Jɛ́nɛ́sì 31
31
Jékɔ̀ kpá Ɖéɓɛ̀ìn xwaún xwáɖáún
1Wé ɖòɛ̀ ɓaɖaa, Jékɔ̀ wɔ̃́ɔ kà Ɖéɓɛ̀ìn dyú-gàà ɓěɔ̀ nìɛ̀ cɛ̃iń, ké wa ɖá, “Jékɔ̀ ɖǎ ɖɛ séín à ɓǎ kɔ̃̀ ma kɛɛ dyí ɖúɛ hwɔ. À ɓǎà kɔ̃̀ɔ̀-ɖɛ̀ séín ɓěɔ̀ ɖǎ ɔ bã̀ìn.” 2Ké Jékɔ̀ dyéɛ ma kà Ɖéɓɛ̀ìn ní gmɔ̀ìn ɔ dyéɖéín-dyèɖè mú ɖe kà ɔ nyu ma nìɛ̀ kĩ́ín nyɛ. 3Hwɛ̀ ké Bounɓoɔ̀ cɛ̃ɛ ma Jékɔ̀ gbo, ké ɔ ɖá, “Sɔ̀ dyí, ɓɛ́ m̀ ké ɖé m̀ ɓǎ ɓíɖí-ɓòɖòɔ̀ kɔ̃ ɖe mu ɖé m̀ mìɔùn nììn nyɔ ɓěɔ̀ gbo. Ní mu ɓó m̀ gbo nììn.”
4Ɔ jèɛɛ, Jékɔ̀ ɖá ma Wéɖécà kè Ɖéà ɖé geɖeɔ̀ gbo dɛ̀ ɓɛ́ ɔ nyúà-ɖɛ̀ ɓěɔ̀ nì ma kà kɛ. 5Ké ɔ cɛ̃ɛ ma wa gbo, ké ɔ ɖá, “Ḿ dyéɛ kà ɓě ɓǎ se ḿ dyéɖéín-dyèɖè mú gmɔ̀ǐn nì ɖe kà ɔ nyu ma kà nìɛ̀ kĩ́ín nyɛ. Kɛɛ ḿ ɓǎà Gèɖèpɔ́ɔ̀ nì ɓó ḿ gbo. 6Ɓě dyuòɛ̀ kà ḿ ɖǎ ɓě ɓǎà gbo-nì-kũ̀à nyu ɖé ní kpé séín múɛ. 7Kɛɛ ɓě ɓǎ ɖǎ ḿ gbá-gbá mú nyu, ké ɔ ɖǎ ní pɛ́ɛ̀-ɖɛ̀ɔ̀ dyí-zàìn-kpà ɓaɖa-bùè nyu. Wɛ̃́ɛ́ kɛɛ, Gèɖèpɔ́ɔ̀ se wɔ̃́ ɓɛ́ ɔ ké ḿ ɖɛ gbà ɖò bũ̌ nyu. 8Ɔ jǔ ké ɓě ɓǎ dyiɛ cɛ̃, ké ɔ dyi níiń, ‘Nyúà-ɖɛ̀ɔ̀ nyɔ ɓě céèɛɛ mu nì pɛ́ɛ̀-ɖɛ̀ jǔùno’ ní, nìí, nyúà-ɖɛ̀ séín ɓěɔ̀ wóɖóìn dyú céè-céè. Ɔ jǔ ké ɔ dyi níiń, ‘Nyúà-ɖɛ̀ɔ̀ nyɔ ɓě nì súɖúú kɔ̃ún wɛ̃ɛ mu nì pɛ́ɛ̀-ɖɛ̀ jǔùno’ ní, nìí, nyúà-ɖɛ̀ séín ɓěɔ̀ wóɖóìn dyú nì súɖúú kɔ̃ún wɛ̃. 9Kǎà Gèɖèpɔ́ɔ̀ nyu ɓě ɓǎà nyúà-ɖɛ̀ ɓěɔ̀ ɔ xwa zàà, ké ɔ nyuɛ ḿ nyíɛ.
