Génesis 17
17
Dupade chiroque Abram aja ujetiga picaque nanique, jé aja urasade ore jnese, enga imoi u jne uje uru iyiejnane gajnesórone jé upúsu ore
1Enga Abram guejnanie sequerei e chise 99 nanique uje Pangarádejnai Dupade chiqueta raja enga catecãrápoi rĩ. Enga chojninga:
–Bacatecãraini Dupade uyu uje yujopié que eruénique cuse. Angaripísi yu enga apésupúsu yojningane cucha jnese. Enga apésu cucha omone gatuaque. 2Enga a yisi ome yuru iyiejájnane ome ua jne enga bajnecho. Enga a yipésu ua jne enga bape disi ejode jiépisi ore jne.–
3Enga jĩraque Abram doi jnumi iji Dupade iquei enga chichaga dagataidie aja jnumi, ga chichaga dacuruté aja jnumi te rĩ. Enga Dupade qué jnopo daruode údi iji.
4Enga chojninga:
–Enga yuru iyiejájnane u udojo ome ua: A bape disi ejode jiépisi ore jne enga a ore cãra daníningome ñane jne, enga a ore uníningo jiei jne. Enga a ore cho dají ua jne iji daníningo.–
5Enga Dupade chojningápome rĩ:
–A yiyágo bei bajai tome ua jne uje Abram ua. Enga a yĩ́care bei ejórique jne ga bei u Abraham jne, uje Abraham uruode qui tu gu ujetiga ape disi ejode ore cho dají ua jnese iji danirone jnese iji erámi údode jnese. 6Enga a amo jne uje jé ũrepise yu jne uje a jiépisi udore bape disi ejode ore uáguedatédie jne iji erámi údode, enga ore eduguéjna cuchábode iji ore unirone jnese jé bape disi ejo ore to jne. 7E yingopo yuru iyiejájnane ome ua jne, mu que gusu ome ua mu bape disi ejo gatéode, gatéode ore gajnecho yuruode to, enga u udojo: a ca yiya jne iji deréjnane jnese ujetiga oyo Uacadupade iji yu, uacape disi ejode uhuaque jnese. 8A yisi ome bajogapi udé punire Canaán ome ua jne, enga bape disi ejórigo a ore gajneque to jne iji deréjnane jnese. Enga a oyo Uacadupade iji yu iji deréjnane jnese.–
9Enga Dupade qué jnopo daruode údi rĩ ome Abraham enga chojninga:
–Que gusu yuru iyiejájnane udojo, mu be ga apésu yojningane cucha to uje a yingome ua jne. Enga bape disi ejode a ore doi yojningane cucha to jne. 10-11Yáyipiedie u ujetiga beyoi jnanione uaque enga aquesúyo uacaode iji uacajñungunguenie gáyode jnese. Enga gajnui tu gu jetiga angachopísi yu jetiga oyo uacajnenguíji yuruode udojo, jé basa uacapijócho to uje yajneque uaque uje uacabeyoi yuruode. 12Beyoi yuruode, jnanione uaque, mu que gusu uaque. A jé chuságaja uacatígo jeta quene ore base enga dirode gadióguiji ti iji ore yui enga jé ajnicho ore aoi tiji ore ujñungunguenie gáyode to, jé iji deréjnai tudé, jé aja deréjna pitade jnese to ujetiga ore pijógome yu to. Que gusu uaque mu jé upome uacarógode ore ape disi ejode ore jnese rĩ, aquesúyo ore aode to iji ore ujñungunguenie gáyode to. Que gusu uacarógode atígo uje ore basíji uacari, mu jé átayopo ore to rĩ uje uacabeyoi oredie ome ore iji purása quedéjnane. Aquesúyo ore atígo aode to iji ore ujñungunguenie gáyode jnese. 13Enga ca ayóyo uñeque gánique jne, aquesúyo ore aode jnese iji ore ujñungunguenie gáyode jnese. Enga jé adi tu jne uje yuru iyiejájnane pijóguiji uaque jnese iji deréjna pitade jnese. 14Ujetiga gosi ca tangári yuru iyiejájnane udojo to enga ca chaquesu daoi iji dajñungungué gai to ga beyoi enga etácho uté gosi to iji uacajade.–
