. Narə wooyo Lubba mba ngann kanjije le ngaâ n̂-dujude karə n̂-kaynje dəwje kə̂ banya le. 8Dusaje nɛ̂n darə asəde ngaâ n̂-mbɔnje kəse kɔrɛ̂je kə̂ nayn karɛ siri dawje nɛ̂n. 9Kɔr dəwje kə̂ eeje lo tə̂ənn le asə doro sɔ. Goe tə̂ a, Jeju tubbade arə n̂-təlje bbeê ləde. 10Njangə baa goe tə̂ a, naal tɔkə to nisi mə tə̂, ne kə njê-njaje goe tə̂ ngaâ dawje nangə tə̂ kə̂ Dalmanuta.
Parijinyɛje dujuje nɛ̂n-mɔri
11 Parijinyɛje ddee teeje ngaâ unnje kutu mayn tar kə Jeju mba nɛɛ̂n nɛ̂n. N̂-dujeje nan: «Ə-dda marə nɛ̂n-mɔri kə̂ in darâ arə joo.» 12Jeju ila kəwn kə singa ngaâ pa nan: «Mba ddi bba dəwje kə̂ bbasinɛn nəənn dujuje marə nɛ̂n-mɔri wa? M-pa tar kə̂ tɔkɔrɔ marəse, Dâ kooje marə nɛ̂n-mɔri kâra ang.» 13Goe tə̂ a, Jeju inya Parijinyɛje le aw aal tɔkə to aw tura ba-katə tə̂.
Jeju pa tar dɔ wum tə̂ lə Parijinyɛje kə lə Erodə
14Mə njê-njaje go Jeju tə̂ oy ta kaw kə mapa tokə banya. Kâra baa be â to jide tə̂ mə tɔkə to tə̂ le. 15Jeju ndɔru mbide nan: «Ooje kə majɛ̂ bba! Aaje rɔse wum tə̂ lə Parijinyɛje kə Erodə#8:15 Wum lə Parijinyɛje to ngəm kə̂ daw dərəje. Tar kə̂ tade tə̂ to dang kə kula-ddade. Oo Luku 12:1..» 16Yeenn ngaâ daw dəjəje tar mba mapaje kə̂ goto jide tə̂ le.
17Jeju gərə tar kə̂ daw dəjəje le ngaâ pa arəde nan: «Mba ddi bba aw əjəje tar məse tə̂ ə-paje nan eeje kə mapa ang wa? Ə-gərəje ang bbay wa? Ooje tar, a ə-gərəje kandɛ̂ ang bbay wa? Nɛ̂n-gərə ləse ddəwe utu wa? 18Kəmse to, a ooje nɛ̂n nɛ̂n ang wa? Mbise to, a ooje nɛ̂n tar ang wa? Məse ole ang wa? 19Ndɔ kə̂ m-tətə mapa min mba dingawje kɔr min le, ə-mbɔnje kəse ddusu karɛ baânn wa?» Dilɛ̂je tə̂ nan: «Karɛ dɔku gire joo.» 20Jeju dujude bbay nan: «Ndɔ kə̂ m-tətə mapa siri mba dəwje kɔr sɔ le, ə-mbɔnje kəse ddusu karɛ baânn wa?» Dilɛ̂je tə̂ nan: «Karɛ Siri.» 21Yeenn ngaâ n̂-dujude nan: «Yeenn kara ə-gərəje ang bbay wa?»
Jeju aji nje-kəm-tɔ kə̂ Betesayida arə oo lo
22Jeju kə njê-njaje goe tə̂ n̂-teeje Betesayida a, dəwje ddeeje kə marə nje-kəm-tɔ rɔ Jeju tə̂ le ngaâ n̂-ddaje rɔde to ndoo rɔɛ̂ tə̂ karə nɔrɛ̂ kə jia. 23Nuwa ji nje-kəm-tɔ le, n̂-tee saa mə bbe tə̂ le kə ddang. N̂-dda maann tɛɛ̂ nɔru nɛ̂n kəmɛ̂ ngaâ nila jia kəmɛ̂ tə̂. Goe tə̂ a, n̂-duje nan: «Oo marə nɛ̂n wa?» 24Dingaw le təəyn kəmɛ̂ ngaâ pa nan: «Moo dəwje, a n̂-toje tokə lə kakəjeenn, a daw njaje.» 25Goe tə̂ a, Jeju təl ila jia kəm dingaw tə̂ le bbay ngaâ kəmɛ̂ le uja arə noo nɛ̂nje tɔyn kə majɛ̂. 26Jeju tubbɛ̂ karə n̂-təl kə̂y laa ngaâ pa arɛ̂ nan: «Andə mə tɔkə bbe tə̂ le ang.»
