Àpɔ́sò 7
7
Ɖɛ ɓɛ́ Síɖíɓììn zaìn ma kɔ̃in nyɛ
1Ké sáa-zà-nyɔ̀ vɛ̀nɛ̀ɔ̀ diè ma ɔ dyi, ké ɔ ɖá, “Kà ɖɛ ɓěa nìì?”
2Ké Síɖíɓììn ɖá, “Ɖíí ɓě, ɓě mɔ̀à ɓóɖóɛ̀ ɓǎ ɓěɛɛ, ɓě tò ḿ gbo ɖùǔ. Ti à ɓǎ Ééɓòɖòhɛ̃́ɛ̀ nì zɔ̃̌ɔ̀ ɖé Mɛ̀sɔ̀pɔ̀témìà-ɓòɖòɔ̀ kɔ̃, hwɛ̀ ɓɛ́ ɔ ké ma kà ɖé Háwàɖàùn-hwɔ̀ɖɔ̀ɔ̀ mú cĩ́ɛɛ, à dĩ́ín-dĩ̀ìn Gèɖèpɔ́ɔ̀ wóɖóìn ma ɔ dyí. 3Ké ɔ cɛ̃ɛ ɔ gbo, ké ɔ ɖá, ‘Sɔ̀ nì ɓíɖí-ɓòɖòɔ̀ kɔ̃, ɔ kè nì nyɔ ɓěɔ̀ hwìɛ̀, ɓɛ́ m̀ ké ɓóɖó ní mu m̀ da zàìn nyɛɛ kɔ̃ mu.’ 4Ɔ jèɛɛ, Ééɓòɖòhɛ̃́ɛ̀ sɔ̀ ma ɖé Kàdíà-nyɔ̀ ɓěɔ̀ ɓóɖóɔ̀ kɔ̃, ké ɔ cĩ́ ma ɖé Háwàɖàùn-hwɔ̀ɖɔ̀ɔ̀ mú. Ti ɔ ɓǎ mɛ́ ma kɛɛ, Gèɖèpɔ́ɔ̀ zà ma ɔ ɖé, ké ɔ dyà ma ɔ nɔ̄ ɓóɖó kɔ̃̀ mú ɓě nìà cĩ́ɛń ɓó kàǔn wɛ̃. 5Kɛɛ Gèɖèpɔ́ɔ̀ se ma ɔ pá ɖò nyí nɔ̄ ɓóɖóɛ̀ kɔ̃, ɓɛ́ ɔ ké ma ɔ kɔ̃̀ɔ̀-ɖɛ̀ jǔ. Ɔ se ma ɔ ɓáɖáa dyúáɖò nyí fóɖóún. Kɛɛ Gèɖèpɔ́ɔ̀ ɖáìn ma ɔ nyɛ́nɛ́ín kà ɔ muɛ ma ɔ nyíìn, ɓɛ́ ɔ ké ɔ kɔ̃̀ɔ̀-ɖɛ̀ jǔ, ɓɛ́ ɔ xwíníín-dyù ɓě mɔ̀ùn kéɛ ma kɔ̃̀ ɖekèɛ. Kɛɛ tia xwíníín nyɛɛ, ɔ séè ma dyú ɖò ɓéɖé ke. 6Ɖɛ Gèɖèpɔ́ɔ̀ cɛ̃ ma kɛɛ, ɔ kɛ̀. Ɔ ɖá, ‘Ééɓòɖòhɛ̃́ɛ̀ xwíníín-dyù ɓěɔ̀ mu ɖéè jǔùn ɖé nyɔ kà kò ɖò ɓě nììn ɓíɖí-ɓòɖò kɔ̃. Ké wa mu wa gǐì mú nyuùn, ɓɛ́ wa ké wa dyi pĩ́à ɓó zɔ̃ hɔ̃dɛ̀ɖɛ̀ hĩinyɛ xwíníín. 