Àpɔ́sò 8
8
1Ɓó tia ɓaɖaa, Sɔ́ɔ̀ hwòɖǒ wɔ̃́ ma, ɓɛ́ wa ké ma Síɖíɓììn ɖáɓá.
Sɔ́ɔ̀ dyéìn cɔ́cì-nyɔ̀ ɓěɔ̀ gǎ
Sɔ̀ìn ɓó wéa gboɛɛ, wa ɖú ma cɔ́cì-nyɔ̀ ɓě ɓɛ́ wa nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ gǎ dyéìn kpàǐ cá. Ké wa séín ɓeìn ma ɖé Júɖìà-ɓòɖòɔ̀ kè Sɛ̀mɛ́ɖìà-ɓòɖòɔ̀ kɔ̃in dà séín, ɔ sèìn ma àpɔ́sò ɓěɔ̀ ɖòùn. 2Nyɔ ɓě ku ma dúún ɓó Gèɖèpɔ́ɔ̀ ɓiè jèɛɛ zà ma Síɖíɓììn dyóɖóún, ké wa nì ma ɔ jè kpá hwòɖǒ taɓauń mìɔ.
3Ɓó tia ɓaɖaa, Sɔ́ɔ̀ nì ma cɔ́cì-nyɔ̀ ɓěɔ̀ wɔ̃ hwɔuń. Ɔ mu ma waà gbǒ ɓěɔ̀ mú ɖò-ɖò, ké ɔ jiɖi ma gàa ɓěɔ̀ kè màa ɓěɔ̀ ɖé, ké ɔ po ma wa kpɔɖɔ ɖeín.
Féɖò cɛ̃ bɔ̃̌ nɔ̀mɔ̀ dyíinɔ̀ ɖé Sɛ̀mɛ́ɖìà-ɓòɖòɔ̀ mú
4Kɛɛ nyɔ ɓě ɓɛ́ wa ɓeìn ma kà dyiɛɛ, wa kpa ma bɔ̃̌ nɔ̀mɔ̀ dyíinɔ̀ cɛ̃ɛ. 5Féɖò mu ma ɖé Sɛ̀mɛ́ɖìà-ɓòɖòɔ̀ hwɔɖɔ ɖò mú, ké ɔ po ma Kɛ́ɖɛ́ìɔ̀ jè zio ɖé wa gbo. 6Ti nyɔ kúɖúú ɓěɔ̀ wɔ̃́ ma ɖɛ ɓě ɓɛ́ ɔ nì ma cɛ̃iń nyɛ, ké ti wa dyé ma zɛ̃̀ìn-ɖɛ̀ ɓě ɓɛ́ ɔ nyu ma kɛɛ, wa ɓéɖé ma hwòɖǒ dyúáɖò, ké wa tò ma ɔ wuɖuɔ̀ ɖùǔ gbo nɔ̀mɔ̀ dyíin. 7Ké zùù gbà ɓěɔ̀ páná ma mú, ké wa sɔ̀ ma nyɔ ɓě mú. Ké nyɔ ɓáún-ɓáún ɓě kɔ̃̀ wáká mɛ́ ma kɛ kè nyɔ kúɖúú ɓě kɔ́ɖɔ́ ma kɛɛ káná ma dyi. 8Ɔ jèɛɛ, múà ɓáún-ɓáún nì ma hwɔɖɔɔ̀ mú.
