Juan 21

Jesús chiqueta raja dacadigode siete ore

1Quigade uje chiqueta raja Tomás ore enga chiquetápo raja dacadigode rĩ iji yote quedéjna cuchábi pijnanai uje i tu Tibérias. Enga isocai u udé uje chiqueta raja ore: 2Jesús acadigode uñane déji yote quedéjnai uté pijnanai enga Simón Pédro u uñai. Tomás déji to uje garaja ore nanique. Natanael déji to uje idai Caná déji ore uniri Galiléa. Zebedéo ujnacarode déji to, jé aja Jesús acadique gáreode uñane. 3Diga Simón Pédro chojningame dajorane:

–A yiji oyídode jne.–

Enga Pédro jorane ore chojninga:

–A yijínango ua jne.–

Jecute ore jno enga ore chacája cucoi. Enga ore chucué oyídode iji dejai údode mu que ore chisa oyítique. 4Uje e idógosi diri enga Jesús chise yote quedéjnai uté pijnanai to. Acadigode ore chimo Jesús iji ta mu que ore chiraja gosi. 5Mu Jesús tibite ore gai enga chojninga: –¡Jõ é! ¿Jé ca ajnicho oyítique é?–

Enga ore chajnai uruode enga ore chojninga:

–Úngare é.–

6Jecute Jesús chojningame ore:

–Beyoi enga óraño uacachímeno aja uacãrachua. Enga a jogadi u jne ujetiga ajnicho oyídode.–

Jecute ore doi Jesús uruode quigode enga jĩraque oyídode irágu ore chímeno. Enga pénupise ga que togome ore ujetiga ore churuguse chímeno aja guesi. 7Jecute Jesús acadigode jõrai uje Jesús chijnorapise chiraja Jesús gosi. Enga catecã́ri Pédro enga chojninga:

–Yocangarádejnai a u, ¡jõ!–

Uje Simón Pédro chudute dajõrai uruode uje ore angaráni Jesús u enga jĩraque chigui daguidé gaiminóri uje chejñu que, enga jĩraque tṍra re aja yodi enga doi jnacoi iji yodi gai aja Jesús yui. 8Mu Jesús acadigode uñane ore cháji cucoi ajei uje cucoi que idája yote quedéjnai pijnanai go. Uje a déji 100 métros. Enga ore doi enga ore chijocase cucoi aja yote quedéjnai pijnanai yui uje ore churuguse ore chímeno uje irágu ome oyídode iji cucoi dosadi. 9Uje ore doi jnumi iji cucoi enga ore chimo uje ore posode e dimane ome ore. Uje oyídi déji pioi gueguerade gai enga arurégode déji pioi ejoi. 10Enga Jesús catecã́ri ore enga chojninga:

–Ajnáño oyídode ucode uñéngo aja de uje quene ajnicho que.–

11Jecute Simón Pédro chayója cucoi enga churuguse chímeno iji jnumi aja yote quedéjnai pijnanai. Oyídode iragupúsu chímeno ga querújna. Uje ore chisecãru oyídode enga 153 u. Uje jiépisi oyídode iji ore chímeno ajei mu que dajuque go. 12Enga jé u uje Jesús tibidi ore enga chojninga:

–Boyóji ti. Acho uacabosode to.–

Mu que udore uñeque cási ujetiga catecã́ri ome úringárique ayoré. Chamáñaje ore chiraja gu ome ipesútedatéi uje a ore angarádejnai u. 13Mu Jesús jĩraque chose ore yui. Chisa arurei enga chisi ome ore. Enga jé isocai u to ome oyídode uje chajuguína ore to.

14Enga e gadioque ome Jesús uje chiqueta raja dacadigode ore uje niji iji pitoringai.

