San Lucas 20

Rinnaba tisacan Jesús gue nu rinnee

(Mt. 21:23-27; Mr. 11:27-33)

1Ttu sá nna laca du Jesús lheꞌeliꞌa gue yotuha ruleꞌenie ca benni ca tisa gue Tata Do Iyyabaaha, bisíntteba ca nu lo gue ca bixxudiha lencana ca nu ruleꞌe nu rá lo ca ley bocaꞌana Moisés lhe ca nu teru elha rieni guecani gue ca benni Israel lhe. 2Nianna, rácane:

—Utixxiꞌen riꞌitu, ¿Bi elha rinnabia rapalu runlu aná? ¿Nú betena elha rinnabia lenlu qui unlu nu runlu-na?

3Jesús becabie re:

—Anáguaba neti lhe innába tisaguaba le. Lebiꞌi nna gualecabi sanga quia. 4¿Nú udhelhana Juan qui ugadibi ca benni inda? ¿Si Tata Do Iyyabaaha aca? ¿Si ca benni seꞌe yies lo yu-ni aca?

5Lacana nna uyuꞌuttebacana unne len loescani, nianna rácana:

—Gansi ecabiri innári Tata Do Iyyabaahaba udhelhe biꞌiniha, lania nna innáttebunna, ¿biacala bittu güia lele gue nu rá biꞌiniha ganna? 6Bittuguaba aca innári dequi ca benni seꞌe yies lo yu-niba udhelhacana biꞌiniha, cumu lania nna iyába ca benni seꞌe lheꞌe yies-ni uttican ri len iyya, de iyábacana ria lecani Juan ucabi ttu profeta gue Tata Do Iyyabaaha.

7Laniala nna becabicana rácana dequi bittu yucana nuxa udhelhana Juan qui ugadibi ca benni inda. 8Jesús becabie re:

—Anáguaba neti bittuguaba quixxiꞌaya nuxa betena elha rinnabia quia qui unia nu runia-ni.

Jesús rixxiꞌe ttu ejemplu gue ca unbiyuu lä du ta lecani uren sina lo ttu yu

(Mt. 21:33-44; Mr. 12:1-11)

9Udulotteba Jesús utixxiꞌanie ca benni seꞌe nía ttu ejemplu, re cana:

—Udo ttu unbiyuu udabi ca ya besuli lo yu guebiha, nianna bete gannabi lo yuha len ca benni qui cuencana nua umpanía. Labi nna biríattebabi diabi lheꞌe attu yiesi subi isáru. 10Atti chi bisía sá exuu besuli betee lo yuha nna udhelhatteba benni beaca guebi lo yuha ttu nu ttoꞌo lo sina guebiha tsiana sayúna ca nu reni umpanía lo yuha qui utecana nu ralha biꞌiniha dhibi, ttiaca ca nu reni umpanía lo yuha nna bedaxxulacana unnuha begüeecana, atti bedhelhacan na sunttebancana. 11Biꞌini beaca guebi lo yuha nna bededhelhattebabi attu nu ttoꞌo lo sina guebiha edeyyana sadiyúna ca nu ribeni umpanía lo yuha. Ca unnuha nna aníaguaba bodidhacacana unnuha, utilhaguaba lencan nua, begüeecan na lhe suna ancaba nua bedhelhacan na. 12Biꞌini beaca guebi lo yuha nna bededhelhattebabi attu nu güia, ttiaca ca nu ribeni umpanía lo yuha nna benlacana nua güee, atti bebequican na roꞌo yuha.

13’Laniala nna rá biꞌini beaca guebi lo yuha: “¿Bila unia nnanna? Idhelharba xiꞌinia-ni nu racatia guen-ni, gaxa guapabacan unní respeto atti iláquinna-na.” 14Ttiaca atti bilen ca nu riben umpanía lo yuha nua nna rátteba loescani: “Unní ancana nu eyaꞌanna lo yu-ni. Udaxxuri na uttiri na qui eyaꞌan lenri lo yu-ni.” 15Ulequittebacana uncuitiha roꞌo yu atta te besuliha, atti bettittebacan na.

Lebiꞌi nna:

—¿Bi rquinle udhaca benni beaca guebi lo yu atta te besuliha ca nu ribeni umpanía lo yu guebiha? 16Labi nna etabi ettelhuxabi ca nu reni umpanía lo yu guebiha, lo yuha nna dhibi nua utebi umpanía len ca benni subi.

