Juan 15

Jesús chacãra dacajnaquéode aja ore acadie úvai

1Jesús chacadápo ore rĩ enga chacãra dacajnaquéode aja erejna quedéjnai uje i u úva. Enga chojninga:

–Yajnua tu erejna quedéjnai úva pacáraque uje obiréjnapise. Enga Yai gajnui u utácai uje suse dacadie úva guio. 2Doi ga chibéro úva jmaneca bisidégode uje íjnoque adie. Mu chaquesu jmaneca ijorone eruéode enga chijnime acãraque betágode iji gai. Gaidi u gu ujetiga árigui jiépisi. 3Mu uacajnui u úva jmanecade uje e paquesuque eruéode enga pijnimique acãraque betágode. Chamáñaje uacamesecho yacajnaquéode quigode gu uje yacate uágome diríca. 4Mu ajóyo uágaja yu. Adi u uje yajo yu aja uaque. Que togome erejna quedéjnai jmanecai ujetiga áraque cuse ujetiga gusu iji charidi. Mu adie cuse gu uje cháta raja ero. Adi jé u ome uac. Uje a ca uacáraque cuse to ujetiga ca átayo uágaja yu.

5Uacarajáyo uje yajnua tu ore acai ero. Jé basa uacajnúone u jmanecade. Ujetiga jé yoquijogate yóguiji ñane enga jogadi u ujetiga uacárigui uásejnai. Uacarajáyo gu uje que cuchárique togome uaque ujetiga ca átayo uágaja yu. 6Mu ujetiga gosi ca chajo raja yu enga ducarãte uté gosi enga gajnui tu erejna quedéjnai jmanecaque paquesugode uje e toi enga pamatacho aja ñane enga quigade enga papose.

7Ujetiga jé ajóyo uágaja yu enga que acadíchoi yacajnaquéode quigode enga jogadi u jne ujetiga atáyoi uacajegaitígo cucha iji Yai enga a chisi ome uaque. 8Yai Dupade úringai picotaque u uje uacabeyoi uacátegoningáne. Enga uacáringane yiroque uréone pijoque to ome uacadode udore. 9Yijnoraquei ome uaque chopise Yai ijnoraquédatéi ome yu. Jecute ejnáño uágaja yijnoraquei. 10Ujetiga beyoi yiroquéode quigode enga a uacajogate iji yijnoraquéode. Adi jé u ome yu uje yiji Yai iroquéode enga jé yijogate iji Yai ijnoraquei ome yu.

11Yurúo udojo ome uaque ujetiga pirasitigai déji yógome ñane. Yigaidi u gu ujetiga pininaquei irágu uacajéode. 12Yiroquei u udé ome uaque: ujetiga ajnóraño ñane enga uacajnoraquéode ome ñane chopise yijnoraquei ome uaque to. 13Pijnoraquédatéi uje sué pijnoraquéode gáyode jnese u ujetiga gosi tẽra re ome dajõráringo ore. 14Yijorane u uaque ujetiga apéso yojningane cucha. 15A ca yĩ́carapo yirógode aja uaque jne rĩ. Chamáñaje pirógode que ore chiraja darósorone áyipiedie ome cuchade. Mu a yĩ́care yijorane aja uaque jne. Chamáñaje e yingo yajnéone Yai ojningane cucha jnese aja uaque gu. 16Que uacajegaite yu nanique mu uyu u uje yajegaite uaque. Enga yiroque uágaja erámi ujetiga amácho ayoré uásejnane aja yu. Enga uacamaningone udore a jogate jne iji deréjnane jnese. Enga uacadie u uacamaningone udore cucha. Enga Yai a chisi ome uacataidode cucha jnese ome uaque gu uacanguretigai iji yu. 17Yajo yu aja yiroquei, ujetiga ajnóraño ñane.

Erámone jogosórone ore chetaque Jesús, jé aja anguresórone ore

18Ujetiga erámone jogosórone ore chetaque uaque enga ajnusináño uje ore chetaque yu bajaque nanique. 19Ujetiga erámone jogosórone urása uaque enga a ore chijnórarase uaque, adi u uje ore chijnóra darasapísode. Mu yajegaidode u uaque nanique iji ore ujade, jecute ore chetaque uaque. Chamáñaje que erámone jogosórone urásapo uaque rĩ. 20Ajnusináño yacajnaqué casodica uje yojninga: "Que togome uñeque irótique ujetiga sué darósõri gai." Ujetiga jé ũré enga ore umajo yu enga a ore cho damajo uaque to. Jé basa ga ujetiga ore doi yacajnaquéode quigode enga a ore doi uacacajnaquéode quigode to. 21A ore cho damajo uaque gu yadode. Chamáñaje que ore chiraja yirósõri gosi gu.

22Ujetiga agúpurairáse ore enga a ca máranguirase ore. Mu yise ore gu ujetiga yo cuchade quigode ome ore. Jecute a ore cho daba dasijnaringuéone enga a ca pĩroque ore isijnaringuéone. 23Udore ore uje ore chetaque yu, ga cho ujetiga ore guetei u Yapade. 24Yipésu yipesútedatéode iji ore ujade uje que toguírase ome uñeque ujetiga cho yu ome yipesútedatéode udore. Mu jé ate ome ore uje ore chetaque yu. Jecute ore guetei upo Yai te rĩ. Ujetiga ca ore pañaji yadode enga a ca máraque ore, mu uje ore chimo yadode enga ore úringai máraque jogadi u. 25Ore ajirigode Moisés urusarane quigode tocade ome ore adode udore. Enga Moisés urusarane chósi te: "Ore chetaque yu bisideque."

26A yiroque Yai Dupade Ujopié Espíritu Sánto aja uaque jne uje cucha uréone gãrapié u. Enga a uacátajató u uaté jne enga a chisi ome picasitigai ome uaque jne. A yipijoguto u uaté jne. 27Mu que gusu uaté mu a yipijogúsorone u uaque to. Chamáñaje uacagúsoi yari nanique iji taningápisi gu.

Currently Selected:

Juan 15: Ayore

Highlight

Copy