Piyɛr pa nan Jeju to Kristə
27 Jeju kə njê-njaje goe tə̂ dawje ər kə ngann bbeje tə̂ kə̂ mbɔr Sejare lə Pilipi tə̂. Daw dawje a, n̂-duju njê-njaje goe tə̂ le nan: «Dəwje aw paje nan m-to nân wa?» 28Dilɛ̂je tə̂ nan: «Marɛ̂je paje nan ə-to Jan-Batisi, marɛ̂je paje nan ə-to Eli, a marɛ̂je paje nan ə-to marə nje-kila mbər tar lə Lubba horo marɛ̂je tə̂.» 29Ngaâ n̂-dujude nan: «A sese, ə-paje nan m-to nân wa?» Piyɛr ilɛ̂ tə̂ nan: «Ə-to Kristə.» 30Yeenn ngaâ n̂-ndɔru mbide nya karə n̂-paje tar dɔɛ̂ tə̂ darə dəw ang.
Jeju pa tar koy laa kə tar ndol laa
31Goe tə̂ a, Jeju unn kutu pa karə njê-njaje goe tə̂ nan: «Maji karə Ngonn lə dəw oo ndoo nya. Tɔkəje lə Jiipije kə mbayje lə njê-poloje Lubba kə njê-gərəje-Ndu mbəteje. Maji karə n̂-tɔlɛ̂je ngaâ ndɔ mota goe tə̂ a, n̂-ndol.» 32N̂-pa tar nəənn le narəde kə ddaka kə majɛ̂. Yeenn ngaâ Piyɛr ɔrɛ̂ kə guku ngaâ unn kutu kin saa. 33A Jeju turu rɔɛ̂ aa njê-njaje goe tə̂ le ngaâ in kə Piyɛr nan: «Ɔtu gom tə̂ kə ddang, Satan, mba kəjə ləi to kəjə lə Lubba ang, to kəjə lə dəw.»
34Goe tə̂ a, n̂-bbar dəwje kə̂ banya kə njê-njaje goe tə̂ ngaâ n̂-pa narəde tɔyn nan: «Bbo dəw ndiki ta kuwa gom a, maji karə nəjə rɔɛ̂ ang, noto kakə-dəsə laa ta nuwa gom. 35Mba dəw kə̂ ndiki ta ngəm təbbə laa, təbbə laa le a nayn kə kɔrɔ̂. A dəw kə̂ təbbə laa nayn kə kɔrɔ̂ mbam ddəm mba Tar kə̂ Maji ddəm a kaji təbbə laa le. 36Bbo dəw inga nɛ̂n tɔyn kə̂ duninya tə̂ nəənn, a bbo təbbə laa nayn kə kɔrɔ̂ a, ddi kə̂ maji a nâ kinga goe tə̂ wa? 37Ddi â dəw a kasə ta karə mba təl kinga nɛ̂n təbbə laa wa? 38Dəw kə̂ dda rɔ-kul ləm kə rɔ-kul tar ləm kəm dəwje tə̂ kə̂ bbokənɛn nəənn, Ngonn lə dəw a dda rɔ-kul laa ndɔ tə̂ kə̂ nâ ddee kə anjəje laa kə̂ majije tɔyn mə piti tə̂ lə Bɔɛ̂je. Mba dəwje kə̂ bbasinɛn nəənn le toje to njê-nɛ̂n-ddaje kə̂ maji ang ddəm dəwje kə̂ pa-nja ləde to kə dannâ ang ddəm.»
Currently Selected:
Markə 8: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