Atti bienquinna nu unne Jesús ráttebacana:

—Gaxa lä innácaba Tata Do Iyyabaaha saxxína aca anía.

17Ttiaca Jesús ttu líba begüie locani, nianna re cana:

—¿Bila dia le nu rá lo ca sitsi gue Tata Do Iyyabaaha atta rinne re:

Iyya nu uluꞌu niꞌa ca benni rucoa ca yoꞌo-na,

unnuha la beacana iyya nu ribe riden tsitsina yoꞌo.#20:17 Salmo 118:22

18Nuxaba iyinnana iqui iyya-ni nna tsaba iyuyana. Gansi iyya-ni iyinnana iqui nuxa nna tsaba eyonna nua biste.

Rinnaba tisacana gansi gua dica quixacana belhi deyya Roma

(Mt. 21:45-46; 22:15-22; Mr. 12:12-17)

19Snaba lania uxaca ca nu lo gue ca bixxudiha lencana ca nu ruleꞌe nu rá lo ca ley bocaꞌana Moisés udaxxucana Jesús, cumu guadúba lecani labacan nua rutáni benniha leni ejemplu unnee, ttiaca rasbaquinna lo ca benni seꞌe nía.

20Ca nu lo gue ca bixxudiha lencana ca nu ruleꞌe nu rá lo ca ley bocaꞌana Moisés, udhelhattebacana ca nu dia güelhatsi. Ca unnuha nna ocadiba runcana dequi ancacana benni du tsee leni, qui anía nna dhacana ibixxi Benniha bixa innee. Qui leni unnuha nna satecana Benniha las ná nu rinnabiaha. 21Denua nna unnaba tisa ca nua Benniha rácane:

—Maestro, riꞌitu yutu nna nu rálu lhe nu ruleꞌelu lhe ancana nu anca gualí, ttuba runlu leni iyába benni lhe, lu nna ruleꞌebalu lhixxa suba gue gaxasná raca le Tata Do Iyyabaaha tseꞌe benni. 22Larcala utixxiꞌa sanguin riꞌitu, ¿si guagaꞌana quixari len güequixa belhi nu deyya atta do nu rinnabia do lheꞌe yiesi Roma? ¿Si bittuba aca?

23Ttiaca Jesús gua yuxeabe läga anca tsee nu rulaba le ca nua uncana, nianna re cana:

—[¿Biaca runle ixú yieya?] 24Gualuleꞌen neti ttu belhi-na. ¿Nú lo unná du lo belhi-ni? ¿Nú beaca láni nu dia lo unná lhe?

Lacana nna becabicana rácana:

—Gue César nu rinnabia do Roma.

25Lania la rá Jesús cana:

—Gualugüeba nu rinnabia-na nu ralhana dhína. Gualugüeguaba Tata Do Iyyabaaha, nu ralhe dhie lhe.

26Tsa läga udácana sattiꞌacana ni ttu nu lä anca tsee lheꞌe ca tisa rinne Benniha lo iyába benni. Denua nna síba beacacana de rebanbaquinna gue ca tisa recabi Benniha.

Gasná eyacani ca nu yatti-na

(Mt. 22:23-33; Mr. 12:18-27)

27Laniala bisína ttulhe ca benni saduceo atta du Jesús. Ca unnuha nna bittu ria lecani dequi gualí eyacani ca nu yatti-na. 28Denua nna unnaba tisacana rácana:

—Maestro, lo sitsi bodhaꞌana Moisés len riꞌitu nna rá: “Gansi ttu unbiyuu chi betsá náni gattina, lana nna nuttu xiꞌinni useꞌe leni nuila gueniha, betsi unbiyuu uttiha nna daa loni edína nuila bidabiha qui anáchu ca xiꞌinni tseꞌe len nuilaha nna acacana attisiba xiꞌini betsini chi uttiha.” 29Ttu libe useꞌe gasi betsi ca unbiyuu. Betsi xen guecaniha nna betsátteba náni, ttiaca uttittebana, niba ttu xiꞌinni bittu bisía. 30Betsi berupa guecaniha nna betsátteba náni len nuila bidabiha, ttiaca unnuha nna bedeattiguabana, nuttuguaba xiꞌinni beseꞌe len nuilaha. 31Betsi beyonnaha nna boditsátteba náni len nuila bidabiha, nuttuguaba xiꞌincani bisía. Aníaba ben iyába gasi betsicani, lacana nna uttibacana, ttiaca nuttu xiꞌincani useꞌe. 32Lenla nna uttiguaba nuilaha. 33Gansi chi bisía sá eyacani ca benni yatti-na, ¿núla ca unbiyuuha aca nuilaha latselani? Cumu iyába gasicana betsá nácani leni nuilaha?

