Àpɔ́sò 13
13
Wa gã Bànábà kè Sɔ́ɔ̀ ké wa ɖoɓo wa
1Ɖé Ã́tìà-hwɔ̀ɖɔ̀ɔ̀ múɛɛ, kpáá-ɖɛ̀-cɛ̃-nyɔ̀ ɓě kè nyɔ-ɖɛ-tɛ̀mɛ̀ìn-nyɔ̀ ɓě nì ma ɖé cɔ́cì-nyɔ̀ ɓěɔ̀ hwìɛ̀. Waà nyɛ́nɛ́ mɔ̀ Bànábà kè Símìɔ̀ ɓɛ́ wa ɖáìn Nájà kɛ kè Ɖúsìà ɓɛ́ ɔ mɔ̀ ma Sàwíɖíìn-nyɔ̀ kɛ kè Mànédyà ɓɛ́ wa gmɛ̀ìn ma ɖé Hɛ́wɔ̀ɖɔ̀ mɔ̀à ɓóɖóɔ̀ kã́áɔ̀ kɛɛ ɓíɖí-taún wɛ̃ ɔ kè Sɔ́ɔ̀. 2Ti wa nì ma Bounɓoɔ̀ kũ̀à nyuɛń, ké wa nì ma wɔ̃ kɔ̃ hwèɖèɛ̌n nyɛɛ, Zùù Hwɛ̀ǐn-hwɛ̀ǐnɔ̀ ɖá, “Ɓě po Bànábà kè Sɔ́ɔ̀ wáká ɓó kũ̀à kɔ̃̀ jè ḿ ɖǎà wa ɖáa jè.”
3Ké ti wa ɖǎ ma wɔ̃ kɔ̃ hwèɖè, ké wa ɖǎ ma ɓaà kɛɛ, wa dè ma Bànábà kè Sɔ́ɔ̀ sɔ̃ dúún, ké wa ɖoɓo ma wa.
Bànábà kè Sɔ́ɔ̀ mu ɖé Kítììn-ɓòɖòɔ̀ kɔ̃
4Ti Zùù Hwɛ̀ǐn-hwɛ̀ǐnɔ̀ ɖǎ ma kà Bànábà kè Sɔ́ɔ̀ ɖoɓoɛɛ, wa mu ma ɖé Sìɖúsìà-hwɔ̀ɖɔ̀ɔ̀ mú. Ké wa sɔ̀ ma ɓó dyí ɖe, ké wa mu ma dyóóɔ̀ tóó-kpò ɓɛ́ wa ɖáìn Kítììn kɛɛ kɔ̃, 5ké wa nyini ma ɖé Sàɖámà-hwɔ̀ɖɔ̀ɔ̀ mú. Ké wa dè ma Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ ɖé Júù-nyɔ̀ ɓěɔ̀ cɔ́cì-gbò ɓěɔ̀ mú cɛ̃ɛ gbɔ. Jɔ̃́ɔ́ nì ma ɓó wa gbo, ɓɛ́ ɔ ké ma wa gbo kpá.
