ATHƐSALONIANAƐ MƆƐKƐ TIŊDƐ 2
2
Nɔ Kafaɛ
1Yɛlayo ha hun Bɛɛ hiɛ Jisɔs Krayst ni ŋhɔ hi bi ha dikilni ha bɔnth wɔɛ, hinɔ thɛlɛni, anyami, 2chen ha pakni kɛkɛ ntenɛ ma mɔay, lama cheɛ ka min ihɔlɔŋdɛ o hɔk, o ray hɔ ŋa hɔɛ hi gbalaɛ, ha ŋa suŋguthani ha hɔɛ lɔkɔ Bɛɛ koŋ hun. 3Ha nɔ gbi ma nɔ dikbolmin naythindɛ gbi; hɔyɛ vɛ chen hun, chaŋ kaŋganiɛ le hunɔ, ni pɔye si nɔ ikweyɛlendɛ, wɔnɛ wɔ koŋ che ha shimjɛmdɛ, 4wɔ bɔŋsua wɔye thɛŋg ni nkɛn ko hɔbatokɛɛ gbi o ko yendɛ gbi pɔ sɛli kohɔkoɛ, ni wɔye kwe ichɛli wɔɛ kil Hɔbatokay, wɔye chamɛ lɛ wɔn wɔɛ Hɔbatokɛ.
5La leɛnɔni ntenɛ lɛ ya hɔmɔnɔ lanɔki gbi mɛŋkɛ ya ka che ni handɛ? 6Ni ŋa si la wɔ ni thapaɛ yɛlayo chelɛ pɔ wɔ toŋgi mɛŋk wɔay. 7Haliwɔ kabande ikweyɛlendɛ koŋ tipɛ haa mpanth, ni nɔɛ wɔɔ gbo thapaɛ wɔlabɔ haa haŋ si hokɔ nayɛbɔl. 8Ni yɛlayo pɔe ke nɔ ikweyɛlendɛ, ni Bɛɛ Jisɔs wɔwɔye di ka ihɛŋ wɔ ŋyɔhɔllɛ ni shimiɛ wɔ ka toŋgini wɔɛ ni hun wɔɛ. 9Hun nɔ ikweyɛlendɛ ka fɔsa min sɔyandɛ bi ha bi fɔsaɛ gbi ni thambasey mbol ni kabande mbol, 10ni ka kafa dik anyin bolmin ha ŋanɛ ŋa bi ha rimdɛ, haliwɔ ŋa yomɔni ha chɔŋ tiŋtiŋdɛ len ni ŋa sɔthɔ lol. 11Labiɛ Hɔbatokɛ wom fɔsa ike tiŋtiŋ, chelɛ ŋa lanɛ lanɔ la mbolɛ, 12chelɛ pɔ baŋ ŋanɛ gbi ŋa lanɛni tiŋtiŋdɛ ilɔ kɛ ŋa the iche tiŋtiŋdɛ pɛthɛ.
Pɔ koŋ nɔ chu su ha sɔthɔ lol
13Kɛ hi ŋa bi chɔŋsɛkɛ ko Hɔbatokɛ mɛŋkɛ hɔn gbi ha ŋan, anyami ŋa Bɛɛ chɔŋlendɛ, haliwɔ Hɔbatokɛ koŋ nɔ chu su hiŋg tipɛkɛ ha ŋan sɔthɔ lol, ka thɔk charaŋ Mindɛ ni laanɛ tiŋtiŋday. 14Ko lanɔ la velɛnɔ ka womdi hi yegbeɛ, chelɛ ha bɔ sɔthɔ gbɛŋ Bɛɛ hiɛ Jisɔs Krayst. 15Labiyɛ, anyami, ŋa sɛm kath ni ŋa yɛthi mbɛnɛɛ ma ha kaŋa hiŋg hindɛ, lachengbo ka ŋhɔk ma hi nyɔhɔl lɛ la cheɛ ka ray hɔ hi gballɛ.
16Yelayowɛ ŋa Bɛɛ hiɛ Jisɔs Krayst wɔnayɛn ni Hɔbatokɛ Baahi; wɔ chɔŋhilendɛ ni ka hi thɛthɛ chɔŋgba ni kithgbɔl yegbe ka wɔŋɔ wɔɛ, 17ŋa thɛthɛ gbɔl thi nɔɛ ni ŋa bɛ tha ki mpanth ni hɔk yegbe gbi.
Currently Selected:
ATHƐSALONIANAƐ MƆƐKƐ TIŊDƐ 2: SNT
Highlight
Share
Copy
Want to have your highlights saved across all your devices? Sign up or sign in
Sherbro New Testament Portions © Bible Society in Sierra Leone, 2020.
