Génesis 24
24
Abraham chutṍri daroguipísi ujetiga uté chucué gapúraque ome dajnacari Isaac ujetiga ujnacari tuté chóji gari
1Enga Abraham e choquíjnapise. Enga jecucha Pangarádejnai Dupade chatapísaja nanique ome cuchade jnese. 2,3,4Ga jé u nanique uje Abraham tibidi daroguipísi uje e choquíjnapise ome irógode uñane. Uje uté u nanique uje chañurupúsu ugúchade guio jnese. Enga Abraham e catecã́ri uté enga chojninga:
–Be jne, enga asa yetarúdi tajíringai ga ãráji gaté. Ga imoi tu ujetiga bepísi yojningane cucha. Enga Pangarádejnai Dupade iji gatajnoquei chimo ua ga imoi tu uje babepísi yuruode ome cuchade. Yajegaidi u udé ome ua jetiga arajapise uje ũrepise yuruode. Que yipotapísa jeta yujnacari Isaac chisa cananéagotóraque iji de. Jecute be enga acáji yocuniri casé, jetiga ese enga ajire yiguiosode ore ujade ome gapúraque bajegaidéraque enga ajiripise bajegaidéraque iji ore ujade, enga ajnapója de rĩ ujetiga yujnacari Isaac chóji gari.–
5Enga jé u uje iroguipísi chajnai uruode enga chojninga:
–¿Jé yo ringome jne a, jetiga gapúraque ca nóna yu? ¿Ama bajegaidi u jne a ujetiga yijnapo bajnacari aja baniri rĩ?–
6-7Mu Abraham chajnai uruode enga chojninga:
–Úngare. Ca ajnapója yocuniri rĩ. Bamo arĩ́e uje Pangarádejnai Dupade iji gatajnoquei catecã́ri yu nanique enga chojninga nanique: "Boji bayé iguíjnai udé, uniri ore, enga ajíñome baguiosode iji de jnese." Enga chisi ome daru iyiejájnane ome yu nanique ujetiga yajneque puniri Canaán udé nanique. Mu que gusu yu gotique, mu yape disi ejórigo ore gajneque to jne. Jecute que yipotapísa jeta yujnacari Isaac jnoji de. Ga a jé u jne jetiga Dupade chutṍri darótique gaté unirísõre aja baquénique jne jetiga dimane gapua iji baquei. Ga a nóna ua aja de jne. 8Mu ujetiga gapúraque ca pota nóna ua aja de, enga que máraque ua ome yu. ¡Mu yijaropise yuruode iji jnumi ome ua ujetiga ca ajna yujnacari aja yocuniri casé jne rĩ!–
9Enga jé u uje Abraham iroguipísi chisa etarúdi tajíringai enga chojninga:
–Enga a yipésu bojningane cucha jnese jne.–
10Ga jé u nanique uje chucué cucha orerã́tigo iji darósõri ugúchade jetiga tẽrame deyáraque gapu jne, jé aja jogasúode ore. Enga chujé cuchade aja dachidode burica quedéjna gáyode. Enga chejna yijmanáyone burica quedéjnane uje chijnoque ugúchade. Enga burica quedéjnane udore i u caméllo ome ore nanique. Enga jé u uje jno nanique enga chicáji ore idai Nacor uje déji punire quedéjnai Mesopotámia. 11Enga jé u nanique uje Abraham iroi e chise ore idai Nacor eruei mu e totási udore uje chise. Enga jecucha chequedíe, gapudíe ore iraninguémeque ore jochai yote nanique. Enga jecucha ore chĩrate uje e tota udore nanique. Jecute chequedíe e ore chijnime yodi nanique uje Abraham iroguipísi di nanique. Enga jé u nanique uje ore chácariji ore jochai yote ejode, gachidode burica quedéjna ore. Enga ore chácariji jnumone iji ejode. 12Enga jé u nanique uje Abraham iroi catecã́ri Dupade enga chojninga: "Dupade á, yirósõri angureni tu ua ya. Enga átapísaja yu jetiga asi ome gapúragome yu jne. Osõripise yirósõri enga asi ome bajegaidéraque gapu ome jetiga ujnacari chóji gari jne. 13A qué yácariji de jne ore jochai yote uje jecucha gapudíe ore chĩrate yodi iji de gu. 14Enga a yicatecã́ri gapúraque jne enga a yojninga: 'Yojiape baranéraque jne.' Enga a chisi ome darané ome yu ujetiga yóji enga a chojningame yu jne: 'A yisi ome ua, enga a yisiapome bachidode burica quedéjna caméllo jne.' Jeta chisi ome yodi ome yu, enga chisiapome yachidode, burica quedéjna ore, enga a e yiraja uje berané uaté ome yu ujetiga yirósõri ujnacari Isaac acoté tu. Enga a yiraja jne uje bosõre yu ome yirósõri."