6Ti wa ɖǎ ma tóó-kpòɔ̀ hwòɖǒǔn zĩ̀ìn nyɛɛ, wa nyini ma ɖé Péfɔ̀-hwɔ̀ɖɔ̀ɔ̀ mú, ké wa dyɛ̀ìn ma ɓó hwĩɔ̀ ɖò dyi. Ɔ mɔ̀ ma Júù-gàà ɖò, ké ɔ ɖáìn ma ɔ mìɔùn kpáá-ɖɛ̀-cɛ̃-nyɔ̀. Ɔ nyɛ́nɛ́ mɔ̀ ma Bàjízɛ̀. 7Ɔ mɔ̀ ma tóó-kpòɔ̀ wuɖuí-kɔ̃̀-nyɔ̀ɔ̀ gbo-nì-nyɔ̀. Ké tóó-kpòɔ̀ wuɖuí-kɔ̃̀-nyɔ̀ɔ̀ nyɛ́nɛ́ mɔ̀ ma Sɔ́jè Pɔ́ɖè, ké ɔ mɔ̀ ma hwòɖǒ-fɔ̀nɔ̀-nyɔ̀. Ɔ ɖá ma Bànábà kè Sɔ́ɔ̀, ké ɔ mɔ́ ɓɛ́ ɔ ké Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ wɔ̃́. 8Kɛɛ Bàjízɛ̀ kɔ̃̀ nyɛ́nɛ́ tɔ̀ɔ̀ mɔ̀ ma Ɛ́ɖémà kɛɛ nì ma wa gbo vɔ̃uń. (Ɛ́ɖémà-nyɛ̀nɛ̀ɔ̀ xwíníín mɔ̀ hwĩɔ̀.) Ɔ mɔ́ ɓɛ́ ɔ ké ma tóó-kpòɔ̀ wuɖuí-kɔ̃̀-nyɔ̀ɔ̀ ɖùǔɔ̀ hwìɖǐǐ-taɓa-ɖɛ̀ ɓěɔ̀ gbo zàìn. 9Ké Zùù Hwɛ̀ǐn-hwɛ̀ǐnɔ̀ dyíìn ma Sɔ́ɔ̀ kɔ̃̀ nyɛ́nɛ́ tɔ̀ɔ̀ mɔ̀ ma Pɔ́ɔ̀ kɛɛ múin, ké ɔ gmɔ̀ ma hwĩɔ̀-gààɔ̀ dya gãa, 10ké ɔ ɖá, “Mɔ̀ nyɔ-cá-nyɔ̀ vɛ̀nɛ̀, mɔ̀ gbá-gbá-nyɔ̀, mɔ̀ Sétɔ̃̀ɛ̀ dyú, mɔ̀ dyí-sɛ́ɖɛ́ìn-ɖɛ̀ séín mú-nyɛ́-nyɔ̀ɛɛ, m̀ se Bounɓoɔ̀ hwìè sɛ́ɖɛ́ìn dyí ɓěɔ̀ dyíin nyìnìɛ̀n ɓɔ́ɔ muù? 11Gmɔ̀ nɔ̄, Bounɓoɔ̀ sɔ̃ nì m̀ kɔ̃ kàǔn, ké nì mu dyéɖéín dyi kpèìn. M̀ se dyóɖóɔ̀ dyéɛ mu ɓó ti goun xwíníín.” Wàɖà cá kɛɛ, dunu kè tíe kpɔ̃ ma ɔ dyéɖéín dyi, ké ɔ kpa ma nyɔ ké ma ɔ sɔ̃in kpɔ̃, ɓɛ́ ɔ ké ma ɔ nàìn nyɛɛ jè dyi ɓɛɛ̀. 12Ti tóó-kpòɔ̀ wuɖuí-kɔ̃̀-nyɔ̀ɔ̀ dyé ma ɖɛ kpá ma kà kɛɛ, ɔ taɓa ma Gèɖèpɔ́ɔ̀ hwìɖǐǐ. Ɔ hwòɖǒɔ̀ giniìn ma dyi ɓó ɖɛ ɓɛ́ Pɔ́ɔ̀ ɖǎ ma cɛ̃ ɓá Bounɓoɔ̀ jè dyíɛɛ jè.