9Kɛɛ gàa ɖò nì ma ɓó, ké ɔ nyɛ́nɛ́ mɔ̀ ma Sã́ɓò. Ké ɔ ɖǎ ma ɖé hwɔɖɔɔ̀ mú zɛ̃̀ìn-ɖɛ̀ ɓě nyuɛń hwèɖèìn. Ké ɔ zɛ̃̀ìn-ɖɛ̀ ɓěɔ̀ nyuɛ ké Sɛ̀mɛ́ɖìà-nyɔ̀ ɓěɔ̀ giniìn ma dyi mìɔ. Ɔ nìɛ̀ ma cɛ̃iń kà ɓɛ́ ɔ mɔ̀ ma nyɔ vɛ̀nɛ̀ kɛ. 10Sɔ̀ìn ɖé waà nyɔ dyùwè ɓěɔ̀ gbo ké waà nyɔ vɛ̀nɛ̀ ɓěɔ̀ dyɛ̀ìn nyɛɛ, wa séín tò ma ɔ wuɖuɔ̀ ɖùǔ gbo nɔ̀mɔ̀ dyíin, ké wa ɖá, “Gàa nìà kɛ mɔ̀ kpé sɔ̀ìn ɖé Gèɖèpɔ́ɔ̀ gbo, ɓɛ́ wa ɖáìn ‘Kpé Vɛ̀nɛ̀’ kɛ.” 11Wa tò ma ɔ ɖùǔ gbo, sepóɛɖé ɔ ɖǎ ma wa dyi giniɛ̌n hwèɖèìn ɖé zɛ̃̀ìn-ɖɛ̀ ɓě ɓɛ́ ɔ nyu ma kɛɛ mú. 12Kɛɛ Féɖò nì ma bɔ̃̌ nɔ̀mɔ̀ dyíinɔ̀ cɛ̃iń ɓá Gèɖèpɔ́ɔ̀ kã́á-ɓòɖòɔ̀ jè dyí, ɔ kè ɓá Jízɛ̀ Kɛ́ɖɛ́ìɛ̀ nyɛ́nɛ́ɔ̀ jè dyí ɖekè. Ké gàa kè màa ɓěɔ̀ kpá ma níɔ, ti ɓɛ́ wa taɓa ma ɖɛ Féɖò nì ma kà wa gbo cɛ̃iń nyɛɛ hwìɖǐǐɛ. 13Ké Sã́ɓò mìɔùn taɓa ma ɖɛ ɓɛ́ Féɖò nì ma kà cɛ̃iń nyɛɛ hwìɖǐǐ ɖekè. Ɔ kpá ma níɔ, ké ɔ kè Féɖò naìn ma mú tee. Ti ɓɛ́ ɔ dyé ma Féɖò ɖàɓàìn-ɖɛ̀ kè zɛ̃̀ìn-ɖɛ̀ kpa ɖɛ ɓě nyuɛ kɛɛ, ɔ giniìn ma dyi.
14Ti àpɔ́sò ɓě ɓɛ́ wa nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ wɔ̃́ɔ ma kà Sɛ̀mɛ́ɖìà-nyɔ̀ ɓěɔ̀ ɖǎ ma Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ dyi kpɔ̃ kɛɛ, wa ɖoɓo ma Píɖɛ̀ kè Jɔ̃́ɔ́ ɖé wa gbo. 15Wa mu ma ɖé, ké wa ɓaà ma ɓó nyɔ ɓěɔ̀ jè, ɓɛ́ Zùù Hwɛ̀ǐn-hwɛ̀ǐnɔ̀ ké ma wa kɔ̃ dyi. 16Sepóɛɖé Zùùɔ̀ séè ma wa ɖò kɔ̃ dyi ke. Wa ɖǎ ma níɔ kpá ɖé Bounɓo Jízɛ̀ɛ̀ nyɛ́nɛ́ɔ̀ mú ɖòùn pū. 17Ké Píɖɛ̀ kè Jɔ̃́ɔ́ dè ma wa sɔ̃ dúún, ké Zùù Hwɛ̀ǐn-hwɛ̀ǐnɔ̀ dyi ma wa kɔ̃.
