Jɛ́nɛ́sì 28
28
1Hwɛ̀ ké Áázè ɖá ma Jékɔ̀, ké ɔ po ma ɔ náún, ké ɔ ɖá, “M̀ mɛ ɓɔ́ nyɔ́nɔ́ ɖò nɔ̄ Kénà-ɓòɖòɛ̀ màa-dyù ɓěɔ̀ hwìɛ̀ zàà. 2Sɔ̀ dyí, ɓɛ́ m̀ ké ɖé Páɖàùn-Áwàɖàùn-ɓòɖòɔ̀ kɔ̃ mu ɖé Bɛ̀fúè mɔ̀à m̀ ɖeɛ̀ ɓǎɔ̀ kɛɛ ɓíɖí-taún, ɓɛ́ m̀ ké Ɖéɓɛ̀ìn mɔ̀à m̀ ɖe ɖíí-gààɔ̀ kɛɛ dyú-màà ɓěɔ̀ ɖò dyi kpɔ̃, ɓɛ́ ɔ ké nì gmàà jǔ. 3Kpé-séín-ɓéɖé-Gèɖèpɔ́ɔ̀ mɛ po m̀ mana kɔ̃, ɓɛ́ ɔ ké m̀ dúún zaìn, ɓɛ́ nyɔ kúɖúú ɓě ké ɖé m̀ mú sɔ̀. 4Ké ɔ mɛ nyí m̀ kè nì xwíníín-dyù ɓě mana ɓɛ́ ɔ po ma kà Ééɓòɖòhɛ̃́ɛ̀ kɔ̃ kɛ, ɓɛ́ ɓě ké ɓóɖó ɓɛ́ Gèɖèpɔ́ɔ̀ nyí ma kà Ééɓòɖòhɛ̃́ɛ̀ kɛɛ dúí sè. Ɔ mɔ̀ ɓóɖó kɔ̃̀ kɔ̃ m̀ mɔ̀à ɖéèɛ.” 5Púɛɛ, Áázè cuò ma Jékɔ̀, ɓɛ́ ɔ ké ma ɖé Páɖàùn-Áwàɖàùn-ɓòɖòɔ̀ kɔ̃ mu ɖé Ɖéɓɛ̀ìn mɔ̀à Bɛ̀fúè mɔ̀à Síwíɖíà-nyɔ̀ɔ̀ kɛɛ dyú-gààɔ̀ kɛɛ gbo. Ɖéɓɛ̀ìn mɔ̀à Wìɖìbɛ́kɔ̀ mɔ̀à Jékɔ̀ kè Íìsɔ́ɔ̀ ɖeɛɛ ɖíí-gààɔ̀ kɛ̀.
Íìsɔ́ɔ̀ kpɔ̃ ma nyɔ́nɔ́ ɖò dyi ɖe
6Púɛɛ, Íìsɔ́ɔ̀ wɔ̃́ɔ ma kà Áázè po ma Jékɔ̀ náún, ké ɔ ɖá, “M̀ mɛ ɓɔ́ nyɔ́nɔ́ ɖò nɔ̄ Kénà-ɓòɖòɛ̀ màa-dyù ɓěɔ̀ hwìɛ̀ zàà.” Ké ɔ dyéɛ ma kà Áázè po ma Jékɔ̀ mana kɔ̃, ké ɔ tò ma ɔ ɖé Páɖàùn-Áwàɖàùn-ɓòɖòɔ̀ kɔ̃, ɓɛ́ ɔ ké ma ɖé ɔ nyɔ́nɔ́ zà kɛ. 7Ké ɔ dyéɛ ma kà Jékɔ̀ ɖǎ ma ɔ ɖe kè ɔ ɓǎà wuɖuɔ̀ wɔ̃́, ké ɔ ɖǎ ma ɖé Páɖàùn-Áwàɖàùn-ɓòɖòɔ̀ kɔ̃ muɛ. 8Púɛɛ, ɔ dyéɛ ma kà Kénà-màà-dyù ɓěɔ̀ se ma ɔ ɓǎ Áázèɛ̀ hwòɖǒ dyi dèɛ. 9Ɔ jèɛɛ, ɔ mu ma ɖé Ésìméò mɔ̀à Ééɓòɖòhɛ̃́ɛ̀ dyú-gààɔ̀ kɛɛ gbo, ké ɔ kpɔ̃ ma Màháɖà mɔ̀ Ésìméò dyú-màà kɛɛ dyi, ɓɛ́ ɔ ké ma ɔ gmàà jǔ ɓó nyɔ́nɔ́ ɓě ɔ ɓéɖé ma kà kɛɛ kɔ̃in ɖe. Màháɖà mɔ̀ Nɛ̀bádyò ɖíí-màà.
