Génesis 22
22
Dupade chetingare Abraham anguretigai úringai ũré ome re
1Iji cuchade udojo quigade enga Dupade chojninga: "A yetingarape Abraham anguretigai úringai ũré ome yu jne." Enga jé u nanique uje catecã́ri Abraham enga chojninga:
–¡Abraham á!–
Enga Abraham chajnai uruode enga chojninga:
–¡Yugúsiji de é!–
2Enga Dupade chojningame Abraham:
–Abraham, be bape ugurui uje bajnorapise enga asi ome yu jne. Bo údi aja ore uniri Moriah, enga ocho yojningai cucarãte jne enga acáji ójo jne. Ga apésu gaserani iji cucarani uté enga ẽra babi tuté ome yu iji uté jne enga abore, enga a gajnui tu cuchiso pẽrapáitique ome yu jne.–
3Enga Abraham niji uje qué tota dore. Enga doi dachidé burica quedéjna enga doi dayaripíode enga chujé aja gai. E chaquesu pidode to bajaque ome daserani yui. Ga jé u uje ore chicáji Dupade ojningai punire uté. Enga abi Isaac nóna, jé aja daroque gárode. 4Enga ore mochádode gadioque aja daqui yui. Uje e chise dire gadiógode enga Abraham chimo Dupade ojningai cucarãte uté iji ta daquei. 5Enga jé u uje Abraham chojningame darógode:
–Arocho yóguiji de. Enga ajicho yachidé burica quedéjna yui te jne. Mu yabi, uyoque qué yicagóji yoquiqui cucarãte yui. Enga a yicatecãcobi Dupade iji ta jne, enga quigade enga yajningopo aja uaque jne rĩ.–
6Enga Abraham chisi ome derogode ome Isaac ujetiga chijnoque to. Enga Abraham chijna daquesei, chatapója pioi te rĩ enga jé u uje ore jno ga ore nóna ñane aja cucarani. 7Mu uje qué idája ore iji cucarani enga Isaac catecã́ri dayé, enga chojninga:
–¡Yapá!–
Enga Abraham chajnai ga chojninga:
–¿Gotique, yabi a?–
Mu Isaac chojninga:
–Iapá, berogode déji de, pioi dépoji de rĩ. Mu que yimo beguéraque áyasa abape gotique ome baserani uté.–
8Enga Abraham chajnai dabi uruode enga chojninga:
–Yababi á, a Dupade u jne jeta chisi ome yoque jne áyasa abataque ome yaserani.–
Enga jé u uje ore cha catecã́ri ñane enga ore jnopo aja daqui yui rĩ. 9Uje e ore chise Dupade ojningai enga jé u uje Abraham doi cucaranenie enga chujé aja ñane gáyode, ga dopoi pidode rĩ ga chujepója cucaranenie gai gaté rĩ. Enga jé u nanique uje jé doi dabi Isaac enga chigaru gai ome enuéjnai enga chujé aja daserani gai. 10-11Enga Abraham chisa daquesei enga chichagúrasu dabi pajei. Mu Pangarádejnai Dupade irógode gaté unirísoño uñai uruode tṍraji gaté ome enga chojninga:
–¡Abraham á! ¡Abraham á!–
Enga Abraham chajnai uruode enga chojninga:
–¿Jé a? ¡Yugúsiji de á!–
12Enga Dupade iroi catecãrápoi rĩ enga chojninga:
–Ca ajé bape ugurui uté. Yimo uje bangaripísi yu enga jecucha ua u uje babé yuruode. E yiraja uje que ãraque bape ugurui ome yu uje bajérase.–
13Enga jé u uje Abraham chajire dejode enga chimo áyasa choquírique uje uedie chimere iji ñane iji porabidie údode. Enga que toc eti jno. Enga Abraham doi áyasa choqui uté enga chejñu iji poridie enga jno údi aja daserani. Enga chijnime dabi ga chicha áyasa aja dabi charidi. Enga chujé áyasa aja daserani gai uje abi gajneque que, enga chujé áyasa tome daquesei iji gaserani gai. Ga jé u uje chujé áyasa tuaté enga chibore iji daserani. 14Cucha dacadode udore quigade u nanique uje Abraham chojningame re nanique: "A yipésu yocaserani jogadi tudé írique jne, enga a i tu udé jne: 'Pangarádejnai tẽrája yu iji de, ga que cuchárique chonapo yu rĩ'. Chamáñaje gusu yabi u que ujetiga yisi ome Dupade, mu Dupade chisi ome yu áyasa choqui ome yaserani." Jecute jecucha ga ore chatatame ñane, jé aja deréjnane udojo to enga ore chojningame ñane: "Dupade ojningai tuté cucarãte ujetiga gosi chicáji ga jé ca cuchárique chona gosi tiji."
15Mu Pangarádejnai iroi uté e tibidápoi Abraham nanique rĩ enga catecãrápoi rĩ. 16-17Enga gaté unirísõri chojninga:
–Yipota jeta yingoma Dupade uruode ome ua rĩ. Uje chojningame ua: "E yimo uje que ãraque bape ugurui ome yu que, enga a yátapipísi tu ua jne ga bajneque yuru uréone udojo jne enga yarecujate yingoméone udojo ome ua. A yipésu jne enga bape disi ejórigo jiépisi ore ga ore gajnunie u guédodie iji gatajnoquei. Enga ore gajnui tupo rĩ yote quedéjnai arĩ iji edógai uje quenguerapise. Enga a yipésapo jne rĩ jetiga bape disi ejórigo ore suépise damajósoningo ore gáningo. 18Enga a yipésu jne jetiga erámi unirisórone ore agutíyabádode u bape disi ejórigo ore. Enga cuchade udore tocade jnese jne gu ua uje bangaripísi yu.–
19Iji cucha dacadode udojo quigade ga Abraham ore chajniápo aja darógode jogadi te rĩ. Ga jé u uje ore jno ga ore nóna darógode aja ore unuchui uje i tu Beerséba nanique. Enga Abraham ore chácariji uté nanique.
Abraham desai Nacor ape disi ejode íode u udojo nanique
20Enga e chise diri nanique uje Abraham chudute uje desai Nacor, acoté Mílca e ore abode cuse to. 21Enga ore ape bajai i tu Uz, jé basa uñai i tu Buz, enga udore quigaminóri u Kemuel uje jnani bajai Aram gãrapi tu uté nanique. 22-23Mu que gusu ore gotique nanique mu Nacor ore, ore ape ejode cusapo rĩ enga ore íode u udojo: Quesed u uñai, jé basa ga Házo u uñai, jé basa ga Píldas u uñai, jé basa ga Jídlaf u uñai, enga ejopísi i tu Betuel. Enga gadióguiji ti yijmanuñai Nacor ujnacarode nanique iji dacoté Mílca gari nanique. Enga ore abi Betuel uté uro cuse nanique enga uaté i u Rebéca nanique.
24Mu Nacor acoté uña cuse uje déji quedéjnai tome acotépise. Enga uaté i tu Reúma nanique. Enga uaté abode gagájni nanique iji dabai gari enga ore íode u udojo: uñai i u Téba, jé basa uñai i tu Gaham, jé basa uñai i tu Táhas, jé basa uñai i tu Maaca nanique.
Currently Selected:
Génesis 22: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