Pɔ́ɔ̀ kè Bànábà nì ɖé Ã́tìà-hwɔ̀ɖɔ̀ɔ̀ mú ɖé Pìsíɖìà-ɓòɖòɔ̀ kɔ̃
13Sɔ̀ìn ɓóɛ gboɛɛ, Pɔ́ɔ̀ kè nyɔ ɓě ɓɛ́ wa nì ma ɔ gboɛɛ sɔ̀ ma ɖé Péfɔ̀-hwɔ̀ɖɔ̀ɔ̀ mú, ké wa mùìn ma dyóóɔ̀ kɔ̃, ké wa nyini ma Pɔ́gà-hwɔ̀ɖɔ̀ɔ̀ mú ɖé Pã̀fíɖídyà-ɓòɖòɔ̀ kɔ̃. Ké Jɔ̃́ɔ́ sɔ̀ ma wa kíɖíí, ké ɔ kɔ́ìn ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe. 14Kɛɛ wa mɔ̀ùn sɔ̀ ma ɖé Pɔ́gà-hwɔ̀ɖɔ̀ɔ̀ mú, ké wa mu ma ɖé Ã́tìà-hwɔ̀ɖɔ̀ɔ̀ mú, ɖé Pìsíɖìà-ɓòɖòɔ̀ kɔ̃. Ké ɓó Gèɖèpɔ́ɔ̀ fɔ̀-wèɔ̀ ɓaɖaa, wa mu ma ɖé Júù-nyɔ̀ ɓěɔ̀ cɔ́cì-gbòɔ̀ mú, ké wa kò ma dyi. 15Ti ɓɛ́ nyɔ ɓěɔ̀ ɖǎ ma Gèɖèpɔ́ɔ̀ gma-cèè-ɖɛ̀ɔ̀ kè kpáá-ɖɛ̀-cɛ̃-nyɔ̀ ɓěɔ̀ céè-ɖɛ̀ ɓěɔ̀ ɖò wuɖuún zàà hwɔɛɛ, cɔ́cìɔ̀ wuɖuí-kɔ̃̀-nyɔ̀ ɓěɔ̀ cɛ̃ɛ ma wa gbo, ké wa ɖá, “Ɖíí ɓě, ɓě dyi wuɖu ké à kpéí poɛɛ ɖò ɓéɖéín, nìí, ɓě mɛ cɛ̃ɛ.”
16Ké Pɔ́ɔ̀ nyànà ma dyi, ké ɔ pòìn ma wa sɔ̃ ɓɔ́í, ké ɔ ɖá, “Ḿ mǔè Éézùɖùɛ̀-nyɔ̀ ɓě kè ɓě mɔ̀ nyɔ ɓě fɛ̃̀àìn à Gèɖèpɔ́ɔ̀ dyi kɛɛ, ɓě mɛ tò ɖùǔ. 17À mɔ̀ Éézùɖùɛ̀-nyɔ̀ ɓě nìà kɛɛ, à Gèɖèpɔ́ɔ̀ mɔ̀ nyɔ gã zɔ̃̌ɔ̀ à ɓǎ nììn ɓǎ ɓěɔ̀. Ti wa mɔ̀ zɔ̃̌ɔ̀ ɖéè, ké wa nì ma ɖé Íjè-ɓòɖòɔ̀ kɔ̃ cĩ́ɛń nyɛɛ, ɔ nyuɛ ké wa zaìn ma ɖé dúún. Ké ɔ nàìn ma wa, ké ɔ zà ma ɖé wa ɖé ɔ kpé mú. 18Ké ɓó zɔ̃ kpáɖá-nyɔ sɔ̃́ xwíníín nyɛɛ, ɔ kùìn ma waà kpeɖeɔ̀ hwòɖǒ ɖé gbǎùn-fúɖúáɔ̀ kɔ̃. 19Ké ti ɔ ɖǎ ma xwéɖé-dù mɛ̀nɛ̌ìn-sɔ̃́ toún ɖu ɖé Kénà-ɓòɖòɔ̀ kɔ̃ kɛɛ, ɔ nyí zɔ̃̌ɔ̀ waà ɓóɖóɔ̀ à ɓǎ nììn ɓǎ ɓěɔ̀, ɓɛ́ wa ké zɔ̃̌ɔ̀ ɔ kɔ̃̀. Ti ɔ ɖú dyí hwɛ̀ ɓɛ́ ɓóɖóɔ̀ ké waà kɔ̃̀ɔ̀-ɖɛ̀ jǔɛɛ ɓɛ́ìn ma zɔ̃ hɔ̃dɛ̀ɖɛ̀ hĩinyɛ kè kpáɖá-nyɔ sɔ̃́ ɓaɖa-bùè jǔɛ.
