Génesis 23
23
Sára toi nanique ga abai chijóchame iji dagaidé cucarã́tedó ajei uje doi oré tome hitítagosi Efrón nanique
1Enga Sára guejnanie sequerei 127 años nanique uje topísi nanique. 2Enga Sára uaté toji ore idai Quiriat-árba nanique. Idai uté i uñai cuse nanique enga i uñai tu Hebrón. Enga déji ore uniri Canaán nanique. Enga Abraham jnusiétaguipíse enga popise dacoté ejode. Enga deréjnane jiépisi nanique ome jnusiétigai. 3Uje Abraham cha nanique uje po enga noñome dacoté togué iji te ga tibágui hitítagosode uñane ujetiga catecã́ri ore ome acoté óderaque jogatique.
4Enga Abraham chojningame ore:
–Uacamóño uje purása quedéjna yu iji uacajade. Yipota jeta yiji jnumi petique iji uacuñeque dosatique ga yijóchame yacoté tiji yigaidátique.–
5-6Enga hitítagosode udore ore chajnai Abraham uruode enga caniranguipise ore ome Abraham nanique enga ore chojninga nanique:
–Que toque arĩ́e jeta yetájo báyipiedie. Yirajagopise gu báringai Dupade atapiésõripíse, ga be bacoté jne enga ajnája yoquerugode uñeque jne jetiga ueradipise enga ãrája uñeque jne.–
7-8Enga Abraham chague ga chichaga datoi taja jnumi uje imoi tu gu uje irasique ore uruode ome re. Enga jé u uje chojninga:
–Ujetiga jé ũrepise uaque ome uacaruode udore ga beyoi ga acatecãchoi uacarásai Efrón ome yu uje uté dai i tu Zohar. 9Uje cucarã́tedóraque déji uté gajnei jnupe ajéjonguérique que, uje uté gajnei jnupe pei uté i tu Macpéla. Enga angoñome uté jne uje yipota ujetiga yiji cucarã́tedó oréraque jne jetiga yicha yacoté óderagaja. Enga a yimanipise jne uté ojningai tuté oredie.–
10Mu Efrón uté déji ore ajei enga chudute Abraham uruode ome re. Enga jé u uje catecã́ri Abraham to mu chejnapúsu daruode. Gaidi u gu ujetiga urasade jé aja ayoré díode jnese ore chudute uruode iji uté.
11Enga chojninga:
–Úngare, que yipota oré tome cucarã́tedó tuaté. Mu a bisidégome ua jne jé aja jnumi tiji ejode. Enga yurasade iji de yoquejode ore chiraja jnese uje bisidégome ua uje ore chudute yuruode jnese gu. Bo, ga be bacoté enga ãrája ajei jne.–
12-13Enga Abraham e chaguepo rĩ ga chichaga datoi taja jnumi ome ore enga chajnai Efrón uruode iji ore edominone jnese enga chojninga:
–¡Angáchoi yu jnese! Enga asayo yiplátadie. Enga jé u ujetiga yijóchame yacoté tiji cucarã́tedó.–
14-15Enga jé u uje Efrón nararápo rĩ enga chojningame Abraham:
–Yijorámi á, angachobi yu to. Be oré tome yajnei jnupe uté ome pláta guebecho ujetiga chise 400. Uje jé yichajapidi tu gu ome yajnei jnupe pei uté. A ca yicatecãrápoi ñane jne rĩ. Enga be jne, enga ãra bacoté aja cucarã́tedó uaté jne.–
16Enga jé u nanique uje Abraham chimesẽre Efrón uruode udore enga chisi ome dapláta guebechome nanique uje chise 400 nanique, uje jiei orérigui nanique. Uje pláta tuaté chojmarápise nanique, mu oredie jiei nanique enga ore doi cuchade ome jnese. 17-19Enga jé u nanique uje Abraham cho dajnenguipise iji Efrón gajnei jnupe pei uté, jé aja cucarã́tedó tiji to, jé aja poridie jnese iji to, jé aja cuchade ore jnese. Enga gaipídi i tu Macpéla nanique enga déji ore idai Mámre dosadi iji guedé garani yui nanique. Ore idai Mámre uté i uñai u Hebrón nanique. Enga Hebrón idaisórone, hitítagosode ore, ore chiraja jnese uje Abraham e gajnenguipise Efrón gajnei jnupe pei, uje ore chudute ore uruode ome ñane gu. Enga jé u uje Abraham jno dacoté údi aja cucarã́tedó nanique enga chijóchame iji ajei. Enga uñane cãra Abraham gaipídi i nanique, enga i tu Hebrón ome ore. Enga gaipídi uté déji ore uniri Canaán ajei nanique.
20Enga Abraham e gajnenguipise cucarã́tedó, jé aja jnumi to iji cucarã́tedó ejode. Chamáñaje hitítagosode ore gueranome gu ujetiga chijóchame dacoté tiji.
Currently Selected:
Génesis 23: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
