San Lucas 16

Ejemplu gue nu beni unbiyuu banani sina

1Jesús utixxiꞌaguabanie ca biꞌini rudheti ca tisa ruleꞌe, re cabi:

—Udo ttu unbiyuu texxatta gueni, lana nna udoguaba ttu unbiyuu banani sina gueniha. Ca benni nna güiacana guattixxiꞌaquinna nu texxatta gueniha, rácan na: “Nu banani sina guelha nna cuentaba runnitti lona nu te guelu”. 2Nu beaca gueni sinaha nna uxna nua rán na: “¿Biunni rácana runlu? Nnanna tte raca lasia bote cuenta len neti gue sina runlu-na, cumu lärga aca usiguilu acalu nu banani sina quia-ni.” 3Nu banani sinaha nna belabatteba leni, nianna uquinna: “¿Bi unia nnanna? Benni renia sina guebi-ni cuababi sina quia. Neti nna bitturu guaca unia sina lo ca yu-na. Tsequia güennaba nu goa roꞌo lis benni nna ettúbatia. 4Chi yua bixa unia, qui tseꞌe nuxa gaxna neti lisni atti bitturu sina quia te.” 5Laniala nna udulona uxna ttuttu ttuttuba ca nu dácana gue benni beaca guebi sina baninnaha. Nu primeroha nna unnaba tisan nua rán nua: “¿Tti dalu gue benni beaca guebi sina bantia-ni?” 6Unnuha nna becabina rána: “Neti nna daya ttu gayua (100) lampa taꞌa seti lheꞌeni.” Nu banani sinaha nna rána: “Ni sitsi gue nu daluha te ni. Jertte udo, bedo loni dequi a suna medi gayua (50) ba dalu.” 7Lenla nna unnaba tisana attu nua rán na: “Lu nna ¿tti dalu?” Unnuha nna becabina rána: “Ttu gayua (100) uxtali xuxtila.” Nu banani sinaha nna rána: “Ni sitsi gue nu daluha te ni. Bentte loni dequi a suna tta (80) ba uxtali xuxtila dalu.” 8Benni beaca guebi sinaha nna bebanbinbi gue atti modu de resiꞌinu nu bittu run lhatsiru banani sina guebiha. Cumu ca benni bittu anca biani Tata Do Iyyabaaha, resiꞌinurcana len nu runcana atti ca benni chi ancabiani Tata Do Iyyabaaha.

9’Neti nna rpea le, gualixuuni nu te guele yies lo yu-ni qui tseꞌe benni tseꞌe tsee lenle, qui atti isía sá eyya nu te gueleha nna chi seꞌe nu edínle lheꞌe ca yoꞌo sia ttu dia liiba iyyabaaha.

10’Benni ruyú lhatsiru nu saroꞌo baninna anáguaba unna len xxenru. Nu bittuba run lhatsiruna len nu saroꞌo baninna anáguaba un nua len xxenru. 11Larcala gansi bittuba ruyú tseele elha tsee anca gue yies lo yu-ni nna tsa läganu uxxen leni le len nu gualíga anca elha tsee te iyyabaaha. 12Cumu gansi bittuba biyú tseele nu bittu anca guele, nurquinle uxxen len le utena len lebiꞌi nu ralhale dhíle.

13’Ni ttu nu ren sina bittu aca gueni unna sina gue chupa ca benni banquinna na. Cumu ttu nua aquinna gueni, attu nua nna utía di leni, o si udona tisa gue ttu nua, attu nua nna cuꞌu niꞌani. Anáguaba lebiꞌi läga aca ixuule lo sina gue Tata Do Iyyabaaha, nianna udogualele gatta xxatta guele.

14Iyábunni bianini ca benni fariseo ridáxxatta lecani belhi-na. Lacana nna bedacalaquinna gue Jesús. 15Benniha nna re cana:

—Lebiꞌi bunna runle dequi ancale benni tsee lo adí ca benni, ttiaca Tata Do Iyyabaaha gua yube gaxasná anca lhiꞌu lheꞌe lastoole. Cumu nu racani ca benni seꞌe yies lo yu-ni ancana nu ra xxenru leni nna ttu tsaba riguꞌu niꞌa Tata Do Iyyabaaha nua.

