Juan 18

Judíode angaránone irógode ore chisa Jesús

(Matéo 26:47-56; Márcos 14:43-50; Lúcas 22:47-53)

1Uje Jesús chejna daruode udore guesi enga jno enga nóna dacadigode aja daquitique uje déji tuijnai Cedrón uéchai. Enga Jesús, acadigode ore chicáji porebui uje acárigui pori jiépisiji. 2Jesús acadigode uñai uje i tu Júdas chiraja ore qui uté jogadi. Chamáñaje jecucha Jesús chamáta dacadigode ore aja jogadi uté gu. Júdas uté u uje a tẽra Jesús jne. 3Uje Jesús, acadigode, qué ore déji jogadi uté enga Júdas e chise ore. Mu soldádode ore uágueraque nóna, jé aja sacerdóteode, fariséode ore irógode uñéngo uje ore irodi u Dupade iguíjna cuchábi. Enga ore chijna dõrachade jnese jé aja dapósode, dacuguedie ore. 4Mu Jesús e chiraja cucha dacadode udore uje a tocade jne, jecute chachai ore iji ore garani enga chojninga:

–¿Uacacuei gosi te a iji yoque?–

5Enga ore chojninga: –Yocucuei u nazarétgosi uje i tu Jesús.–

Jecute Jesús chajnai ore enga chojninga:

–Yugúsi de.–

Júdas uté uje a guẽrate dacadisṍri jne déji ore gari to. 6Uje Jesús chojninga: "Yugúsi de," enga ore tṍra raque jnese enga ore cṍra aja jnumi. 7Jecute Jesús catecãrápoi ore gaté rĩ enga chojninga:

–¿Jé uacacuei gosi te a?–

Enga ore chojninga:

Jesús, nazarétgosi u.–

8Jesús chojninga:

–E yingome uaque que uje uyu u. Ujetiga uacacuei u uyu enga ajuécho doi ome yijorane ore.–

9Cucha dacadode udore tocade gu uje Jesús uru casodé quigode u. Uje chojninga: "Que Yai gueranone yacadique uñeque bijna ome yu." 10Diga Simón Pédro chijnime daquesei uje déji gari enga chaquesu sacerdóteode ore iroi Málco angoroné, ãrachua jogoto. 11Mu Jesús chaquĩ́ra Pédro enga chojninga:

–Acha baquesei aja jogadi. Ujetiga Yai ajéo enga pequetingaquédatéi udé chise yu, ga ¿a yayorásome a?–

Ore jno Jesús údi aja sacerdóteode ore eduguéjnapisi

(Matéo 26:57-58; Márcos 14:53-54; Lúcas 22:54)

12Diga soldádode, ore eduguéjnai, jé aja judíode angaránone ore irógode ore chisa Jesús enga ore chigaru jmanecade. 13Enga jĩraque ore jno Jesús údi aja ore eduguéjnai Anás. Uje Caifás iyoquíjnai u Anás uté. Enga sacerdóteode ore cho deduguéjnai iji Caifás iji sequeré uaté. 14Caifás uté u uje cho quique dojode judío ica enga chojninga: "A jé ueradi u ome yoque ujetiga gusu toque jnani chojmarai ome yocurasade ore jnese, enga jé ca yocuniri jnese íjnoque jne."

Pédro otigayaquéode u ome Jesús

(Matéo 26:69-70; Márcos 14:66-68; Lúcas 22:55-57)

15Uje ore jno Jesús údi enga Simón Pédro jé aja Jesús acadigode uñeque ore chajna Jesús. Simón Pédro jõrai uté chiraja sacerdóteode ore eduguéjnai. Jecute ore juéga ajei ome uté to enga nóna Jesús aja ore asuté iguíjnai ajã́ro. 16Mu Pédro que nóna ore aja ajei go mu cháji guesi. Enga cháguena guiguíjna piagoi iji guesi. Jecute Pédro jõrai uje chiraja sacerdóteode ore eduguéjnai doi enga catecã́ri ore irogué uje chirote piagoi ujetiga juéga ajei ome Pédro to. Diga uaté juéga ajei ome Pédro to. 17Jecute ore irogué uaté catecã́ri Pédro enga chojninga:

