San Lucas 21

Úna uluꞌu nuila bidabi bittu te gueniha

(Mr. 12:41-44)

1Jesús rugüie gue ca nu texxatta guecaniha riguꞌucana úna lheꞌe ca atta ruꞌu úna sia lheꞌeliꞌa gue yotuha. 2Biláguabanie ttu nuila bidabi bittu te gueni uluꞌuna chupa ca belhi bittu xxeni lidhacacani te lheꞌe atta ruꞌu únaha.

3Laniala nna rá Jesús:

—Neti rpea le, xxeniru úna bete nuila bidabi bittu te guen-na atti iyába ca benni uluꞌu úna. 4Cumu iyábacana nu rexxa guebacani bedaxxucana uluꞌucana úna, ttiaca nuila bittu te guen-na, betena iyába nu te gueni, nu dica gona qui aca banna.

Jesús unnee re: Isía sá iseꞌe lo yotuha

(Mt. 24:1-2; Mr. 13:1-2)

5Ttulhe ca benni rudheti ca tisa ruleꞌe Jesús seꞌe nía, rinnecana gue yotuha, gue ca iyya tsee coa nua lhe gue ca nu gaꞌana tsee bete benni taa lheꞌe yotuha lhe. Jesús nna re:

6—Isía sá atti iyába nu rilenle-ni iseꞌe lona, ni ttu ca iyya coa-na bitturu eyaꞌana iqui loesni. Itúbana iseꞌe lo.

Gaxasná aca atti chi deoba lhuxa yies lo yu-ni

(Mt. 24:3-28; Mr. 13:3-23)

7Laniala nna unnaba tisacana Jesús rácane:

—Maestro, ¿núca aca nu ralha? ¿Bi aca qui uleꞌe lo dequi chi deoba aca aná?

8Jesús becabie re:

—Tsitsi gualdo cuidadu qui bittu dhielhale ixú yiele. Cumu ixe ca nu isía uncana dequi ancacana neti, nianna innácana: “Neti nua Cristu.” Innáguabacana: “Chi bisía sá atti lhuxa yies lo yu-ni.” Ttiaca lebiꞌi nna bittu tsia lele guecani. 9Atti unale ritilha len loesi ca yiesi lhe ca benni seꞌe lheꞌe la ttuba yiesi lhe bittu gasinle, cumu labíaba loxaba unní aca, ttiaca läga chi bisía sá lhuxa yies lo yu-ni.

10Nianna re ca biꞌiniha:

—Ttu yiesi xeni leni attu yiesi xeni itilha len loescani, ttu nu rinnabia leni attu nu rinnabia itilha len loescani. 11Gatti laduba gue yies lo yu-ni ixúxxatta, aca ubina lhe isíaguaba ixe lo isagüe gue ca benni lhe ilen benni lo bea-na nu unna gasquinna lhe nu unna ebanquinna lhe.

12’Ttiaca antisla aca iyá unní nna lebiꞌi nna uría lacan le, udaxxucan le qui ichecan le utsá dule lheꞌe ca yoꞌo atta riseꞌeri rudhetiri ca tisa gue Tata Do Iyyabaaha qui uncana elha uxtisi guele, saseꞌecan le lo ca nu rinnabia lhe lo ca uxtisi lhe quixxacan le lisiyya lhe lo niꞌa quia. 13Aníaliba nna qui aca quixxiꞌenle ca nua ca tisa quia-ni. 14Lebiꞌi nna gualorexxa lele, bittu ulaba lele gue bixa innále ecabile guecani, 15cumu neti guteba tisa len lebiꞌi, uteguaba elha rieni guele lhe qui ni ttu ca nu bittu raca uyúcan le nna bittu dhacana uchíacana lo nu innele, lä eselguabaquinna bixa innácana qui ecabicana guele lhe. 16Lebiꞌi nna axtaba ca tata gueleha lhe ca betsile lhe ca nu datíale lhe ca nu seꞌe tsee len lebiꞌi lhe satecan le las ná ca nu bittu raca uyúcan le-na. Uttiguabacan ttulhele lhe. 17Iyába ca benni bitturu aca uyúcan le lo niꞌa quia. 18Ttiaca ni ttu ca itsiquile-na bittu tsia nitti. 19¡Tsitsi gualtseꞌe qui dhale gatta elha naban guele ttu dia lii!

