Jɛ́nɛ́sì 29
29
Jékɔ̀ nyini ɖé Ɖéɓɛ̀ìn ɓíɖí
1Hwɛ̀ ké Jékɔ̀ kpá ma hwìè kɔ̃ ɖe, ké ɔ nyini ma ɖé nyɔ ɓě nì ma ɖé dyóɖó-xwáɖáún-wóɖóìn-naínɔ̀ kɛɛ ɓíɖí-ɓòɖòɔ̀ kɔ̃.#29:1 Ɓóɖó nìà kɛ mɔ̀ Páɖàùn-Áwàɖàùn-ɓòɖòɔ̀. 2Púɛɛ, ɔ wóɖóìn ma ní-ɓì ɖò nì ma ɖé gbǎùn-fúɖúá ɖò kɔ̃ɛɛ kɔ̃. Ké ɓáɖáá ɓě ɓɛ́ nyɔ-dù kò-kò tã kɔ̃̀ɛɛ wáɖá ma ɓóɛ wĩín dyi, sepóɛɖé ɖé ní-ɓìɔ̀ mú, ɖéɛ̀ waà náá-nì sɔ̀. Sɔ́ɔ́-kpò vɛ̀nɛ̀ ɖò jìɖǐ ma ɓó ní-ɓìɔ̀ wĩín. 3Ɔ jǔ ké ɓáɖáá séín ɓěɔ̀ ɖǎ ɓó dyí poìn ní, nìí, ɓáɖáá-dyí-gmɔ̀-nyɔ̀ ɓěɔ̀ kiɖiò sɔ́ɔ́-kpòɔ̀ sɔ̀ìn ɓó ɓíɔ̀ wĩín, ké wa nyí ɓáɖáá ɓěɔ̀ ní. Hwɛ̀ ké wa kiɖiò sɔ́ɔ́-kpòɔ̀, ké wa poɛ ɓóɛ ɓíɔ̀ wĩín ɖe.
4Ké Jékɔ̀ diè ma ɓáɖáá-dyí-gmɔ̀-nyɔ̀ ɓěɔ̀ dyi, ké ɔ ɖá, “Ḿ ɖíí ɓě, dɛ̌ ɓě sɔ̀ kɛ́?”
Ké wa jǔ ma ɔ gɔ̃̌, ké wa ɖá, “À sɔ̀ ɖé Háwàɖàùn-hwɔ̀ɖɔ̀ɔ̀ mú.”
5Ké ɔ diè wa dyi ɖe, ké ɔ ɖá, “Ɓě dyuò gàa ɖò mɔ̀ Ɖéɓɛ̀ìn mɔ̀ Néhɔ̀ɛ̀ nyúà-dyú kɛɛ dyíì?”
Wa ɖá, “Ǹdye, à dyuò ɔ dyí.”
6Ɔ diè wa dyi ɖe, ké ɔ ɖá, “À wɔ̃́ ɖé ɔ gboe?”
Wa ɖá, “Ɖé ɔ gbo pɛɛ̀ ní. Gmɔ̀ ɖéa kà ɔ dyú-màà Wéɖécà kè ɓáɖáá ɓěɔ̀ nìě dyiɛń nyɛ.”
7Ɔ cɛ̃ɛ wa gbo, ké ɔ ɖá, “Ɓě dyéɛ kà dyóɖó nìě keɛ. Ɔ seɔ́ ti ɓɛ́ ɓě ké ɓáɖáá ɓěɔ̀ dyí poìn. Ɓě nyí wa ní, ɓɛ́ ɓě ké wa dyi ɖiɛń kpa ɖe.”
8Kɛɛ wa ɖá, “À seɛ nyuɛ ɓɛ́ìn. Ɓáɖáá séín ɓěɔ̀ ɓéɖé ɓɛ́ wa ké dyí poìn, hwɛ̀ ɓɛ́ à ké sɔ́ɔ́-kpòɔ̀ ɓó ní-ɓìɔ̀ wĩín zà, ɓɛ́ à ké ɓáɖáá ɓěɔ̀ ní nyí.”
