Génesis 20
20
Abraham cho nero iji dacoté Sára uje todo eduguéjnai Abimelec gu ujetiga pota chutígome ujetiga chijna acoté iji gari
1Enga cuchade udojo quigade nanique enga Abraham ore jnoji dayaridi Mámre, enga ore qui tupúsu ore idáidatéi Gerar enga ore cho daniri iji uté. Enga Gerar uté déji guidáidatéode, Cádes, Shur ore ujai nanique. 2Uje e ore chise ore idai Gerar enga Abraham cho nero iji dacoté Sára. Jecute gerárgosode ore eduguéjna cuchábi chojningame darógode: "Beyoi, ga ajnáño uté nero aja yu, ga yo yacoté iji uaté jne." 3Mu uje chise dejai uté nanique enga Abimelec urigode cuse, enga Dupade catecã́ri iji urigode enga chojninga: "A atoi jne, chamáñaje chequé uaté abai cuse gu."
4Mu cáma Abimelec moji Sára gari nanique. Jecute chajnai Pangarádejnai Dupade uruode enga chojninga: "Que yibárique cuse arĩ́e ujetiga ajé yu jne. 5Chamáñaje Abraham jé urúo ome yu diríca ga chojninga: 'Yẽro uaté.' Enga uaté chojningame yu: 'Jé u arĩ́e. Yaja uté to.' Que gajnarengue yáyipiedie diríca, jé ore urúo ome yu diríca jecute yangureta ore uruode diríca ome yu. Que yipésu cucha gajnarétique ome yu."
6Enga Pangarádejnai chajnai uruode enga chojninga: "Ejẽ́ arĩ́e. Uje que apésu cucha gajnarétique. Chamáñaje uyu u gu uje yaquĩ́ra ua enga que asa uaté iji dejai udé. Yaquĩ́ra ua gu ujetiga ca yise bayoguérique. 7Jecute be ga atire uaté abaipísi gai. Chamáñaje yuruode atatasõre uté gu enga a chijócha yajei údi ome ua jne ujetiga ca yo yujuñame ua. Mu ujetiga ca be yuruode enga atire uaté abaipísi gai, enga a atoi jne, jé aja bajogasúode ore jnese."
8Enga e chise dire uñai enga Abimelec niji ga tibidi darógode aja re. Enga jé u uje chatata denominone ome darógode ore. Enga uje ore chudute júdode denomicho enga ore todópisa edominone quigode. 9Enga jé u uje Abimelec tibidi Abraham enga catecã́ri enga chojningame:
–¿Ga yipésu pisijnaringuérique ome ua diríca ya? uje bajnime Dupade ájningai ome yoque. Uje bangome yu diríca uje chiese bẽro bacoté. Que pisoca uté gotique jetiga yoco yocurupatáringa ome ñane. 10¿Gotique diríca uje bo barupatáringa ome yoque?–
Enga jé u uje Abimelec uruode gajnarécho aja Abraham nanique. 11Enga jé u uje Abraham cho quique uruode enga chojninga:
–Yajéode u diríca uje yojninga: "A ca ore todo Dupade iji guidáidatéi tudé. Jecute a ore pota chutígome yu jne ujetiga ore chijna yacoté iji yari." 12Que yo yurupatáringa ome ua gotique, uje yẽro yacoté tuaté. Yacoté, uyu yocai chojmára mu yocatedie u uje ore cãra rome ñane. Jecute pujuegate ome yu ujetiga yisa uaté nanique. 13Mu iji taningai nanique enga Dupade catecã́ri yoque ujetiga yicoji yocai jogadi nanique enga yojningame yacoté nanique: "Ujetiga yico purása quedéjnaringo enga jecucha o baja yu. Enga edu báringa yẽro ome ore."–
14Enga jé u nanique uje Abimelec chudute Abraham o quigode udojo cucha nanique enga jé u uje chatire Abraham acoté gai. Enga jé u uje tẽrája to enga chisi ome aquirájnanie, áyasadie ore ome, jé aja irógode, iróguedie ore jnese. 15Enga Abimelec catecã́ri Abraham nanique enga chojninga:
–Cajire erámi iji yoquejode, bajegaitíguiji. Enga beyoi bajegaitique enga acayóji ga ácayoji.–
16Enga Abimelec e catecãrápoi Sára to rĩ enga chojninga:
–Cajire to yerané pláta guebec uje mil u. A yisi ome babai jne enga babai, yocúringai parácho pijógome ore jnese jne. Enga a ore chiraja jnese jne uje que yimo iji bari gotique, enga a ca dara quedéjnarique tagu ua jne iji sañeque.–
17Enga jé u uje Abraham catecã́ri Dupade ome Abimelec, acoté ore. Enga Dupade chisi ome ore ijóningai tome ore. Que gusu ore mu chiqueta ore iróguedie to uje aberé ore enga ore abode cuse jnese iji quigade. 18Chamáñaje Dupade e pésu chequedíe ore jnese iji Abimelec iguíjnai gu Sára enga abérei ore jnese iji uté.
Currently Selected:
Génesis 20: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
