Markə 9
9
1Jeju təl pa arəde bbay nan: «Tɔkɔrɔ njaa, m-pa marəse, marə dəwje horo dəwje tə̂ kə̂ arje nəənn a koyje ang ndərəng dâ kooje kɔn-mbay lə Lubba kə̂ a ddee kə singa-mɔngu.»
Jeju turu to dang
2Ndɔ misan goe tə̂ a, Jeju jin Piyɛr, Jakə kə Jan ngaâ aw kə de dɔ ddingiri tə̂ kə karəde baa. Jeju turu to dang kəmde tə̂. 3Kubbuje laa kara nda kayn kayn. Nda lə kubbuje le, marə nɛ̂n dɔ nangə tə̂ nəənn kə̂ a kasə dda karə kubbu nda tokə baann goto. 4A ta koo a, dooje Eli de kə Mɔyijə kə̂ dundaje lo n̂-teeje ngaâ dede joo kəm daw paje tar kə Jeju le. 5Yeenn ngaâ Piyɛr pa arə Jeju nan: «Nje-nɛ̂n-tɔju, maji laa boy â jee nəənn. Ja dda ngann kəy-kamje mota: kâra to ləi, kâra to lə Mɔyijə, a kâra to lə Eli.»
6Kə̂ tɔkɔrɔ, Piyɛr gərə tar kâra kə̂ ta pa ang, mba ne kə njê-marɛ̂je kə̂ joo le bbəəl uta dɔde. 7Mum ddee kiride ngaâ marə ndu bbar mə mum tə̂ le nan: «Dəw nəənn to Ngonnəm kə̂ m-ndike nya. Ooje tɛɛ̂!» 8A ta koo a, njê-njaje go Jeju tə̂ le aaje lo mbɔrde tə̂ a, dooje dəw kâra ang ngaa. Jeju kə karɛ̂ baa njaa ar kə de. 9Dinje dɔ ddingiri tə̂ le daw ddisije a, Jeju ndɔru mbide nan: «Dang bba ə-paje tar nɛ̂n kə̂ ooje le arəje dəw ang, ndərəng ndɔ kə̂ Ngonn lə dəw a ndol go koy tə̂ laa.» 10N̂-ndikije tar tə̂ lə Jeju le kə majɛ̂, a daw dujuje naan tar nan: «Ndol go yo tə̂ laa» a ta pa nan ddi njaa nəənn wa? 11N̂-dujuje Jeju nan: «Mba ddi bba njê-gərəje-Ndu paje nan Eli a ddee dɔngɔr bba wa?» 12Jeju ilade tə̂ nan: «Tɔkɔrɔ, Eli a ddee dɔngɔr bba njaa, mba mɔsɛ nɛ̂nje tɔyn ture tə̂. A mba ddi bba Makəturu lə Lubba pa nan: ‹Ngonn lə dəw a koo ndoo nya ngaâ dəwje a mbəteje› wa? 13A m-pa marəse, Eli ddee mban ngaâ n̂-ddaje saa nɛ̂n tɔyn kə̂ məde ndiki tokə n̂-dda Makəturu tə̂ lə Lubba le.»
Jeju tubba ndil kə̂ maji ang rɔ marə ngonn tə̂
14Kar kə̂ Jeju kə njê-njaje goe tə̂ kə̂ mota le n̂-teeje ngɔsi kə kəseje a, dooje dəwje kə̂ banya kə̂ guku kəseje le kə njê-gərəje-Ndu kə̂ aw maynje tar kə de. 15Dəwje kə̂ banya le ooje Jeju a, məde unda dɔ binya ngaâ n̂-tilaje kəmɛ̂ kə ngɔru ta ddɛɛ̂ lapiya. 16Jeju duju njê-njaje goe tə̂ nan: «Aw maynje kə de tar ɔju dɔ ddi wa?» 17Marə dəw kə̂ ee horo dəwje tə̂ kə̂ banya le ilɛ̂ tə̂ nan: «Nje-nɛ̂n-tɔju, m-ddee kə ngonnəm kə̂ dingaw rɔi tə̂ mba marə ndil kə̂ maji ang aw ddɛɛ̂ arə n̂-pa tar ang. 18Lo tɔyn njaa ndil le aw unnɛ̂ tə̂ ilɛ̂ nangə̂. Njum-tɛɛ̂ aw tee, naw ngəər ngangɛ̂ ngaâ n̂-mɔngu. M-duju njê-njaje goi tə̂ karə n̂-tubbaje ndil le a, dumanje nɛ̂n pin.» 19Jeju pa arəde nan: «See dəwje kə̂ mə-kunn ləse goto nəənn, mâ nayn kə se be mba ndɔ baânn wa? Mâ kumanse mba ndɔ baânn bbay wa? Ə-ddeeje kə ngonn le arəmje.»