9Ti ɓɛ́ ɔ kè wa nì ma wùɖùɛ̌n nyɛɛ, púɛɛ, Wéɖécà kè ɔ ɓǎ Ɖéɓɛ̀ìn ɓáɖáá ɓěɔ̀ nyini ma ɓó. Ɔ mɔ̀ ma ɔ ɓǎà ɓáɖáá ɓěɔ̀ dyí-gmɔ̀-nyɔ̀. 10Ɖéɓɛ̀ìn mɔ̀à Jékɔ̀ ɖe Wìɖìbɛ́kɔ̀ɛ̀ ɖíí-gààɔ̀ kɛ̀. Ti ɓɛ́ Jékɔ̀ dyé ma Wéɖécà kè Ɖéɓɛ̀ìn ɓáɖáá ɓěɔ̀ kɛɛ, ɔ mu, ké ɔ zà ma sɔ́ɔ́-kpòɔ̀ ɓó ní-ɓìɔ̀ wĩín, ké ɔ nyí ma ɓáɖáá ɓěɔ̀ ní. 11Hwɛ̀ ké Jékɔ̀ nyá ma Wéɖécà wɔ̃, ké ɔ ɖú ma kpé-po-wùɖùǐ. 12Hwɛ̀ ké ɔ cɛ̃ɛ ma Wéɖécà gbo kà ɔ mɔ̀ ma ɔ ɓǎà ɖíí ɓěɔ̀ ɖò kɛ. Ɔ cɛ̃ɛ kà ɔ mɔ̀ ma Wìɖìbɛ́kɔ̀ɛ̀ dyú-gàà kɛ. Ké Wéɖécà kpa ma peɖeɛ, ké ɔ cɛ̃ɛ ma ɔ ɓǎ gbo.
13Ti ɓɛ́ Ɖéɓɛ̀ìn wɔ̃́ ma bɔ̃̌ ɓá ɔ ɖíí-màà dyú mɔ̀à Jékɔ̀ kɛɛ jè dyíɛɛ, ɔ mu ma ɔ hwìǐ. Ɔ kpa ma peɖeɛ, ké ɔ gbèɖèìn ma Jékɔ̀, ké ɔ nyá ma ɔ wɔ̃, ké ɔ dyà ma ɔ ɖé ɔ ɓíɖí-taún. Ké Jékɔ̀ zaìn ma ɔ mìɔùn jè kɔ̃in. 14Púɛɛ, Ɖéɓɛ̀ìn cɛ̃ɛ ma Jékɔ̀ gbo, ké ɔ ɖá, “M̀ mɔ̀ ní nyɔmɔɔ jǎà.” Ké Jékɔ̀ nyu ma ɓó ɔ gbo dɛ̀nɛ̀ ɖò.
Jékɔ̀ kpɔ̃ Ɖéà kè Wéɖécà dyi
15Hwɛ̀ ké Ɖéɓɛ̀ìn cɛ̃ɛ ma Jékɔ̀ gbo, ké ɔ ɖá, “M̀ mɔ̀ ní ɖííɛ̀ dyú jèɛɛ, m̀ ké ní kũ̀à nyu pídyiì? Ɖɛ́ nì mɔ́ ḿ ké m̀ pɛ́ɛ̀ kɛ́? Cɛ̃ɛ ḿ gbo.” 16Ɔ nì ná kɛɛ, Ɖéɓɛ̀ìn ɓéɖé ma dyú-màà sɔ̃́. Nyɔ vɛ̀nɛ̀ɔ̀ nyɛ́nɛ́ mɔ̀ ma Ɖéà, ké nyɔ dyùwèɔ̀ nyɛ́nɛ́ mɔ̀ ma Wéɖécà. 17Ɖéà se ma ná dyíin nɔ̀mɔ̀, kɛɛ Wéɖécà mɔ̀ ma dyíin-nɔ̀mɔ̀-màà cá.
18Jékɔ̀ ɖɛ̀ɓɛ̀ ma Wéɖécà mú jèɛɛ, ɔ ɖá, “Ní mu m̀ gbo nììn ɓó zɔ̃ mɛ̀nɛ̌ìn-sɔ̃́ mú ɓó nì dyú-màà dyùwè mɔ̀à Wéɖécà kɛɛ jè.”