–¿A ca jnani uté acadigode jõra ua to a?–

Mu Pédro chotigase enga chojninga:

–Que uté acadique yu go.–

18Uje tejnupise enga Dupade iguíjna cuchábi irodisórone uje ore déji ta jé aja ore irógode uñane ore doi enga ore pésu pioi enga ore cháguena ejode ujetiga ore chajningare dádode iji. Enga Pédro déji ore gari enga chajningare dádode to.

Sacerdóteode ore eduguéjnai chajire Jesús adode aja quigode

(Matéo 26:59-66; Márcos 14:55-64; Lúcas 22:66-71)

19Sacerdóteode ore eduguéjnai catecã́ri Jesús ome acadigode ore íode. Catecãrápoi Jesús ome acajnaquéode quigode rĩ. 20Jecute Jesús chajnai uruode enga chojninga:

–Cho ujetiga pipoguiete yacajnaquéode quigode. Bamo uje jecucha yacate ore iji guesáringane. Yacadápo ore rĩ iji ore aquiningaméone guiguíjna jé aja Dupade iguíjna cuchábi. Enga bamo judíode ore jnese chamáta rágaja Dupade iguíjna cuchábi. 21¿Gotique gu a uje bacatecã́ri yu ome yacajnaquéode quigode? Be ga acatecã́ri ore uje ore chudute yacajnaquéode diríca iji yajesúode erámio, enga a ore chingo quigode ome ua. Udore ore chiraja yacajnaquéode quigode gu.–

22Uje Jesús urúo udojo enga Dupade iguíjna cuchábi irodisórone uñai doi enga chinguíra dajmanai aja Jesús edodie enga chojninga:

–¿Ja ca ajéngome sacerdóteode ore eduguéjnai uje barúo udore ome uté que a?–

23Jesús chajnai uruode enga chojninga:

–Ujetiga yurúrigo gajnarécho que ome ua ya, ga be ga angome yu yuru gajnarétigo quitígo. Mu ujetiga yuruode ueracho, mu ¿gotique gu a uje bajé yu?–

24Quigade enga ore eduguéjnai Anás chiroque darógode ujetiga ore jno Jesús údi aja sacerdóteode ore eduguéjna cuchábi Caifás, uje Jesús qué déji dáringai pigarique.

Pédro chotigásapo dáringai Jesús ajnasõre rĩ

(Matéo 26:71-75; Márcos 14:69-72; Lúcas 22:58-62)

25Uje ore doi dasocade ome Jesús mu Pédro qué déji dáringai chaguesi iji pioi ejoi uje chajningare dádode iji. Enga Pédro ejominórone ore catecã́ri enga ore chojninga:

–¿Ja ca jnani uté acadigode jõra ua to a?–

Pédro chãrápo ore rĩ enga chojninga:

–Que uté acadigode jõra yu to go.–

26Diga sacerdóteode eduguéjnai irógode uñai catecã́ri Pédro to. Pédro aquesui u uté iguiosi uje Pédro chaquesu angoroné iji porebui údi que. Enga uté chojningame Pédro:

–¿Ja ca yimo ua to que a iji porebui údi uje bagúsi Jesús ejoi a?–

27Pédro chãrápo ore rĩ uje chiese ca Jesús acadigode jõra. Uje Pédro chejna daruode udore guesi enga jé u uje cochagájnai po.