15Uje cáma uté cha dacatecãraitigade nanique mu chimo gapúraque enga qué doi yodi, enga chijnoque darané tiji dorotadi. Enga gapua uaté i tu Rebéca. Dayé i tu Betuel, enga Abraham desai Nacor ape gapua tuaté dayé nanique iji dacoté Mílca gari. 16Enga Rebéca uaté omepise nanique. Que gusu omé mu cáma jnacánique chimo to nanique. Enga e di nanique ga chijnime yodi jetiga chĩrate darané tiji. Enga e chajnírasaja guidai. 17Mu Abraham iroguipísi chucajningárome gapua uaté. Enga e chise, ga e catecã́ri uaté enga chojninga:
–¿Apota ujetiga yojiape barané?–
18Enga jé u uje uaté jĩraque chajnai uruode. Chamurásiji dorotadi ga chicháji iquei enga chojninga:
–¡Ojiape!–
19Enga Abraham iroi chóji, mu Rebéca qué catecãrápoi rĩ enga chojninga:
–A yiji yodi ome bachidode burica quedéjna caméllo to jeta ore chóji enga ore chĩreta dacadie to.–
20Enga chojne ié taja ore gachidode agapié, enga e dopoi rĩ enga e chojnepo rĩ, enga jecucha ga doi yodi ga chójneja ore gachidode agapié enga jé chuságaja uje subudé Abraham iroguipísi gachidode ore jnese. 21Enga gapua doi yodi enga Abraham iroi topísiji gai. Pota gu jeta chiraja ujeta Pangarádejnai Dupade ajegaidé tu uaté. 22Uje e subudé gachidode iji gapua guerani yote uté, enga jé u uje e chiraja uje Dupade guerané gapua uaté. Jecute jno enga chijnime derané óro enga chaníraja gapua ujunane edo ujetiga aparagate ome. Enga dopoi óro carubi te rĩ enga chaníraja gapua uaté jmanecapajei. Enga ore chuguhese ujunane gajnei óro enga e chise 6 grámos nanique, jé basa jmanecai erã́sori chise 100 grámos. Enga jiei gueranone udojo oredie nanique. 23Enga jé u uje Abraham iroguipísi catecãrápoi gapua rĩ. Enga chojninga:
–Yababía, angopísa banique aja yu. ¿Ama jogatique déji bayé iguíjnai ome yijorane, uyu jeta yimóngomíji uté?–
24Enga uaté chajnai uruode enga chojninga:
–Yapade i tu Betuel. Enga yapade dayé i tu Nacor, jé basa ga yapade daté i tu Mílca.–
25Enga chojninga:
–Jogadi déji arĩ́e jetiga amóñomíji yapade iguíjnai ajei to. Jé basa ga jnacarai dépoji to rĩ ome bachidode ujetiga ore tagu.–
26Enga jé u uje Abraham iroguipísi chichaga dagataidie iji jnumi enga chacãre Pangarádejnai Dupade gai. 27Enga chojninga: "Picotaquéode gajnengóri tu ua, Yangarádejna Dupade, yirósõri Abraham angureni tupúsu ua. Enga jé ũrepise ua ome baruode udore uje bosõripise yu ome yirósõri. Ua u gu uje bo quique dajei tiji yiquéode ujetiga yise yirósõri iguiosode ore iguíjnai."
28Enga jé u uje Rebéca chayóji daté yui ujetiga chingo dojñane ome. 29Uje Rebéca e chatata dojñane ome ore enga dajai Labán chayóji ore irani ore eruque yui ujetiga chucué Abraham iroguipísi ore iji ejode. 30Enga Labán uté irasique ore yui uje chimo gu nero gajnenie óro iji ujunai pei, jé iji jmanecapajei. Enga e chudute to nero ojñane ome Abraham iroguipísi jorane ore. Jecute chicáji ore yui ujetiga catecã́ri ore to. Enga chise ore iji ore irani ore eruque ejode, jé aja gachidode burica quedéjna ore. 31Uje e chisipise ore enga catecã́ri ore enga chojninga:
–Yimo uje Pangarádejnai Dupade chatapísaja ua. Enga acáji yoquiguíjnai. Chamáñaje que yipota jeta amóño iji guetique. E yimate cuchade iji yoquiguíjnai ome ua, jé chopo bachidode rĩ, jogadi e déji ome ore to.–
32Enga jé u uje Abraham iroguipísi ore nóna Labán aja ore iguíjnai. Uje e ore chise iguíjnai enga Labán jĩraque chejñu ore ugúchade iji ore gachidode burica quedéjna ore guidobode, enga chisi ome ore gachidode burica quedéjna ore posode ome ore. Enga dopoi yodi tome ore rĩ ujetiga ore churu darídade iji jnumone ome yodi.