19Ké Ɖéɓɛ̀ìn ɖá, “Ɔ mɔ̀ ɖɛ sɛ́ɖɛ́ìn dyí. Ɔ kpa ɖɛ ɓɛ́ ḿ ké ɔ m̀ nyí ké ɔ zi ɓɛ́ ḿ ké ɔ gàa kà kò ɖò nyíɛɛ dyí. Nì dà ḿ gbo.” 20Ɔ jèɛɛ, Jékɔ̀ nì ma Ɖéɓɛ̀ìn gbo ɓó zɔ̃ mɛ̀nɛ̌ìn-sɔ̃́ xwíníín ɓó Wéɖécà jè, kɛɛ zɔ̃ mɛ̀nɛ̌ìn-sɔ̃́ ɓěɔ̀ nì pū kà wé sɔ̃́ nìà kɛɛ ɖé ɔ gbo, sepóɛɖé ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ ɓéɖé ma ɓó Wéɖécà bììɛɛ ɓúá ma kpéín mìɔ jè.
21Ti ɓɛ́ tiɔ̀ ɖǎ ma ɖé hwɛ̀ kɛɛ, Jékɔ̀ cɛ̃ɛ ma Ɖéɓɛ̀ìn gbo, ké ɔ ɖá, “Tòǎ ní nyɔ́nɔ́ɔ̀, ɓɛ́ ḿ kéá ɔ dyi kpɔ̃, sepóɛɖé ní tiɔ̀ ɖǎ ɖé hwɛ̀.” 22Ɔ jèɛɛ, Ɖéɓɛ̀ìn poìn ma nyɔ séín ɓě nì ma páɔ̀ múɛɛ dyí, ké ɔ pa ma hwɔ ɖò. 23-24Kɛɛ ti ɓɛ́ hwuɖu ɖǎ ma hwɔɛɛ, ɔ ɖú ma ɔ dyú-màà Ɖéà dyí, ké ɔ nyí ma ɔ Jékɔ̀. Ké ɔ ɖú ma ɔ gǐì-màà mɔ̀ Zíópà kɛɛ dyí, ké ɔ nyí ma ɔ Ɖéà, ɓɛ́ ɔ ké ma ɔ gbo-nì-màà jǔ. Ké Jékɔ̀ kè Ɖéà nì ma ɓó da. 25Ti ɓɛ́ zɔ̃ ɖǎ ma zɔ̃ɛɛ, púɛɛ, Jékɔ̀ dyéɛ ma kà ɔ mɔ̀ ma Ɖéà kɛ. Ké Jékɔ̀ cɛ̃ɛ ma Ɖéɓɛ̀ìn gbo, ké ɔ ɖá, “Ɖɛ́ mɔ̀ ɖɛ m̀ nyuà ḿ bũ̌ kɛɛ xwíníín nyɛ́? Má, ḿ nì ma m̀ gbo ɓó Wéɖécà jèe? Ɖɛ́ kɔ̃̀ jè m̀ cáà ḿ wɛ̃́?”
26Ké Ɖéɓɛ̀ìn ɖá, “À ní nyuɛ náa nɔ̄ à ɓíɖí-ɓòɖòɛ̀ kɔ̃. À ní dè à dyú-màà dyùwè dyia kĩ́ín. 27M̀ kè Ɖéà mɛ pa ɓěɛ̀ dyi-kpɔ̃ìn-hwɔ̀ɔ̀ ɓó wíkìɛ̀ mú, nìí, à mu m̀ dyɛ mɔ̀ɔ̀ nyíìn ɖekè, ɓɛ́ m̀ ké ḿ gbo nì ɓó zɔ̃ mɛ̀nɛ̌ìn-sɔ̃́ɔ̀ ɖò ɖe.”