Jesús catecã́ri Simón Pédro

15Ore posode quigade enga Jesús catecã́ri Simón Pédro enga chojninga:

–Simón á, Jonás abi á, ¿bajnorai upúsu yu a, jeoga bajnoraquei ome cuchade udore sué bajnoraquei gai ome yu a?–

Mu Pédro chojninga:

–Yangaráni á, baraja uje yirasiguipise ua.–

Jecute Jesús chojninga:

–Ujetiga jec ũré ua ome baruode udore enga ajusípise yanguresõre ichade ore guio. Uje ore gajnunie u áyasabidie gu.–

16Mu Jesús catecãrápoi Pédro rĩ enga chojninga:

–Simón á, Jonás abi á, ¿jé ũré uje ajnóra yu a?–

Enga Pédro chajnai uruode enga chojninga:

–Yangaráni á, baraja uje yirasique ua.–

Jec u uje Jesús chojningame:

–Ujetiga jec ũré ua enga ajusípise yanguresórone ore guio jnese uje ore gajnunie u áyasadie.–

17E gadioc uje Jesús chingo Pédro ujetiga jec ũré ome ijnoraquei enga chojninga:

–Simón á, Jonás abi á, ¿jé ũrepise ua ome barasitigade ome yu a?–

Mu jnusiétaque Pédro uje Jesús catecã́ri ga gadioque eti jé ũrepise ome irasitigade. Enga jé u uje Pédro chojninga:

–Yangaráni á, baraja cuchade jnese. A baraja to uje jec ũré yu uje yirasique ua.–

Jesús chojningame:

–Be enga ajusípise yanguresórone ore guio uje ore gajnunie u áyasadie.–

18Enga Jesús jno daruode údi enga chojningame Pédro:

–Jé ũré yu uje jnacare ua nanique enga bagui bajegaidedie iji baguidedie. Enga bacapóji bajegaitígo bajesúrigo erãpe rĩ. Mu ujetiga ese báringai choquíjna enga a ãrai bajmanecade iji gatéode ujetiga bamajosórone ore chimate dasocade ome ua. Enga a ore jno bádi aja dajegaitique erãpe uje que bajegaite mu.–

19Jesús uruode u udojo ome Pédro gu ujetiga Pédro chiraja datoringai yui quitígo. Enga chingopome rĩ uje a Dupade úringai cuchape pijoque jne ujetiga diga cho daba danguretigai iji Dupade. Quigade enga Jesús chojningame Pédro:

–Ajo ua aja yadode.–

Juan chajo raja uje ũrepíso urusarane quigode

20Uje Pédro chiguísãre daquigade gai enga chimo uje Jesús acadigode uñai chajna ore to. Jesús acadi uté u uje Jesús chijnorapise. U to uje chácariji Jesús ejoi iji ore atigabié mésa enga catecã́ri Jesús ome guẽrasṍri gosi. Uje chojninga ica: "Yocangaráni á, ¿bẽrasṍri gosi te jne a?" 21Uje Pédro chimo uté enga catecã́ri Jesús enga chojninga:

–Yangaráni á, be ga atata cucha dacadode quitígo to uje a tocade jne ome uté.– 22Mu Jesús chojninga:

–Ujetiga yajéraso enga qué ecárase aja yiríringai mu qué dóji. Be enga ajo ua aja yadode.–

23Diga Jesús anguretasórone uñane chudute udojo enga que ore chiraja quitique. Jecute ore ojña bisidégode chubu erámi uje chiese ca Jesús acadi uté toi jne. Mu Jesús uruode quigode que u ujetiga ca toi. Mu uruode qui u ujetiga ajéraso enga eca aja diringai. Jecute Jesús chojningame Pédro: "Que bajnei to yáyipiedie ome uté."

24Enga ore erángani, Jesús acadi uté, u uyu. Uyu u to uje yurúsãre cucha dacadode udore iji darujna aoi udé. Enga yajo yu aja yurusarane uje jé ũrepíso. Enga que potigayaquérique déji uyoc uñeque ome cucha dacadode udojo úringane ũréo.

25Amirone qué uásejna ome Jesús ipesudode cucha uje que purusãracho iji darujna aoi udé. Mu ujetiga uñeque dorási enga churúsãre Jesús ipesudode jnese enga a chipédugurásu erámi ujetiga purusãracho jnese. Amén. Qui jé upúsu.

Currently Selected:

Juan 21: Ayore

Highlight

Copy