Juan 1

Dupade áyipiedie pijogúsõri pésu re ga ayoré

1Uje cáma pipesute erámi iji taningai mu Dupade áyipiedie pijogúsõri jé jogate. Enga uté déji Dupade gari nanique enga Dupade jé u uté to. 2Dupade garíjogosṍri uté jé jogate Dupade gari iji taningápisi. 3Enga Dupade angúromei u uté uje ipesute cuchade jnese. Uté imanique cuchade iji erámi jnese enga que cucha amínique cuse ujetiga ca ipesute. 4Enga pucuecaringuei gajnesṍri u uté. Enga quene díreca jnanione ore áyipiedie uje uté guẽrate pucuecaringuei ome ore. 5Uté chijñate ijnangununie gáyode. Enga que togome ijnangunua uaté ujetiga chajni uté idírecaringuéi.

Juan chatata dírecaringuéi guẽrasṍri gosi

6Dupade utocaidi cuse nanique enga i tu Juan. 7Dupade ajegaidi u ujetiga Juan uté chatata dírecaringuéi guẽrasṍri gosi ome ore ujetiga ore changureta. 8Que dírecaringuéi guẽrasṍri u Juan gotique. Mu Dupade utocaite ujetiga chatata dírecaringuéi guẽrasṍri gosi. 9Enga Juan atatagode u uje dírecaringuéi guẽrasõripísi uté a jĩraque di jne iji erámone. Enga dírecaringuéi uté u uje chijñate erámi unirisórone ore gáyode jnese.

10Dupade angúromei u dáyipiedie pijogúsõri uté nanique uje pésu erámi iji taningai. Mu uje uté chise erámi enga que erámi unirisórone chiraja uje erámi ipesungóri u uté. 11Uté gajneque erámi, unirisórone ore mu que ore chimesẽre nanique uje chise ore. 12Mu uñane ore chimesẽre enga ore changureta. Jecute chinoningase ore enga ore chise dáringane Dupade abío. 13Mu ore úringai Dupade abío que cho ore úringane ayoré abío. Uje ore dayode ayoréo chisa ore datedie nanique jecute ore basíji datedie. Jé basa ore úringane Dupade abío garani u Dupade áyipiedie ome ore.

14Enga Dupade áyipiedie pijogúsõri pésu re enga cho erámi unirísõri iji re to nanique. Enga déji yocujade nanique iji erámi udé. Enga chijnorapise yoque. Enga ũrepísei arecujaidie. Yimóngo ingoningájnai. Enga cuchadaté ingoningájnai uje Dupade ape ugurui u uté gu. 15Dupade utocaidi Juan chojninga:

–Yojningai jé u jnacari uté uje yacate uaque diríca. Uje yojninga: "A Dupade utocaitique uñeque diapo jne rĩ iji yiquigade. Uté u uje sué yibai. Uje cáma yibase nanique mu uté jé jogate."–

16Enga uyoque jnese yocajneque uté icaniratiguédatéi. Enga uté chosõre yoque gatuac, tuaque. 17Yirajágo uje Moisés di Dupade iroquéode údi iji darasade ore nanique. Yirajágopo rĩ uje Jesucrísto iringuío dai Dupade ijnoraquei údi ome yoque. Enga e yirajágo cucha uréone gu Jesucrísto. 18Que uñeque chimo Dupade gotique. Gusu Dupade ape ugurui u uje chingo dayé aja yoque. Chamáñaje Jesús, dayé Dupade ore cháta raja ñane ome dáyipiedie gu enga que ore chiramurase ñane iji dajéode go.

