San Lucas 14

Jesús beonie ttu unbiyuu yuꞌu gui

1Ttu sá redí le ca benni Israel nna güia Jesús go yetta lheꞌe yoꞌo gue ttu nu anca nu lo gue ca fariseo. Adí ca fariseo nna seꞌecana güelhatsi. 2Gaxxaba atta do Jesús du ttu unbiyuu rani yuꞌuna gui. 3Jesús unnaba tise ca fariseo seꞌe nía lhe ca nu ruleꞌe nu rá lo ley bocaꞌana Moisés lhe re cana:

—¿Si gua dica eyaca ttu beni rani sá redí leri-ni? ¿Si bittuba aca?

4Ttiaca lacana nna bittu unnecana. Laniala nna bedaxxue nu raniha atti beonttebe na, nianna re na:

—Beyyatte.

5Ca fariseo nna re cana:

—Lebiꞌi nna gansi burru gueleha o si uꞌuna gueleha iyinnina lheꞌe ttu pozo, ¿läba ganna saleattebale nua masquiba anca sá redí leri?

6Lacana nna bittu beselaquinna bixa innácana ecabicana gue Benniha.

Ca nu seꞌe atta betsá ná ca benni

7Atti biláni Jesús ca benni biyaxi go etta rucuecana atta anca tseeru qui cuiacana, lee nna bedúttebe elha rieni iquicani re cana:

8—Gansi nuxa gaxina lu atta utsá ná ca benni, bittu ttelu dholu atta anca cuia ca nu lo, qui lä isía attu benni biyaxi ra xxenru leni atti lu. 9Lania nna nu uxna leha nna isíana gán lu: “Begüe unní atta dolha dhona.” Nianna lu nna tu rettubinlu sadolu axta xubanali. 10Lugar quiba unnuha nna gansi chi nuxa gaxna lu, lu nna dhottelalu xubana, qui atti isía nu uxna luha nna innána: “Benni do tsee lania, ute udo axta atta anca cuia ca benni lo.” Lania nna iyába ca nu sia lenlu roꞌo mexaha iláquinna rapa nu run laníha lu respeto. 11Cumu nuxaba benni nu la labana runna dequi ancana nu ra xxeni leni, Tata Do Iyyabaaha unie eyadigaa leni, nu rechida gaa leniha nna uni Benniha acana nu ra xxeni leni.

12Ráguaba Jesús unbiyuu nu uxne lheꞌe yoꞌo gueniha:

—Atti aquinlu ugolu xue o si rse, bittu gaxlu ca nu seꞌe tsee lenlu, niguaba ca betsiluha lhe niguaba ca nu datíaluha lhe niguaba ca nu te gueni seꞌe lenlu gaxxa lhe cumu ca unnuha nna gaxguaba ca nua lu, lania nna chiba beguixa ca nua guelu. 13Lu nna atti unlu ttu laní, tseerla gaxlu ca nu bittu te guecani, ca benni recu niꞌa nácani lhe ca benni xi lhe ca nu xua locani lhe. 14Lania nna carbárulu. Cumu ca unní nna bittu aca eguixacana guelu, ttiaca lu nna dhílu elha tsee atti isía sá eyadha ca benni beni nu anca tsee lheꞌe ca baa-na.

Ca benni biyaxi tseꞌe laní

(Mt. 22:1-10)

15Atti bienin ttu ca nu re roꞌo mexaha nu rá Jesús, nianna rána Benniha:

—¡Carbáru ca benni go elha go gatta atta do Tata Do Iyyabaaha rinnabie!