28Ké Jékɔ̀ wɔ̃́ ma, ké ɔ jaɖa ma wíkìɔ̀. Hwɛ̀ ké Ɖéɓɛ̀ìn nyí ma Jékɔ̀ ɔ dyú-màà Wéɖécà, ɓɛ́ ɔ ké ɔ gmàà jǔ ɖekè. 29Ké Ɖéɓɛ̀ìn nyí ma ɔ gǐì-màà mɔ̀ Bíóhà kɛɛ ɔ dyú-màà Wéɖécà, ɓɛ́ ɔ ké ɔ gbo-nì-màà jǔ. 30Ɔ jèɛɛ, Jékɔ̀ kpɔ̃ ma Wéɖécà dyi ɖekè. Ɔ ɖɛ̀ɓɛ̀ ma Wéɖécà mú mìɔ ké ɔ zi Ɖéà dyí. Ké ɔ nì ma Ɖéɓɛ̀ìn gbo ɓó zɔ̃ mɛ̀nɛ̌ìn-sɔ̃́ɔ̀ ɖò ɖe.
Jékɔ̀ɛ̀ dyú ɓěɔ̀
31Ti ɓɛ́ Bounɓoɔ̀ dyéɛ ma kà Jékɔ̀ se ma Ɖéà mú ɖɛ̀ɓɛ̀ɛ, púɛɛ, ɔ nyuɛ ké Ɖéà wóɖóìn ma dyú. Kɛɛ Wéɖécà mɔ̀ ma ɖàà-màà. 32Púɛɛ, Ɖéà nì ma zùù kɔ̃, ké ɔ wóɖóìn ma gàa-dyù ɖò. Ké ɔ jǔìn ma ɔ Wuɖuɓíín-nyɛ̀nɛ̀ kɔ̃̀ xwíníín mɔ̀à Bounɓoɔ̀ ɖǎ ní gǎ-dyé-dyéɔ̀ dyé kɛ. Sepóɛɖé ɔ ɖá, “Bounɓoɔ̀ ɖǎ ní gǎ-dyé-dyéɔ̀ dyé jèɛɛ, ní dyú-ɓǎɔ̀ muá ḿ mú ɖɛ̀ɓɛ̀ìn.” 33Sɔ̀ìn ɓóɛ gboɛɛ, ɔ nì ma zùù kɔ̃ ɖe, ké ɔ wóɖóìn ma gàa-dyù ɖò. Ké ɔ ɖá, “Sepóɛɖé Bounɓoɔ̀ ɖǎa wɔ̃́ kà ɓɛ́ Jékɔ̀ se ḿ mú ɖɛ̀ɓɛ̀ jèɛɛ, ɔ ɖǎ ḿ gàa-dyù nìà kɛ nyí ɖekè.” Ɔ jèɛɛ, ɔ jǔìn ma ɔ Símìɔ̀-nyɛ̀nɛ̀ kɔ̃̀ xwíníín mɔ̀à dyi-wɔ̃́-nyɔ̀ kɛ. 34Ké ɔ nì ma zùù kɔ̃ ɖe, ké ɔ wóɖóìn ma gàa-dyù ɖò. Ké ɔ ɖá, “Ɓó kàǔn wɛ̃ɛ, ḿ kè ní dyú-ɓǎɔ̀ muá hwòɖǒǔn hwɔìn, sepóɛɖé ḿ ɖǎ ɔ bìì gàa-dyù tã wóɖóìn.” Ɔ jèɛɛ, ɔ jǔìn ma ɔ Ɖíìváà-nyɛ̀nɛ̀ kɔ̃̀ xwíníín mɔ̀à hwòɖǒǔn-hwɔìn-hwɔìn nyɛ. 35Ké ɔ nì ma zùù kɔ̃, ké ɔ wóɖóìn ma gàa-dyù ɖò ɖe. Ké ɔ ɖá, “Ɓó tiɛ̀ múɛɛ, ní muá Bounɓoɔ̀ ɓàìn.” Ɔ jèɛɛ, ɔ jǔìn ma ɔ Júɖà-nyɛ̀nɛ̀ kɔ̃̀ xwíníín mɔ̀à ɓàìn-ɓàìn nyɛ. Púɛɛ, ɔ ɓɔ́ ma dyú wóɖóɛ̀n.
Currently Selected:
Jɛ́nɛ́sì 29: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