33Enga jé u uje ore tibidi Abraham iroguipísi ujetiga tagu ore posode to. Mu Abraham iroguipísi chojninga:
–Cáma toque jetiga e yaque to. Chamáñaje cáma yingo yirósõri uruode ome uaque gu.–
Enga jé u uje Labán catecã́ri enga chojninga:
–Be enga angome yoque barósõri uruode gotígo.–
34Enga Abraham iroguipísi chojninga:
–Uacarajáyo yu uje yirósõri i tu Abraham, enga uté iroque yu. 35Enga Pangarádejnai Dupade chatapísaja yirósõri enga e chise dáringai ugúcharanguipíse to. Enga Pangarádejnai gueranone u udojo ome Abraham. Chisi ome áyasadie, jé aja burica quedéjnane, jé aja aquirájnane, jé aja burica quedéjna uñanie to uje ore i u caméllo, jé aja óro, pláta ore, jé aja ore irógode, iróguedie ore jnese. 36Uje e gatapise acotábia Sára nanique mu abi qué cuse nanique. Enga yirósõri e tẽrája dajnacari tuté ome dagúcha jiéode udore jnese. 37Mu yirósõri tibidi yu diríca jetiga yisa etarúdi tajíringai enga chojningame yu: 'Asa yetarúdi tajíringai ga gajnui tu ujetiga apésu yojningane cucha jnese.' Enga chojningame yu: 'Ca ajuéga jeta yujnacari chóji cananéagotóraque gari iji puniri udé. 38Mu bo, enga acáji yai casica jogasúode ore, enga acuebi gapúraque iji yiguiosode ujade ome yujnacari jetiga chóji gari.' 39Mu yichajnai yirósõri uruode diríca enga yojninga: '¿Mu jé yo ringome jne a, ujetiga ca gapúraque nóna yu aja ne?' 40Mu yirósõri chajnai yuruode to enga chojninga: 'Bamo uje e iyajmaque yu iji Pangarádejnai Dupade ũrajei enga yirajapise quigode. Enga a chiroque datocaitique gaté unirísõre iji baquei jne enga chatapísaja ua jne aja baqui yui ujetiga ese gapúraguiji baqui uté. Jetiga ese yiguiotodie jne enga be bajegaidéraguiji ore urodie ome yujnacari ujetiga chóji gari jne. Jé tiógara gu jeta yujnacari acotéraque tṍraji yai casica jogasúraque. 41Mu a ca yetaque ua jne jetiga uaté dayode ore chetaque ua, jetiga ãriápo iji yu bisideque jne.'–
42,43,44Enga Abraham iroguipísi qué jnopo daruode údi ome ore rĩ enga chojninga:
–Uje yĩríji ore iraninguémei yote uje déji ore erui ajei que, enga yicatecã́ri yirósõri angureni Dupade, enga yojninga:
'Jetiga jé ũrepise ua jeta átaja yu ome yirósõri utoquéode enga yuruode tocadepise to jne: ujetiga gapúraque doi ore irani tudé ore eruque, enga a yicatecã́ri enga a yojningame jne: 'Amurase barané ga yojiape yodi iji to.' Mu ujetiga uaté chajnai yuruode enga chojningame yu: 'Ojiape,' enga doi enga chisi ome yodi ome yu, enga chisiapome yachidedie rĩ, enga a yiraja uje berané uaté ome yu ujetiga yirósõri ujnacari chóji gari jne.–
45Enga Abraham iroguipísi qué jnopo daruode údi rĩ ome ore enga chojninga:
–Qué yugúsiji yicatecãraitigade gai nanique enga yimo Rebéca uje chijnoque darané tiji dorotadi. Enga yimo uje chijnime yodi ome darané enga chĩraníji dajnimi. Enga yicatecã́ri enga yojninga: '¿Apota ya jetiga yojiape barané jne a?' 46Enga uaté jĩraque chamurase darané iji dorotadi enga catecã́ri yu enga chojningame yu: 'Ejẽ́, ojiape, enga a yisi ome yodi ome bachidedie burica quedéjna caméllo to.' Enga jé u uje yóji yodi, enga yachidedie chójiapo to rĩ. 47Enga jé u uje yicatecã́ri uaté ome danique enga yojninga: '¿Gosi uro ua ya?' Enga chajnai yuruode enga chojninga: 'Betuel uro yu arĩ́e. Enga yapade uté dayé i tu Nacor, jé basa ga daté i tu Mílca.' Enga jé u uje yiraja enga yiji óro enga yaníraja ujunane edo, enga yiji óro carubi enga yicháji jmanecapajei. 48Enga yichaga yigataidie aja jnumi enga yicatecã́ri Dupade, enga yicotápise yirósõri Abraham angureni tuté. Yiraja gu uje uté u gu uje cho quique yiqui tome yu jetiga yiraja gapua jogadi. Chamáñaje yigaidi tu diríca gu ujetiga yise yirósõri iguiosode uñeque uróraque enga yirósõri ujnacari chóji gari.–
49Enga e catecãripísi ore enga chojninga:
–Yigaidi tupúsu gu ujetiga yiraja uacajéningo. Ujetiga osṍcho yirósõri, jeoga etácho áyipiedie. Be enga ango uacáyipiedie ome yu jetiga yĩríji yirósõri bisideque, jeoga baro nóna uyu.–