16Jesús becabie re:

—Ttu unbiyuu bego etta nna uxbi ixeru benni. 17Bisíaba ura gocana etta nna benttebabi mandadu benni run sina guebiha sayúna ca nu anca ita go etta, gán cana: “Gualtá, qui chi te elha go.” 18Ttiaca iyábacana udulocana bedúcana tisa. Nu primeroha nna rána: “Chi uxíba ttu lo yu quia, níala tsiaya sagüiaya nua. Rinnaba lolu gálbi dhichibi elha xen lasi quia.” 19Attuna nna rána: “Chi uxíba gayu neda uꞌuna, nianna chi uquetila ca nua qui uleꞌena gansi güixúcana cuencana sina. Rinnaba lolu gálbi dhichibi elha xen lasi quia.” 20Attuna nna rána: “Chi betsába náya, denua nna larcala bittu aca ita.” 21Benni run sinaha nna bequina guattixxiꞌenna benni baninna naha iyába nu rá ca unnuha. Nianna benni beaca guebi yoꞌoha nna bisaꞌattebinbi, atti rábi benni run sina guebiha: “Güia dhuti lo ca neda xen-na lhe atta seꞌe ca neda güexxa seꞌe lheꞌe yies-ni lhe guaxxí ca nu bittu te guequinna ca nu recu nácani o niꞌacani lhe ca nu xua loquinna lhe ca nu xi lhe.” 22Läga bicaga isá uca nna chi besin benni ren sinaha rána: “Benni bananie neti, chi benia nu ben cuinalu mandadu unia. Sna ancaba lheꞌe yoꞌo-ni nna.” 23Nianna redea benni baninbi benni run sina guebiha: “Güia roꞌo yies-ni lo ca neda xen-na lhe lo ca neda chicaꞌa-na lhe ben duelha gue adí benni itacana, qui tsa isá lheꞌe yoꞌo quia-ni. 24Cumu neti ria, ni ttu ca nu uxia primeroha bittu gocana elha go quia-ni.”

Nu sate ca benni udheti ca tisa ruleꞌe Jesús

(Mt. 10:37-38)

25Ixe tsitsia ca benni denalhacana Jesús. Lee nna bodequitteba loe re cana:

26—Nuxa benni raca leni acana benni udheti nu ruleꞌa nna gansi bittuba racaruinna quia atti gue tata gueniha lhe gue nan gueniha lhe gue nuila gueniha lhe gue ca xiꞌinniha lhe gue ca betsiniha lhe gue ca danniha lhe gue elha naban gueni lhe läga aca aca nua benni udheti nu ruleꞌa. 27Benni bittu dhielhana uchíana lo nu satena lo niꞌa quia, attiba ttu benni nuja crusi gueni diana atta ttána lo nua, unnuha nna bittuguaba bi elha ralhana acana nu udheti nu ruleꞌa. 28Gansi nux ttule raquinle udole ttu yoꞌo nu aca ixe coa, ¿läba primerxa ebíale ulaba lele gue ttixa tsia gue nua qui anáchu ugüiale gansi guaca ni nu te guele uluxale nua? 29Cumu gansi dhulole ucoale cimientu gue yoꞌoha, nianna bittu dhale uluxale nua, lania nna iyába ca nu iláquinna nua, dhulocana edacaquinna guele, 30innácana: “Unbiyuu du-ni nna udulona rudona yoꞌo, ttiaca bittu udána uluxan na.” 31O gansi ttu nu rinnabia tsiana ttilha lenna attu nu rinnabia, ¿läba primerxa dhona udhaca leni gansi guadá tsii mil ca soldado gueniha ttilha lencana nu daa len galhia (20) mil soldadoha? 32Gansi udhacaba leni bittuba dhana ttilha lenna ca nua nna laca sna daa nu rinnabiaha idittu nna idhelhana benni gueni qui tsiacana sannabacana lo nua qui bittu ttilhacana. 33Aníaguaba lebiꞌi, gansi nuxa ttule bittu udhequile iyá nu te guele, läga aca acale benni udheti nu ruleꞌa.

Bi un benni len deti-na gansi initti ixe gueni

(Mt. 5:13; Mr. 9:50)

34’Tseeba rixuu deti-na, ttiaca gansi enitti ixe gueni, lärga aca eyona ixe attu libe. 35Tsa lärgabi ixuuna, ni de cuena lo yu, niguaba qui tsiana lheꞌe bebi lhe. Denuala nna iruꞌuna na. Atta rieninle nu ria-ni nna tsitsi gualdo nagale qui sadú lele.

Currently Selected:

San Lucas 14: zaq

Highlight

Copy