Génesis 16
16
Sárai chisi ome darogué egíptogoto Agar ome Abram nanique ujetiga ore cho dabi iji Abram, uaté ore atique jne
1Mu aberepe Abram acoté Sárai nanique ga que togome ore jeta ore atique cus. Mu Sárai irogué cuse nanique uje egíptogoto uaté enga i tu Agar nanique. 2Mu chise diri uje Sárai catecã́ri dabai Abram nanique enga chojninga:
–Bamo yu uje Pangarádejnai Dupade que juéga yocatígo ome yoque. Jecute yijócha bajei údi ujetiga amóji yirogué gari. Jé socaseti batique cuse jne iji gari, enga yoco yocabíji atígo jne.–
Enga Abram chimesẽre dacoté áyipiedie udire, enga ore áyipiedie chojmára iji jnumi jnese. 3Enga jé u nanique uje Sárai doi darogué egíptogoto Agar nanique enga chisi ome dabai jeta móji gari. Enga cuchade udore tocade nanique uje Abram ore guejnanie sequerei chejna yijmanáyone nanique iji puniri uté uje i tu Canaán. 4Uje Abram, Agar e ore móji ñane gari enga e Agar ujningaqué. Mu e chujã erámi enga jé u uje chiraja uje abi déji ajei. Enga irasé re enga chujñieta daroto Sárai.
5Uje Sárai chiraja uje irogué chujñieta enga ájningarẽ́ ome dabai enga pojna dabai údode, enga chojninga:
–Chiese yirogué suépise yibai ome ajéode uje abi e déji ajei. Mu ua u gu uje yirogué chujñieta yu ome ua. Que yojningai tu jeta ajnorapise uaté, gusu ujetiga amóji gari bisideque ujetiga yoco yocabíji atique. Pangarádejnai a chiraja jetiga bayoguei tu jetiga ajnóra yoquirogué, jeoga a chiraja to ujetiga tague yu.–
6Mu Abram chajnai dacoté uruode enga chojninga:
–Barogue uaté arĩ́e. Que cucha gotique ome yu. Be bajéningo ome barogué.–
Enga jé u uje Sárai chõre daroquéode ome darogué, enga ájningarẽ́ ome gatuaque. Jecute Agar chayome iroquéode enga jnopise. 7Enga chajna dajei uje chicáji ore idai Shur yui. Enga basíji erãpe tarétigai iji sibíjnarique ejórique. Enga jé u nanique uje Dupade irógode gaté unirísõre uñai chise uaté iji charidi tuté. 8Enga Dupade iroi uté catecã́ri Agar enga chojninga:
–¿Sárai irogue Agar ua ya? ¿Ṍraji rique que a? ¿Acáji rique?–
Mu Agar chajnai uruode enga chojninga:
–Yayome yiroto Sárai gu.–
9Mu Pangarádejnai Dupade iroi uté catecã́ri enga chojninga:
–Ajni baroto gai. Enga angaripísi jne enga apésu ajegaidode cucha jnese.–
10Enga Dupade iroi uté qué jno daruode údi ome chequé uaté enga chojninga:
"A amo jne uje batique ape disi ejórigo jiépisi ore jne.
Enga a ca toque jne jetiga ayorérique chisecãru ore.
11Baraja uje jeque ua; a bababi base jne enga diyoqui jne, enga ẽ́care Ismael aja jne.
Chamáñaje Ismael urui qui tu gu uje Dupade tangaripísi ua iji báyuguhebátigade jmainie.
12Enga a babi uté gajnui tu burica choqui jne uje tagu dejode enga que porute ga chijninguese raja quedéjnane.
Enga a ca áyipieraque jnoji dajocaningane, ga jé chopo ejominórone ayoréo ore to, a ore pésu dajocaningane ome uté to jne.
A babi uté jogasúrique cuse jne, mu a uté desade cãra dajogatique ome ore jogasui jne."
13Enga cuchadatei u ome Agar nanique uje Pangarádejnai, Agar ore catecã́ri ñane. Jecute uaté chojninga nanique: "A yipésu Yangarádejnai i jne enga a yojninga jne: 'Dupade uté u uje timíninga yógaja quedéjnane'. Enga chojningame re: "¡Jé gotique! Dupade, uyu yimóngo ñane mu que chejna yu go; qué yiqueca." 14Que gusu Dupade uje uaté pésu i ome, mu pésu sibíjnai gajné ejopié i to enga i tu "Dupa Piminingásõri Gajné Ejopié uaté; chamáñaje chimo uyu iji gu." Enga sibíjnai gajné ejopié uaté déji guidáyode ujai nanique uje ore íode u Cádes, Béred ore. Enga idaisórone udore jé ore ĩcarai tu aja sibíjnai gajné ejopié uaté iji deréjnane udojo to.
15Udojo quigade ga Agar abi base enga Abram ore cho dabíji to enga Abram pésu i enga chĩ́care Ismael aja disabi suté nanique. 16Enga Abram guejnanie sequerei chise 86 nanique uje abi Ismael base.
Currently Selected:
Génesis 16: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
