San Juan 14

Jesús anque neda dia atta do Tata Do Iyyabaaha

1Jesús re ca biꞌini rudheti ca tisa ruleꞌe:

—Bittu aca guatenle. Gualtsia lele Tata Do Iyyabaaha, gualtsiaguaba lele neti lhe. 2Lheꞌe lisi Tata quia do iyyabaaha nna ixe atta tseꞌe benni sia nía. Gansi läba anía anca nna lägabi upea le aní. Nnanna nna eyyaꞌaya qui sen tseea atta tseꞌele. 3Dequide eyyaꞌaya sen tseea atta tseꞌele nna dedaaya attu libe qui echea le len neti, qui tseꞌeguabale atta dhoa. 4Lebiꞌi nna chiba anca bienle neda dia atta eyyaꞌaya.

5Tomás rábi Jesús:

—Läga yu riꞌitu gaxa eyyalu, xa Benni bananie riꞌitu. Larcala nna ¿tti modu yutu bixa neda nua?

6Jesús becabie re:

—Netiba nua anca neda dia atta do Tata Do Iyyabaaha. Anca nu ruleꞌe nu anca gualí lhe anca nu rute elha nabani ttu dia lii lhe. Ni ttu benni bittu aca gueni isínna len Tata quia gansi läba neti unia qui isínna len Benniha. 7Gansi lebiꞌi chi anca bienle neti nna chiguaba anca bienle Tata quia. Nnannali chi anca bienle, cumu Benniha bunni rugüiale.

8Felipe nna rábi:

—Benni banani riꞌitu, beleꞌen riꞌitu Tata gueriha, careꞌaba nua nna ucatte.

9Jesús becabie re:

—Felipe, isá chi uca requia len lebiꞌi nna ¿si itú ttuali nna bittu chi yulu nuxa anca? Benni chi bilenna neti nna chiguaba bilen nua Tataha. ¿Gasná nua nna lu nna rálu: “Beleꞌen riꞌitu Tataha”? 10¿Si läba gua ria lelu, neti nna ttuba Benni anca lenia Tataha, Tataha nna ttuba Benni anca Benniha lenie neti? Ca tisa rinnea-ni nna läganu anca quionni rinnea, nu anca gue Tata Do Iyyabaaha Benni yuꞌu lheꞌe lastooa-niba Ben-ni rinnea. Labe runie ca milagru runia. 11Gualtsia lele, neti nna ttuba Benni anca lenia Tataha, Tataha nna ttuba Benni anque lenie neti. Gansi bittuba nna ladiba gue nu rilenle runia gualtsia lele. 12Neti nna gualíbatia ria, nu tsia leni neti nna unguabana ca nu runia-ni. Nu xxenrula unna cumu neti nna eyaꞌaba atta do Tata quia. 13Iyába nu innábale len Tataha rudettile láya nna gunba nua, qui anáchu neti xiꞌin Tata Do Iyyabaaha, de nu runia-ni nna uleꞌe lo anca Benniha Benni ra xxeni leni. 14Bixaba innábale rudettile láya nna gunba nua.

Jesús rucan yienie idhelhe Espíritu gue Tata Do Iyyabaaha

15’Gansi lebiꞌi raquinle quia nna gudobale tisa gue ca tisa runia le mandadu unle. 16Neti nna güinnababa lo Tata quia qui idhelhe attu Benni aca lanie le, qui dhoe len lebiꞌi ttu dia lii. 17Benniha nua Espíritu gue Tata Do Iyyabaaha, Benni ruleꞌenie le nu anca gualí. Ca benni seꞌe yies lo yu-ni nna läga ulabicana Benniha, cumu läga anca biaquinna Benniha, niguaba lä riláquinne lhe. Ttiaca lebiꞌi nna chiba anca bienle Ben-na, cumu len lebiꞌiba doe, dhoe lheꞌe lastoole lhe.

18’Läga ocaꞌan neti le attiba ttu bidabi, esíaba neti qui dhoa len lebiꞌi. 19Chi tte deoba bitturu iláni ca benni seꞌe yies lo yu-ni neti, lebiꞌi nna güilabinle neti. De anca bania nna lebiꞌi nna guaca banguale. 20Gansi chi bisía sá aca nu ria-ni nna lania nna ttedeenle neti nna ttuba Benni anca lenia tata quiaha, lebiꞌi nna ancale ttuba benni leni neti, neti nna anca ttuba Benni len lebiꞌi. 21Benni chi bieninna ca tisa runia le mandadu unle-na lhe udona tisa gueque lhe unnuha nua gualíguinna raquinna quia. Benni raquinna quia nna Tata quia nna acanie gueni. Anáguaba neti acaguabatia gueni, uleꞌe loa len lana nuxa anca lhe.

22Judas nu bittu lá Iscariote nna ráne:

—Tata, ¿biaca suntteba len riꞌitu uleꞌe lolu nuxa ancalu, bittu uleꞌe lolu leni iyá ca benni nuxa ancalu?

23Jesús becabie re:

—Benni raquinna quia nna udoba nua tisa gue ca tisa quia-ni. Tata quia nna guaca banie gueni. Tata quia lenie neti nna itatu tsuꞌutu lheꞌe lastooni. 24Nu bittu raquinna quia nna läga rudo nua tisa gue nu rixxiꞌaya. Ca tisa rieninle rinnea-ni nna läga anca ca unní nu anca quia, nu anca gue Tata quia Benni udhelhe netiha bunni rinnea.

25’Iyábunni rixxiꞌatia le, nnanna doa len lebiꞌi. 26Ttiaca Benni aca lanie leha, delába Espíritu idhelha Tataha cuenta quia, Benniha uleꞌenie le iyába, orexxe lele iyá nu chi rpea le lhe.

27’Neti rutea xen su le lenle. Xen su le guele rutea lenle-na bittu ancana loesi xen su le rute ca benni seꞌe yies lo yu-ni. Nuarca bittu aca guatenle, lä gasguabinle lhe. 28La chiba bieninle ria: “Eyyaꞌaba, lenla nna esíaya qui dhoa len lebiꞌi attu libe.” Gansi gualíguinle raquinle quia nna rana beꞌo juisia lele atti rpea le: “Eyyaꞌaya atta do Tata quia”, cumu Benniha anque Benni raru xxeni lee atti neti. 29Nnannali chi rixxiꞌatia le, qui gansi chi uca nu ria-ni nna tsia lele.

30’Lärga bitterga isá rinne lania le, cumu nu xxegüi rinnabia ca benni seꞌe yies lo yu-ni nna chi dana, masquiba läga unnuha rinnabiana neti. 31Ttiaca anába te aca, qui ttedaani ca benni, neti nna racatia gue Tata quia, runia nu re neti unia lhe.

’Gualdhu lí. Gualtsá.

Currently Selected:

San Juan 14: zaq

Highlight

Copy