Héchos 1

Dupade a chiroque Dajopié Espíritu Sánto aja ore jne

1Teófilo á, a yurúsãrapo cuchade ome ua jne rĩ. Bamo uje yurúsarome ua nanique enga yurusarane u Jesús ipesudode jnese, acajnaquéode jnese rĩ. Yingome Jesús ipesute taninguíone aja ua. 2Enga yingopo ipesute ejode jnese aja ua to rĩ uje pésu nanique uje cáma jnome gaté. Mu uje cáma jnome gaté nanique enga doi dajegaidode iji dacadigode ujade ujetiga chingo dáyipiedie aja ore enga ore doi iroquéode. Enga chĩ́care darógode 'apóstoles' aja ore. Enga Jesús garíjogoto u Dupade Ujopié Espíritu Sánto nanique uje pésu cuchade udore. 3Enga Jesús chiqueta raja dajegaidode udore iji datoringai quigade nanique. Dirode guejnane ayoré gare nanique uje jé ate udore enga chiqueta raja ore gatuaque. Chetingare re iji ore ujade uje jé upúsu re. Gaidi u gu ujetiga ca potigayaquérique déji udore uñeque uje ecápo rĩ iji dáringai toque quigade. Enga jecucha catecã́ri ore ome ore úringáringo purása ome ujetiga Dupade chamáta darasade jnese aja re ome uté úringai ore asuté.

4Uje Jesús qué déji darógode udore ore gari ga chaquĩ́ra ore ujetiga cáma ore jnomíji Jerusalén. Chojninga:

–Arochope jeta yojningai di iji uaque jne, uje yai Dupade a chirógaja uaque jne. 5Juan casicaite chaca uáguiji yodi ica, mu e idógosi jeta Dupade Ujopié Espíritu Sánto chacája uaque.–

Jesús jnome gaté

6Uje Jesús irógode, Jesús ore déji ñane gari ga ore catecã́ri Jesús enga ore chojninga:

–Yocangaráni á, ¿ajócãrape purása quedéjnane ore eduguéjnane iji yocujade jne iji deréjnane udojo a? ujetiga israélgosode uyoque yipécopo yoqueduguéjnapísode jne rĩ.–

7Mu Jesús chajnai ore ga chojninga:

–Que uacajnei tu gotique ujetiga arajáyo deréjnarique ujetiga yai Dupade pésu cucha dacadode aja quigode. Enga gusu Yai uje gajnei tu ujetiga pésu cuchade aja quigode ujetiga ore tocade. 8Mu ujetiga Dupade Ujopié Espíritu Sánto chacája uaque enga a uacajopiéraque cuse to jne. Enga yipijogúsorone u uaque jne iji Jerusalén, iji Judéa jnese rĩ, iji Samária jnese rĩ, iji jnumi eruéode jnese to rĩ.–

9Uje Jesús chejna daruode udore guesi enga jnome gaté yui uje qué ore chajire. Enga gue abujadie suru gai, jecute que toc ujetiga ore chimópo rĩ. 10Uje qué ore chajire gaté uje Jesús jno, ga jnani gáreode chiqueta raja ore. Enga póroropisi ore iguidedie. 11Enga ore catecã́ri Jesús irógode enga ore chojninga:

–Galiléagosode uaque á, ¿gotique gu a uje que ayáyo amíningachó Jesús aja icoringai? Jec ũré uje e jnoji uacari que enga qui tu gaté, mu adi a jé u to jne ujetiga diapo jne rĩ.–

Ore chijna Matías aja Júdas charidi

12Quigade ga Jesús irógode ore, ore chajni iji cucarani uje i tu Olívos ga ore chajni aja Jerusalén. Cucarani Olívos, ore idáidatéi Jerusalén, ore idógosiji ñane. 13Uje e ore chise guidáidatéi ga ore cheru guiguíjnai ajei gateminóri. Pédro, Juan, Jacóbo, Andrés, Felipe, Tomás, Bartolomé, Matéo, Jacóbo uje Alféo ape, Simón uje pota chijnime ore eduguéjna ducurása quedéjnai nanique iji ore uniri, Júdas uje Jacóbo jõra, udore ore upusiédi u guiguíjnai tuté. 14Chequedíe uñanie chamáta rágaja ore to iji uté gatuaque uje ore gaidi u picatecãraitigade ome Dupade. Enga Jesús daté María, jec aja Jesús desade ore cháta rágaja ore to.

15Enga ore pésapo dague te rĩ iji dirode udore uñeque enga Pédro chague iji dojode Jesús anguretasóño ajei ujetiga chacate ore. Enga 120 ore uje ore déji ñane gari iji jogadi uté.

16Enga Pédro chojningame ore:

–Yujode Jesús anguretasóño uaque á, Dupade Ujopié Espíritu Sánto angúromei u jnani bajai David nanique ujetiga churúsãre cucha piqueminórone. Jecute que toc ujetiga ca David urusarane udore tocade. Enga David urusãra cásodicáite ojningai u Jesús guẽrasṍri Júdas. 17Uacamóño to uje Júdas uté jõra yógaja Jesús iroquéode to ica. 18Mu uje tẽra Jesús ome ore ica enga ore chisi ome plátadie ome ica. Enga Júdas uté jno ga doi oré tome jnupe pei ome dasijnaringuéone oredie enga jé u uje chujé re enga chichaga datoi aja jnumi enga dusi ome. Enga uchade tocade. 19Jerusalén idaisórone ore chudute Júdas casica ujnomei jecute ore chĩ́care Acéldama aja ore gaidi jnupe pei. Acéldama ore uruode qui tu Erãpe Diquiyoi. 20Enga David ojningai jé upúsu Júdas iji darusarane uje i tu Sálmos. Uje chojninga:

Jec arec ujeta uté iguíjnai íjnoque bisidec. Enga ca uñeque pusapóji rĩ iji deréjnane.

Enga David chojningápo rĩ:

Jec arec ujetiga uñeque basája uté jogadi

Enga doi Dupade iroquéode.

21-22Pédro e cha catecã́ri ore ome David urusarane udore enga cho ore quique. Enga chojninga:

–Jnanione uñane déji yocujade uje ore chimo Jesús to uje Juan tṍraja yodi ica. Enga jecucha ore nóna Jesús uyoque to aja erámone nanique jec aja diri uje jnome gaté. Jec areque jeta yisago jnanione udore uñeque aja yoque ujetiga chacate ore ome Jesús to uje ecápo rĩ.–

23Enga ore ajegaidode gare iji jnanione udore. Uñai íode gadioc: José, Barsabás, Jústo u. Uñai i tu Matías. 24Enga ore catecã́ri Dupade enga ore chojninga:

–Yocangarádejnai Dupade á, barajapise ore áyipiedie jnese. Jecute ango yoque bajegaitíguiji jnani gáreode udore ore. 25Yoquigaidi tu gu ujetiga bajegaidi tuté basája Júdas casica jogadi ome bajnacari iroquéode to. Uje bamo uje Júdas úringai bajnacari iroque e bijna ome gu isijnaringuéone. Enga jé tiógara Júdas uté úringai pujuya, enga e chise.–

26Uje ore cha dacatecãraitigade enga ore doi cucaranenie ome ñane. Ore gaidi u gu ujetiga ore chiraja gosi iji jnanione udore. Enga Matías yuque, jecute Jesús irógode apóstoles uje chojmára ore iji yirídai ore cháta uté aja raque to.

Currently Selected:

Héchos 1: Ayore

Highlight

Copy