18Kɛɛ ti Sã́ɓò dyéɛ ma kà àpɔ́sò ɓěɔ̀ dè ma nyɔ ɓěɔ̀ sɔ̃ dúún, ké Zùùɔ̀ dyi ma wa kɔ̃ɛɛ, púɛɛ, ɔ nyí ma wa wíɖí, 19ké ɔ ɖá, “Ɓě nyí mɔ́ún kpé dyúáɖòɔ̀ ɖò, ɓɛ́ nyɔ kã̀ìn séín ní mu sɔ̃ dúún dèìn nyɛɛ, Zùù Hwɛ̀ǐn-hwɛ̀ǐnɔ̀ ké wa kɔ̃ dyi ɖekè.”
20Kɛɛ Píɖɛ̀ cɛ̃ɛ ma ɔ gbo, ké ɔ ɖá, “M̀ kè nì wíɖíɔ̀ mu mú gbɔɔ̀ùn, sepóɛɖé m̀ poɛ̀n hwìɖǐi kà ɓɛ́ m̀ ɓɛ́ìn Gèɖèpɔ́ɔ̀ nyíí-ɖɛ̀ɔ̀ wíɖí mú dyéɛ̀n nyɛ. 21M̀ se kpé kè pá ɖò ɓéɖé ɖé ɖɛ nìà kɛ mú, sepóɛɖé nì hwòɖǒ-dyùàɔ̀ se dyí sɛ́ɖɛ́ìn ɓó Gèɖèpɔ́ɔ̀ gbo. 22M̀ mɛ táà nì kpeɖe gbàɔ̀ dyi, ɓɛ́ m̀ ké Bounɓoɔ̀ ɓaà, kɛbì Gèɖèpɔ́ɔ̀ mu ɖɛ nì hwòɖǒ-dyùàɔ̀ poà gbɔɛɛ kɔ̃in zĩ̀ìn ní. 23Ḿ dyéɛ kà hwɛ̀nɛ̌ nyuɛ ké nì hwòɖǒ-dyùàɔ̀ nɛɛ̀ mìɔ kɛ, ɔ kè kà nì ɖɛ gbàɔ̀ ɖǎ m̀ sã mìɔ kɛ.”
24Ké Sã́ɓò zà ma ɖé wuɖu, ké ɔ ɖá, “Ɓě ɓaà ḿ bìì Bounɓoɔ̀, ɓɛ́ ɖɛ ɓě cɛ̃à kɛɛ ɖò ní kɔ̃̀ ɖà ḿ gbo kpá.”
25Ti Píɖɛ̀ kè Jɔ̃́ɔ́ ɖǎ ma zàse nyu, ké wa ɖǎ ma Bounɓoɔ̀ bɔ̃̌ nɔ̀mɔ̀ dyíinɔ̀ nyɔ ɓěɔ̀ gbo cɛ̃ɛ, wa kɔ́ìn ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe. Wa kpa ma bɔ̃̌ nɔ̀mɔ̀ dyíinɔ̀ cɛ̃ɛ ɖé Sɛ̀mɛ́ɖìà-hwɔ̀ɖɔ̀ ɓáún-ɓáún ɓě kɔ̃̀ mú wa zĩ̀ìn ma dyiɛɛ múin.
