Lúcas 2

Jesús batigai u udojo

(Matéo 1:18-25)

1Udojo quigade ga eduguéjnai Augústo pota cénso, jecute chiroque dáyipiedie aja erámi údode ujetiga ore chisecãru ayoréode iji erámi údode. 2Ore isecãratíga bajai u uje síriagosode ore eduguéjnai u Cirénio. 3Enga jé u uje ayoréode jnese ore chajni aja dabatigade punire ujetiga ore churúsãre déode iji, ujetiga ore chisecãru ore iji. 4Jecute José jnoji ore gari iji ore idai Nazaret uje déji ore uniri Galiléa. Enga chicáji ore idai uje i tu Belén uje déji puniri Judéa. Chamáñaje jnani bajai David ore batigade u gu uje José gãrapíode u ore. 5Enga José, María ore nóna ñane aja Belén ujetiga ore churúsãre déode iji uté. Uje José jé gajmato María. Mu María ica déji ajei. 6Enga qué María ore déji Belén mu María ica basíji. 7Mu íjnoque ore upusiétique guiguíjna ome José, María ore iji Belén. Jecute María ape bajai basíji aquirájnanie iguíjnai ajei. Uje e base enga daté chigaru gai iji borapébode enga chicháji aquirájnanie agapié ajei.

Dupade utocaidode gaté unirísoño ore chiqueta raja áyasa irodisórone ore

8Enga áyasadie irodisóningo déji Belén ejórique uje ore chirote dachidédie iji dejade. 9Ga ore chuniname eti Dupade utocaidode gateminore uñai chiqueta raja ore enga chijninguese ore gai. Chamáñaje Dupade ijningueñai nóna iroi aja ore gu. Enga chajuque áyasadie irodisórone agutedie enga ore todópisa. 10Mu Dupade iroi chojningame áyasadie irodisórone ore:

–Ca atodóyo. Yise uaque gu ujetiga yingo gojña omone ome uaque. Enga a pininaquei gajnengore uáguiji erámi údode jnese jne ome yojñane udore. 11Yojña omone u uje disabi basosi que iji dejai tuqué iji Belén, jnani bajai David idai. Enga uté u jne ujetiga uacaquetangóri tu. Enga yoquijnati Crísto upúsu, Yocangarádejnai. 12Enga a qué yo quigome uaque jne disabi suté jogadi. Disabi su uje ore chigarúsu gai iji borapébode. Enga déji aquirájnanie iguíjnai.–

13Uje chejna daruode udojo guesi enga jorane Dupade iroque gateminóño ore diapóji to rĩ enga jiépisi ore. Ga ore nínapúsu raque enga ore chicota Dupade.

14Enga ore chósi te:

Picotaguipise opejã Dupade iji idai iji gaté.

Jé basa ga a cho sere jnumi jogosórone ajéode jne uje a ore nínapúsu raque jne uje ore chimo Dupade osongaquédatéi ome ore gu.

15Uje Dupade irógode gateminóño ore jnopome gaté rĩ enga áyasadie irodisórone ore catecã́ri ñane. Ga ore chojningame ñane:

–Boyo yico ga yibájobí ore iji ore idai Belén to. Yajicope Yocangarádejnai Dupade ojningai Yoquiquetangore to.–

16Ore jno ga ore chaguitópisiji yui. Enga ore chise José, María ore iji aquirájnanie iguíjnai enga María ababi désiji aquirájnanie agapié ajei. 17Uje ore chise ore ga ore chingo Dupade iroi ojñane ome ore ome ore ababi. 18Uje María, José ore chudute ore ojñane enga ore tijapúsu gojñane udore. 19Mu María que chicadígui cuchade udore iji dáyipie. Mu jecucha jnusina ore ojñane udore. 20Mu áyasadie irodisórone ore chajni aja darodedie dachidei. Enga ore tija Dupade aja dajei. Uje ore chimo Dupade ojningane cucha uje ore chudúdome Dupade utocaidi gateminore uruode. Uje tocadepise ojningane cucha ome ore.

