San Lucas 13

Gualodú xiyyan le qui bittu tsia nittile

1Laniaguaba nua bisína ttu chupa ca benni atta du Jesús. Lacana nna utixxiꞌaquinna Benniha, Pilato benna mandadu betticana ttulhe ca unbiyuu daa lo yu gue Galilea laca seꞌecana rutticana ca nimala qui utecana úna gue Tata Do Iyyabaaha. Reni gue ca nimalaha nna biselana len reni guecani. 2Jesús re:

—¿Si rquinle dequi guate ca unbiyuu gue Galilea anía de ancacana nu teru tulha guecani lo Tata Do Iyyabaaha atti adí ca benni seꞌe lheꞌe yies guecaniha? 3Neti nna ria, dica. Lebiꞌi nna gansi bittuba odú xiyyan le odaxxule neda gue Tata Do Iyyabaaha, anáguaba lebiꞌi, iyábale gattiguabale. 4¿O raquinle dequi ca nu sixunu (18) utti atti ubixxi lo yoꞌo nu anca ixe coa do lheꞌe yiesi Siloé iquicaniha, ancacana ca nu benru nu bittu anca tsee delo iyá ca nu seꞌe Jerusalén? 5Neti nna ria, dica. Lebiꞌi nna gansi bittuba odú xiyyanle odaxxule neda gue Tata Do Iyyabaaha, anáguaba lebiꞌi iyábale gattiguabale.

Ejemplu gue ya igu nu bittu ribía nu xixxi gueniha

6Jesús utixxiꞌattebanie ca benni seꞌe nía ttu ejemplu, re cana:

—Ttu unbiyuu yadinbi ttu ya igu lheꞌe yu atta te besuli guebiha. Nianna güiabi guagüiabi gansi gua sia igu gue nua. Ttiaca niba ttu igu bittu guattiꞌabi. 7Larcala nna rábi unbiyuu ruyú atta yada besuliha: “Begüiarga, chinca tsunna ida-ni rita reguila nu xixxi gue ya igu-ni, ttiaca tsa bittu ratiꞌaya nu xixxi loni. Uchú na, cumu cuentarguaba duna rulháninna lo yu-na.” 8Ttiaca nu rapa lo yuha nna becabina rána: “Benni bananie neti, begüeelha na dhuna attu ida-ni, laca icheꞌenia xanni, cuequia bebi lhe 9qui nicaga gutebana nu xixxi. Gansi bittuba nna lania liba ichúlha.”

Jesús beonie ttu nuila sá redí le ca benni Israel

10Ttu sá atti redí le ca benni Israel, Jesús beleꞌenie ca benni lheꞌe ttu yoꞌo atta rudheticana ca tisa gue Tata Do Iyyabaaha. 11Nía du ttu nuila chi anca sixunu (18) ida ranina. Ttu be xxegüiba nua uyuꞌuna, nuarca bedo rubana cuꞌeni, nianna ttu tsaba bittu raca elixxana. 12Atti bilen Jesús nuilaha nna uxttebe na re na:

—Nuila, chiba ulálu lo isagüe guelha.

13Laniala nna bexxúa nee cuꞌeni. Snaba lania belína, nianna udulottebana ulequi xenna Tata Do Iyyabaaha. 14Ttiaca nu lo gue yoꞌo atta rudheticana ca tisa gue Tata Do Iyyabaaha nna bisaꞌattebinna de biaca beon Jesús nuilaha la sá redí lecaniha. Nianna ráttebana ca benni seꞌe nía:

—Xxupa ubisaba gaꞌana cuen ca benni sina. Lheꞌe ca sá-ni gualtá qui eyacale, bittu itale qui eyacale sá redí leri-ni.

15Jesús becabie re:

—Lebiꞌi, ca nu ni lo ni tisaba runi dequi ancale nu runi nu anca tsee, lä gua rudhanba cua ttu ttule uꞌuna guele o burru guele sá redí leri-ni qui tsia lenle nua sagüiꞌale na inda. 16Nuila du-ni nna ancana nu datía Abraham. Chinca sixunu [18] ida yuꞌuni nu xxegüiha na isagüe, nianna ¿si bittuba dica eyaca nuila-ni sá redí leri-ni?

17Atti rá Jesús anía nna ca nu bittu raca uyúcana Benniha nna bettuxxattaquinna, ttiaca adí ca benni seꞌe nía nna tsitsiba ruꞌu lecani rilaquinna ca milagru run Benniha.