20Yeenn ngaâ n̂-ddeeje kə ngonn le darɛ̂. A koo kə̂ ndil kə̂ maji ang le oo Jeju a, unn kutu yəkə ngonn le kə singa. Ngonn le oso nangə̂ aw ndubbu ngaâ njum-tɛɛ̂ aw tee. 21Jeju duju bɔ ngonnje le nan: «Nɛ̂ɛnn aw ddɛɛ̂ dda ndɔ baânn ngaa wa?» Bɔɛ̂je le ila Jeju tə̂ nan: «Kə kasɛ̂ baa njaa. 22Ndil le aw ilɛ̂ taar taar kəm puru tə̂, marɛ̂ a, nilɛ̂ mə maann tə̂ ta karə noy. Bbo asə ta dda marə nɛ̂n a, oo kəm-to-ndoo ləje bbo umanje.» 23Jeju pa arɛ̂ nan: «Mba ddi bba ə-pa nan: ‹Bbo asə ta dda marə nɛ̂n a›, wa? Dəw kə̂ mə-kunn laa to a kasə dda nɛ̂n tɔyn!» 24Njangə baa njaa bɔ ngonnje le uru əkii kə taar nan: «Moo məm tə̂! A ə-ddee umam mba mə-kunn ləm goto.»
25 Jeju oo dəwje kə̂ banya kə̂ aw ddeeje kə ngɔru kə rɔde tə̂ a, ndangə ndil kə̂ maji ang le nan: «Əi ndil kə̂ nje-dda karə dəw pa tar ang ddəm oo tar ang ddəm ə-tee rɔ ngonn tə̂ nəənn kə ddang ta ə-təl andə məɛ̂ tə̂ ang ngaa.» 26Ndil kə̂ maji ang le uru əkii, yəkə ngonn le kə singa ngaâ tee kə ddang. Ngonn le to tokə dəw kə̂ oy ngaâ dəwje nya paje nan: «Noy mban.» 27A Jeju uwa ji ngonn le ndɔrɛ̂ arə nin nar taar.
28Kar kə̂ Jeju təl aw kə̂y ngaâ njê-njaje goe tə̂ njaa naynje saa kə karəde baa a, n̂-dujeje nan: «Mba ddi bba jeje juman kə tubba ndil le pin wa?» 29Nilade tə̂ nan: «Duju Lubba njaa kâra baa â dəw a kasə tubba nɛ̂n ndil kə̂ baann.»
Jeju təl pa tar koy kə tar ndol laa
30Dɔtuje lo tə̂ənn, n̂-ndayje kə ddəw kə̂ Galile mba Jeju ndiki karə dəw gərə ang. 31Mba, naw tɔju nɛ̂n njê-njaje goe tə̂ ngaâ n̂-pa nan: «Dâ kuwa Ngonn lə dəw kulɛ̂ ji dəwje tə̂ karə n̂-tɔlɛ̂je ngaâ ndɔ mota goe tə̂ a, nâ ndol.» 32Njê-njaje goe tə̂ le gərəje dɔde tar tə̂ kə̂ naw pa narəde le ang, a n̂-bbəəlje ta təl duje.
Nân bba to dəw kə̂ bo wa?
33Daw teeje Kapɛrnawum. A kisi kə̂ disije mə kəy tə̂ a, Jeju duju njê-njaje goe tə̂ nan: «Ddi bba aw maynje nɛ̂n naan tar horose tə̂ ddəw-boô wa?» 34A dilaje tar tə̂ ang, mba kar tə̂ kə̂ n̂-naynje ddəw-boô bbay le, daw maynje naan tar ta gərə dəw kə̂ uta marɛ̂je horode tə̂. 35Yeenn ngaâ Jeju isi nangə̂ a, bbar njê-njaje goe tə̂ kə̂ dɔku gire joo le pa arəde nan: «Bbo dəw ndiki ta to dəw kə̂ dɔngɔr a, maji karə n̂-to dɔbɔyn dəw kə̂ go kəseje tə̂ tɔyn ta n̂-ddee to nje-kula ləde tɔyn.»