50Labán, Betuel jĩraque ore chimate dáyipiedie ome ñane ujetiga ore juéga doi ome Rebéca. Enga ore chojninga:
–Yirajágo uje cucha dacadode udore garani upúsu Pangarádejnai Dupade ome yoque. Enga que togome yoque ujetiga ca yipéco uté áyipiedie quigode. 51Bamo Rebéca iji de. Be ga nóna ua jne. Yocajéode u gu ujetiga barósõri ujnacari chóji gari jne iji uacaniri. Chamáñaje Pangarádejnai jé ajéo gu.–
52Uje Abraham iroguipísi e chudute ore uruode enga jé u uje chichaga denochai taja jnumi, enga chacãre Dupade gai ome darósõri ujnacari acoté. 53Enga jé u uje jno enga chijnime cuchade uñane iji dagúchade ujetiga chisi ome ore. Enga e chisiapome Rebéca gajnéone ome to rĩ. Enga chisi ome pláta nanganatáguedie, jé aja óro nanganatáguedie to, jé aja iguidé ueradéjnanie rĩ. Enga chisiapome Rebéca dajai to rĩ, jé aja daté ore iji dagúchade. 54Udojo quigade enga Abraham iroi, jorane ore taguíji Rebéca daté, dayé ore iguíjnai uje ore irasique ñane iji. Enga jé upo rĩ uje ore moji ore iguíjnai ajei to rĩ iji dejai. Mu dire uñai enga ore catecã́ri Rebéca dayé ore enga ore chojninga:
–A yajningopója yoquirósõri te jne rĩ.–
55Mu Rebéca daté, dajai ore, ore chajnai uruode enga ore chojninga:
–Ayape jne enga Rebéca mochádode chejna yijmanáyone jne iji de yoquiguíjnai ga jé boyo jne.–
56Mu Abraham iroguipísi chojninga:
–Úngare. Ca ajochapo yajei údi rĩ enga yajníngo to ga yicagopóji yirósõri te jne ga yingongome yocojñane ome jne uje Dupade chatapísaja yóguiji udojo gu enga e yejnángo iroquéode aja guesi gu.–
57Mu Rebécadaté, ore chajnai uruode enga chojninga:
–A yibidábi Rebéca jne enga yirajágo áyipieraque jne ujetiga nóna uaque iji de, jeoga nóna uaque iji ejórique jne.–
58Enga jé u uje daté, dajai ore tibidi Rebéca enga ore catecã́ri ujetiga pota nóna Abraham iroguipísi jé iji de deréjnai uje ore jno. Enga Rebéca jĩraque chajnai daté, dajai ore uruode enga chojninga:
–A yijína ore to jne.–
59Enga jé u uje juéga doi tome ore. Enga Rebécadaté irogué irasé Rebéca nanique iji úringamía disape, enga uaté nóna Abraham irógode, ore aja ore qui to. 60Uje cáma Rebéca jno mu ore cho darúja enga ore chojninga:
"Yoquẽro á, ¡yipécopú ga bape disi ejórigo jiei ore jne jõ!
Enga bape disi ejórigo pujnuéngaisṍripíse ore jne enga a ore sué damajósoningo ore gáyode jne.
Enga a ore cho dajnenguíji damajósoningo idáningo jne jetiga ore chose damajosórone ore jne."
61Enga jé u uje Rebéca, iróguedie ore choru burica quedéjnane caméllo aja Abraham iroguipísi quigade. Enga jé yojñane udojo u uje Abraham iroguipísi chise Rebéca enga jno Rebéca údi aja darósõri ujnacaripísi.
62Enga Isaac déji erãpetarei Neguev nanique uje pésu darengúi tiji. Enga doi yodi iji sibíjnai gajné ejopié uje i u "Dupa Piminingásõri Gajné Ejopié" uje chimo Agar iji nanique gu. Enga e chajni iji yodi. 63Mu uje guedé e jnosipise enga Isaac chisṍriji dati bisideque. Mu e chimo burica quedéjnane caméllo iji ti uje cáputapísiji. 64Mu jé cho Rebéca to, chajire daquei ga chimo jnacánique iji te to. Enga jé u uje doi jnumi tiji doruti burica quedéjna caméllo gai. 65Enga catecã́ri Abraham iroi enga chojninga:
–¿Gosi te a uje tṍraji yoquiquei ome yoque?–
Enga Abraham iroi chajnai uruode enga chojninga:
–Yirósõri u arĩ́e.–
Enga jĩraque Rebéca chisa dedodie gajnei borapeque enga chaco dedodie gai enga gusúpusu edodie iji guesi. Ore gaidi tu gu ujetiga ca piraja chequedíe ore.
66Enga e Abraham iroi ore chise Isaac enga chatata cuchade ome jnese. 67Enga e ore cha ore catecã́ri ñane enga jé u uje Isaac jno Rebéca údi aja daguíjnai cárpa údi ujetiga chóji gari. Isaac uté daté gajneque iguíjnai uje cáma toi nanique. Enga Isaac irasépise Rebéca. Enga jnusiétaque diríca uje jnusi daté mu uje e déji Rebéca gari ga e cha dajnusiétigade.
Currently Selected:
Génesis 24: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
Génesis 24
24
Abraham chutṍri daroguipísi ujetiga uté chucué gapúraque ome dajnacari Isaac ujetiga ujnacari tuté chóji gari
1Enga Abraham e choquíjnapise. Enga jecucha Pangarádejnai Dupade chatapísaja nanique ome cuchade jnese. 2,3,4Ga jé u nanique uje Abraham tibidi daroguipísi uje e choquíjnapise ome irógode uñane. Uje uté u nanique uje chañurupúsu ugúchade guio jnese. Enga Abraham e catecã́ri uté enga chojninga:
–Be jne, enga asa yetarúdi tajíringai ga ãráji gaté. Ga imoi tu ujetiga bepísi yojningane cucha. Enga Pangarádejnai Dupade iji gatajnoquei chimo ua ga imoi tu uje babepísi yuruode ome cuchade. Yajegaidi u udé ome ua jetiga arajapise uje ũrepise yuruode. Que yipotapísa jeta yujnacari Isaac chisa cananéagotóraque iji de. Jecute be enga acáji yocuniri casé, jetiga ese enga ajire yiguiosode ore ujade ome gapúraque bajegaidéraque enga ajiripise bajegaidéraque iji ore ujade, enga ajnapója de rĩ ujetiga yujnacari Isaac chóji gari.–
5Enga jé u uje iroguipísi chajnai uruode enga chojninga:
–¿Jé yo ringome jne a, jetiga gapúraque ca nóna yu? ¿Ama bajegaidi u jne a ujetiga yijnapo bajnacari aja baniri rĩ?–
6-7Mu Abraham chajnai uruode enga chojninga:
–Úngare. Ca ajnapója yocuniri rĩ. Bamo arĩ́e uje Pangarádejnai Dupade iji gatajnoquei catecã́ri yu nanique enga chojninga nanique: "Boji bayé iguíjnai udé, uniri ore, enga ajíñome baguiosode iji de jnese." Enga chisi ome daru iyiejájnane ome yu nanique ujetiga yajneque puniri Canaán udé nanique. Mu que gusu yu gotique, mu yape disi ejórigo ore gajneque to jne. Jecute que yipotapísa jeta yujnacari Isaac jnoji de. Ga a jé u jne jetiga Dupade chutṍri darótique gaté unirísõre aja baquénique jne jetiga dimane gapua iji baquei. Ga a nóna ua aja de jne. 8Mu ujetiga gapúraque ca pota nóna ua aja de, enga que máraque ua ome yu. ¡Mu yijaropise yuruode iji jnumi ome ua ujetiga ca ajna yujnacari aja yocuniri casé jne rĩ!–
9Enga jé u uje Abraham iroguipísi chisa etarúdi tajíringai enga chojninga:
–Enga a yipésu bojningane cucha jnese jne.–
10Ga jé u nanique uje chucué cucha orerã́tigo iji darósõri ugúchade jetiga tẽrame deyáraque gapu jne, jé aja jogasúode ore. Enga chujé cuchade aja dachidode burica quedéjna gáyode. Enga chejna yijmanáyone burica quedéjnane uje chijnoque ugúchade. Enga burica quedéjnane udore i u caméllo ome ore nanique. Enga jé u uje jno nanique enga chicáji ore idai Nacor uje déji punire quedéjnai Mesopotámia. 11Enga jé u nanique uje Abraham iroi e chise ore idai Nacor eruei mu e totási udore uje chise. Enga jecucha chequedíe, gapudíe ore iraninguémeque ore jochai yote nanique. Enga jecucha ore chĩrate uje e tota udore nanique. Jecute chequedíe e ore chijnime yodi nanique uje Abraham iroguipísi di nanique. Enga jé u nanique uje ore chácariji ore jochai yote ejode, gachidode burica quedéjna ore. Enga ore chácariji jnumone iji ejode. 12Enga jé u nanique uje Abraham iroi catecã́ri Dupade enga chojninga: "Dupade á, yirósõri angureni tu ua ya. Enga átapísaja yu jetiga asi ome gapúragome yu jne. Osõripise yirósõri enga asi ome bajegaidéraque gapu ome jetiga ujnacari chóji gari jne. 13A qué yácariji de jne ore jochai yote uje jecucha gapudíe ore chĩrate yodi iji de gu. 14Enga a yicatecã́ri gapúraque jne enga a yojninga: 'Yojiape baranéraque jne.' Enga a chisi ome darané ome yu ujetiga yóji enga a chojningame yu jne: 'A yisi ome ua, enga a yisiapome bachidode burica quedéjna caméllo jne.' Jeta chisi ome yodi ome yu, enga chisiapome yachidode, burica quedéjna ore, enga a e yiraja uje berané uaté ome yu ujetiga yirósõri ujnacari Isaac acoté tu. Enga a yiraja jne uje bosõre yu ome yirósõri."
15Uje cáma uté cha dacatecãraitigade nanique mu chimo gapúraque enga qué doi yodi, enga chijnoque darané tiji dorotadi. Enga gapua uaté i tu Rebéca. Dayé i tu Betuel, enga Abraham desai Nacor ape gapua tuaté dayé nanique iji dacoté Mílca gari. 16Enga Rebéca uaté omepise nanique. Que gusu omé mu cáma jnacánique chimo to nanique. Enga e di nanique ga chijnime yodi jetiga chĩrate darané tiji. Enga e chajnírasaja guidai. 17Mu Abraham iroguipísi chucajningárome gapua uaté. Enga e chise, ga e catecã́ri uaté enga chojninga:
–¿Apota ujetiga yojiape barané?–
18Enga jé u uje uaté jĩraque chajnai uruode. Chamurásiji dorotadi ga chicháji iquei enga chojninga:
–¡Ojiape!–
19Enga Abraham iroi chóji, mu Rebéca qué catecãrápoi rĩ enga chojninga:
–A yiji yodi ome bachidode burica quedéjna caméllo to jeta ore chóji enga ore chĩreta dacadie to.–
20Enga chojne ié taja ore gachidode agapié, enga e dopoi rĩ enga e chojnepo rĩ, enga jecucha ga doi yodi ga chójneja ore gachidode agapié enga jé chuságaja uje subudé Abraham iroguipísi gachidode ore jnese. 21Enga gapua doi yodi enga Abraham iroi topísiji gai. Pota gu jeta chiraja ujeta Pangarádejnai Dupade ajegaidé tu uaté. 22Uje e subudé gachidode iji gapua guerani yote uté, enga jé u uje e chiraja uje Dupade guerané gapua uaté. Jecute jno enga chijnime derané óro enga chaníraja gapua ujunane edo ujetiga aparagate ome. Enga dopoi óro carubi te rĩ enga chaníraja gapua uaté jmanecapajei. Enga ore chuguhese ujunane gajnei óro enga e chise 6 grámos nanique, jé basa jmanecai erã́sori chise 100 grámos. Enga jiei gueranone udojo oredie nanique. 23Enga jé u uje Abraham iroguipísi catecãrápoi gapua rĩ. Enga chojninga:
–Yababía, angopísa banique aja yu. ¿Ama jogatique déji bayé iguíjnai ome yijorane, uyu jeta yimóngomíji uté?–
24Enga uaté chajnai uruode enga chojninga:
–Yapade i tu Betuel. Enga yapade dayé i tu Nacor, jé basa ga yapade daté i tu Mílca.–
25Enga chojninga:
–Jogadi déji arĩ́e jetiga amóñomíji yapade iguíjnai ajei to. Jé basa ga jnacarai dépoji to rĩ ome bachidode ujetiga ore tagu.–
26Enga jé u uje Abraham iroguipísi chichaga dagataidie iji jnumi enga chacãre Pangarádejnai Dupade gai. 27Enga chojninga: "Picotaquéode gajnengóri tu ua, Yangarádejna Dupade, yirósõri Abraham angureni tupúsu ua. Enga jé ũrepise ua ome baruode udore uje bosõripise yu ome yirósõri. Ua u gu uje bo quique dajei tiji yiquéode ujetiga yise yirósõri iguiosode ore iguíjnai."
28Enga jé u uje Rebéca chayóji daté yui ujetiga chingo dojñane ome. 29Uje Rebéca e chatata dojñane ome ore enga dajai Labán chayóji ore irani ore eruque yui ujetiga chucué Abraham iroguipísi ore iji ejode. 30Enga Labán uté irasique ore yui uje chimo gu nero gajnenie óro iji ujunai pei, jé iji jmanecapajei. Enga e chudute to nero ojñane ome Abraham iroguipísi jorane ore. Jecute chicáji ore yui ujetiga catecã́ri ore to. Enga chise ore iji ore irani ore eruque ejode, jé aja gachidode burica quedéjna ore. 31Uje e chisipise ore enga catecã́ri ore enga chojninga:
–Yimo uje Pangarádejnai Dupade chatapísaja ua. Enga acáji yoquiguíjnai. Chamáñaje que yipota jeta amóño iji guetique. E yimate cuchade iji yoquiguíjnai ome ua, jé chopo bachidode rĩ, jogadi e déji ome ore to.–
32Enga jé u uje Abraham iroguipísi ore nóna Labán aja ore iguíjnai. Uje e ore chise iguíjnai enga Labán jĩraque chejñu ore ugúchade iji ore gachidode burica quedéjna ore guidobode, enga chisi ome ore gachidode burica quedéjna ore posode ome ore. Enga dopoi yodi tome ore rĩ ujetiga ore churu darídade iji jnumone ome yodi.