Féɖò kè gɔ̌mànà-nyɔ̀ vɛ̀nɛ̀ sɔ̀ìn ɖé Ítìópìà-ɓòɖòɔ̀ kɔ̃ɛɛ jè
26Wé ɖòɛ̀ ɓaɖaa, Bounɓoɔ̀ ínjà ɖò cɛ̃ɛ ma Féɖò gbo, ké ɔ ɖá, “Sɔ̀ dyí, ɓɛ́ m̀ ké ɖé zɔ̃̌in mùìn, ɓɛ́ m̀ ké hwìè ɓɛ́ ɔ sɔ̀ìn kà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ ɔ muà ɖé Gázà-hwɔ̀ɖɔ̀ɔ̀ múɛɛ dyí sí.” Ɔ mɔ̀ hwìè ɓɛ́ ɔ mu ɖé gbǎùn-fúɖúáɔ̀ kɔ̃ɛ. 27Ké Féɖò sɔ̀ ma dyí, ké ɔ mu ma. Ti ɔ nì ma muɛń nyɛɛ, ɔ wáɖá ma Ítìópìà-gàà ɖò dyéɖé dya. Gàa nìà kɛ mɔ̀ ma Kã̀dásì ɓɛ́ ɔ mɔ̀ ma màa, ɓɛ́ ɔ kɔ̃̀ ma Ítìópìà-nyɔ̀ ɓěɔ̀ wuɖuí kɛɛ gbo-nì-nyɔ̀ vɛ̀nɛ̀. Ɖɛ kpa ɖɛ séín ɓě ɓɛ́ kã́á-mààɔ̀ ɓéɖé ma kɛɛ, ɔ mɔ̀ nyɔ kɔ̃̀ wa wuɖuí. Ɔ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ ɔ ké Gèɖèpɔ́ɔ̀ ɓiè. 28Ké ɔ nìǎ ma ɔ ɓíɖí muɛń ɖe. Ɔ kò ma ɔ hwíì-sǒɔ̀ mú, ké ɔ nì ma Àzédyà mɔ̀à kpáá-ɖɛ̀-cɛ̃-nyɔ̀ɔ̀ kɛɛ céè-ɖɛ̀ɔ̀ wuɖuún zàà kpauń. 29Ké Zùùɔ̀ cɛ̃ɛ ma Féɖò gbo, ké ɔ ɖá, “Mu ɖé gàa nìà hwíì-sǒɔ̀ mú kɛɛ gbo.” 30Ɔ jèɛɛ, Féɖò kpa ma ɖé ɔ gbo peɖeɛ, ké ɔ wɔ̃́ ma gàaɔ̀ Àzédyà mɔ̀à kpáá-ɖɛ̀-cɛ̃-nyɔ̀ɔ̀ kɛɛ céè-ɖɛ̀ɔ̀ wuɖuún zàà. Ké ɔ diè ma ɔ dyi, ké ɔ ɖá, “Ɖɛ m̀ nìà wuɖuún zàǔn wɛ̃ɛ, m̀ wɔ̃́ɔ múinǹ?”
31Ké gàaɔ̀ ɖá, “Ɔ jǔ ké nyɔ ɖò se nì, ɓɛ́ ɔ kéɛ ḿ tɛ̀mɛ̀ìn ní, nìí, xwɛ̌ ḿ ɓɛ́ìn ɔ múin wɔ̃́ɔ nyuɛ kɛ́?” Ké ɔ ɖá ma Féɖò, ɓɛ́ ɔ ké ma ɖé ɔ gbo dyá, ɓɛ́ ɔ ké ɖé ɔ gbo dyi kò. 32Gèɖèpɔ́ɔ̀-cèè-ɖɛ̀ɔ̀ wáká kɔ̃̀ mú ɓɛ́ ɔ nì ma kà wuɖuún zàǔn wɛ̃ɛ, ɖɛ ɔ cɛ̃ɛ kɛà kɛ̀. Ɔ ɖá,
“Ɔ nì ma kà ɓáɖáá ɓɛ́ wa nì ɖáɓá-naín kpauń wɛ̃ɛ nìà kɛ.
Kà ɓáɖáá ɓɛ́ wa nì mí bũ̌in cɛ̃iń nyɛɛ ní wuɖuà kɛɛ,
kǎà ɔ mɔ̀ùn se ma ɔ wɔ̃ɔ̀ ɓáà ɖekè.
33Wa dyà ma ɔ ɓíɖíi, ké ɖɛ wa kéɔ́ má dyí-sɛ́ɖɛ́ìn-kà cɛ̃, ɓɛ́ ɔ kéɔ́ dyéɛɛ, ɔ seɛ ma dyé.
Nyɛ́ ɓɛ́ìn ɔ nììn dyú ɓě jè cɛ̃ɛ kɛ́?