Ore jno Jesús údi aja ore eduguéjna cuchábi Piláto

(Matéo 27:1-2, 11-14; Márcos 15:1-5; Lúcas 23:1-5)

28Uje Caifás chejna dajiritigade ome Jesús ga ore jnopo údi rĩ aja eduguéjnai uñai iguíjna cuchábi uje rómagosode ore eduguéjna cuchábi ichajapite uté aja charidi. Enga e idógosi diri. Que togome Jesús oisórone judío ujetiga ore nóna Jesús aja eduguéjna cuchábi iguíjnai ajei. Chamáñaje purása quedéjna eduguéjnai uté gu enga ore todo dáringáringo puyaque yui. Jecute que ore chacája ajei to. Ore chiraja gu uje a ca togome ore ujetiga ore tagu ore jnusinamáni dire uje i tu Páscua gajnéone cucha ujetiga puyac ore. 29Jecute Piláto doi guesi iji daguíjnai ujetiga catecã́ri ore enga chojninga:

–¿Uaquetétigai iji jnani uté a?–

30Mu ore chojninga:

–Ujetiga ca sijnanguirase uté enga a ca yijnángorásaja ua.–

31Piláto chojningame ore:

–Que yipota ujetiga yajire adode aja quigode. Boyo údi aja judíode uaqueduguéjnapísode. Chamáñaje udore ore u uje ore chiraja uacajnéone Moisés urusãracho quigode ujetiga ore chajire uacarasade adode aja quigode.–

Mu judíode ore chojninga:

–Bamo uje judíode uyoque que togome uyoque ujetiga yisígo pitoringai ome ayorérique. Jecute yijnángo uté aja rómagosi ua.–

32Enga jé u uje Jesús uruode e tocade uje chingome ore diríca uje a toji curesérique gai jne. 33Ore eduguéjna cuchábi Piláto chacapója daguíjna cuchábi rĩ. Enga tibidi Jesús aja re enga catecã́ri. Enga chojninga:

–¿Judíode ore eduguéjna cuchábi tu ua ya?–

34Mu Jesús chajnai uruode enga chojninga:

–¿Jé ũré uje uhua upúsu uje bapota baraja udore a? ¿Jeoga yurasade judío uñeque uru quitígo ome ua ya?–

35Ore eduguéjna cuchábi Piláto catecã́ri Jesús enga chojninga:

–¿Ja judío yu a, ujetiga yangári judírique áyipierigui? Mu barasade, jé aja sacerdóteode eduguéjnane ore u uje ore chijna ua aja yu. ¿Jé bapesutique a uje ore chetaque ua ya?–

36Jecute Jesús chajnai uruode enga chojninga:

–Yajnepídi erãpe ome yúringai eduguéjna cuchape que u erámi tudé. Ujetiga urásu enga yacadigode jĩraque ore chirotárase yu diríca uje judíode ore chisa yu. Yajnepídi erãpe que u de gotique.–

37Jecute Piláto catecãrápoi rĩ ga chojninga:

–¿Jé ũré ua ya ome báringai eduguéjna cuchape?–

Enga Jesús chojninga:

–Ejẽ́. Jé ũré baruode uje eduguéjna yu. Mu yibase nanique gu ujetiga yingo cucha uréone ome erámi unirisórone ore. Enga cucha uréone ijnorasórone ore jnese tangári yacajnaquéode quigode.–

Piláto juéga Jesús ome judíode ujetiga ore chujé

(Matéo 27:15-31; Márcos 15:6-20; Lúcas 23:13-25)

38Piláto chojninga:

–¿Gotique a cucha uréone quigode?–

Uje Piláto chejna daruode udore guesi enga dopoi guesi te rĩ ujetiga catecã́ri judíode ore, enga chojningame ore:

–Que yiraja jnani uté bárique cucha. 39Uacarajáyo uje uacasocabei u ujetiga yirame yoquisatique pujurúgai ome uaque iji uacajnusinamáni dire uje i tu Páscua. ¿A apótayo a, ujetiga yirame judíode uaqueduguéjna cuchábi udé a?–

40Mu ore ichorájna enga ore tibite jnese. Enga ore chojninga:

–¡Que yipótago ujetiga arame uté! ¡Be ga arame Barrabás!–

Enga Barrabás uté u uje oriechoqui.

Currently Selected:

Juan 18: Ayore

Highlight

Copy