Génesis 25
25
Abraham chisapo dacoté ejo enga acoté ejo tuaté i tu Cetúra nanique, ga Abraham abode cuse to iji uaté gari
1Chise diri uje Abraham chisapo dacoté ejo te rĩ iji dacoté togué quigade enga uaté i tu Cetúra. 2Enga Abraham abode cuse iji uaté gari to. Enga ore íode u udojo: uñai i tu Zimram, jé basa ga uñai i tu Jocsán, jé basa ga uñai i tu Medán, jé basa ga uñai i tu Madián, jé basa ga uñai i tu Isbac, enga ejopísi i tu Súa. 3Enga Jocsán abode cuse to enga ore íode upo udojo nanique rĩ: Séba, Dedán ore. Enga asuréogosode, jé aja letuséogosode, jé aja leuméogosode ore gãrapi u Dedán nanique. 4Enga Madián abode cuse to nanique, enga ore íode upo udojo rĩ: Éfa, aja Éfer, aja Hánoc, aja Abída, aja Élda. Yujúdode udojo ore gãrapié tu Abraham acoté ejo Cetúra uaté nanique. 5Mu uje Abraham e choquíjnapise nanique, mu e chichaga dagúcha dipeséode aja dajnacari Isaac nanique jeta ujnacari gajneque cuchade jnese jne. 6Enga Abraham e garósi jeta toi nanique enga tibidi dajnacarode uñane iji dacoté uñanie gari to ujetiga tẽrája ore ome dagúchade uñane, enga jé u uje chojningame ore:
–Boyo enga angaráño uacaquitígo ome yujnacaripísi quitique jne. Enga boyo ga acayóji guedé garani yui te jne.–
Uje Abraham topísi nanique enga ujnacarode ore chijóchame iji dagaidé cucarã́tedó uje i tu Macpéla nanique
7Enga Abraham guejnanie sequerei e déji 175 nanique uje topísi nanique.
8Enga Abraham que ejnarétaque gotique nanique, mu chisipise deruei gu enga jé toi bisidec. Enga uté chajna dayode jnani bajácho uje chopise ore gu uje ore topísi jnese to nanique rĩ. 9-10Mu e toi enga Isaac, Ismael ore jno dayé údi ujetiga ore chijóchame iji dagaidé cucarã́tedó uaté uje i u Macpéla nanique. U uje Abraham doi oré tome iji Zohar ujnacari Efrón gajnei jnupe pei nanique iji hitítagosode ore uniri. Uje ore uniri uté déji ore idai Mámre dosadi iji guedé garani yui. Enga ore chijóchame dai Abraham iji dacotépise Sára ejoi. 11Enga Dupade chatapísaja Isaac nanique iji dayé quigade uje e toi. Enga Isaac qué chácariji sibíjnai gajnei ejopié ejo uje i tu "Dupa Piminingásõri Gajné Ejopié" nanique uje chimo Agar iji nanique.
Ismael ape disi ejode ore íode u udojo nanique
12A qué yatata Abraham ujnacari Ismael abode íode ome uaque jne. Uje Ismael uté daté u Agar, Sára irogué nanique. Enga egíptogoto uaté to nanique. 13A yatata ape bajai i bajaque jne. Nebaiot u bajai, enga quigaminórone ore íode upo unojo rĩ: Cédar, Adbeel, Míbsam, 14Mísma, Dúma, Mássa, 15Hadar, Téma, Jetur, Náfis, enga quigaminoripísi i tu Cedéma. 16Enga Ismael abode gare iji yirídai chojmarai nanique. Enga ore chisite rágaja erámi to nanique enga jé ore cho danirone íode iji déode nanique. Enga eduguéjnapise ore jnese iji danirone udore nanique.
17Enga Ismael guejnanie sequerei déji 137 nanique uje topísi to. Enga uté chajna dayode jnani bajácho uje chopise ore to uje ore toi jnese to nanique rĩ. 18Enga Ismael ape disi ejode ore pésu danirone iji punirone Havíla, Shur ore ujai. Enga Ismael ape disi ejode ore unirone, egíptogosode ore uniri chise ñane. Enga asíriagosode ore chajúguiji Ismael ape disi ejode uniri iji gatócoro uje ore chicáji Egípto nanique. Enga Ismael ape disi ejode, Abraham ujnacarode uñane ape disi ejode que ore cunguésõri ñane enga idájapise ore iji ñane nanique.
Isaac chijócha Dupade ajei údi nanique ujetiga chisi ome ore atígome ore, ga jé u nanique uje jeque Rebéca enga abode Jacob, Esaú ore base
19A qué yatata Abraham ujnacaripísi Isaac adode ome uaque jne. 20Isaac uté guejnanie sequerei e chise 40 años nanique uje chisa dacoté Rebéca. Uje Betuel uro uaté nanique. Enga araméogosi Labán u Rebéca dajai nanique uje uté uniri i u Padán-áram nanique. 21Mu aberé Rebéca nanique jecute abai Isaac chijóchapíse Pangarádejnai Dupade ajei údi ujetiga chisi ome ore atígome to. Enga Pangarádejnai tangaripísi Isaac icatecãraitigade nanique enga jé u uje Rebéca abi e déji ajei to. 22Mu garaja abode iji ajei nanique. Enga ore chipatigase re iji ñane iji ajei. Mu Rebéca jecucha ga narañime dabode uje ore quejna iji ajei enga chojningame re: "¡Qué jeque yitobi enga ore basape to!" Enga catecã́ri Dupade ome re nanique uje narañípisome daca uchiejnane iji dajei gu. 23Enga Pangarádejnai Dupade chajnai Rebéca icatecãraitigade ome re nanique. Enga chojninga:
"Baca uaté gare ore iji bajei. A chise dínique jne jeta babode udore ore ape disi ejórigo jiépisi ore jne, mu a ore cãra daníningo ome ñane jne.
Enga babode udore uje ore chetaque ñane iji bajei, a jé ore ape disi ejórigo ore isocai tu jne uje a ore chetaque ñane to jne iji daníningo.
Mu babode udore uñeque ape disi ejórigo a uajadipise ore jne ome jõrai ape disi ejórigo. A babode udore base jne mu a bajai u jne ujeta doi ejoi iroquéode."
24Ga udojo quigade nanique enga Rebéca ica base, mu garaja ore aja guesi. 25Enga ape bajai gatororodie caratei, enga ojójãi déji gai jnese. Enga ore chĩ́care Esaú aja dabi tuté nanique uje ojójãi déji gai gu. Enga Esaú urui qui tu gu ome ore. 26Mu ape ejoi base to nanique mu chisa bajai ujadia taja guesi yui. Enga ore pésu dabi uté i enga i tu Jacob uje chisa darẽjai ujadia taja guesi gu, enga Jacob urui qui tu gu ome ore. Enga Isaac guejnanie sequerei e chise 60 años nanique uje Rebéca abode udore e ore base.
Esaú tẽra dáringai urẽja ome desai nanique enga oré tu desai ãraquegode cugué edo caratacho
27Enga ore abode base, ga ore quérã nanique enga ore chise dáringai jnacare nanique. Enga Esaú jnacare nanique enga chirajapise uje ojicarotaque nanique. Enga jecucha ga chisõre ome dosipéode. Jé basa ga Jacob jecucha ga paraque enga que chisõre gotique, mu chijnóra ujeta chácariji degúi. 28Ore dai Isaac irasi tu dape bajai Esaú, uje irasique dosipéode gu uje chujé enga ore tagu yugode. Jé basa ore daté Rebéca irasi tu Jacob.
29Chise diri uje Jacob qué chãrei ore posode, mu urẽjai di mu isoránenie chujé enga eyuguipise. 30Enga Esaú catecã́ri desai Jacob enga chojninga:
–Asi yu iji bãraquegode cugué edo caratacho enga yagu to. Chaguhei chejnapise yu.–
(Enga jé u nanique uje ore cho Esaú i iji ãraquei enochai uje carataque gu. Enga i jé u Edom ome ore uje urui qui jé u gu ome ore.)
31Enga Jacob chajnai darẽjai uruode enga chojninga:
–Ajuéga báringai urẽjai ome yu, enga agu to yãraquei. Enga yo yajnéngu yocai ugúchade, uru iyiejájnane ore jnese jne.–
32Enga Esaú dojnóngaja dáringai urẽja, dayé uru iyiejájnane ore enga chojninga:
–Bamo yu arĩ́e uje yitorási ome yiyaguhei enga que cuchárique yúringai urẽja gotique ome yu.–
33Mu Jacob qué nararápo rĩ enga chojninga:
–Be ga asi ome baru iyiejájnane ome yu jne jeta yajneque báringai urẽja jne.–
Enga jé u uje Esaú chojningame desai uruode:
–Bajneque yúringai urẽja jne, enga jé ũrepise yuru iyiejájnane udojo ome ua.–
Enga jé u uje Esaú chisi ome daru iyiejájnane ome desai Jacob ujetiga Jacob cho dajnéngu dayai úringai urẽja ome re.
34Enga jé u nanique uje Jacob chisi ome dãraquegode cugué edo caratacho ome dayai. Enga chátaja arurégode rĩ. Enga jé u nanique uje Esaú cha dáringai chagu enga chóji yodi rĩ enga jec u uje jno enga cha dáringai urẽja enga chojninga: "Que cucha ome yu ujeta yesai cho urẽjai iji re."
Currently Selected:
Génesis 25: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
Génesis 25
25
Abraham chisapo dacoté ejo enga acoté ejo tuaté i tu Cetúra nanique, ga Abraham abode cuse to iji uaté gari
1Chise diri uje Abraham chisapo dacoté ejo te rĩ iji dacoté togué quigade enga uaté i tu Cetúra. 2Enga Abraham abode cuse iji uaté gari to. Enga ore íode u udojo: uñai i tu Zimram, jé basa ga uñai i tu Jocsán, jé basa ga uñai i tu Medán, jé basa ga uñai i tu Madián, jé basa ga uñai i tu Isbac, enga ejopísi i tu Súa. 3Enga Jocsán abode cuse to enga ore íode upo udojo nanique rĩ: Séba, Dedán ore. Enga asuréogosode, jé aja letuséogosode, jé aja leuméogosode ore gãrapi u Dedán nanique. 4Enga Madián abode cuse to nanique, enga ore íode upo udojo rĩ: Éfa, aja Éfer, aja Hánoc, aja Abída, aja Élda. Yujúdode udojo ore gãrapié tu Abraham acoté ejo Cetúra uaté nanique. 5Mu uje Abraham e choquíjnapise nanique, mu e chichaga dagúcha dipeséode aja dajnacari Isaac nanique jeta ujnacari gajneque cuchade jnese jne. 6Enga Abraham e garósi jeta toi nanique enga tibidi dajnacarode uñane iji dacoté uñanie gari to ujetiga tẽrája ore ome dagúchade uñane, enga jé u uje chojningame ore:
–Boyo enga angaráño uacaquitígo ome yujnacaripísi quitique jne. Enga boyo ga acayóji guedé garani yui te jne.–
Uje Abraham topísi nanique enga ujnacarode ore chijóchame iji dagaidé cucarã́tedó uje i tu Macpéla nanique
7Enga Abraham guejnanie sequerei e déji 175 nanique uje topísi nanique.
8Enga Abraham que ejnarétaque gotique nanique, mu chisipise deruei gu enga jé toi bisidec. Enga uté chajna dayode jnani bajácho uje chopise ore gu uje ore topísi jnese to nanique rĩ. 9-10Mu e toi enga Isaac, Ismael ore jno dayé údi ujetiga ore chijóchame iji dagaidé cucarã́tedó uaté uje i u Macpéla nanique. U uje Abraham doi oré tome iji Zohar ujnacari Efrón gajnei jnupe pei nanique iji hitítagosode ore uniri. Uje ore uniri uté déji ore idai Mámre dosadi iji guedé garani yui. Enga ore chijóchame dai Abraham iji dacotépise Sára ejoi. 11Enga Dupade chatapísaja Isaac nanique iji dayé quigade uje e toi. Enga Isaac qué chácariji sibíjnai gajnei ejopié ejo uje i tu "Dupa Piminingásõri Gajné Ejopié" nanique uje chimo Agar iji nanique.
Ismael ape disi ejode ore íode u udojo nanique
12A qué yatata Abraham ujnacari Ismael abode íode ome uaque jne. Uje Ismael uté daté u Agar, Sára irogué nanique. Enga egíptogoto uaté to nanique. 13A yatata ape bajai i bajaque jne. Nebaiot u bajai, enga quigaminórone ore íode upo unojo rĩ: Cédar, Adbeel, Míbsam, 14Mísma, Dúma, Mássa, 15Hadar, Téma, Jetur, Náfis, enga quigaminoripísi i tu Cedéma. 16Enga Ismael abode gare iji yirídai chojmarai nanique. Enga ore chisite rágaja erámi to nanique enga jé ore cho danirone íode iji déode nanique. Enga eduguéjnapise ore jnese iji danirone udore nanique.
17Enga Ismael guejnanie sequerei déji 137 nanique uje topísi to. Enga uté chajna dayode jnani bajácho uje chopise ore to uje ore toi jnese to nanique rĩ. 18Enga Ismael ape disi ejode ore pésu danirone iji punirone Havíla, Shur ore ujai. Enga Ismael ape disi ejode ore unirone, egíptogosode ore uniri chise ñane. Enga asíriagosode ore chajúguiji Ismael ape disi ejode uniri iji gatócoro uje ore chicáji Egípto nanique. Enga Ismael ape disi ejode, Abraham ujnacarode uñane ape disi ejode que ore cunguésõri ñane enga idájapise ore iji ñane nanique.
Isaac chijócha Dupade ajei údi nanique ujetiga chisi ome ore atígome ore, ga jé u nanique uje jeque Rebéca enga abode Jacob, Esaú ore base
19A qué yatata Abraham ujnacaripísi Isaac adode ome uaque jne. 20Isaac uté guejnanie sequerei e chise 40 años nanique uje chisa dacoté Rebéca. Uje Betuel uro uaté nanique. Enga araméogosi Labán u Rebéca dajai nanique uje uté uniri i u Padán-áram nanique. 21Mu aberé Rebéca nanique jecute abai Isaac chijóchapíse Pangarádejnai Dupade ajei údi ujetiga chisi ome ore atígome to. Enga Pangarádejnai tangaripísi Isaac icatecãraitigade nanique enga jé u uje Rebéca abi e déji ajei to. 22Mu garaja abode iji ajei nanique. Enga ore chipatigase re iji ñane iji ajei. Mu Rebéca jecucha ga narañime dabode uje ore quejna iji ajei enga chojningame re: "¡Qué jeque yitobi enga ore basape to!" Enga catecã́ri Dupade ome re nanique uje narañípisome daca uchiejnane iji dajei gu. 23Enga Pangarádejnai Dupade chajnai Rebéca icatecãraitigade ome re nanique. Enga chojninga:
"Baca uaté gare ore iji bajei. A chise dínique jne jeta babode udore ore ape disi ejórigo jiépisi ore jne, mu a ore cãra daníningo ome ñane jne.
Enga babode udore uje ore chetaque ñane iji bajei, a jé ore ape disi ejórigo ore isocai tu jne uje a ore chetaque ñane to jne iji daníningo.
Mu babode udore uñeque ape disi ejórigo a uajadipise ore jne ome jõrai ape disi ejórigo. A babode udore base jne mu a bajai u jne ujeta doi ejoi iroquéode."
24Ga udojo quigade nanique enga Rebéca ica base, mu garaja ore aja guesi. 25Enga ape bajai gatororodie caratei, enga ojójãi déji gai jnese. Enga ore chĩ́care Esaú aja dabi tuté nanique uje ojójãi déji gai gu. Enga Esaú urui qui tu gu ome ore. 26Mu ape ejoi base to nanique mu chisa bajai ujadia taja guesi yui. Enga ore pésu dabi uté i enga i tu Jacob uje chisa darẽjai ujadia taja guesi gu, enga Jacob urui qui tu gu ome ore. Enga Isaac guejnanie sequerei e chise 60 años nanique uje Rebéca abode udore e ore base.
Esaú tẽra dáringai urẽja ome desai nanique enga oré tu desai ãraquegode cugué edo caratacho
27Enga ore abode base, ga ore quérã nanique enga ore chise dáringai jnacare nanique. Enga Esaú jnacare nanique enga chirajapise uje ojicarotaque nanique. Enga jecucha ga chisõre ome dosipéode. Jé basa ga Jacob jecucha ga paraque enga que chisõre gotique, mu chijnóra ujeta chácariji degúi. 28Ore dai Isaac irasi tu dape bajai Esaú, uje irasique dosipéode gu uje chujé enga ore tagu yugode. Jé basa ore daté Rebéca irasi tu Jacob.
29Chise diri uje Jacob qué chãrei ore posode, mu urẽjai di mu isoránenie chujé enga eyuguipise. 30Enga Esaú catecã́ri desai Jacob enga chojninga:
–Asi yu iji bãraquegode cugué edo caratacho enga yagu to. Chaguhei chejnapise yu.–
(Enga jé u nanique uje ore cho Esaú i iji ãraquei enochai uje carataque gu. Enga i jé u Edom ome ore uje urui qui jé u gu ome ore.)
31Enga Jacob chajnai darẽjai uruode enga chojninga:
–Ajuéga báringai urẽjai ome yu, enga agu to yãraquei. Enga yo yajnéngu yocai ugúchade, uru iyiejájnane ore jnese jne.–
32Enga Esaú dojnóngaja dáringai urẽja, dayé uru iyiejájnane ore enga chojninga:
–Bamo yu arĩ́e uje yitorási ome yiyaguhei enga que cuchárique yúringai urẽja gotique ome yu.–
33Mu Jacob qué nararápo rĩ enga chojninga:
–Be ga asi ome baru iyiejájnane ome yu jne jeta yajneque báringai urẽja jne.–
Enga jé u uje Esaú chojningame desai uruode:
–Bajneque yúringai urẽja jne, enga jé ũrepise yuru iyiejájnane udojo ome ua.–
Enga jé u uje Esaú chisi ome daru iyiejájnane ome desai Jacob ujetiga Jacob cho dajnéngu dayai úringai urẽja ome re.
34Enga jé u nanique uje Jacob chisi ome dãraquegode cugué edo caratacho ome dayai. Enga chátaja arurégode rĩ. Enga jé u nanique uje Esaú cha dáringai chagu enga chóji yodi rĩ enga jec u uje jno enga cha dáringai urẽja enga chojninga: "Que cucha ome yu ujeta yesai cho urẽjai iji re."
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2021 Ethnos360