Juan 17

Jesús catecã́ri Dupade ome dacadigode ore

1Uje Jesús chejna daruode udore guesi enga chajire gaté enga catecã́ri dai Dupade. Enga chojninga:

–Yapá, bojningai dire e chise yu. Jecute yicatecã́ri ua ujetiga bangoningájnai pijóguiji bajnacari uyu. Yigaidi u gu ujetiga picotaque opejã ua to ome bajnacari uyu yadode. 2E bajíñome baroquéode jnese iji bajnacari uyu yari ujetiga yiroque erámi unirisórone jnese. Enga u to ujetiga yisi ome pucuecaringué eyúgojmai ome yanguresórone jnese uje bẽrate ore ome yu. 3Pucuecaringué eyúgojmai quigode u udojo: ujetiga gosi chirajapise Dupa uguru ũrei ua, enga chirajapísapo Jesucrísto uyu rĩ uje baroque yu aja jnumi nanique.

4E yimate baroquéode ome yu jnese, jecute bangoningájnai e pijógome erámi unirisórone ore. 5Jecute, Yapá, yajéode u ujetiga yugúsapóji bari enga ujetiga atire yúringai cuchape yibai. Yigaidi tu gu ujetiga yocópo ñane rĩ ome yocúringane cuchape. Ujetiga yocópise uje cáma erã́tique cuse nanique iji taningane.

6E yingo báringai gosi ome bajegaidode ore uje bẽrate ore ome yu iji erámone udojo. E bajneque ore mu basi ome ore ome yu. Enga udore ore dopísi baruode quigode. 7Enga e ore chiraja uje beranone yacajnaquéo garani tu ua. 8E yacate ore ome beranone yacajnaquéo enga ore chimesẽre. Que potigayaquérique déji ore uje yarani tu ua. Enga ore changureta uje baroque yu aja jnumi nanique.

9E yijócha bajei údi ome udore ore. Mu que yijócha bajei údi ome erámone jogosórone uñane. Mu yicatecã́ri ua ome udore uje bẽrate ore ome yu. Chamáñaje bajneque ore gu. 10Bamo uje yanguresórone jnese jé bajnecho ore to. Adi jé u to banguresórone jnese, uje jé yajnecho ore to. Enga bamo to uje yingoningai pijóguiji yocanguresórone udore ore to. 11A ca yiyapóji erámi tudé jne rĩ. Mu yanguresórone udore ore, a ore cháji. A e yiji jne ujetiga yugúsiji bari. Yapá, uje ueque ua ome pisijnaringuéone, ga yijócha bajéode údi ome beranone yanguresõre ore, ujetiga arodipise ore ome bajopiédaté ujetiga ca ore ajéode cãra re ome ñane mu ore ajéode chojmára, adi tu ome uyoque uje yocajéode jé chojmára. 12Uje qué yugúsi beranone yanguresõre ore gari iji jnumi udé enga yirote ore ome bajopiédaté ujetiga ca cuchárique chósi ti iji ore. Que udore uñeque bijna ome yu. Mu chojmarai u uje bijna ome yu. Chamáñaje uté quique obiréjnai u ujetiga bijnaque. Chamáñaje ore urusarane barúo quigode jé u gu.

13Idógosi ujetiga e yicáji bari. Mu uje qué yugúsi erámi udé enga yicatecã́ri yanguresórone ome cuchade udore. Yigaidi u gu ujetiga yijogonóri pininaqué irágu ore ajéode to. 14E yingo baruode aja yanguresórone, jecute erámone jogosórone ore chetaque ore. Chamáñaje que erámone jogosórone urásapo ore to rĩ. Enga e ore cho yu uje que erámone unirísõre yu to. 15Que yingome ua ujetiga ajnime ore iji erámi, mu arote ore ome Satanás. 16Adi jé u ome yu uje que erámone jogosõre yu, adi jé u to ome yanguresórone ore uje que erámone jogosõre ore to. 17Acate ore ome cucha uréone quigode ujetiga ore chedu ua iji dajéode. Chamáñaje bacajnaquéode quigode ũréo gu. 18Adi u ome yu uje baroque yu aja erámone unirisórone, adi jé upo ome ore rĩ uje yiroque ore aja erámone unirisórone ore to. 19Yisi ome yu ome ua to ujetiga yanguresórone ore adi jé u yadi ga ore chisi ome raque ome ua to uje ore chiraja bacajnaqué uréone quigode.

20Que gusu deréjnai udé jogonórone yanguresõre uje yicatecã́ri ua ome ore. Mu yijócha bajei údi ome yanguresõre disi ejode ore to uje a ore chudute ore atatagode barúo. 21Yutai ua ome yanguresórone ore jnese ujetiga ore áyipiedie quitígo chojmarapise. Ujetiga ore chatapísa raja uyoque enga chojmára yóguiji jnumi. Yapá, yigaidi u gu ujetiga ore chopise yoque, uje yocáyipiedie chopise ñane. Ujetiga erámone jogosórone ore chimo uje yanguresórone ore áyipiedie quigode chojmára enga a ca potigayaquérique déji ore ome yúringai batocaite. 22E yajuguína berani yingoningájna aja yanguresórone ore. Yigaidi u gu ujetiga ore chopise uyoque enga chojmarápise ore iji jnumi to. 23Yugúsi yanguresórone chojmara, chojmarane ore, adi u uje bagúsi yari. Yigaidi u gu ujetiga yáta ore aja ñane enga chojmára ore iji jnumi. Ujetiga erámone jogosórone ore chimo uje chojmára ore iji jnumi, enga jogadi u jne ujetiga ore chiraja uje batocaidi u ore angureni uyu. A ore chiraja to uje bajnorapise ore enga bajnoraquei ome ore chopise bajnoraquei ome yu.

24Yapá, bẽrate yanguresórone ome yu, jecute yajéode u ujetiga ore chise yu iji yijogadi jne. Ujetiga ore chimo yingoningájnai to uje beranome yu. Chamáña gu uje bajnorapise yu nanique uje cáma pipesute erámi jé aja deréjnane udojo. 25Yapá, yicota ua ome báringai ũrepise. Erámone jogosórone ore que ore chiraja ua go. Mu uyu yirajapise ua. Enga yanguresórone udore ore chiraja uje batocaidi u yu. 26E yatata ua gosi ome ore, enga qué yiji údi uje yingo ua aja ore. Yigaidi u gu ujetiga baríjogonóri pijnoraqué déji ore to, adi u uje déji yu. Yigaidi upo rĩ ujetiga yugúsipísiji ore gari to.–

Currently Selected:

Juan 17: Ayore

Highlight

Copy