Génesis 21
21
Abraham, Sára ore abi Isaac base nanique enga jé upúsu Dupade uru casodica ome Abraham
1Enga e chise diri nanique enga Pangarádejnai Dupade chisi ome daru iyiejájnane ome Sára jetiga atique cuse jne. Enga do gojni enga e doi ga chimate daruode aja guesi. 2Jé u uje abi déji ajei nanique. Enga base enga diyoqui abi. Abraham e choquíjnapis mu abi cuse. Enga abi base ga jé upúsu Pangarádejnai Dupade uru casodica ome Abraham ore uje chojningame ore ica: "A uacabi base jne iji sequeré uéchai." Enga jé u nanique uje basipísiji sequeré uéchai. 3Enga Abraham pésu dabi i nanique enga chĩ́care Isaac aja Sára, orabi nanique. 4Enga Abraham dopísi Dupade uruode nanique enga abi guejnane dire gadióguiji ti iji yijmanuñai uje chica ujñungungué nanique enga chijnime aoi pei. 5Enga Abraham guejnanie sequeré e chise 100 nanique uje abi Isaac base. 6Enga Sára chojningame re nanique: "Que toc eti ca yirasé yu enga yingana, uje Pangarádejnai Dupade chisi ome yocabi ome yoque. Mu que gusu yoque uje yoquirasé yoc enga yinganángo, mu a yocujnomei chise yoquijoranie to jne enga a ore irasé raque to jne enga a ore cana yoquibai to jne uje ore irasé yoque gu yocabi. 7Que uñeque urúo nanique ome yabai Abraham jetiga chojninga: 'A Sára atique cuse jne.' Ore chiraja jnese yúringa aberé gu. Yabai e choquíjnapise to, mu yocabi jé cuse."
Abraham chiroque dacoté irogué Agar, ore abi Ismael ore aja doi nanique
8Enga ore ababi Isaac e areque nanique enga daté cha chisi ome dajnanie ome jeta ca chucuapo rĩ. Enga chise nanique uje Sára cha dajnanie ome dabi enga abai pésu diri iji uje ore doi daninaquei ome dabose unérone jetiga ore tagu iji jorane ore gari. 9Mu chise dire uñeque nanique uje egíptogoto Agar abi chujñieta Sára, Abraham ore abi Isaac. Enga Sára chajire ore iji ti enga chetaguipise disabi ujñiequéode ome abi. 10Enga Sára chayója dabai ome disabi ujñiequéode. Enga chojninga: "Be ga ajócãre yoquirogué tuaté, jé aja ape jnacaripítai uté. Enga ajócãre ore jnese. Que yipota gu jetiga barogué, uacabi chijna bagúchade petique to jne jetiga atoi. Omi tu jeta Isaac gajnecho jnese."
11Abraham tṍra rome dacoté uruode udore. Uje chijnorapise dape uñai iji darogué gari. 12Mu Dupade catecã́ri Abraham nanique rĩ, enga chojninga: "Ca báyipie chejna raja babi tiji barogué gari, daté ore. Be ga angaripísi bacoté Sára, enga be uruode ome cuchade. Uje yajéode jé u to ujetiga bape gatérigo gãrapi tu babi Isaac uté jne. 13Enga a yipésu yáyipiedie ome barogué Agar, uacabi to jne. Chamáñaje babípise gu. A uté ape disi ejórigo quérã iji danínique enga jiépisi ore to jne."
14Enga jé u uje Abraham chobéri niriji iji dire uñai nanique. Ga doi arurégode enga chátaja dago uje cucha ao nanique, enga yodi irágu ajei. Enga chisíome cuchade udore jnese ome darogué Agar uaté ujetiga chijnónguiji dorotadi, jé aja ore abi Ismael uté, enga chiroque ore aja doi. Ga jé u uje Agar, Ismael ore jno. Mu que ore chiraja daquitique enga ore chacája ñane iji erãpetarei uje i tu Beerséba nanique. 15Enga e ore chinire yodi iji dago cucha ao ajei nanique, ga íjnonguipíse. Mu abi cho sere, sere, sere, ome dayádi uje íjnonguipíse yodi ome ore gu. Enga jé u uje daté chojningame dabi: "Amóji porabidie udire údi." 16Enga uaté noñome dabi iji uté, enga cãra dayaridi tome dabi. Que pota gu jetiga chimo dabi jetiga toi. Enga jé u uje chácariji jnumi to iji ti. Mu chácare mu chudute dabi agoyé iji ti enga jnusietépise.