Jékɔ̀ɛ̀ dya-dya
10Ti ɓɛ́ Jékɔ̀ sɔ̀ ma Bèsíɓà-pàɔ̀ mú dyí, ké ɔ nì ma ɖé Háwàɖàùn-hwɔ̀ɖɔ̀ɔ̀ mú muɛń nyɛɛ, 11ɔ nyini ma ɓó pá ɖò mú, ké tíe ɖǎ ma ɔ kpɔ̃̀ìn jèɛɛ, ɔ pɛ̃́ ma ɓó. Ɔ ɖú ma sɔ́ɔ́-kpò ɓě nì ma ɓóɛɛ ɖò dyí, ké ɔ nyuɛ ma dú-kɔ̃-dè-ɖɛ̀ mú, ké ɔ pɛ̃́ ma ɓó dyi, ɓɛ́ ɔ ké mɔ́. 12Ti ɔ kpá ma nyíɔún wɛ̃ɛ, ɔ ɓéɖé ma dya-dya ɖò. Ɔ dyé ma ɖɛ hwɔìn sáɖá-gbóó ɖò ɓɛ́ ɔ sɔ̀ìn ma nɔ̄ ɓóɖó-kpàà kɔ̃, ké ɔ nyini ma ɖé dyɔún wɛ̃. Ké Gèɖèpɔ́ɔ̀ ínjà ɓěɔ̀ nì ma dyáùn sí nyuɛń ɓóɛ kɔ̃. 13Ké Bounɓoɔ̀ nyànà ma ɖéɛ dú-hwìɛ̀ dyi, ké ɔ ɖá, “Mɔ̄ mɔ̀ Bounɓo mɔ̀à m̀ ɓǎ Ééɓòɖòhɛ̃́ɛ̀ kè Áázèɛ̀ Gèɖèpɔ́ɔ̀ kɛ̀. Ɓóɖó kɔ̃̀ kɔ̃ ɓɛ́ m̀ pɛ̃́à ɓó dyiɛɛ, ní muɛ m̀ kè nì xwíníín-dyù ɓě nyíìn. 14Ké kà púu-púu nìà ɓóɖó-kpàɔ̀ kɔ̃ɛɛ jĩ̀à kɛɛ, kǎà nì xwíníín-dyù ɓěɔ̀ mu jĩ̀ìn. Ké ɓě mu dyi gbɛ̀ìn, ɓɛ́ ɓě ké ɓóɖó-gã̀ hĩinyɛɔ̀ kɔ̃in dyíìn, ké dyììn ɖé m̀ kè nì xwíníín-dyù ɓěɔ̀ múɛɛ, ɖéɛ̀ xwéɖé-dù séín nì ɓóɖó-kpàɔ̀ kɔ̃ɛɛ mu jĩ́á-jè dyéìn. 15Tò ɖùǔ, ní mu ɓó m̀ gbo nììn kánáá pū, ké ní mu m̀ dyí gmɔ̀ùn dɛ̀ kã̀ìn séín nì mu muùn wɛ̃, ké ní mu m̀ ɓóɖó nìà kɛ kɔ̃ dyàùn ɖe, sepóɛɖé ḿ se m̀ dyi táǎ mu. Ní mu ɖɛ séín ḿ ɖǎà m̀ nyɛ́nɛ́ín ɖáìn nyɛɛ nyuùn.”
16Ti ɓɛ́ Jékɔ̀ sɔ̀ ma nyíɔún wɛ̃ɛ, ɔ ɖá, “Jǎà jɛ́ɛ́, Bounɓoɔ̀ nì pá nìà kɛ mú, ké ḿ seɛ dyuò wà!” 17Ɔ peɖe ma fã̀à mìɔ cá, ké ɔ ɖá, “Dà ɓó gã̌ ní cá wà! Gèɖèpɔ́ɔ̀ nì dà, ké dà ɓó mɔ̀ dyɔún gbǒ-wɔ̃̀ jǎà wà!”
18Hwɛ̀ ké Jékɔ̀ sɔ̀ ma dyí ɓó gànà-kṹún mɛ̀nɛ̀ɛ̀, ké ɔ ɖú ma sɔ́ɔ́-kpò ɓɛ́ ɔ dè ma kà dú kɔ̃ɛɛ dyí, ké ɔ nyànàìn maa dyi, ɓɛ́ ɔ ké nyɔ-ɖɛ-hwìɖǐi-dyàìn-ɖɛ̀ jǔ. Ké ɔ púèɛ̀ ma cáná dúún. 19Ké ɔ jǔìn ma páɔ̀ Bɛ́fèò-nyɛ̀nɛ̀,#28:19 Bɛ́fèò-nyɛ̀nɛ̀ɔ̀ xwíníín mɔ̀ Gèɖèpɔ́ɔ̀ gbǒ. kɛɛ hwɔɖɔ nì ma ɓó páɔ̀ múɛɛ nyɛ́nɛ́ wa ɖáìn ma kĩ́ín nyɛɛ mɔ̀ ma Ɖúzì. 20Hwɛ̀ ké Jékɔ̀ ɖi ma wuɖu, ké ɔ ɖá, “Ɔ jǔ ké Gèɖèpɔ́ɔ̀ dyi ɓó ḿ gbo nì, ké ɔ dyi ḿ dyí gmɔ̀ ɓó hwìè-kpà ḿ nìà kpauń wɛ̃ɛ kɔ̃, ké ɔ dyi ḿ ɖii-ɖɛ̀ ḿ ké ɖiɛ kè ɖɔ ḿ ké mú poɛɛ nyí, 21ké ɔ dyi ḿ ɖe kpa ɖé ḿ ɓǎ ɓíɖí-taún, ɖé gìɖìǐ mú ní, nìí, Bounɓoɔ̀ mu ní Gèɖèpɔ́ɔ̀ jǔùn kánáá pū. 22Ké dɛ̀ ɓɛ́ ɖɛ-hwìɖǐi-dyàìn-sɔ̀ɔ̌-kpò ɓɛ́ ḿ nyànàìn dyiɛɛ nìà kɛ mu nì ɓièìn-naín jǔùn. Ké ɖɛ kã̀ìn séín nì mu ḿ nyíìn nyɛɛ, ní muɛ ɓàɖàìn-bùè m̀ nyíìn ɖe.”
Currently Selected:
Jɛ́nɛ́sì 28: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