Jesús rixxiꞌe atti uyú ca benni seꞌe Jerusalén elha disa

20’Atti ilenle chi bebiꞌa no soldado yiesi Jerusalén, lebiꞌi nna chi yule chi tte deoba iseꞌe lona. 21Lania nna ca nu seꞌe lo yu nu te láni Judea, uxunnicana tsiacana atta sia ca iꞌiya-na, ca nu seꞌe Jerusalén-ni nna iríacana lheꞌe yies-ni, ca nu seꞌe ranchu nna bittu eyequicana esíacana lheꞌe yies-ni. 22Cumu lania isía sá atti dhi ca benni elha disa, qui saxxína aca iyá nu gaꞌana lo ca sitsi gue Tata Do Iyyabaaha. 23¡Carusiꞌiru ca nuila seꞌe nuja xiꞌincani lania, ca nu deni unto rasi xisi lhe! Cumu tsitsiba nu sate ca benni seꞌe itúba yies lo yu-ni, ttu elha disa xenba uyúcana. 24Ttulhecana gatticana lo ná ca soldado, adícana nna iyaxxucana echecan cana lheꞌe ca yiesi dittu. Ca benni dittu nna udhaca güecana yiesi Jerusalén-ni, axta liba lhuxa ca sá chi gaꞌanani Tata Do Iyyabaaha satecana.

Jesús rixxiꞌe gaxasná aca atti eyequie esíe

(Mt. 24:29-35, 42-44; Mr. 13:24-37)

25’Lania nna aca ttu nu aca lo tatubisa-na, lo nanto beo-na lhe len ca beli-na lhe. Ca benni seꞌe yies lo yu-ni nna aca guatexxattaquinna gasixxattaquinna lhe de cuꞌu bexxatta idisa tsiꞌi indattoo-na, de dhulíxxatta loni lhe. 26Ca benni nna echulhaquinna de gasixxattabaquinna de ichacha iquicani gue nu aca yies lo yu-ni lhe cumu axtaba ca beli-na leni ca nu ra xxeni leni seꞌe lo bea-na ixidicana. 27Lania nna iláni ca benni, neti Benni unbiyuu daa iyyabaaha dedaaya lheꞌe ttu bea anca benni ra xxeni leni, ruꞌu xieni gaꞌana tsee quia lhe. 28Gansi chi udulo aca ca nu ria-ni nna gualelhidha iquile, tsitsi gualseꞌe lhe cumu lania nna chi deoba lhále.

29Utixxiꞌaguabani Jesús cana attu ejemplu, nianna re cana:

—Gualgüia lo ya igu-na, lo adí ca yaga-na lhe. 30Atti rilenle chi dedaa reatsa lhaga guecani, lebiꞌi nna ritedaattebinle chi dedaa tiempu iyya. 31Anáguaba lebiꞌi, gansi chi bilenle aca iyába ca nu chi ria-ni, lania nna chi yule chi daa ribiga isía sá innabia Tata Do Iyyabaaha.

32’Neti nna gualíbatia rpea le, iyába nu ria-ni aca, antisla lhuxa ca benni seꞌe-ni. 33Lo bea-na lhe yies lo yu-ni lhe lhuxabacana, ttiaca labíaba saxxína aca nu rá ca tisa quia-ni.

34’Gualdo cuidadu. Bittu udo lele dha lele nu bittu anca tsee anca gue yies lo yu-ni, lä acaguale nu dusi lhe bittuguaba aquinle ichachaxxatta iquile gue nu anca gue yies lo yu-ni, qui lä iyyaba lele isía sá esíaya. 35Cumu attiba ttu nu iyyaba leni uyuꞌuna yalhi, aníaba isía sáha gue iyába ca nu seꞌe biꞌacanaba yies lo yu-ni. 36Gualeseꞌe tsee, satía gualnne len Tata Do Iyyabaaha qui dhale lhále lo iyába nu chi daa aca, anáguaba qui aca utsá dule loa gansi chi besíaya neti Benni unbiyuu daa iyyabaaha.

37Resá nna ruleꞌeni Jesús ca benni ritupa lheꞌeliꞌa gue yotuha. Lo rela nna rie atta do lo lhilhi Atta Da Ca Ya Olivuha. 38Nianna iyába ca benni riacana dilatte lheꞌeliꞌa gue yotuha qui iyienquinna nu rá Benniha.

Currently Selected:

San Lucas 21: zaq

Highlight

Copy