17Mu que gusu uaté uje chudute dabi agoyé, mu Dupade chudute to agoyé uaté. Mu Dupade irótique tṍraji gaté enga catecã́ri Agar aja jnumi yui enga chojninga: "Agar á, ¿jé bajnusiétigai gajnetique cucha ya? Aya atodo yui jeta babi toi. Uje Dupade chudute babi agoyé to iji charidi. 18Ajniapója baquigade rĩ enga a ese babi jne enga asa jmanai jne enga ca arame jmanai jne. Enga a ca toi jne enga a yipésu uté jne enga ape disi ejórigo jiépisi ore iji ore unínique."
19Enga jé u uje Agar dopísi Dupade uruode. Enga chajniápo aja daquigade rĩ enga jé u uje chimo gajño uje Dupade chingo jogadi taja. Enga irágupúsu yodi. Enga jé u uje chirate dago cucha ao iji enga jno údi aja Ismael ujetiga chóji to. 20-21Udojo quigade ga Ismael quérã nanique enga Dupade chátapísaja nanique. Enga ore cho daniri tiji erãpetarei nanique uje i tu Parán. Enga udojo quigade enga jnacare nanique enga Ismael uté ojicarotaque enga chirajapise docoji uje chujé cuchisode ome. Mu e chise diri nanique uje daté jno dajnacari údi aja gapua egíptogoto ujetiga cho dacoté iji.
Abraham, Abimelec ore chisi ome daru iyiejájnane ome ñane ujetiga ca ore doi pocaningane ome ñane
22Mu e chise dirode udojo uñeque nanique enga eduguéjnai Abimelec chicáji Abraham ujetiga catecã́ri. Enga uté iroguipísi Ficol nóna, uje jõcaratade ore eduguéjnai tu nanique iji ore uniri. Enga Abimelec catecã́ri Abraham nanique enga chojningame uté:
–Yimóngo uje Dupade chatapísaja ua ome cuchade. 23Jecute be gajiné enga jé ca apésu pocaningai ome yoque. Be ga asi ome baru iyiejájnane ome yu uje Dupade chisi ome ua baruode ga ũrepise baruode udore. Enga que gusu yoque mu jé cho yocape ejode, jé aja yocape gatérigo ore jne. Enga jé ca bape disi ejode dopoi pocaningai ome yocape disi ejode to jne. Bamo arĩ́e uje que yujuseque uaque ica uje uaqueso yoque ica. Jecute be yisocai tuté to enga ca ajuseque yoque to. Chamáñaje e uacoyo uacaniri iji yocuniri udé to gu. Enga jé tiógara jetiga paraque uágome yurasade ore to iji uaquejode.–
24Enga jé u uje Abraham chajnai uruode enga chojninga:
–A ca yipéco pocaningárique jne ome uaque. Yisi ome yuru iyiejájnane ome uaque enga Dupade chiraja uje ũrepise yuruode udore ome uaque.–
25Mu Abraham chojningápome Abimelec rĩ:
–A qué yingome yuruode aja ua jne. Uje yetei tu uje barógode chijna yoquijochai sibíjna iji yocari diríca.–
26Mu Abimelec chajnai uruode enga chojninga:
–Abraham, quene yudute to baruode uje gosi chijna uacajochai sibíjna iji uacari. ¿Jé gotique gu a uje que angome yu diríca?–
27Enga jé u iji diri uté nanique uje Abraham, Abimelec ore pésu dáyipiedie ome ñane enga Abraham tẽrája Abimelec nanique ome dachidedie aquirájnai, áyasai ore. Imoi tu pajesereringai ome ñane. 28Mu Abraham cãra dachidedie áyasai uñanie jogadi enga gare ore iji ti yijmanuñai. 29Enga jé u uje Abimelec catecã́ri Abraham enga chojninga:
–¿Gotique gu a uje bangara bachidedie áyasai uñanie jogadi?–
30Enga Abraham chajnai uruode enga chojninga:
–Yajneque sibíjnai tuté arĩ́e. Chamáñaje yoquijochai tu gu. Jecute yipota jeta asa áyasadie udire enga bajnei. Enga gajnui tu jeta yocajnengápo yoquijochai sibíjna rĩ.–
31Enga jogadi uté uje ore catecã́ri ñane iji, e ore pésu i ga ore chĩ́care Beerséba aja uté. Chamáñaje Beerséba uruode qui tu gu uje ore chimesẽre uñane áyipiedie ome ñane ome ore jochai sibíjna.
32Uje Abraham, Abimelec ore chimate dáyipiedie ome ñane, enga jé u uje Abimelec, Ficol ore chajni aja filistéogosode ore uniri, uje filistéogosode urása ore gu. 33Uje e ore jno enga Abraham e doi poria nanique uje i tu tamarísco ga chaca iji Beerséba uté uje ore catecã́ri ñane iji. Enga uje e chimate daca pore aja jnumi enga jé u uje catecã́ri Dupa Eyúgojmai ome re. 34Enga Abraham guejnanie sequerei jiei iji filistéogosode ore uniri uté.
Currently Selected:
Génesis 21: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