33Enga jé u uje ore tibidi Abraham iroguipísi ujetiga tagu ore posode to. Mu Abraham iroguipísi chojninga:
–Cáma toque jetiga e yaque to. Chamáñaje cáma yingo yirósõri uruode ome uaque gu.–
Enga jé u uje Labán catecã́ri enga chojninga:
–Be enga angome yoque barósõri uruode gotígo.–
34Enga Abraham iroguipísi chojninga:
–Uacarajáyo yu uje yirósõri i tu Abraham, enga uté iroque yu. 35Enga Pangarádejnai Dupade chatapísaja yirósõri enga e chise dáringai ugúcharanguipíse to. Enga Pangarádejnai gueranone u udojo ome Abraham. Chisi ome áyasadie, jé aja burica quedéjnane, jé aja aquirájnane, jé aja burica quedéjna uñanie to uje ore i u caméllo, jé aja óro, pláta ore, jé aja ore irógode, iróguedie ore jnese. 36Uje e gatapise acotábia Sára nanique mu abi qué cuse nanique. Enga yirósõri e tẽrája dajnacari tuté ome dagúcha jiéode udore jnese. 37Mu yirósõri tibidi yu diríca jetiga yisa etarúdi tajíringai enga chojningame yu: 'Asa yetarúdi tajíringai ga gajnui tu ujetiga apésu yojningane cucha jnese.' Enga chojningame yu: 'Ca ajuéga jeta yujnacari chóji cananéagotóraque gari iji puniri udé. 38Mu bo, enga acáji yai casica jogasúode ore, enga acuebi gapúraque iji yiguiosode ujade ome yujnacari jetiga chóji gari.' 39Mu yichajnai yirósõri uruode diríca enga yojninga: '¿Mu jé yo ringome jne a, ujetiga ca gapúraque nóna yu aja ne?' 40Mu yirósõri chajnai yuruode to enga chojninga: 'Bamo uje e iyajmaque yu iji Pangarádejnai Dupade ũrajei enga yirajapise quigode. Enga a chiroque datocaitique gaté unirísõre iji baquei jne enga chatapísaja ua jne aja baqui yui ujetiga ese gapúraguiji baqui uté. Jetiga ese yiguiotodie jne enga be bajegaidéraguiji ore urodie ome yujnacari ujetiga chóji gari jne. Jé tiógara gu jeta yujnacari acotéraque tṍraji yai casica jogasúraque. 41Mu a ca yetaque ua jne jetiga uaté dayode ore chetaque ua, jetiga ãriápo iji yu bisideque jne.'–
42,43,44Enga Abraham iroguipísi qué jnopo daruode údi ome ore rĩ enga chojninga:
–Uje yĩríji ore iraninguémei yote uje déji ore erui ajei que, enga yicatecã́ri yirósõri angureni Dupade, enga yojninga:
'Jetiga jé ũrepise ua jeta átaja yu ome yirósõri utoquéode enga yuruode tocadepise to jne: ujetiga gapúraque doi ore irani tudé ore eruque, enga a yicatecã́ri enga a yojningame jne: 'Amurase barané ga yojiape yodi iji to.' Mu ujetiga uaté chajnai yuruode enga chojningame yu: 'Ojiape,' enga doi enga chisi ome yodi ome yu, enga chisiapome yachidedie rĩ, enga a yiraja uje berané uaté ome yu ujetiga yirósõri ujnacari chóji gari jne.–
45Enga Abraham iroguipísi qué jnopo daruode údi rĩ ome ore enga chojninga:
–Qué yugúsiji yicatecãraitigade gai nanique enga yimo Rebéca uje chijnoque darané tiji dorotadi. Enga yimo uje chijnime yodi ome darané enga chĩraníji dajnimi. Enga yicatecã́ri enga yojninga: '¿Apota ya jetiga yojiape barané jne a?' 46Enga uaté jĩraque chamurase darané iji dorotadi enga catecã́ri yu enga chojningame yu: 'Ejẽ́, ojiape, enga a yisi ome yodi ome bachidedie burica quedéjna caméllo to.' Enga jé u uje yóji yodi, enga yachidedie chójiapo to rĩ. 47Enga jé u uje yicatecã́ri uaté ome danique enga yojninga: '¿Gosi uro ua ya?' Enga chajnai yuruode enga chojninga: 'Betuel uro yu arĩ́e. Enga yapade uté dayé i tu Nacor, jé basa ga daté i tu Mílca.' Enga jé u uje yiraja enga yiji óro enga yaníraja ujunane edo, enga yiji óro carubi enga yicháji jmanecapajei. 48Enga yichaga yigataidie aja jnumi enga yicatecã́ri Dupade, enga yicotápise yirósõri Abraham angureni tuté. Yiraja gu uje uté u gu uje cho quique yiqui tome yu jetiga yiraja gapua jogadi. Chamáñaje yigaidi tu diríca gu ujetiga yise yirósõri iguiosode uñeque uróraque enga yirósõri ujnacari chóji gari.–
49Enga e catecãripísi ore enga chojninga:
–Yigaidi tupúsu gu ujetiga yiraja uacajéningo. Ujetiga osṍcho yirósõri, jeoga etácho áyipiedie. Be enga ango uacáyipiedie ome yu jetiga yĩríji yirósõri bisideque, jeoga baro nóna uyu.–