10“Ɖé nyúà-ɖɛ̀ ɓěɔ̀ kɔ̃ún-kpáìn-tìɔ̀ múɛɛ, ḿ dyaa, ké vã́á ɓě ɓɛ́ wa kpá ma kà gbǎà nyɔ́nɔ́ ɓěɔ̀ kɔ̃ún wɛ̃ɛ céè ma bũ̌in. 11Púɛɛ, Gèɖèpɔ́ɔ̀ zɛ̃̀ìn ma ínjà ɖò mú, ké ɔ ɖá, ‘Jékɔ̀.’ Ké ḿ ɖá, ‘Dyòo.’ 12Ké ɔ ɖá, ‘Ɖú nì dyéɖéɔ̀ dyií, ɓɛ́ m̀ kéɛ dyé kà vã́á séín ɓě ɓɛ́ wa kpáà gbǎà nyɔ́nɔ́ ɓěɔ̀ kɔ̃ún wɛ̃ɛ céèɛ. Ḿ nyuɛ náa, sepóɛɖé ḿ ɖǎ ɖɛ séín ɓɛ́ Ɖéɓɛ̀ìn nìà m̀ bũ̌ nyuɛń nyɛɛ dyé. 13Mɔ̄ mɔ̀ Gèɖèpɔ́ɔ̀ ɓɛ́ ḿ wóɖóìn ma kà m̀ dyí ɖé Bɛ́fèò-hwɔ̀ɖɔ̀ɔ̀ múɛ, dɛ̀ ɓɛ́ m̀ nyànàìn ma kà nyɔ-ɖɛ-hwìɖǐi-dyàìn-sɔ̀ɔ̌-kpòɔ̀ dyi, ɓɛ́ m̀ dyiɛ ma kà cáná dúún púè, ɓɛ́ m̀ dyi ma kà ɓó wuɖu ɖi ɓó ḿ dyúa kɛ.#31:13 Gmɔ̀ ɖé Jɛ́nɛ́sì 28:18-22 mú. Ɓó kàǔn wɛ̃ɛ, dè gbɛ̌, ɓɛ́ m̀ ké ɓóɖó nìà kɛ mú sɔ̀, ɓɛ́ m̀ ké ɖé nì wóɖóìn-ɓòɖòɔ̀ kɔ̃ ɖe mu.’ ”
14Hwɛ̀ ké Wéɖécà kè Ɖéà zà ma ɖé wuɖu, ké wa ɖá, “À kɔ̃̀ dúí-sè-ɖɛ̀ ɖò ɖé à ɓǎà ɓíɖí-gbǒ-xwíníín ɖeè? 15Má, à mɔ̀ǎ ɖéè ɖé ɔ dyéɖéíne? Sepóɛɖé ɔ ɖǎ à peɖe, ké ɔ ɖǎ wíɖí ɔ kpɔ̃ ma à kɔ̃ún dyiɛɛ ɖi. 16Kɔ̃̀ɔ̀-ɖɛ̀ séín ɓɛ́ Gèɖèpɔ́ɔ̀ ɖǎà à ɓǎ xwa zà kɛɛ, à kè à dyú ɓě kɔ̃̀ǎ wa. Ɔ jèɛɛ, ɓó kàǔn wɛ̃ɛ, nyu ɖɛ séín ɓɛ́ Gèɖèpɔ́ɔ̀ cɛ̃ m̀ gboɛ.”
17Hwɛ̀ ké Jékɔ̀ sɔ̀ ma dyí, ké ɔ po ma ɔ dyú ɓěɔ̀ kè ɔ gmàà ɓěɔ̀ sǒ-nì-gbu-kɔ̃ún ɓě kɔ̃ún. 18Ké ɔ ɖú ma ɔ nyúà-ɖɛ̀ ɓě kè ɖɛ séín ɓɛ́ ɔ ɖǎ ma kà dyé ɖé Páɖàùn-Áwàɖàùn-ɓòɖòɔ̀ kɔ̃ɛɛ dyí, ké ɔ mu ma ɖé Kénà-ɓòɖòɔ̀ kɔ̃ ɖe, ɖé ɔ ɓǎ Áázè gbo.
19Ɓó tia ɓaɖaa, Ɖéɓɛ̀ìn mɛ̀ìn ma ɔ ɓáɖáá ɓěɔ̀ mí bũ̌in cɛ̃iń, ké Wéɖécà dyíɖí ma ɔ ɓǎà kũùn-kpò ɓěɔ̀. 20Jékɔ̀ nyu ma Ɖéɓɛ̀ìn mɔ̀à Síwíɖíà-nyɔ̀ɔ̀ kɛɛ gbá-gbá mú, sepóɛɖé ɔ pa ɔ dyi. 21Kǎà ɔ nyu ma ɔ kɔ̃̀ɔ̀-ɖɛ̀ séín ɓěɔ̀ xwáɖáún kpáìn. Ɔ mu, ké ɔ péɖé ma Dyùféɖétì-nìɔ̀, ké ɔ pòìn ma ɖé toɖo-ɓòɖò mɔ̀ Gíɖèà kɛɛ gbo dú.