7Kɛɛ ní mu ɓóɖó kɔ̃̀ gǐì ɓɛ́ wa muà jǔùn wɛ̃ɛ gǎ dyéìn. Ɔ ɖǎ ná nìǐn, Ééɓòɖòhɛ̃́ɛ̀ xwíníín-dyù ɓěɔ̀ mu dyiìn, ɓɛ́ wa ké ḿ ɓiè nɔ̄ pá nìà kɛ mú.’ 8Ké Gèɖèpɔ́ɔ̀ kè Ééɓòɖòhɛ̃́ɛ̀ dè ma wuɖu. Ké dèè-wùɖùɔ̀ ɖàɓàìn-ɖɛ̀ mɔ̀ sàà-mɛ́-mɛ́. Ɔ jèɛɛ, ti Ééɓòɖòhɛ̃́ɛ̀ ɖǎ ma Áázè wóɖóìn nyɛɛ, ɔ ɖáɓá ma ɔ sàà, ti ɔ nyuá ma wé mɛ̀nɛ̌ìn-tã kɛ. Ké Áázè wóɖóìn ma Jékɔ̀, ké Jékɔ̀ wóɖóìn ma à ɓóɖóɛ̀ nyɔ vɛ̀nɛ̀ ɓaɖa-bùè sè sɔ̃́ ɓěɔ̀.
9“Ké à ɓóɖóɛ̀ nyɔ vɛ̀nɛ̀ ɓěɔ̀ kpá ma hwɛ̀nɛ̌ǐn ɓó Jòsé jè, ké wa peɖe ma ɔ, ké ɔ mɔ̀ ma gǐì ɖé Íjè-ɓòɖòɔ̀ kɔ̃. Kɛɛ Gèɖèpɔ́ɔ̀ nì ma ɔ gbo, 10ké ɔ gbǎà ma ɔ ɖé ɔ gǎ-dyé-dyé séín ɓěɔ̀ mú. Ké Gèɖèpɔ́ɔ̀ nyí ma ɔ fɔ̀nɔ̀-hwòɖǒ. Ɔ nyuɛ ma ɓɛ́ Féwòɖò mɔ̀ ma kà Íjè-ɓòɖòɔ̀ nàìn-nyɔ̀ɔ̀ kɛɛ hwòɖǒ ké ma ɔ múin dèìn. Ké Féwòɖò nyu ma Jòsé Íjè-ɓòɖòɔ̀ kè ɔ ɓíɖí-gbǒ-xwíníín-nyɔ̀ séín ɓěɔ̀ wuɖuí-kɔ̃̀-nyɔ̀ mú. 11Ké mɔ́ kpá ma ɖé Íjè-ɓòɖòɔ̀ kè Kénà-ɓòɖòɔ̀ kɔ̃ dà séín. Ké mɔ́ɔ̀ dyà ma gǎ-dyé-dyé pàɖǎ, ké à ɓǎ nììn ɓǎ ɓěɔ̀ se ma ɖii-ɖɛ̀ ɖò dyéɛ ɓɛ́ìn fɔɔ. 12Kɛɛ ti Jékɔ̀ wɔ̃́ɔ ma kà ɖii-ɖɛ̀ nì ma ɖé Íjè-ɓòɖòɔ̀ kɔ̃ɛɛ, ɔ tò ma ɖé à ɓǎ nììn ɓǎ ɓěɔ̀. Ɔ mɔ̀ ma wa ɖé mu-mu kĩ́ín-kĩ́ínɔ̀. 13Kɛɛ ti ɓɔ́ìn ɖe ɓɛ́ wa mu ma ɖéɛɛ, Jòsé nyuɛ ma ké ɔ ɖíí-gàà ɓěɔ̀ dyuò ma ɔ dyí. Púɛɛ, Féwòɖò dyuò ma Jòséɛ̀ nyɔ ɓěɔ̀ dyí. 14Ké Jòsé tò ma nyɔ, ɓɛ́ wa ké ma ɔ ɓǎ kè ɔ nyɔ séín ɓěɔ̀ ɖá. Ɔ nyɔ ɓěɔ̀ mɔ̀ ma nyɔ-kpò kpáɖá-nyɔ tã ɓaɖa-bùè sè hm̀m̌. 