Ore chijna Jesús aja Jerusalén ujetiga ore tẽrája Dupade ome

21Uje disabi chisósi dirode uje gadióguiji ti iji yui enga ore doi judíode ore isocabei ome Jesús ujetiga ore chicási ome circuncisión. Ga quene ore pésu írique. Mu ore chĩ́carosi Jesús aja uje Dupade irótique ipesute i gu uje abi cáma chiquetási raja daté ajei.

22Uje dirode chejna ayoré gáredie ga José, María ore jno dádi aja Jerusalén ujetiga ore tẽrája Dupade ome María úringa puyé. Uje Moisés urusarane quigode jé u gu ujetiga ore tẽrája Dupade ome dáringáraque puyé enga jé u uje ore úringa icha jogadi u iji quigade ome Dupade. Jé upo rĩ ujetiga ore chisi ome dape bajábi ome dangarádejnai Dupade. 23Ore pésu udojo gu uje Dupade jé urúo iji daruode uje chojninga: "Ujetiga uacape bajátique diyoqui enga asíñome Dupade." 24Ore gaidedie upo Dupade áyipiedie rĩ uje chojninga: "Ẽcho cucujnadaté gáningo ome yu, jeoga guidobo gáningo ujetiga ajéyosi ome yu."

25Iji deréjnane udore nanique ga jnanírique déji Jerusalén uje i tu Simeón. Enga ate areguipise uté enga chijnorapise Dupade. Enga que cha dangoroné ome israélgosode ore iquetangónique yui. Enga Dupade Espíritu Sánto ujopié irágupúsu uté ajei. 26Dupade Ujopié Espíritu Sánto chojningame Simeón:

–A ca atobi jne. Mu a jé aságaja jne ujetiga amo baquetangóri to ujetiga yirógaja ua jne.–

27Mu e chise dínique uje Dupade Ujopié Espíritu Sánto catecã́ri Simeón ujetiga chicáji Dupade iguíjna cuchábi. Enga jĩrique Simeón jnome. Ga chicáji enga chise José, María ore iji uje qué ore doi Dupade áyipiedie ome raque. 28Uje quene Simeón chimo disabi Jesús iji taningai enga chisasi iji gaté enga tija Dupade. Enga chojninga:

29Yangaráni á, Dupade á, jé arec ujetiga e yitoi uje bojningane cucha e tocadepise ome yu.

30Uje e yimópise ome yedodie yoquiquetangóri uje disabi sudé su.

31Uje bachajapite uté ome uyoc ujetiga yoquiquetangore jnese iji erámone.

32Chamáñaje uté u gu ujetiga chijñate purása quedéjnane ore, yoquibáyode. Enga a picotaque barasade israélgose uyoque jne uje piquetangóri Jesús gãrapíode u yoc.

33Uje José, María ore chudute Simeón ojñane ome disabi ga ore tijapísa. 34Udojo quigade enga Simeón chojningame José, María ore:

–¡Yipésupú ga Dupade chatapísaja uaque jõ á!–

Enga chojningame María:

–Adójnacho uje a jiépisi israélgosode jne ujetiga ore changureta disabi suté. Mu a jiépisi israélgosode to ujetiga ore chetágosi. Mu a Dupade sose uté ipotigásoningo iji gaté jne. Mu jé basa ga Dupade a sose guetésoningo ore iji jnumi jne ujetiga ujuya ore. Mu disabi suté a chosi Dupade gãrapié iji re jne mu a jiépisi ayorérigo uje a ore chotigásosi jne. 35Enga a udore ore áyipierigui imóringo tocade jne. Mu ome ua, María, a bajneque páyuguhebátigadatéi jne ujetiga chise bajei.–