Ɖéɓɛ̀ìn kpá Jékɔ̀ kíɖíí
22Sɔ̀ìn ɓó ti ɓɛ́ Jékɔ̀ ɖǎ ma xwáɖáún kpáa gboɛɛ, ɓó wéɔ̀ tã nììnɔ̀ ɓaɖaa, wa cɛ̃ɛ ma Ɖéɓɛ̀ìn gbo kà Jékɔ̀ ɖǎ ma xwáɖáún kpáa. 23Ɔ jèɛɛ, ɔ ɖú ma ɔ ɖíí-gàà ɓěɔ̀ dyí, ké wa kpá ma ɔ kíɖíí. Wa nàìn ma wé mɛ̀nɛ̌ìn-sɔ̃́, ké wa dyɛ̀ìn ma ɔ ɖé toɖo-ɓòɖò mɔ̀à Gíɖèà kɛɛ kɔ̃ dyi. 24Kɛɛ hwɛ̀ ɓɛ́ ɔ ké ma Jékɔ̀ dyɛ̀ìn nyɛɛ, Gèɖèpɔ́ɔ̀ wóɖóìn ma ɔ dyí ɖé dya-dya ɖò mú ɓó máaún. Ké ɔ cɛ̃ɛ ma ɔ gbo, ké ɔ ɖá, “M̀ mɛ ma mú. Mɔ̀ǔn ɖá m̀ ké Jékɔ̀ gana-wùɖù ɖò ké ɔ ɖe dyà kɛɛ gbo cɛ̃.” 25Ɓó tia ɓaɖaa, Jékɔ̀ nyànàìn ma ɔ jàɖàìn-gbò ɓěɔ̀ ɖé Gíɖèà-ɓòɖòɔ̀ kɔ̃ dyi ɖé toɖo ɖò dya, ké Ɖéɓɛ̀ìn kè ɔ ɖíí-gàà ɓěɔ̀ nyànàìn ma wa nììn jàɖàìn-gbò ɓěɔ̀ toɖo ɖò dyai ɖekè.
26Hwɛ̀ ké ti wa ɖǎ ma dyéìn nyɛɛ, Ɖéɓɛ̀ìn diè ma Jékɔ̀ dyi, ké ɔ ɖá, “Ɖɛ́ mɔ̀ ɖɛ m̀ nyuà kɛɛ xwíníín nyɛ́? Ɖɛ́ kɔ̃̀ jè m̀ nyuà ḿ gbá-gbá mú, ɓɛ́ m̀ dyià ní dyú-màà ɓěɔ̀ dyà kà nyɔ zàà gǐì to gboɛɛ́? 27Ɖɛ́ kɔ̃̀ jè m̀ nyuà ḿ gbá-gbá mú, ɓɛ́ m̀ dyià ḿ dyi pa, ɓɛ́ m̀ dyià xwáɖáún kpá kɛ́? Ɖɛ́ kɔ̃̀ jè m̀ seà ḿ gbo cɛ̃, ɓɛ́ ḿ kéà m̀ cuò ɖé múà kè wɛ́ɖɛ́-wùɖù kè zàká-wùɖù ɔ kè gbǎɖí-wùɖù múɛ́? 28Ɖɛ́ kɔ̃̀ jè m̀ nyuɛ ké ḿ se ní nyúà-dyú ɓěɛ̀ kè ní dyú-màà ɓěɛ̀ wɔ̃ nyá, ɓɛ́ ḿ ké wa hwuɖu hwɔá po fóɖóún wɛ̃́? Ɖɛ m̀ nyuà kɛɛ mɔ̀ zuɖuu-ɖɛ̀. 29Ḿ ɓɛ́ìnɔ̌ má m̀ ɖɛ gbà ɖò bũ̌ nyuɛ. Kɛɛ m̀ ɓǎà Gèɖèpɔ́ɔ̀ wùɖù ḿ gbo ɓó máaǔn, ké ɔ ɖá, ‘M̀ mɛ ma mú. Mɔ̀ǔn ɖá m̀ ké Jékɔ̀ gana-wùɖù ɖò ké ɔ ɖe dyà kɛɛ gbo cɛ̃.’ 30Ɓó kàǔn wɛ̃ɛ, ḿ dyéɛ kà m̀ nì muɛń, sepóɛɖé nì ɓǎà gbǒ-xwíníín-nyɔ̀ ɓěɔ̀ dyé-tò nì m̀ nyuɛń mìɔ kɛ, kɛɛ ɖɛ́ kɔ̃̀ jè m̀ dyíɖíà ní kũùn-kpò ɓěɔ̀ kɛ́?”
31Hwɛ̀ ké Jékɔ̀ jǔ ma Ɖéɓɛ̀ìn gɔ̃̌, ké ɔ ɖá, “Ḿ kpá xwáɖáún, sepóɛɖé ḿ fɛ̃̀ìn ní, mɔ̀ǔn kɔ̃̀ ɖà nì dyú-màà ɓěɔ̀ ḿ gana xwa zàìn. 32Kɛɛ ɓá nì kũùn-kpò ɓěɔ̀ jè dyíɛɛ, nyɔ nì muɛ xwaún kpɔ̃̀ìn nyɛɛ mɛ mɛ́. À ɖíí ɓě nìà dà kɛɛ mɔ̀ zàse. Gmɔìn ní kɔ̃̀ɔ̀-ɖɛ̀ ɓěɛ̀ hwìɛ̀ dyi. M̀ dyi ɖé nì kɔ̃̀ɔ̀-ɖɛ̀ ɖò dyé ní, ɖúɛ dyí.” Jékɔ̀ cