Lúcas 1

Lúcas churúsãre Jesús adode ome Teófilo enga cho quigome nanique

1Teófilo á, e jiei ore uje ore churúsãre Jesús adode quigode uje pésu iji yocurasade ujade nanique. Enga ore ipotigádi u ujetiga ore chatatapísa quitígo. 2Ore urusarane u yocacadisórone acajnaquéode. Uje yocacadisórone udore ore chimópise Jesús adode iji taningai nanique. Enga ore u to uje ore jno uté ujnomei údi. 3Jecute uerate ome yu ujetiga yo quigome ua to, Teófilo á, uje e ore chingo yu Jesús adode iji taningai jé aja eruei. Enga e yiraja quigode to. 4Yipotigádi u gu ujetiga araja to uje cuchade udore ũrepíso uje pacadique ua ome ica.

Dupade utocaitique chiqueta raja Zacarías

5Uje Heródes u ore eduguéjna cuchábi iji ore uniri uje i tu Judéa nanique, ga sacerdote déji to uje i tu Zacarías. Enga Zacarías uté acote i tu Elisabet. Ore gãrapi u jnani bajai Aarón jnese. Uje sacerdóteode ore pésu dáguedie enga ore chécãre rágome dasagode iji Dupade iguíjna cuchábi. Enga jnani bajai Abías gajneque Zacarías uague uaté to iji taningápisi. 6Enga ueracho Elisabet, Zacarías ore adode enga Dupade irasiguipise ore. Ore tangaripísi Dupade iroquéode aja acajnaquéode ore gu. Enga que piyaque ore bárique cucha uje ore dopísi Dupade adode. 7Mu Zacarías, Elisabet que ore atique cuse go uje aberé acoté. Enga e choquíjnape Zacarías ga e gatape Elisabet to.

8Enga chise dínique uje sacerdóteode udore ore doi dáguedie ga ore chijnire ñane aja dáguedie iji Dupade iguíjnai jeta ore pésu cuchade aja quigode iji ajei. Jecute Zacarías déji Dupade iguíjnai ajei. 9Enga sacerdóteode ore adébeque uje ore doi cucaranenie ome ñane. Enga ore doi ome ñane enga Zacarías yuque. Jecute Zacarías u uje chacája Dupade iguíjnai ajei uñai puyai ujetiga chãru cucha ai unénique iji. 10Uje Zacarías qué chãru cucha ai unérone iji ajei puyai ga urasade qué ore catecã́ri Dupade iji guesi ome raque. 11Mu Zacarías chuniname eti Dupade utocaidode gateminore uñai chiqueta raja. Enga cháji Zacarías ãrachua iji gaserani dosadi uje ore chãru cucha ai unérone iji. 12Uje Zacarías chimo Dupade utocaidi uté uje chiqueta raja enga que chiraja dasocárique, enga todópisa. 13Mu Dupade utocaidi chojningame Zacarías:

–Ca atodo yu. Yibágui ua gu jetiga araja uje Dupade a chisi ome bataquei ome ua jne. Ga a bacoté Elisabet, uacatique cuse jne. Enga ẽ́cacho Juan aja jne. 14A anínapúsu ua jne iji babi batigai. Mu que angara anína ua gotique, mu a jé chuságaja barasade ore to ore ininaquei ome babi batigai. 15Enga a Dupade cho ujnomeránguiji babi jne. A ca babi chóji yote pioi to jne. Enga Dupade Ujopié a chise ajei eruéode jne uje qué déji daté ajei, jé aja batigai. 16Enga a babi uté gajneque jne ujetiga chacate darasade ore ga a jiépisi israélgosode ore ujetiga ore chajni Dupade gai. Enga ore chopo dangaráni iji Dupade to jne rĩ ome uté acajnaquérigo. 17Enga babi Juan a oite pujnomei jne ome yocangaráni Dupade ujnacari diringai. Enga a cho jnani bajai uje i tu Elías uje a ujopíerãque babi to jne. Ga a chijna pajesereringai ome abechugode ore jne uje a ore cha dájningane ome dabode jne. Enga a ore abode cha dájningane ome dayode ore rĩ. Enga jé upo ome Dupade guetesórone ore rĩ. Uje a ore tangárapoi Dupade rĩ enga a ore chisa ome dáyipiedie ome babi uté acajnaquérigo jne.–

18Uje Dupade utocaidi cha narare enga Zacarías catecã́ri enga chojninga:

–¿Ama jé ũré ua ya ome baruode udore a? Yaníri tu gu uje gatape yacoté uyoque.–

19Mu Dupade utocaidi uté chojninga:

–Dupade iroguipise yu aja ua arĩ́e. Enga yi tu Gabriel. Yarani tu gaté aja udé jnumi uje Dupade chiroque yu aja ua ujetiga yisi ome babi ujnomei ome ua. 20Mu botigase yu ga a ca ãrararápo jne rĩ jé aja bacoté ica batigárique. Mu jé yurúo ome ua uje a batique base jne ujetiga chise dínique.–

21Mu Zacarías urasade uje ore déji guesi chirote uté yui, ga ore cho dáyugu uje diyajmanguipise Zacarías uté iji Dupade iguíjnai ajei uñai uje puyaguipise. 22Mu uje Zacarías quene doi guesi iji Dupade iguíjnai ajei puyai mu que narárape. Jé urasade ore chiraja uje a chimo denomitígo iji Dupade iguíjnai ajei puyai. Enga Zacarías chusẽre cuchade uje a ca toque daráringome.

23Uje Zacarías chejna dajnéone dire ome Dupade iroquéode ga chajni aja daguíjnai. 24Iji udojo quigade enga Zacarías acoté Elisabet e jeque. Enga guedosíode chejna yijmanai uje que chicapoi siñeque rĩ iji daguíjnai. Enga chucué dáyipie ome re. 25Enga chojningame re: "Dupade ipesute yabi gu ujetiga ca yajéngopome yúringa aberé rĩ ome yurasade ore."

Dupade utocaidi gateminore Gabriel chiqueta raja María to

26Uje e guedosíode chojmára iji ti iji yui uje Elisabet ica déji ajei enga Dupade chirógapo datocaidi Gabriel aja ore idai uñeque rĩ uje i tu Nazaret, uje déji ore uniri Galiléa. 27Enga ibaguiéde tu gapua uje i tu María. Gapu uegue uaté, mu gajmasṍri e cuse. Enga gajmasṍri i tu José. Enga eduguéjnai David ape disi ejo gajmasṍri tuté. 28Enga Dupade utocaidi chacája María gari iji jogadi. Enga chojningame:

–Qué yibágui ua, María. Dupade ajegaidé ua iji bojodie chequei ujade. Enga Dupade déji bari iji de.–

29Uje María chimo Dupade utocaidi enga uruode chajuque aguté. Enga chojninga iji dajei: "¿Chimo jóroque re gotique uje urúo udore ome yu?" 30Mu Dupade utocaidi chojningame María:

–Ca atodo yu. Ueradépise Dupade áyipiedie ome ua.–

31Enga chojningápome rĩ:

–A jeque ua jne, enga diga babi base jne enga a ojningame jne, Jesús. 32Ga a eduguéjna cuchape babi jne. Uje ajnai tu dayé Dupade gu ome úringai eduguéjna cuchape. Ga a ajnai tupo eduguéjna cuchábi David to rĩ uje bãrapi tu gu. 33Enga israélgosode a ore cho deduguéjna cuchábi iji uté jne. Enga úringai eduguéjna a ca íjnoque jne.–

34Enga María catecã́ri Dupade utocaidi enga chojningame:

–¿Jé yatique tõrarásiji rique jne a? Uje cáma yamanique cuse.–

35Enga Dupade utocaidi chojningame María:

–Dupa Pujnuéngaisṍri Ujopié Espíritu Sánto a chise ua jne. Enga a chaparu babai jne. Gajnui u ujetiga agúsiji gue abujáraque ajei. Babi uté a garani upúsu Dupade jne. Jecute a ueque jne ome pisijnaringuéone. Enga a ore chĩ́care Dupade abi aja jne. 36Baguioto Elisabet a atique cuse to jne. Uaté u uje ore chojningame aberé. Gata mu a jé atique cuse jne. Enga e guedosíode chojmára iji ti iji yui uje ica déji ajei. 37Dupade que ajéningapusu darúrique. Enga que cucha ibiratique cúsome Dupade.–

38Jecute María chojninga:

–Yocangaráni Dupade irogue yu arĩ́e. Jecute yajéode u ujetiga uté doi dáyipiedie quigode ome yu, enga baruode udore tocade ome yu.–

María chejna daruode udore guesi ome Dupade utocaidi enga jé u uje uté jno.

María jĩrique jnome dajõra Elisabet ujetiga qué taquiríji to

39Udojo quigade ga María jĩrique jnome ore idai yui iji cucaranone edo iji ore uniri Judéa. 40Di iji ore idai ga chicáji Zacarías iguíjnai. Tibidi Elisabet enga chojninga:

–Yĩri iji uaque á.–

41Uje Elisabet chudute María pijnane enga abi chijocase re iji ajei. Enga jĩrique Dupade Ujopié Espíritu Sánto irágu Elisabet ajei. 42Enga Elisabet chejnapúsu daruode enga chojninga:

–Dupade a imeserã ua iji yocujodie chequei ujade jnese. Enga a imeserangápo babi to jne rĩ iji bajei. 43¿Jé gotique gu a uje babágui yu uje que yugúsiji cuchárique múñi? Mu a yocangarádejnai daté u ua jne. 44Uje yudute baruode que, enga yabi chijocase re iji yajei. Nínapúsu re iji yajei gu. 45A anínapúsu ua uje que otigase Dupade ojningane cucha ome ua uje a tocade jnese jne.–

46Jecute María chojninga:

–Yacaranguipise ome Dupade uje yẽrápisa yúringa ayoré ome. 47Enga jé yirasépise yu to ome yúringa piqueta ome Dupade. Yiquetangóri u uté gu.

48Enga Dupade áyipiedie ueradepísi ome yu uje que yugúsiji cuchárique múñi. Enga jé u uje erámi unirisórone, ore ape disi ejórigo a ore chiraja yu jnese jne uje Dupade imeserã yu.

49Uje Dupade u ujopíerãi uje ipesudode cuchadatéo ome yu. Uje pisijnaringuéringo que déji uté ajei go.

50Jecucha Dupade chosõre dangarásorone jnese.

51Dupade ipesucho cuchade ome dajopiéjna. Enga sué ayoré dicotárechoquíode gai ome dapesútedatéode udore.

52Dupade chĩro dacasutedie ore úringanie dacasuté. Enga jé basa udore ore uje que ore déji cuchárique ga Dupade sosi ore iji gaté.

53Dupade átapipísode u jmatágode ore. Jeque ga chiroque ayoré atade aja doi mu ore chedo dajmainie.

54Enga chopise dáyugu daroi Israel ape disi ejoi ore uyoque enga yocajneque osongaquei.

55Uje jé urúpiso nanique ome jnani bajai Abraham enga jé chuságaja ape disi ejode uyoque to uje a ca cha chátaja yoque jne iji yocuniri gotique jne.–

56María e guejnane guedosi gadioc iji Elisabet ore gari. Mu udojo quigade ga chajni to aja dedai.

Juan el Bautísta batigai u udojo, uje uté garãte ore aja yodi nanique

57Udojo quigade ga Elisabet ica base. Enga diyocape ababi. 58Uje Elisabet ica base ga iguiosode, urasade ore tibágui to uje ore nína re ome abi. Ore chiraja uaté gu uje Dupade imeserã ome abi. 59Uje e abi chise dirode uje gadióguiji ti iji yui enga jé u uje ore tibágapoi rĩ ujetiga ore chicasi disabi suté ome circuncisión. Enga ore chojningame Elisabet:

–A yĩ́caco dayé i aja jne uje Zacarías u.–

60Mu daté chetaque ore áyipiedie. Enga chojninga:

–A yĩ́caco Juan aja jne.–

61Mu jé ore chojninga:

–¿Gotique gu a? Que uacaguiotique i tu Juan gotique.–

62Mu ore cho quique daserane cucha ome disabi dayé ujetiga pésu írique. 63Mu dayé chutai darujna aórique iji ore ujetiga churúsãre dajegaitique ore írique iji. Enga churúsãre Juan iji. Mu ore tijapísa uté ipesudi i jnese. 64Uje ore chejna udojo guesi enga Zacarías nararápo to rĩ. Enga jé u uje tijapúsu Dupade. 65Ore tijapúsu uje Zacarías nararápo rĩ. Ga ore chingo cucha dacadode udore ome ñane iji dedai údode. Jé ore chuságaja dedai eruéode. Jé u iji guidáyode iji cucarani edodie rĩ iji puniri Judéa. 66Uje ore chudute udojo jnese enga ore cho dáyugu re. Ore catecã́ri uñane aja daquigode. Enga ore chojninga:

–¿Jé chosi píringome re jne a, suté disabi?–

Chamáñaje jé ũré enga Dupade imeserãpe.

Zacarías ijoyaquéode ome Dupade

67Dupade Ujopié Espíritu Sánto irágu disabi dayé Zacarías ajei. Jecute uruode u Dupade gueranone urúo ome. Ga qué tujua ga chósi tome:

68Picotaque opejã israélgosode Yocangarádejnai Dupade. Uje di iji yoque ujetiga chiqueta yoque. Uje gajneque yoque iji yocuniri.

69Chisi ome Yoquiquetangóri tome yoque uje ujopíerãque. Enga Yoquiquetangóri uté gãrapi tu jnani bajai David.

70Uje Dupade jé urúo nanique ome daruode atatasórone iji taningápisode. Uje ore urusãraque Dupade uruode udojo to ga chise yoque to. Uje chĩ́care jetiga chiroque piquetangónique aja yoque jne.

71Uje a uté chãraque uyógome yocumajósoningo ore jne, yoquetésoningo ore rĩ.

72Enga a jecucha ga jnusina dáyipiedie ome yoca cásodicáite jnani bajácho ore. Enga a jé ca chicadígui dáyipie omenie ome ore jne.

73Dupade urúo udojo to ome yoca cásodicáite jnani bajai Abraham nanique.

74Uje a chiqueta yógome yocumajósoningo ujetiga yicoi uruode enga a ca yitodógo iji gánique jne.

75Enga a yisígo uyógome Dupade jne enga yocúringai ujñapetaque jogadi tu. Enga jé yusájoja yocucuecaringuei eruénique jne.

76Zacarías e tujua dababi ga chósi tome: Yababi á, a Dupa Pujnuéngaisṍri uruode atatasõre ua jne ome yocurasade. Chamáñaje a bajaque ua aja Yocangarádejnai iquéode jne gu. Uje a bo uté ujnomei údi ome yocurasade jne ujetiga ore chécãre dadode ome uté yui.

77Enga a angome yocurasade jne uje ore úringai piquetaque garani tu ujeta pĩroque ore isijnaringuéone jne.

78Uje yocosõrasṍri u Dupade. Enga chijnorapise yoque. Enga uté gajnui tu guedé uje chijñate yoquibai ujetiga quene díreca yoquejode ujetiga chiqueta yoc.

79Enga a di dírecaringuéi údi ome ore jne uje qué ore déji ijnangununie ajéode; udore ore jnese uje ore qui upúsu pitoringai yui. A chiqueta ore, uyoque jnese jne ga jé u uje yico yocáyipie ueradedie enga quene pajesereringai chise yoque.

80Enga ore ababi Juan e quérãsi enga quérãpo irajatigai iji Dupade adode rĩ. Enga uté jogadi tu erãpetarei nanique. Ga jé chuságaja uje chingongara raja israélgosode ore.

Currently Selected:

Lúcas 1: Ayore

Highlight

Copy