20“Ké ti ɔ ɖǎ ma ná nìɛɛ, ɔ nyí ma wa tɔ̀ɔ̀-ɓìɔ̀ ɓě, hwɛ̀ ké Sámíò mɔ̀à kpáá-ɖɛ̀-cɛ̃-nyɔ̀ɔ̀ kɛɛ dyi ma. 21Ti Sámíò ɖǎ ma dyiɛɛ, wa zɔ̀ ma kã́á, ké Gèɖèpɔ́ɔ̀ nyí ma wa Sɔ́ɔ̀ mɔ̀à Kísìɛ̀ dyú-gààɔ̀ kɛ. Ɔ sɔ̀ ma ɖé Bɛ̃́címà nììn xwéɖé-dùɔ̀ hwìɛ̀. Ɔ kɔ̃̀ ma wa wuɖuí ɓó zɔ̃ kpáɖá-nyɔ sɔ̃́ xwíníín. 22Ké ti Gèɖèpɔ́ɔ̀ ɖǎ ma Sɔ́ɔ̀ ɖé zà kɛɛ, ɔ ɖú ma Dèɓé dyí, ɓɛ́ ɔ ké ma wa kã́á jǔ. Ɔ mɔ̀ nyɔ kɔ̃̀ jè Gèɖèpɔ́ɔ̀ nyu ma zàse, ké ɔ ɖá, ‘Ḿ ɖǎa dyé kà Dèɓé mɔ̀à Jɛséɛ̀ dyú-gààɔ̀ kɛɛ mɔ̀ gàa kɔ̃̀ kpeɖe dè ḿ hwìɖǐiɛ. Ɔ mɔ̀ nyɔ mu ɖɛ séín ɓě ɓɛ́ ḿ mɔ́ ɔ ké nyuɛɛ nyuùn.’ 23Sɔ̀ìn ɖé Dèɓé nìà kɛ nììn nyúà-dyú ɓě múɛɛ, Gèɖèpɔ́ɔ̀ ɖǎ Nyɔ-póìn-nyɔ̀ ɖò mɔ̀ Jízɛ̀ kɛɛ à mɔ̀ Éézùɖùɛ̀-nyɔ̀ ɓěɔ̀ kɛɛ nyí, sepóɛɖé ɔ ɖǎa ma à nyɛ́nɛ́ín ɖáìn kĩ́ín. 24Hwɛ̀ ɓɛ́ Jízɛ̀ ké ma dyiɛɛ, Jɔ̃́ɔ́ po ma zio ɖé Éézùɖùɛ̀-nyɔ̀ séín ɓěɔ̀ gbo, ɓɛ́ wa ké waà nàmàǔn-kpèɖèɔ̀ dyi táà, ɓɛ́ wa ké níɔ kpá. 25Ti Jɔ̃́ɔ́ nììn tiɔ̀ nìǎ ma ɖé hwɛ̀ǐn nyɛɛ, ɔ ɖá, ‘Ḿ se nyɔ ɓě ɖá ḿ jǔà kɛ. Ǹdye, kɛɛ nyɔ ɖò mu ɓó ḿ ɖeín dyí kɔùn, ké ḿ se ɖɛ kpa, ɓɛ́ ḿ ké ɔ bǎ-ɖúú buɛ̀ dyɛ mɔ̀ùn.’
26“Ɖíí ɓě, ɓě mɔ̀ Ééɓòɖòhɛ̃́ɛ̀ nyúà-dyú ɓěɛ, ɔ kè ɓě mɔ̀ nyɔ ɓě fɛ̃̀ìn kà à Gèɖèpɔ́ɔ̀ dyi kɛɛ, Gèɖèpɔ́ɔ̀ tò ma pó-bɔ̃̀ nìà kɛ à gbo. 27Jùɖúsɛ̀ɖɛ̀ìn-nyɔ̀ ɓěɔ̀ kè waà wuɖuí-kɔ̃̀-nyɔ̀ ɓěɔ̀ seɛ ma dyí dyuò nyɔ Jízɛ̀ ké ma jǔ jɛ́ɛ́ kɛ. Ké wa se kpáá-ɖɛ̀-cɛ̃-nyɔ̀ ɓěɔ̀ céè-ɖɛ̀ ɓě ɓɛ́ nyɔ zàà wuɖuún ɓó Gèɖèpɔ́ɔ̀ fɔ̀-wè séín xwíníín nyɛɛ múin wɔ̃́. Kɛɛ ti wa kpɔ̃̀ìn ma ɔ zaa kɛɛ, wa nyuɛ ké ɖɛ ɓě céè céè-ɖɛ̀ ɓě nìà kɛ múɛɛ kpá jǎà. 28Wa se ma ɖɛ jɛ́ɛ́ kɔ̃̀ jè ɓɛ́ wa ké ma ɔ ɖáɓáa dyéɛ ɓɛ́ìn, kɛɛ wa zɔ̀ ma Páɖè, ɓɛ́ ɔ ké ma ɔ ɖáɓá wɛ̃́ɛ́. 29Ké ti wa nyuɛ ké ɖɛ séín ɓě céè ma ɓá Jízɛ̀ jè dyíɛɛ kpá ma jǎà kɛɛ, wa zà ma ɔ xwɛ́ɔ̀ kɔ́ɖɔ́sìɔ̀ kɔ̃, ké wa zàà ma dyóɖóún. 30Kɛɛ Gèɖèpɔ́ɔ̀ zà ma ɔ gĩɔ. 31Ké ɓó wé ɓáún-ɓáún xwíníín nyɛɛ, Jízɛ̀ wóɖóìn ma nyɔ ɓě ɓɛ́ ɔ kè wa kè sɔ̀ ma ɖé Gáɖàɖíì-ɓòɖòɔ̀ kɔ̃, ké wa mu ma Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ dyí. Nyɔ ɓě nìà kɛɛ, wa mɔ̀ nyɔ nì ɔ zàse nyuɛń ɖé à ɓíɖí-nyɔ̀ ɓěɔ̀ gbo ɓó kàǔn. 32Ké à dyà ɓě bɔ̃̌ nɔ̀mɔ̀ dyíin kà ɓɛ́ Gèɖèpɔ́ɔ̀ mɔ̀ nyɔ ɖáìn ma kà à ɓǎ nììn ɓǎ ɓěɔ̀ ɖɛɔ̀ nyɛ́nɛ́ín nyɛɛ, 33ɔ ɖǎa nyu ké ɔ ɖǎ jǎà kpá ɓó à mɔ̀ waà dyú ɓěɔ̀ bìì, dyììn ɖé Jízɛ̀ gĩɔ-zà-zà mú. Ɖɛ nìà kɛ céè ɖé Wɛ́ɖɛ́-cèè-ɖɛ̀ɔ̀ wuɖu-kpà sɔ̃́ mú. Ɔ ɖá,
‘M̀ mɔ̀ǎ ní Dyú-gàà,
ké ḿ mɔ̀ǎ nì Ɓǎ ɓó zɛ̃̌ɛ̀.’
34Ké ɓó ɖeɛɛ, kà Gèɖèpɔ́ɔ̀ ɖǎ ma ɔ gĩɔ zà, ké ɔ se mú gbɔɔ̌ mu ɖeɛɛ, ɔ cɛ̃ɛ ma ɖé wuɖu ɓě nìà kɛ mú, ké ɔ ɖá,
‘Ní mu ɖɛ hwɛ̀ǐn-hwɛ̀ǐn kè hwòɖǒ-kɔ̃-dè-ɖɛ̀ ɓě ɓɛ́ ḿ ɖáìn ma kà Dèɓé nyɛ́nɛ́ín nyɛɛ ɓě nyíìn.’
35Ɔ jèɛɛ, Gèɖèpɔ́ɔ̀ cɛ̃ɛ ma ɖéɛ ɔ céè-ɖɛ̀ɔ̀ dà ɖò ɖe, ké ɔ ɖá,
‘Nyɔ ɓɛ́ ɔ taɓaà ḿ hwìɖǐǐ kóɖó-kóɖó kɛɛ, ḿ se ɔ dyi táǎ mu ɓɛ́ ɔ ké zɔ̃̌.’