36Goe tə̂ a, Jeju unn marə ngonn kə̂ ngaji undɛ̂ dannde tə̂. Nuwɛ̂ kə karɛ̂ tə̂ ngaâ n̂-pa narə njê-njaje goe tə̂ nan: 37«Dəw kə̂ taa marə ngonn kə̂ tokə ne nəənn kə rɔɛ̂ tə̂ kə rim a, əman njaa n̂-taam. Ngaa dəw kə̂ taam kə rɔɛ̂ tə̂ a, to dəw kə̂ ulam a n̂-tɛɛ̂ bbo to əman kə karəm ang.»
Dəw kə̂ mbətəje ang, to dəw ləje
38 Jan pa arə Jeju nan: «Nje-nɛ̂n-tɔju, joo marə dəw kə̂ unn rii aw tubba nɛ̂n ndilje kə̂ maji ang. N-sangə ddəw ta kɔkɛ̂ ddəwe, mba n̂-nja goje tə̂ ang.» 39A Jeju ilɛ̂ tə̂ nan: «Ɔkɛ̂je ddəw ang, mba dəw kâra kə̂ a dda nɛ̂n-mɔri kə rim ngaâ njangə baa goe tə̂ a, a təl pa tar ləm maji ang goto. 40Mba dəw kə̂ mbətəje ang, to dəw ləje. 41Tɔkɔrɔ njaa m-pa marəse, dəw kə̂ arəse maann-kay mə əngo tə̂ ayje, mba ə-toje to dəwje lə Kristə a, dəw le a kinga kuka laa.»
Jeju ndɔru mbi njê-njaje goe tə̂
42«Dəw kə̂ dda arə marə dəw horo ngannje tə̂ kə̂ ngaji kə̂ unnje məde arəm oso mə majang tə̂ a, maji boy ta tɔ biri gɔsɛ̂ tə̂ kilɛ̂ mə ba-katə tə̂. 43Bbo jii a ta dda karə ə-dda majang a, ə-gangə kə ddang. Mba kinga təbbə kə̂ tɔkɔrɔ kə jii kə̂ nayn kâra baa, maji uta ngəm jii joo kəm kaw nɛ̂n kəm puru tə̂ kə̂ aw ɔn kə ndɔ kə ndɔ. [44Lo tə̂ənn kore kə̂ aw ɔn dəw oy ang ddəm puru kə̂ aw ɔn oy ang ddəm.] 45Bbo gɔli a ta dda karə ə-dda majang a, ə-gangə kə ddang. Mba kinga təbbə kə̂ tɔkɔrɔ kə gɔli kə̂ nayn kâra baa maji uta ngəm gɔli joo kəm karə dilai nɛ̂n kəm puru tə̂ kə̂ aw ɔn kə ndɔ kə ndɔ. [46Lo tə̂ənn, kore kə̂ aw ɔn dəw oy ang ddəm puru kə̂ aw ɔn oy ang ddəm.] 47Bbo kəmi a ta dda karə ə-dda majang a, ɔru kə ddang. Mba kandə Bbe-kɔn tə̂ lə Lubba kə kəmi kə̂ nayn kâra baa, maji uta ngəm kəmi joo kəm karə dilai nɛ̂n kəm puru tə̂ kə̂ aw ɔn kə ndɔ kə ndɔ. 48Lo tə̂ənn kore kə̂ aw ɔn dəw oy ang ddəm puru kə̂ aw ɔn oy ang ddəm. 49Mba puru a kɔru dəwje tɔyn tokə katə kə̂ ɔru nɛ̂n. 50Katə to nɛ̂n kə̂ maji. A bbo katə təl dɔɔn ang ngaa a, ddi bba dəw a dda karə katə le təl dɔɔn bbay wa? Maji karə katə to rɔse tə̂, ta isije kə̂ mə-wul-lɔm horose tə̂.»
Currently Selected:
Markə 9: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