15Ké Jékɔ̀ mu ma ɖé Íjè-ɓòɖòɔ̀ kɔ̃. Ɔ kè à ɓǎ nììn ɓǎ ɓěɔ̀ fɛ̀ɛ̀ɔ̀ hwɛ̀ìn ma ɖé mánáín. 16Ké nyɔ ɓěɔ̀ zà ma waà xwɛ́ ɓěɔ̀ ɖé Íjè-ɓòɖòɔ̀ kɔ̃, ké wa kpa ma wa ɖé Sɛ́kɛ̃̀ìn-hwɔ̀ɖɔ̀ɔ̀ mú. Ké wa zà ma wa dyóɖóún ɖé pá ɓɛ́ Ééɓòɖòhɛ̃́ɛ̀ dɔ̃ zɔ̃̌ɔ̀, ɓɛ́ ɔ ké ma ɖé xwɛ́ dyóɖóún zàìn nyɛɛ mú. Ééɓòɖòhɛ̃́ɛ̀ dɔ̃̀ìn ma páɔ̀ séɓàɖà-wìɖì mú ɖé Hámɔ̀ɛ̀ dyú ɓěɔ̀ gbo, ɖé Sɛ́kɛ̃̀ìn-hwɔ̀ɖɔ̀ɔ̀ mú.
17“Kɛɛ ti ɖɛ ɓɛ́ Gèɖèpɔ́ɔ̀ ɖáìn zɔ̃̌ɔ̀ kà Ééɓòɖòhɛ̃́ɛ̀ nyɛ́nɛ́ín nyɛɛ ɖǎ ma dyi xwɛ̃́ìn nyɛɛ, à nyɔ ɓě ɓɛ́ wa nì ma ɖé Íjè-ɓòɖòɔ̀ kɔ̃ɛɛ zaìn ma dúún, ké wa kpá ma kɔ̃. 18Ti ɔ ɖǎ ma hwèɖèìn hwèɖèìn nyɛɛ, kã́á ɖìè ɖò ɓɛ́ ɔ se ma Jòsé jè dyuòɛɛ kɔ̃̀ ma Íjè-ɓòɖòɔ̀ wuɖuí. 19Ɔ vɔ̃ ma à nyɔ ɓěɔ̀ gbo sɛ́ɖɛ́-kà, ké ɔ nɛ́ ma à ɓǎ nììn ɓǎ ɓěɔ̀ kɔ̃, ɓɛ́ wa ké waà dyú-pɛ̀ɖɛ̀ ɓěɔ̀ xwáɖá xwíɖíi dyi pɛ̃́ìn, ɓɛ́ wa ní kɔ̃̀ ɖà ɖé wóɖó. 20Kɛɛ tia xwíníín nyɛɛ, Mózè wóɖó ma. Ɔ mɔ̀ ma dyú nɔ̀mɔ̀ dyíin, ké Gèɖèpɔ́ɔ̀ ɖɛ̀ɓɛ̀ ma ɔ mú mìɔ. Wa gmɛ̀ìn ma ɔ ɖé ɔ ɓǎ ɓíɖí-gbǒǔn ɓó dɛ̀nɛ̀ tã xwíníín. 21Ké ti wa pɛ̃́ìn ma ɔ xwáɖá xwíɖíi dyiɛɛ, Féwòɖòɛ̀ dyú-mààɔ̀ ɖú ma ɔ dyí, ké ɔ gmɛ̀ìn ma ɔ kà ɔ kéɔ́ kà ɔ mìɔùn xwíníín-zà-dyù gmɛ̀ìn nyuɛ. 22Ké Íjè-nyɔ̀ ɓěɔ̀ tɛ̀mɛ̀ìn ma Mózè wa nììn hwòɖǒ-fɔ̀nɔ̀-fɔ̀nɔ̀ séín ɓěɔ̀, ké ɔ dyuò ma wùɖùɛ̀ mìɔ, ké ɔ ɓéɖé ma kpé ɖé ɔ nyuu-ɖɛ̀ ɓěɔ̀ mú.
23“Ti ɔ ɖǎ ma zɔ̃ kpáɖá-nyɔ sɔ̃́ nyuɛɛ, ɔ hwòɖǒ poɛ ma gbɔ, ɓɛ́ ɔ ké ma ɔ ɖíí Éézùɖùɛ̀-nyɔ̀ ɓěɔ̀ gboi té. 24Kɛɛ ti ɔ dyéɛ ma kà Íjè-gàà ɖò kpɔ̃ ma ɔ ɖíí ɓěɔ̀ ɖò gbà-kà kɛɛ, ɔ vɔ̃ ma ɔ ɖíí ɓɛ́ gàaɔ̀ sɔ̃ zi ma kà wɔ̃ kɛɛ bìì. Ké ɔ zà ma ɔ ɖííɔ̀ kpa, ké ɔ ɓɔɔ̀ ma Íjè-gààɔ̀. 25Mózè poɛ̀n ma hwìɖǐi kà ɔ ɖíí ɓěɔ̀ muɛ ma dyí dyuòùn kà Gèɖèpɔ́ɔ̀ mɔ́ ɓɛ́ ɔ ké ma wa póìn dyììn ɖé ɔ múɛɛ, kɛɛ wa mɔ̀ùn seɛ ma náa dyí dyuò. 26Wéɔ̀ nyɔ kɔ ma ɓó dyíɛɛ, ɔ wóɖóìn ma ɔ ɖíí sɔ̃́ ɓě nì ma vɔ̃uń wɛ̃ɛ kɔ̃. Ɔ vɔ̃ ɓɛ́ ɔ ké ma wa dyí kpɔ̃, ké ɔ ɖá, ‘Gàa-dyù ɓě, má, ɓě mɔ̀ wóɖó-wóɖóe? Ɖɛ́ kɔ̃̀ jè ɓě nìà gbo vɔ̃ǐn nyɛ́?’ 27Kɛɛ nyɔ ɓɛ́ ɔ mɔ́ ma kà ɔ mǔèɔ̀ jeín nyɛɛ cṹ ma Mózè, ké ɔ ɖá, ‘Nyɛ́ nyu m̀ nyɔ-wuɖuí-kɔ̃̀-nyɔ̀ kè tɔ̀ɔ̀ mú ɓó à kɔ̃in nyɛ́? 28Nì mɔ́ mɔ́ún ɖáɓáa dyi ɖekè kà m̀ ɖáɓá ma kà Íjè-gààɔ̀ mabã̀a kɛɛ̀?’ 29Ɓó ɖɛ gàaɔ̀ cɛ̃à kɛ jèɛɛ, Mózè kpá ma xwáɖáún, ké ɔ mu ma ɖé Míɖìàùn-ɓòɖòɔ̀ kɔ̃. Ké ɔ cĩ́ ma ɖé, ké ɔ wóɖóìn ma ɖé gàa-dyù sɔ̃́.
30“Ti zɔ̃ kpáɖá-nyɔ sɔ̃́ ɖǎ ma ziɛɛ, ínjà ɖò wóɖóìn ma Mózè dyí ɖé nyɛ-mìɔ̀ ɖò ɓɛ́ ɔ nì ɖé cu-gbɔ̌ ɖò mú sɔ̀ǔn wɛ̃ɛ mú, ɖé gbǎùn-fúɖúáɔ̀ kɔ̃, dɛ̀ ɓɛ́ Sányà-tòɖòɔ̀ nì ma kà kɛ. 31Ti Mózè dyéɛ ma kà cu-gbɔ̌ɔ̀ nyu ma nìɛ̀ kɛɛ, púɛɛ, ɔ kpèìn ma ɔ hwìɖǐi. Ké ti ɔ xwɛ̃́ìn ma ɓó dyi, ɓɛ́ ɔ kéɛ ma dyé nɔ̀mɔ̀ dyíin nyɛɛ, ɔ wɔ̃́ ma Bounɓoɔ̀ wuɖu. 32Ké wuɖuɔ̀ ɖá, ‘Mɔ̄ mɔ̀ nì ɓǎ ɓěɛ̀ Gèɖèpɔ́ɔ̀. Mɔ̄ mɔ̀ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀.’ Ké Mózè tɛɖɛ ma, ké ɔ se ma ɖé gmɔ̀ɔ̀ ɓɛ́ìn ɖe. 33Ké Bounɓoɔ̀ cɛ̃ɛ ma ɔ gbo, ké ɔ ɖá, ‘Zà nì bǎɔ̀ ɓoún, sepóɛɖé pá m̀ nyànàà ɓó kɔ̃ dyiɛɛ mɔ̀ pá hwɛ̀ǐn-hwɛ̀ǐn. 34Ḿ ɖǎa dyéɖéi hwɔ̀ìn kà wa nyu ní nyɔ ɓěɔ̀ dyi pĩ́àà ɖé Íjè-ɓòɖòɔ̀ kɔ̃ɛ. Ké ḿ ɖǎ waà vĩ̌-wùɖù ɓěɔ̀ wɔ̃́. Ḿ ɖǎ nɔ̄ ɓíɖíi dyi, ɓɛ́ ḿ ké wa póìn. Ɔ jèɛɛ, ḿ nì m̀ ɖé Íjè-ɓòɖòɔ̀ kɔ̃ ɖoɓoɛń.’
35“Mózè mɔ̀ nyɔ ɓɛ́ wa ɓɔ́ ma kà, ɓɛ́ wa dyi ma kà níiń, ‘Nyɛ́ nyu m̀ à wuɖuí-kɔ̃̀-nyɔ̀ kè à tɔ̀ɔ̀-ɓìɔ̀ múɛ́?’ kɛ. Mózè dyúáɖòɔ̀ mɔ̀ nyɔ Gèɖèpɔ́ɔ̀ ɖoɓo ma, ɓɛ́ ɔ ké nyɔ-wuɖuí-kɔ̃̀-nyɔ̀ kè nyɔ-póìn-nyɔ̀ jǔ. Gèɖèpɔ́ɔ̀ nyí ma ɔ kũ̀àɔ̀ ti ɓɛ́ ɔ wùɖùìn ma ɖé ínjà ɓɛ́ ɔ wóɖóìn ma kà ɔ dyí ɖé cu-gbɔ̌ɔ̀ múɛɛ mú kɛ. 36Mózè mɔ̀ nyɔ nàìn ma wa, ké ɔ zà ma wa ɖé Íjè-ɓòɖòɔ̀ kɔ̃. Ɔ nyu ma ɖàɓàìn-ɖɛ̀ kè ɖɛ dĩ́ín-dĩ̀ìn ɓě ɖé Íjè-ɓòɖòɔ̀ kɔ̃ kè ɖé Dyóó Zĩ-zãɔ̀ wĩín ɔ kè ɖé gbǎùn-fúɖúáɔ̀ kɔ̃, ɓó zɔ̃ kpáɖá-nyɔ sɔ̃́ xwíníín. 37Mózè mɔ̀ nyɔ cɛ̃ɛ zɔ̃̌ɔ̀ Éézùɖùɛ̀-nyɔ̀ ɓěɔ̀ gbo, ké ɔ ɖá, ‘Gèɖèpɔ́ɔ̀ muɛ nyuùn ɓɛ́ ɓě ɖíí ɓěɔ̀ ɖò ké kpáá-ɖɛ̀-cɛ̃-nyɔ̀ jǔ ɖé ɓě hwìɛ̀ kà ḿ nìà kɛ.’ 38Ti Éézùɖùɛ̀-nyɔ̀ ɓěɔ̀ poìn ma ɖé gbǎùn-fúɖúáɔ̀ kɔ̃ dyíɛɛ, Mózè mɔ̀ ma nyɔ kè ínjàɔ̀ nì ma kà wùɖùɛ̌n ɖé Sányà-tòɖòɔ̀ dya kɛ̀. À ɓǎ nììn ɓǎ ɓěɔ̀ nì ma ɓó ɖekè. Gèɖèpɔ́ɔ̀ nyí ma Mózè cĩ́-cĩ́-wùɖù ɓě, ɓɛ́ ɔ kéɛ à nyí.
39“Kɛɛ à ɓǎ nììn ɓǎ ɓěɔ̀ nɔ́ɔ̀ ma ɔ wuɖuɔ̀ gbo, ké wa poɛ ma wáká. Ké Íjè-ɓòɖòɔ̀ kɔ̃ ɖe-mu-tò nyu ma wa mìɔ. 40Wa cɛ̃ɛ ma Eɖóún gbo, ké wa ɖá, ‘Nyu à bìì gèɖèpɔ́ɔ̀, ɓɛ́ ɔ ké à nàìn, sepóɛɖé à se ɖɛ ké Mózè mɔ̀ nyɔ zà ma kà à ɖé Íjè-ɓòɖòɔ̀ kɔ̃ɛɛ gbo kpáa dyí dyuò.’ 41Ɓó wé ɓěa ɓaɖaa, wa mɛ ma ɓìɖǐ-dyù ɖò, ké wa zà ma sáa ɓó kũùn-kpò ɓɛ́ wa ɖǎ ma kà mɛɛ bìì. Ké wa pa ma hwɔ ɓó ɖɛ wa mìɔùn nììn sɔ̃ ɖǎ ma kà mɛɛ bìì. 42Ɔ jèɛɛ, Gèɖèpɔ́ɔ̀ pòìn ma wa kɔ̃ín, ké ɔ zàìn ma wa ɖɛ séín ɓě ɓɛ́ wa fãà ɖé dyɔɔ̀ dyíɛɛ ɓiè-ɓiè xwáɖáún. Kà ɓɛ́ ɔ nyu céèɛ̀ ɖé kpáá-ɖɛ̀-cɛ̃-nyɔ̀ ɓěɔ̀ céè-ɖɛ̀ ɓěɔ̀ múɛɛ, ɔ kɛ̀. Gèɖèpɔ́ɔ̀ ɖá,
‘Óó Éézùɖùɛ̀-dyù ɓě, zɔ̃ kpáɖá-nyɔ sɔ̃́ ɓɛ́ ɓě nyuà ɖé gbǎùn-fúɖúáɔ̀ kɔ̃ɛɛ,
ɓě dyà ma ḿ ɖòǔn sáa-zàìn-ɖɛ̀ mɔɔ nyíí-ɖɛ̀ɛ̀?
43Gbào, ɓě ɖú gèɖèpɔ́ɔ̀ mɔ̀à Móɖɛ̀ kɛɛ mú-ɓièìn-gbò kè dɛ̀nɛ̀-dyù-gèɖèpɔ́ɔ̀ mɔ̀à Wɛ́ɖɛ́fàùn kɛɛ kũùn-kpòɔ̀ dyí, ké ɓě kpa ma wa.
Ɓě ɓiè waà hwɔìn-ɖɛ̀ ɓě ɓɛ́ ɓě ɖǎà mɛ kɛɛ ní.
Ɔ jèɛɛ, ní mu ɓě toɛ̀-kpɔ̃-nyɔ̀ mú nyuùn, ɓɛ́ ḿ ké ɓě ɖé Báɓèɖɔ́ùn-ɓòɖòɔ̀ ɖeín kpa.’
44“À ɓǎ nììn ɓǎ ɓěɔ̀ ɓéɖé ma Bounɓoɔ̀ jàɖàìn-gbò kɔ̃̀ mú ɓɛ́ gma-gbɔ̀ɖɔ̀ɔ̀ nì ma kà kɛɛ ɖé gbǎùn-fúɖúáɔ̀ kɔ̃. Ɔ mɔ̀ ɖɛ kɔ̃̀ jè Gèɖèpɔ́ɔ̀ cɛ̃ ma wa gbo kĩ́ín, ti ɔ cɛ̃ɛ ma Mózè gbo, ɓɛ́ ɔ ké ma jàɖàìn-gbòɔ̀ po kà ɔ mìɔùn nyuɛ ma kà Mózè gbo cɛ̃ɛ kɛ. 45Ti Gèɖèpɔ́ɔ̀ kúmú ma xwéɖé-dù ɓěɔ̀ ɓó à ɓǎ nììn ɓǎ ɓěɔ̀ dyúa, ké à ɓǎ ɓěɔ̀ ɖú ma waà ɓóɖóɛ̀ dyíɛɛ, à ɓǎ ɓěɔ̀ kè Jasúé dyà ma jàɖàìn-gbòɔ̀ nɔ̄ ɓóɖóɛ̀ kɔ̃. Ké ɔ sè ma nɔ̄ ɓóɖóɛ̀ kɔ̃, ké Dèɓé dyɛ̀ìn ma nɔ̄ dyi. 46Ké Gèɖèpɔ́ɔ̀ hwòɖǒ dèìn ma Dèɓé múin, ké Dèɓé zɔ̀ìn ma Gèɖèpɔ́ɔ̀, ɓɛ́ ɔ ké ma ɔ kpé nyí, ɓɛ́ ɔ ké ma ɔ bìì cĩ́-naín ɖò po. Cĩ́-naín ɔ ké ma kà poɛɛ, ɔ mɔ̀ ma Jékɔ̀ɛ̀ Gèɖèpɔ́ɔ̀ bìì. 47Kɛɛ Sã́ɖómà mɔ̀ nyɔ po ma ɔ bìì gbǒ ɖò. 48Kɛɛ Gèɖèpɔ́ɔ̀ nìà ɖéé ɖé dyiíɛɛ ní cĩ́ gbǒ ɓɛ́ nyɔǔn-dyù poɛɛ mú. Ɔ mɔ̀ ɖɛ ɓɛ́ kpáá-ɖɛ̀-cɛ̃-nyɔ̀ɔ̀ cɛ̃ zɔ̃̌ɔ̀, ké ɔ ɖá,
49‘Bounɓoɔ̀ cɛ̃ɛ, ké ɔ ɖá, “Dyɔún mɔ̀ ní zèèɔ̀ dè-naín,
ké ɓóɖó-kpàɔ̀ mɔ̀ ní ɓo-síìn-naín.
Gbǒɔ̀ nyɛ́ ɓě kéà ḿ bìì poɛ́?
Cĩ́-naínɔ̀ nyɛ́ ɓě ké ḿ bìì nyuɛ́?