Sepóɛɖé ɔ fɛ̀ɛ̀ɔ̀ ɖǎ ɔ xwa sɔ̀, ké ɔ ɖǎ ɓóɖó-kpàà kɔ̃ sɔ̀.”
34Ké gɔ̌mànà-nyɔ̀ vɛ̀nɛ̀ɔ̀ diè ma Féɖò dyi, ké ɔ ɖá, “Nyɛ́ kɔ̃̀ jè kpáá-ɖɛ̀-cɛ̃-nyɔ̀ɔ̀ cɛ̃à kɛ́? Ɔ cɛ̃ ɔ mìɔùn jèè, mɔɔ ɔ cɛ̃ nyɔ kà kò ɖò jèè? Cɛ̃ɛ wɛ́ɛ ḿ gboe.” 35Ké Féɖò dè ma wùɖùɛ̀ gbɔ. Ɔ dèɛ̀n ma ɖé céè-ɖɛ̀ kɔ̃̀ mú gàaɔ̀ nì ma kà wuɖuún zàǔn wɛ̃ɛ gbo gbɔ, ké ɔ cɛ̃ ma bɔ̃̌ nɔ̀mɔ̀ dyíin ɓá Jízɛ̀ dyíɛɛ ɔ gbo. 36Ké ti wa nì ma hwìèɔ̀ xwíníín muɛń nyɛɛ, wa dyɛ̀ìn ma ní ɖò. Ké gɔ̌mànà-nyɔ̀ vɛ̀nɛ̀ɔ̀ ɖá, “Gmɔ̀ nɔ̄, gbɛ̀ kà ní ɖò nìɛ. Ɖɛ́ mu nyuùn ɓɛ́ ḿ ké se níɔ kpáá?”
[ 37Ké Féɖò ɖá, “M̀ dyiɛ náa jǎà po ɖé nì hwòɖǒ-dyùà séín múín, m̀ ɓɛ́ìn níɔ kpáa.”
Hwɛ̀ ké gɔ̌mànà-nyɔ̀ vɛ̀nɛ̀ɔ̀ cɛ̃ɛ ma Féɖò gbo, ké ɔ ɖá, “Ḿ poɛ jǎà jɛ́ɛ́ kà Jízɛ̀ Kɛ́ɖɛ́ì mɔ̀ Gèɖèpɔ́ɔ̀ Dyú-gààɔ̀ kɛ.”] 38Ké ɔ cɛ̃ɛ ma nyɔ ɓɛ́ ɔ nì ma ɔ hwíì-sǒɔ̀ nàǐn nyɛɛ gbo, ɓɛ́ wa ké ma dyi nyànà. Ké Féɖò kè gɔ̌mànà-nyɔ̀ vɛ̀nɛ̀ɔ̀ sí ma níɔ̀ kɔ̃, ké Féɖò po ma ɔ níɔ. 39Ké ti wa sɔ̀ ma níɔ̀ gboɛɛ, Bounɓoɔ̀ Zùùɔ̀ bǎ ma ɓó Féɖò ɓíɖíi, ké gɔ̌mànà-nyɔ̀ vɛ̀nɛ̀ɔ̀ se ma ɔ dyé ɖe fɔɔ. Ké gɔ̌mànà-nyɔ̀ɔ̀ kpá ma hwìè xwíníín ɖe, ké ɔ kpa ma múà nyuɛ mìɔ. 40Kɛɛ Féɖò wóɖóìn ma ɖé Àzótà-hwɔ̀ɖɔ̀ɔ̀ mú. Ké ɔ mùìn ma ɖé ɓóɖóɔ̀ kɔ̃, ké ɔ kpa ma bɔ̃̌ nɔ̀mɔ̀ dyíinɔ̀ cɛ̃ɛ ɖé hwɔɖɔ séín ɓěɔ̀ mú, ké ɔ nyini ma ɖé Sɛ̀sɛ̀wíɖíà-hwɔ̀ɖɔ̀ɔ̀ mú.
Currently Selected:
Àpɔ́sò 8: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