36Dèɓé nyu ma ɖɛ Gèɖèpɔ́ɔ̀ mɔ́ ɓɛ́ ɔ ké ma ɔ mú nyùìn nyɛɛ ɖé ɔ nììn tiín. Ti ɔ ɖǎa ma náa nyuɛɛ, ɔ mɛ́ ma, ké ɔ mu ɔ ɓǎ ɓě gbo, ké ɔ zɔ̃̌ ma. 37Kɛɛ nyɔ ɓɛ́ Gèɖèpɔ́ɔ̀ zà ma kà gĩɔ kɛɛ se ma zɔ̃̌. 38Ɖíí ɓě, ɖɛ ɓě mɛ dyuò dyíɛɛ kɛà kɛ̀. À nìɛ̀ ɓě gbo cɛ̃iń kà ɓɛ́ Gèɖèpɔ́ɔ̀ ɓɛ́ìn ɓěɛ̀ nàmàǔn ɓěɔ̀ kɔ̃in zĩ̀ɛ̀n dyììn ɖé Jízɛ̀ nìà kɛ múɛ. 39Ɖɛ séín ɓě ɓɛ́ nyɔ se ma xwaún buɛ̀ɛ̀ ɓɛ́ìn dyììn ɖé Mózè nììn gmaɔ̀ múɛɛ, nyɔ mɔ̀ nyɔ taɓa Gèɖèpɔ́ɔ̀ hwìɖǐǐ kɛɛ, ɔ ɖǎ wa xwaún buɛ̀ dyììn ɖé gàa nìà kɛ mú. 40Ɔ jèɛɛ, ɓě mɛ maún, ɓɛ́ ɖɛ ɓě ɓɛ́ kpáá-ɖɛ̀-cɛ̃-nyɔ̀ ɓěɔ̀ cɛ̃ zɔ̃̌ɔ̀ ɖé waà céè-ɖɛ̀ ɓěɔ̀ múɛɛ ní kɔ̃̀ ɖà ɓě gbo kpá. Wa ɖá,
41‘Ɓě gmɔ̀ nɔ̄, nyɔ-dyɔ́-ɓaɖa-nyɔ̀ ɓě!
Ɓě mɛ poìn hwìɖǐi, ɓɛ́ ɓě ké ḿ dyéɖé kɔ̃in pa!
Sepóɛɖé ní mu ɖɛ ɖò nyuùn ɓó ti ɓě nìà cĩ́ɛń nyɛ,
ké ɓě seɛ jǎà poɛ́ mu, kɛbì wa mɛ cɛ̃ ɔ jè ɓě gboɛ.’ ”
42Ké ti Pɔ́ɔ̀ kè nyɔ ɓě ɓɛ́ wa nì ma ɓó ɔ gboɛɛ nì ma Júù-nyɔ̀ ɓěɔ̀ cɔ́cì-gbòɔ̀ mú sɔ̀ǔn wɛ̃ɛ, nyɔ ɓěɔ̀ ɓaà ma wa, ɓɛ́ wa ké ma wa ɖɛ ɓěa gbo cɛ̃ ɓó Gèɖèpɔ́ɔ̀ fɔ̀-wè nyɔ kɔ ma ɓó dyíɛɛ xwíníín. 43Ti nyɔ ɓě ɓɛ́ wa nì ma Júù-nyɔ̀ ɓěɔ̀ cɔ́cì-gbòɔ̀ múɛɛ ɖǎ ma dyi gbɛ̌ìn nyɛɛ, Júù-nyɔ̀ ɓáún-ɓáún kè nyɔ ɓě ɓɛ́ wa ɖú ma Júù-nyɔ̀ ɓěɔ̀ Gèɖèpɔ́ɔ̀ ɓiè-ɓiè dyíɛɛ, wa sí ma Pɔ́ɔ̀ kè Bànábà kíɖíí. Ké Pɔ́ɔ̀ kè Bànábà wùɖù ma wa gbo, ké wa po ma wa náún, ɓɛ́ wa ké Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ dyi kpɔ̃ kóɖó-kóɖó.
44Gèɖèpɔ́ɔ̀ fɔ̀-wèɔ̀ nyɔ kɔ ma ɓó dyíɛɛ, ɔ sè ma ɖɛ tííwè pū ɓɛ́ hwɔɖɔɔ̀ nyɔ séín ɓěɔ̀ ké ma dyí poìn, ɓɛ́ wa ké Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ wɔ̃́. 45Ti Júù-nyɔ̀ ɓěɔ̀ dyé ma nyɔ kúɖúú ɓěɔ̀ kɛɛ, wa kpá ma hwɛ̀nɛ̌ǐn mìɔ, ké wa nì ma ɖɛ Pɔ́ɔ̀ nì ma kà cɛ̃iń nyɛɛ gbo dòǐn zàǔn, ké wa nì ma ɔ nyɛ́nɛ́ gbà ɖáuń. 46Kɛɛ Pɔ́ɔ̀ kè Bànábà se ma fã̀à-kà wùɖù, ké wa ɖá, “Ɔ nɔ̀mɔ̀ dyíin ɓɛ́ à kéɔ́ ɓě Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ gbo cɛ̃ kĩ́ín. Kɛɛ kàǔn wɛ̃ɛ, kà ɓɛ́ ɓě ɖǎà ɔ ɓɔ́, ké ɓě ɖǎ ɓě mìɔùn zaa wɔ̃ po kà ɓɛ́ ɓě se kpé ɓɛ́ìn ɓɛ́ ɓě ké sè-ná-sèɛ̀ fɛ̀ɛ̀ ɓéɖéɛɛ, à muá dyɛ ɓóɖó-dù kà kò ɖò ɓěɛ̀ nyɔ ɓěɔ̀ mɔ̀ùn gbo gmɔ̀ìn. 47Sepóɛɖé ɔ mɔ̀ ɖɛ Bounɓoɔ̀ ɖá à mɛ nyuɛ. Ɔ ɖá,
‘Ní mu m̀ tòùn, ɓɛ́ m̀ ké ce jǔ ɓó ɓóɖó-dù kà kò ɖo ɓěɔ̀ bìì,
nìí ɓɛ́ ní pó-póɔ̀ ké ɖé ɓóɖó-kpàɔ̀ dà séín nyini.’ ”
48Ti nyɔ ɓě ɓɛ́ wa se ma Júù-nyɔ̀ ɓěɛɛ wɔ̃́ ma ɖɛa kɛɛ, wa hwòɖǒ dè ma dyi, ké wa ɓàìn ma Bounɓoɔ̀ bɔ̃̌ nɔ̀mɔ̀ dyíinɔ̀. Ké nyɔ ɓě ɓɛ́ Gèɖèpɔ́ɔ̀ gã ma ɓó sè-ná-sèɛ̀ fɛ̀ɛ̀ jèɛɛ taɓa ma ɔ hwìɖǐǐ. 49Ké Bounɓoɔ̀ bɔ̃̌ nɔ̀mɔ̀ dyíinɔ̀ ɓeìn ma Pìsíɖìà-ɓòɖòɔ̀ dà séín dyi. 50Kɛɛ Júù-nyɔ̀ ɓěɔ̀ po ma màa vɛ̀nɛ̀-vɛ̀nɛ̀ ɓě ɓɛ́ wa ɓiè ma Gèɖèpɔ́ɔ̀ kɛ kè gàa vɛ̀nɛ̀ ɓě ɓɛ́ wa nì ma ɖé Ã́tìà-hwɔ̀ɖɔ̀ɔ̀ múɛɛ vã kɔ̃. Ké wa ɖú ma Pɔ́ɔ̀ kè Bànábà gǎ dyéìn kpàǐ, ké wa kúmú ma wa ɖé wa nììn ɓóɖóɔ̀ kɔ̃. 51Ɔ jèɛɛ, Pɔ́ɔ̀ kè Bànábà ɓaɖa ma waà ɓo ɓěɔ̀ mú, ɓɛ́ waà ɓo-xwíɖíi-ɓòɖò ɓěɔ̀ ké ma dyi wáɖá, ɓɛ́ ɔ ké nyɔ ɓěɔ̀ zaa dúún wáɖá. Ké wa mu ma ɖé Àkónìà-hwɔ̀ɖɔ̀ɔ̀ mú. 52Kɛɛ nyɔ ɓě ɓɛ́ wa taɓa ma Gèɖèpɔ́ɔ̀ hwìɖǐǐɛɛ kpá ma múàǔn, ké Zùù Hwɛ̀ǐn-hwɛ̀ǐnɔ̀ dyíìn ma wa múin.
Currently Selected:
Àpɔ́sò 13: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