36Enga chequéraque dépoji Dupade iguíjna cuchábi ajei te rĩ, uje Dupade uruode ojñato. Enga uaté iábi su Ána nanique. Enga dayé i tu Fanuel. Enga ore gãrapi tu jnani bajai uje i tu Aser. Mu Ána e chise dáringa gata. Enga Ána suaté jĩrique chisa damanique nanique iji dáringa gapu. Mu déji dabai gari aja sequeredie uje gare iji ti iji yijmanai uñai. Mu abai toi nanique. 37Enga uaté chequé eca iji Dupade iguíjna cuchábi ajei. Enga e gatapísape, uje guejnanie sequerei 84 iji yui. Enga que doi guetíguiji Dupade iguíjnai ajei gotique. Uje jecucha doi Dupade uruode ga cho dayágome re ujetiga jnusi rome dacatecãraitigade ome Dupade. 38Enga Ána chise Simeón, José, María ore iji ñane gari uje qué ore chicotási disabi suté. Enga Ána cháta raja ore to. Enga chacãre Dupade gai ome disabi Jesús to. Enga jno ga chingo erámi uje Jesús e di, uje Jerusalén idaisórone ore ijnati tu ujetiga chiqueta ore iji ore umajosórone jmainie.

José, María ore chajniapója dedai Nazaret

39Uje José, María ore chejna Dupade áyipiedie quigode guesi, enga jé u uje ore chajni aja dedáipisi uje i tu Nazaret uje déji puniri Galiléa. 40Mu Jesús quérãsi gaté. Ga irajatigai quérãpo rĩ. Enga Dupade chatapísaja disabi enga caniranguipísome rĩ.

Jesús isocade u udojo iji Dupade iguíjna cuchábi 'Témplo' uje e chise 12 años nanique

41Jecucha Jesús dayé, daté ore chicai Jerusalén iji sequeredie jnese ome judíode ore jnusinamáni dire uje i tu Páscua. 42Enga uje Jesús e chise sequeredie uje 12 años ga e nóna ore aja Jerusalén to uje ore doi dasocabei uté. 43Mu uje José, María ore chejna dasocabei adode guesi enga jé u uje ore chajni aja dedai. A ore jos eti Jesús déji gague dipesei ore gari to uje ore nóna ore aja dajei. Mu Jesús a qué chácariji Jerusalén que. 44Ore jos eti Jesús nóna ore jorane aja dajei. Jecute que ore chucué míraque. Mu uje ore chejna dire chojmarárique iji dajei enga jé u uje ore jnusina Jesús. Enga jé u uje ore chucuesi iji dajorane ore ujade. 45Mu que ore chise Jesús go iji darasade ore ujade. Jecute ore chajni Jerusalén gai ujetiga ore chucué iji.

46Enga gadioque ore guejnatígo dire uje ore chucué. Mu diga ore chisíji Dupade iguíjna cuchábi ajei. Enga qué déji Moisés uruode atatasórone uñéngo ore gatócororaque. Uje tangaripísi ore ojñane ga catecã́ri ore to ome cuchade. 47Mu jnanione udore ga chajuque ore agutedie uje disi urẽja uté áyipieranguipíse. Uje e chiraja ore uruode quigode ga chimate ore uru quitígo ome ore. 48Enga uje José, María ore chise dabi iji Moisés uruode atatasórone ore ajei ga chajuque ore agutedie uje cháji ore gatócoro. Ga daté chojningame:

–Yababi á, bayé uyoque yucuegoi ua iji erámi údode diríca. Yocopise yocáyugu ua gu. Uje que yirajágo bajogatique. ¿Gotique gu a uje que ajína yoque to diríca ya?–

49Mu Jesús chajnai daté uruode ga chojninga:

–¿Gotique gu a uje uacacueyoi yu iji daté diríca? ¿Ga ca arajáyo a uje yijogadi tu yajnéone Yapade iroquéo gai iji iguíjnai tudé?–

50Mu que ore chiraja Jesús áyipie quigode go.

51Mu udojo quigade ga nóna ore aja dajei uje ore chajni aja Nazaret. Enga jecucha ga tangaripísi ore. Mu daté que chicadígui cuchade udore iji dáyipie. 52Mu qué Jesús quérã. Enga irajatigai quérã to iji áyipie. Enga Dupade irasiguipise. Enga jé chopome ujode ayoré ore to rĩ uje ore chimesẽre.

Currently Selected:

Lúcas 2: Ayore

Highlight

Copy