Génesis 15
15
Dupade chiqueta raja Abram nanique iji denominone enga chisi ome daru iyiejájnane ome
1Cucha dacadode udore quigade nanique enga Pangarádejnai Dupade chiqueta raja Abram nanique iji denominone enga catecã́ri, ga chojninga:
–Jé ca atodo yu, Abram. Barotangóri tu yu. A yo boré iji cucha datérique jne.–
2-3Mu Abram chajnai Dupade uruode udore, enga chojninga:
–Yangarádejna, Dupade á. Barajapise uje que yatique cus ujetiga cho dajnenguíji yugúcharique jne iji yiquigade jetiga yitoi. Jecute a o yoré jne mu que cucha beranone ome yu. Baraja gu uje gusu yirógode uñai, damáscogosi Eliezer ujetiga gajnecho bẽratígo cucha jne ome yu ujetiga e yitoi.–
4Mu Pangarádejnai chajnai uruode enga chojninga:
–Úngare. Que quigode u baruode gotique. A babípise jne ujetiga gajneque bagúchade jne, enga a ca pape unejátique jetiga gajneque bagúchade udore jne ujetiga atoi, iji baquigade.–
5Enga jé u uje Pangarádejnai Dupade dejéna Abram aja daquigade ujetiga doi guesi tiji guiguíjnai ajei enga ore catecã́ri ñane iji guesi. Uje ore déji guesi enga Dupade chojninga:
–Ajire gaté enga asecãru guédodie, ¿ama ejnárase a? A jé adi tu jne ome bape disi ejórigo ore. A jiépisi ore jne.–
6Enga Abram changuretapise Dupade uruode ome re. Jecute Pangarádejnai Dupade chopise ayoré ate ujñapetáguiji Abram gu anguretigai enga irasiguipise nanique. 7Enga jé u uje Pangarádejnai Dupade chingo raja Abram enga chojninga:
–Bangarádejnai tu yu. Uyu u nanique uje yijnime ua iji caldéagosode ore ujade nanique iji bedai Ur nanique. Yijnime ua gu ujetiga yicha ua aja de enga o bajnenguíji puniri udé údode jnese.–
8Ga Abram chajnai Dupade uruode ga chojninga:
–Yangarádejna, Dupade á, ¿yo ringome ujetiga yirajapise baruode udore úringane ũrepísome yu ujetiga yajneque puniri udé jnese jne?–
9Enga Dupade chajnai Abram uruode enga chojninga:
–Abram, be ga ãri cuchisode údi aja de jne, ujetiga ore guejnanie sequerei gadioque jnese. Yojningane u udojo: aquirájnaraque, jé aja erámoro quedéjnaraque, jé aja áyasaraque, jé aja cucujnadatérique, jé aja cucujnádaté quedéjnarique to.–
10Enga jĩraque Abram doi Dupade uruode. Enga chujé cuchisode enga chajuque cuchiso chojmarai iji gatócoro, enga chujépo cuchiso chojmarai te rĩ enga chajugapo gatócoro te rĩ, enga jé adi tu ome ore jnese. Gusu cucujnadatei, cucujnadaté quedéjnai uje chujé ore bisideque enga que chajugája jnumi to. Enga jé u uje doi degode udore péode enga chimáta enga umare qui tome, enga cuchiso chojmarai péode nóna ñane ga pésu jochai. 11Mu Abram chimate degode ga cobotodie doi, mu Abram doi ore ga chijócãre ore iji ejode. 12Enga guedé e jnosipise, enga Abram mo enga cho jetiga déji ijnangunúraque ajénique uje mopise. Ga todópisa. 13Enga jé u uje Pangarádejnai chingo cucha piqueminórone ome Abram nanique enga chojninga:
–Yipota jeta araja cuchade uje a tocade jne ome bape disi ejode ore. Enga a purása quedéjna ore jne iji punire quedéjnarique jne. Punire quedéjnai uté unirisórone a ore sué ore gai jne, enga a bape disi ejode a doi ore iroquérigo iji ore unínique jne. Enga a ore chiroque ore bisideque jne, enga a sijnanguipise ore jne, enga a ore chaquesu ore údode jne. Enga a jecucha ga ate jne ome bape disi ejórigo ore jé aja sequeredie jne ujetiga chise 400. 14Mu a chise diri jne ujetiga yo yujuñame bape disi ejode udore ore umajosórone udore. A yijnime bape disi ejode iji udore ore jmainie jne enga a ca pisagápo udore ore jne rĩ. Enga a ore jnoji puniri tuté enga a ataguipise ore jne aja dajesúrique.
15Mu uhua enga a ca amo cuchade udore jne, mu a jé aságaja báringai choquíjnapise jne ga a atopísi jne enga a áta ua aja bayode jnani bajácho ore jne. 16Enga ujetiga bape ejode e ore déji punire quedéjnai uté jne, mu a gagájni ore ape gatérigo iji yui jne ujetiga quene yijnime ore ape gatéode jne iji puniri tuté unirisórone jmainie. Enga jé u jne ujetiga yatirépo ore rĩ aja baniri tudé.–
Enga qué Dupade jno daruode údi enga chojninga:
–Que yatire bape disi ejode míraque gu amorréogosode ore iji puniri udé. Qué yidota yu ome ore isijnaringuéone gu. Mu a chise diri jne jetiga ore isijnaringuéone quérã, quérã enga a ca toque ujetiga qué yidotápo yu ome ore jne rĩ. Enga a jé u jne ujetiga yejna ore enga bape disi ejode basája ore uniri tudé jne.–
17Mu uje e dejaguipise enga piotique cuchábi tṍraji gaté uje pioi úyujna nóna ocaraidie aja jnumi ome yugode cuchiso péode enga cho jetiga nóna pite pijnanitique aja jnumi enga jnoji péode ujai. 18Iji udojo quigade iji dejai uté enga Pangarádejnai Dupade chingo daru iyiejájnane aja Abram nanique enga chojninga:
–A yisi ome bape disi ejode jne bajogadi tudé punire údode jnese. Yojningai punire uté u tié jé aja tié uña ore ujai. Uje tiedie udire ore íode u Éufrates, Egípto jogoto ore. 19Mu iji dirode udojo qué jiépisi jnumi tuté jogosórone ayoré ore iji uté. Enga ore íode u udojo: cenéogosode u uñane, jé basa ga cenezéogosode u uñane, jé basa ga cadmonéogosode u uñane, 20jé basa ga hitítagosode u uñane, jé basa ga ferezéogosode u uñane, jé basa ga refaítagosode u uñane, 21jé basa ga amorréogosode u uñane, jé basa ga cananéogosode u uñane, jé basa ga gergeséogosode u uñane, jé aja jebuséogosode ore to.–
Currently Selected:
Génesis 15: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