Ejemplu gue bes coana murtasa

(Mt. 13:31-32; Mr. 4:30-32)

18Ráguaba Jesús:

—¿Gasná ruleꞌe atti rinnabia Tata Do Iyyabaaha ca benni? ¿Bi nua ttu te innía ancana aná? 19Atti rinnabia Tata Do Iyyabaaha ca benni ancana attiba ttu besi coana murtasa uda ttu unbiyuu lo yu gueniha. Unnuha nna bixenna ucana attiba ttu ya gaꞌa, ca binni-na nna runi xcuadi guecani lo ca xiquini.

Ejemplu gue levadura

(Mt. 13:33)

20Ráguaba Jesús attu libe:

—¿Bi nua ttu innía raxxína ancana attiba atti rinnabia Tata Do Iyyabaaha ca benni? 21Atti rinnabia Tata Do Iyyabaaha ca benni ancana attiba levadura bedaxxu ttu nuila betselana lheꞌe tsunna ya yiedi qui ilhidhana lheꞌe itúba cua gue ttaxtilaha.

Gualun duelha gualgaꞌa roꞌo puerta güexxa-na

(Mt. 7:13-14, 21-23)

22Laca dia Jesús yuꞌe neda daca Jerusalén, lee nna ruleꞌenie ca benni seꞌe lheꞌe ca yiesi lhe ca ranchu lhe seꞌe atta die ritee. 23Ttu benni nna unnaba tisana rána Benniha:

—Benni bananie neti, ¿si ttulherba benni anca odilá Tata Do Iyyabaaha?

Lee nna becabie re:

24—Gualun duelha gualgaꞌa roꞌo puerta güexxa-na, cumu neti ria, ixe ca benni uncana gaꞌacana, ttiaca bittu dhacana. 25Dequide chadha benni beaca guebi yoꞌoha odheabi puertaha nna lebiꞌi ca nu seꞌe lheꞌeliꞌa nna innele innále: “Benni bananie riꞌitu, udhalchi qui gaꞌatu”, ttiaca biꞌiniha nna ecabibi guele innábi: “Läga yu neti gax beaca lasle.” 26Lania nna dhulole innále: “Inqui len luba uꞌuya utotu lhe lo ca neda seꞌe lheꞌe ca yies guetu-naba udúlu beleꞌenlu riꞌitu lhe.” 27Ttiaca Benniha nna ecabie innee: “¿La chiba rpea le bittu yua ga ladu dale? ¡Gualbietta atta dua-ni, lebiꞌi ca nu runi nu bittu anca tsee!” 28Atta tsiale nna ancana atta cuesle lhe atta goni lo layale lhe atti ilenle Abraham, Isaac lhe Jacob lhe iyáguaba ca benni uca profeta lhe seꞌe atta rinnabia Tata Do Iyyabaaha, ttiaca lebiꞌi nna cuequibe le. 29Cumu isía ca benni daa daca norti lhe daca sur lhe daca atta riría bisa-na lhe daca atta radi bisa-na lhe qui ebíacana gocana ttu elha go tsee atta rinnabia Tata Do Iyyabaaha. 30Lania nna ixe ca nu bittu ancacana nu ra xxeni leni nnanna eyacacana nu ra xxeni leni, ca nu anca nnanna nu ra xxeni leni nna eyacacana nu bittu ra xxeni leni.

Jesús ribesie gue Jerusalén

(Mt. 23:37-39)

31La sátteba bisín ttulhe ca benni fariseo, nianna rácana Jesús:

—Bería ni beyya, cumu Herodes rdacana uttin lu.

32Jesús becabie re cana:

—Gualtsia gualgás bedaha: “Neti nna nasá lhe uxxea lhe ebearba ca be xxegüi-na lhe eyonia ca benni rani-na lhe güisa nna uluxa sina quia-ni.” 33Ttiaca labíaba usiguia neda quia nasá lhe uxxea lhe güisa lhe cumu läga dica gatti ttu benni ancabi profeta attu atta subi, gan läba lheꞌe yiesi Jerusalén.

34’¡Atturu gueni xa benni seꞌe Jerusalén! Lebiꞌi nna ruttile ca biꞌini anca profeta, rusíale iyya ca benni ridhelha Tata Do Iyyabaaha atta seꞌele lhe. ¡Balhala libe benia oseꞌale ttu reba attiba run ttu bera reaxina ca xiꞌinni reguꞌu lheꞌe xxilani qui uyúncana, ttiaca bittu uca lele! 35Gualgüia nnanna yies guele-ni nna a tturbana eyaꞌana. Neti rpea le, lebiꞌi nna bitturu ilenle neti, axta liba isía sá innále: “¡Carbáru Benni daa cuenta gue Tata Do Iyyabaaha!”

Currently Selected:

San Lucas 13: zaq

Highlight

Copy