15Enga Dupade qué jnopo daruode údi rĩ ome Abraham nanique enga chojninga:
–Enga bacoté Sárai, jé chopo rĩ, a yiyágo i to jne. Enga jé iji deréjnai tudé a ore chĩ́care Sára aja jne. 16Enga a yiji jne enga yátapísaja bacoté uaté jne, enga a atique cuse to jne. Enga a yipésu uaté jne enga a ape disi ejode ore cho daté iji jnese jne iji punire dipeséjnane ore jnese. Enga ore eduguéjna cuchábode a jé uaté ape disi ejo ore to jne.–
17Enga Abraham jé dopoi dasocai enga chichaga dacuruté taja jnumi te rĩ. Enga jé u uje cana dabai enga chojningame re: "¡Chimo jóroque re uje yejnanie sequerei e chise 100 mu a yatique cuse jne ome uté! ¡Chimo jóroque re to rĩ uje yacotábia guejnanie sequerei e chisápo 90 to rĩ mu jé yocatique cuse jne!" 18Enga jé u uje Abraham catecã́ri Dupade enga chojninga:
–Bamo uje yabi Ismael cuse jetiga gajneque yugúchade jne. Ajirape yabi tuté to jetiga amesẽre enga gajneque baru iyiejájnane to jne.–
19Enga Dupade chajnai Abraham uruode enga chojninga:
–Úngare. Que yuru qui tu gotique. Bacotépise Sára a atique cuse jne. Be jne enga ẽ́care Isaac aja jne jetiga base. Enga Isaac uté a gajneque yuru iyiejájnane jne. Enga a jecucha yuruode tocade jnese jne, enga a ca eruénique cuse jne ome uté, ape disi ejo gatérigo, gatérigo ore jnese.–
20Enga chojningápome Abraham rĩ:
–Mu e yudute bacatecãraitigade ome babi Ismael. A yátapísaja uté to jne. Enga yipésu uté to jne enga yátapísaja ga uté ape disi ejórigo a jiépisi ore jne, ga ore quérã, quérã jne. Enga uté abode gare ore iji yirídai jne enga a ore chise dáringáringo eduguéjnapiso jnese jne. Enga a jiépisi uté urasade jne iji ore unínique. 21Mu a ca uté gajneque yuru iyiejájnane udore jne. Isaac jé gajnecho yuru iyiejájnane jne. Yojningai tu bacotábia Sára abi uté uje a yisi ome uaque. Enga a basíji sequeré ejo jne iji guedosi tudé uéchaminónique.–
22Enga Dupade e cha catecã́ri Abraham enga jé u uje jnoji ore jogadi uté. 23Enga jé u uje Abraham chague enga que chajirape cuchárique. Jĩraque doi dabi Ismael enga jĩraque chaquesu aoi tiji ujñungungué gai. Enga tibidi darógode ore aja re uje ore basíji ore irengúone ga jé chátaja darógode uñane to uje doi oré tome ore nanique uje purása quedéjna ore nanique, enga chaquesu ore aode to. Que chimoque irótique uje chaquesu ore aode iji ore ujñungunguenie gáyode. Dopísi Dupade uruode ome re gu. 24-25Enga Abraham guejnanie sequerei chise 99 nanique uje chaquesu daoi iji dajñungungué gai to, jé basa Ismael guejnanie sequerei chise 13 nanique uje dayé chaquesuapo aoi iji ujñungungué gai to rĩ. 26-27Enga dire chojmarai u nanique uje paquesu Abraham, Ismael, Abraham irógode ore aode iji dajñungunguenie gáyode jnese.
Currently Selected:
Génesis 17: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