50Labán, Betuel jĩraque ore chimate dáyipiedie ome ñane ujetiga ore juéga doi ome Rebéca. Enga ore chojninga:
–Yirajágo uje cucha dacadode udore garani upúsu Pangarádejnai Dupade ome yoque. Enga que togome yoque ujetiga ca yipéco uté áyipiedie quigode. 51Bamo Rebéca iji de. Be ga nóna ua jne. Yocajéode u gu ujetiga barósõri ujnacari chóji gari jne iji uacaniri. Chamáñaje Pangarádejnai jé ajéo gu.–
52Uje Abraham iroguipísi e chudute ore uruode enga jé u uje chichaga denochai taja jnumi, enga chacãre Dupade gai ome darósõri ujnacari acoté. 53Enga jé u uje jno enga chijnime cuchade uñane iji dagúchade ujetiga chisi ome ore. Enga e chisiapome Rebéca gajnéone ome to rĩ. Enga chisi ome pláta nanganatáguedie, jé aja óro nanganatáguedie to, jé aja iguidé ueradéjnanie rĩ. Enga chisiapome Rebéca dajai to rĩ, jé aja daté ore iji dagúchade. 54Udojo quigade enga Abraham iroi, jorane ore taguíji Rebéca daté, dayé ore iguíjnai uje ore irasique ñane iji. Enga jé upo rĩ uje ore moji ore iguíjnai ajei to rĩ iji dejai. Mu dire uñai enga ore catecã́ri Rebéca dayé ore enga ore chojninga:
–A yajningopója yoquirósõri te jne rĩ.–
55Mu Rebéca daté, dajai ore, ore chajnai uruode enga ore chojninga:
–Ayape jne enga Rebéca mochádode chejna yijmanáyone jne iji de yoquiguíjnai ga jé boyo jne.–
56Mu Abraham iroguipísi chojninga:
–Úngare. Ca ajochapo yajei údi rĩ enga yajníngo to ga yicagopóji yirósõri te jne ga yingongome yocojñane ome jne uje Dupade chatapísaja yóguiji udojo gu enga e yejnángo iroquéode aja guesi gu.–
57Mu Rebécadaté, ore chajnai uruode enga chojninga:
–A yibidábi Rebéca jne enga yirajágo áyipieraque jne ujetiga nóna uaque iji de, jeoga nóna uaque iji ejórique jne.–
58Enga jé u uje daté, dajai ore tibidi Rebéca enga ore catecã́ri ujetiga pota nóna Abraham iroguipísi jé iji de deréjnai uje ore jno. Enga Rebéca jĩraque chajnai daté, dajai ore uruode enga chojninga:
–A yijína ore to jne.–
59Enga jé u uje juéga doi tome ore. Enga Rebécadaté irogué irasé Rebéca nanique iji úringamía disape, enga uaté nóna Abraham irógode, ore aja ore qui to. 60Uje cáma Rebéca jno mu ore cho darúja enga ore chojninga:
"Yoquẽro á, ¡yipécopú ga bape disi ejórigo jiei ore jne jõ!
Enga bape disi ejórigo pujnuéngaisṍripíse ore jne enga a ore sué damajósoningo ore gáyode jne.
Enga a ore cho dajnenguíji damajósoningo idáningo jne jetiga ore chose damajosórone ore jne."
61Enga jé u uje Rebéca, iróguedie ore choru burica quedéjnane caméllo aja Abraham iroguipísi quigade. Enga jé yojñane udojo u uje Abraham iroguipísi chise Rebéca enga jno Rebéca údi aja darósõri ujnacaripísi.
62Enga Isaac déji erãpetarei Neguev nanique uje pésu darengúi tiji. Enga doi yodi iji sibíjnai gajné ejopié uje i u "Dupa Piminingásõri Gajné Ejopié" uje chimo Agar iji nanique gu. Enga e chajni iji yodi. 63Mu uje guedé e jnosipise enga Isaac chisṍriji dati bisideque. Mu e chimo burica quedéjnane caméllo iji ti uje cáputapísiji. 64Mu jé cho Rebéca to, chajire daquei ga chimo jnacánique iji te to. Enga jé u uje doi jnumi tiji doruti burica quedéjna caméllo gai. 65Enga catecã́ri Abraham iroi enga chojninga:
–¿Gosi te a uje tṍraji yoquiquei ome yoque?–
Enga Abraham iroi chajnai uruode enga chojninga:
–Yirósõri u arĩ́e.–
Enga jĩraque Rebéca chisa dedodie gajnei borapeque enga chaco dedodie gai enga gusúpusu edodie iji guesi. Ore gaidi tu gu ujetiga ca piraja chequedíe ore.
66Enga e Abraham iroi ore chise Isaac enga chatata cuchade ome jnese. 67Enga e ore cha ore catecã́ri ñane enga jé u uje Isaac jno Rebéca údi aja daguíjnai cárpa údi ujetiga chóji gari. Isaac uté daté gajneque iguíjnai uje cáma toi nanique. Enga Isaac irasépise Rebéca. Enga jnusiétaque diríca uje jnusi daté mu uje e déji Rebéca gari ga e cha dajnusiétigade.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2021 Ethnos360