50Ní sɔ̃ mɔ̀ nyɔ mɛ ɖɛ séín ɓěɛ̀.” ’
51“Ɓě kã̀ ɖùǔ cá. Ɓě dyi ɖɛ hwìɖǐi poìn, ɔ kè ɓě dyi ɖɛ́ ɖò wɔ̃́ín, ɔ nì kà nyɔ ɓě seà Gèɖèpɔ́ɔ̀ dyí dyuò wɛɛ nìà kɛ. Ké ɓě nì Zùù Hwɛ̀ǐn-hwɛ̀ǐnɔ̀ gbo vɔ̃uń kánáá pū. Kà ɓě ɓǎ nììn ɓǎ ɓěɔ̀ nyuɛ zɔ̃̌ɔ̀ kà kĩ́ín nyɛɛ, kǎà ɓě mɔ̀ùn nìà nyuɛń nyɛ̀. 52Kpáá-ɖɛ̀-cɛ̃-nyɔ̀ ɓěɔ̀ nyɛ́ ɓě ɓǎ nììn ɓǎ ɓěɔ̀ se ma gǎ dyéìn nyɛ́? Nyɔ ɓě ɓɛ́ wa cɛ̃ɛ zɔ̃̌ɔ̀ kĩ́ín kà ɓɛ́ Dyí-sɛ́ɖɛ́ìn-nyɔ̀ɔ̀ mu ma kà dyiìn nyɛɛ, wa ɖáɓá ma wa ní. Ké Dyí-sɛ́ɖɛ́ìn-nyɔ̀ɔ̀ kɛɛ, ɓě mɔ̀ùn ɖǎ ɔ peɖe-nyɔ̀ kè ɔ ɖáɓá-nyɔ̀ jǔ ɓó kàǔn. 53Ɓě dyé zɔ̃̌ɔ̀ Gèɖèpɔ́ɔ̀ gma ɓě ɓɛ́ ɔ dèìn zɔ̃̌ɔ̀ kà ínjà ɓěɔ̀ xwa kɛ, kɛɛ wɛ̃́ɛ́ kɛɛ, ɓě seɛ ma dyi kpɔ̃.”
Wa taɓaìn Síɖíɓììn sɔ́ɔ́-kpò dyi
54Ti tɔ̀ɔ̀-ɓìɔ̀ ɓěɔ̀ wɔ̃́ ma ɖɛ ɓěa kɛɛ, cɛ̃́ dyá ma wa mìɔ, ké wa tà ma nyɛ́nɛ́. 55Kɛɛ púɛɛ, Zùù Hwɛ̀ǐn-hwɛ̀ǐnɔ̀ dyíìn ma Síɖíɓììn múin, ké ɔ gmɔ̀ ma dyií gãa, ké ɔ dyé ma Gèɖèpɔ́ɔ̀ dĩ́ín-dĩ̀ìnɔ̀, ké ɔ dyé ma Jízɛ̀ ɓó Gèɖèpɔ́ɔ̀ ɖiaún dyi nyànàà. 56Ké ɔ ɖá, “Ɓě gmɔ̀ ɖéa, ḿ dyé ké dyɔɔ̀ kaà wɔ̃, ké ḿ dyé Nyɔǔn-dyùɛ̀ Dyú-gààɔ̀, ké ɔ nyànà ɖé Gèɖèpɔ́ɔ̀ ɖiaún dyi.”
57Ké tɔ̀ɔ̀-ɓìɔ̀ ɓěɔ̀ páná ma mú zoo, ké wa kã ma waà ɖùǔ ɓěɔ̀, ké wa séín wáɖá ma Síɖíɓììn kɔ̃. 58Ké wa kúmú ma ɔ hwɔɖɔɔ̀ mú dyi, ké wa taɓaìn ma ɔ sɔ́ɔ́-kpò dyi. Zàse ɓěɔ̀ pɛ̃́ìn ma waà ɖɔ ɓě ɓɛ́ wa zà ma múɛɛ ɓó gàa-dyù hwà ɖò ɓɛ́ wa ɖáìn Sɔ́ɔ̀ kɛɛ ɓo zɔ̃̌ dyi. 59Ké ti wa nì ma Síɖíɓììn sɔ́ɔ́-kpò dyi taɓaǐn nyɛɛ, ɔ wùɖù ma Bounɓoɔ̀ gbo, ké ɔ ɖá, “Bounɓo Jízɛ̀, kpɔ̃ ní zùùɔ̀ dyi.” 60Ké ɔ taɓa ma kɔ́-dù hwuɖu, ké ɔ páná ma mú, ké ɔ ɖá, “Bounɓo, nàmàǔn wa nìà nyuɛń nyɛɛ, mɔ̀ǔn ɖá ɓɛ́ wa kéɛ kpa dyí ɖú.” Ti ɔ ɖǎ ma ɖɛa cɛ̃ɛ, púɛɛ, ɔ mɛ́ ma ní.
Currently Selected:
Àpɔ́sò 7: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