34Laniala becabi Jesús re:

—Ca benni seꞌe yies lo yu-ni nna rutsába nácani, ruteguabacana ca xiꞌincani qui rutsá nácani lhe. 35Ttiaca ca benni rudhaca le Tata Do Iyyabaaha ralhacana tseꞌecana lheꞌe yiesi cubi atta tseꞌe ca benni chi utti eyacaniha nna nía lärgaga utsá ná ca benni lä uterguabacana ca xiꞌincani qui utsá nácani lhe. 36Cumu lärga aca gatticana, lacana nna eyacabacana attiba ca ingeli gue Tata Do Iyyabaaha. Acaguabacana xiꞌin Tata Do Iyyabaaha de ancacana benni beacani dequide utticana. 37Ttiaca gue gansi güeyacani ca benni yatti-na, lo sitsi gue Tata Do Iyyabaaha atta rinne gue atti biláni Moisés bibu riteha nna rixxiꞌabi gualíba eyacani ca nu yatti-na. Labi nna rábi: “Benni bananie ri-na anque Tata Do Iyyabaa gue Abraham lhe gue Isaac lhe gue Jacob lhe.”#20:37 Éxodo 3:6 38Tata Do Iyyabaaha läga anque Dios gue ca benni yatti-na, Ben-na anque Dios gue ca benni bani-na. Cumu len Ben-na, masquiba ratti ca benni, iyábacana banbacana.

39Ttulhe ca nu ruleꞌe nu rá lo ca ley bocaꞌana Moisés becabicana rácana:

—Tseeba chi becabilu, xa maestro.

40Lacana nna tsa lärga beaxquinna innába tisacana Benniha adí.

¿Nú benni nua datie David?

(Mt. 22:41-46; Mr. 12:35-37)

41Jesús unnaba tise re:

—¿Tti modu rále dequi Cristu anque benni datía David? 42Inqui la laba David rábi lo ca sitsi atta dia ca Salmo-na:

Tata Do Iyyabaaha re Cristu Benni bananie neti:

“Ni udo daca lhuitta derechu quia,

43axta liba unia aca ca nu lä raca uyúcan lu-na

nu udú niꞌalu iquicani.”#20:42-43 Salmo 110:1

44Inqui la Davidba rábi: “Cristuha anque Benni bananie neti”, ganna anía anca, ¿tti modu anca Cristuha benni datía David?

Jesús rudelha iyye ca nu ruleꞌe nu rá lo ca ley bocaꞌana Moisés

(Mt. 23:1-36; Mr. 12:38-40; Lc. 11:37-54)

45Laca rudo naga iyába ca benni seꞌe nía gue Jesús, lee nna unnee re ca biꞌini rudheti ca tisa ruleꞌe:

46—Gualudo cuidadu qui lä unle atti run ca nu ruleꞌe nu rá lo ca ley bocaꞌana Moisés, cumu ca unná nna reꞌo lecani tsequicana ucu xo tuni guecani qui uleꞌe dequi ancacana benni ra xxeni leni, radi lecani gá benni cana padiuxi len respeto lheꞌe atta raca ca iꞌiya-na lhe. Atti seꞌecana lheꞌe ca yoꞌo atta rudhetiri ca tisa gue Tata Do Iyyabaaha nna tsitsiba ridá lecani cuiacana lo ca xxila atta ribía ca nu ra xxeni lecani, aníaguaba runcana ca atta raca laní atti riacana go etta. 47Güeaniba rigúacana ca yoꞌo gue ca nuila bidabi-na, nianna ni lo ni tisaba isáru riseꞌecana rinnecana leni Tata Do Iyyabaaha qui uleꞌe lo dequi ancacana benni runi nu anca tsee lo Ben-na. Larcala nna ttu elha disa xeni ugüe Tata Do Iyyabaaha ca unná atti adí benni.

Currently Selected:

San Lucas 20: zaq

Highlight

Copy