Ca ley bocaꞌana Tata Do Iyyabaaha

16’Ca ley bocaꞌana Tata Do Iyyabaaha len Moisés, ca tisa utixxiꞌa ca profetaha lhe ucaque nu beleꞌen lebiꞌi bedaa atti bisía Juan benni begadi indaha. Bedaa lania nna udulo runa ca benni ca tisa tsee rixxiꞌa gue gaxasná rinnabia Tata Do Iyyabaaha ca benni, nianna iyába ca benni runcana duelha gaꞌacana qui iselacana ca benni rinnabia Ben-na.

17’Ttiaca adíla satti enitti lo lo bea-na lhe yies lo yu-ni lhe attichula tua ttu letra nu chicaꞌaru dia lo ca ley gue Tata Do Iyyabaaha.

Jesús ruleꞌe bittu anca tsee udhá iqui ttu unbiyuu nuila gueni

(Mt. 19:1-12; Mr. 10:1-12)

18’Gansi ttu unbiyuu udhá iquini nuila gueniha, nianna otsá náni len attu nuila subi, ttu nu satsaba nua unna. Unbiyuu otsá náni leni nuila bedhá iqui unbiyuuha nna ttu nu satsaba nua unna.

Jesús rixxiꞌe nu guate unbiyuu uttaxxatta gueniha lenna Lázaro

19’Udo ttu unbiyuu uttaxxatta gueni. Tsitsiba sipa redúna len ca xo daca racalaa gueni, ttu ttu sába runna laní rugo tseena benni. 20Udoguaba ttu unbiyuu lábi Lázaro ancabi benni di, itúba cuerpu guebi sia güee chi bixínani. Labi nna níaba ridobi lo yu roꞌo puerta gue nu texxatta gueniha. 21Labi nna attulade nu runbi gobi ca nu yuya rinna xana mexa gue nu te gueniha. Axtaba ca becu risincana rilheꞌecana lo ca güee guebiha. 22Ttu sá nna uttiba Lázaro, nianna ca ingeli gue Tata Do Iyyabaahaba betexxicabi biꞌiniha qui esínbi dhobi lhuitta Abraham. Unbiyuu texxatta gueniha nna uttiguabana, nianna becatsibacan na.

23’Lagüiba ratexxatta unbiyuu uttaxxatta gueni yuꞌuna atta seꞌe ca benni chi utti-na nna ulidha loni bilenna Abraham idittuli dobi lenbi Lázaro. 24Laniala nna uresiꞌana rána: “¡Tata Abraham, guatúachi lelu neti! Gusichi Lázaro-na odibidha lo xbináni, atti itana ettedibidhana lo lhusa-ni, cumu ya de ratea yuꞌa lo gui-ni.” 25Ttiaca Abraham becabibi rábi: “Xiꞌini, borexxa lelu, atti udolu yies lo yuha nna tseeba gualíana lu Lázaro-ni nna läga gualía tseen nna. Nnanna nna lana tseeba dona-ni, lu nna ratexxattalu. 26Güeaniba nna xxen tsitsia anca belhaꞌa du lagüi atta seꞌetu-ni len atta yuꞌule-na. Larcala nna läga aca tte ca nu seꞌe-ni itacana atta yuꞌule na, niguaba ca nu yuꞌu na bittu aca ttecana qui isíacana nii.”

27’Nu uttaxxatta gueniha nna rána: “Rinnaba lolu xa Tata Abraham, udhelha chi Lázaro-na lheꞌe yoꞌo gue tata quia, 28qui sattixxiꞌenbi a gayu ca betsiaha, gue gaxasná anca ni. Anía nna bittu etácana atta yuꞌutu ruyútu elha disa-ni.” 29Abraham nna rábi: “Chiba den ca nua ca tisa bocaꞌana Moisés lhe ca tisa bocaꞌana ca benni uca profeta lhe. ¡Gue ca tisaha udo nagacani!” 30Unbiyuu uttaxxatta gueniha nna becabina rána: “Bittu xa tata Abraham, läga iyienquin ca unnuha, ttiaca gansi ttu nu chi utti eyaquinna nianna uleꞌe loni len lacana, ca unnuha nna godú xiyyaban cana odaxxucana neda gue Tata Do Iyyabaaha.” 31Ttiaca Abraham nna rábi na: “Gansi bittuba raca lecani udo nagacani gue ca tisa gue Moisés, nigua gue ca tisa ben ca benni uca profeta lhe bittuguaba tsia le ca nua masquiba eyacani ttu nu chi utti uleꞌe loni len lacana.”

Currently Selected:

San Lucas 16: zaq

Highlight

Copy