Juan el Bautísta uje chaca ore edodie iji yodi narare Jesucrísto gai

(Matéo 3:11-12; Márcos 1:7-8; Lúcas 3:15-17)

19Enga judíode ore eduguéjnane iji Jerusalén ore chiroque sacerdóteode, levíteode uñane aja Juan ujetiga ore chiraja úringárique ayoré. 20Diga ore catecã́ri Juan ujetiga ore ijnati Crísto u. Mu Juan chingopísa ore enga chojninga:

–Crísto que u uyu gotique.–

21Enga ore catecãrápoi Juan gaté rĩ enga ore chojninga:

–Ujetiga Crísto ca u ua, ango ua aja yoque. ¿Ja Dupade uruode atatasṍri Elías u ua ya?–

Mu Juan chojninga:

–Que u yu gotique.–

Jecute ore chojninga: –Ore erángani Dupade uruode atatasõre ¿ja u ua ya uje a di jne iji yoque?–

Mu Juan chojninga:

–Que uyu u gotique.–

22Enga jé ore ate uje ore catecã́ri Juan enga ore chojninga:

–Ango ua gosi ome yoque enga yirajágo ua. Ga yingongo ua aja yoquirósorone ore. Ore potapísa jóroga jeta ore chiraja ua gosi.–

23Jecute Juan chajnai ore enga chojninga:

–Dupade uruode atatasṍri Isaías ojningai u yu uje chojninga: "A pududicho gosi pijnane jne uje tṍraji erãpe tarétigai. Enga a uté chojninga: 'Achẽcho dajei gai iji Yocangarádejnai iquei.'"–

24Fariséode ore iroque udore uñane to uje ore catecã́ri Juan. 25Enga ore catecã́ri Juan gaté enga ore chojninga:

–¿Gotique gu a uje baca ore edodie iji yodi? Ujetiga ca Crísto u ua enga ca Elías upo ua gotique rĩ. Jé aja ujetiga ca Dupade uruode atatasṍri upo ua rĩ uje yijnátugo diringai.–

26Juan chajnai ore uruode enga chojninga: –Jé ũré uje yaca ore edodie iji yodi. Mu a Dupade utocaitique uñeque di jne iji yiquigade uje e déji uacajade mu cáma arajáyo. 27Bajaque yu mu que yipijoque. Mu uñai di iji yiquigade enga ibijoguipísi u uté. Que yugúsiji cuchárique go mu cuchadatei u uté uje chise uaque iji yiquigade.–

28Jnanione udore catecã́ri Juan nanique iji ore idai uje i tu Betánia uje déji tié Jordán edógai iji guedé garani. Enga Juan qué chaca ayoréode edodie iji tié uaqué nanique uje ore chise.

Jesús gajnua u áyasa perané ome Dupade

29Jecute dire uñai enga Juan chimo Jesús uje chose ore yui enga chojningame daríjogosórone:

–Cajicho to jnacari uté. Uté u jne ujetiga toi ome erámone jogosórone yoquisijnaringuéone. Enga gajnua u áyasa perané ome Dupade. Enga Dupade jé guerani u ome yoque.–

30Mu Juan jé jno dacatecãraitigade údi ome ore enga chojninga:

–Yojningai jé u uté uje a di jne iji yiquigade mu sué yibai ome úringai Dupade utocaite. Mu uté jé jogate nanique uje cáma yibase. 31Que yiraja Dupade utocaidi uté gosi iji taningai mu yĩri gu ujetiga yaca yurasade Israel gose ore edodie iji yodi ujetiga dimane ore ome uté diringai yui. Yigaidi u gu ujetiga di enga jĩraque ore chiraja.–

32-33Juan qué jno daruode údi enga chojninga:

–Que yiraja uté to iji taningápisi. Mu yirósõri Dupade u uje chiroque yu aja ujetiga yaca ore edodie iji yodi enga chojningame yu: "Jogadi tu jne ujetiga araja yutocaidi gosi: ujetiga amo Yujopié Espíritu Sánto ujetiga doi jnumi iji gaté enga cháji jnacari uté ójo gai enga a araja jne uje yutocaidi jé u ujetiga chĩreta ore áyipiedie ome Yujopié Espíritu Sánto." Enga e yimo Espíritu Sánto uje doi jnumi iji gaté enga cho cucujnadatei enga basája jnacari uté ójo. 34Uje e yimo enga uté pijogúsõre yu to. Enga yingome uaque uje Dupade abipísi u uté.–

Jesús acadique bajade ore chise dáringane Jesús anguresóño

35Dire uñai enga Juan e dépoji uté rĩ. Enga acadique gáreode ore déji gari. 36Uje Jesús chicáji ore ejoi enga jĩraque Juan chimo ga chojninga:

–Cajicho to Dupade utocaidi uté uje Dupade a tẽrame yoque jne. Enga gajnua tu áyasa perané.–

37Uje Juan acadique gáreode udore chudute udore enga ore jno enga ore chajna Jesús. 38Jecute Jesús chajire daquigade enga chimo ore enga chojninga:

–¿Uacagaitique?–

Enga ore chojninga:

–Pacadisṍri á, ¿bajogatique déji rique?–

39Enga Jesús chojninga:

–Boyóji ti. Ajínaño yu.–

Enga ore jno enga ore nóna Jesús aja jogadi. Guedé e jnome ore uje ore chise Jesús jogadi mu ore catecã́ri Jesús aja guedéjnoringái.

40Andrés u jnanione udore uñai uje ore chajna Jesús gu Juan ojñane. Enga Andrés uté u Simón Pédro jõrai. 41Enga Andrés que chajirape cuchárique mu jĩraque chucué dajõrai Simón enga chojninga:

–¡Yico judíode yoquijnati Mesías!–

Enga ore ĩcarai Mesías u Crísto ome gréciagosode ore uruode.

42Jĩraque Andrés jno Simón údi aja Jesús jogadi. Enga uje Jesús chimo Simón enga chojningame:

–Simón, Jonás abi u ua. Mu quigade enga a ore chĩ́care Céfas jeoga Pédro aja ua jne.–

Simón i ichade udore qui tu cucarané ome judíode ore uruode.

Jesús dejéna Felipe, Natanael ore aja daquigade

43Dire uñai enga Jesús pota chicai ore uniri uje i tu Galiléa mu tuangóa jnacari uje i u Felipe. Enga chojninga:

–Felipe á, ajína yu to.–

44Felipe uté idai u Betsáida. Enga Pédro, Andrés ore idai jé u to. 45Felipe jno enga chucué Natanael enga chojninga:

–Yimóngo Dupade utocaidi que uje Moisés, Dupade uruode atatasórone proféta uñane ore urusarane ojningai tu. Enga uté i u Jesús uje dayé u José, nazarétgosi.–

46Mu Natanael chotigase Felipe uruode jecute chojninga:

–¿Ja Dupade utocaite cuchátique tõrarásiji Nazaret a?–

Mu Felipe chojninga:

–Yico ga yibájoi enga ajirape to ujetiga araja ujetiga yoquijnati u.–

47Uje Jesús chimo Natanael uje chose yui enga chojninga:

–¡Israelgosípise jnacari uté uje e chose yoqui, enga que paringaquérique déji uté!–

48Jecute Natanael catecã́ri enga chojninga:

–Quene bamo yu múñi, jé baraja yu.–

Jesús chojninga:

–Uje cáma Felipe tibidi ua, mu yimo ua iji poria uaté údi uje i tu higuéra.–

49Jecute Natanael chojninga:

–¡Yocacadisṍri á, e yiraja uje Dupade ape ua! ¡Israélgosode yoquijnati yoqueduguéjna cuchábi upo ua rĩ!–

50Jesús chojningame uté:

–Bangureta yu uje yingome ua uje yimo ua iji te iji poria uaté údi uje i tu higuéra. Mu a amópo yipesútedatérigo uñéngo jne rĩ uje sué udore gai.–

51Jesús qué jno daruode údi enga chojninga:

–Jé ũrepise yu ome yuruode udojo: a amóño gatajnoquei jne uje chuchẽre dabai. A amóñopo Dupade iroque gateminórone ujetiga ore chicáji jnumi aja Dupade utocaidi uyu. Enga a amóñopo jne rĩ ujetiga ore chicapóji gaté rĩ.–

Currently Selected:

Juan 1: Ayore

Highlight

Copy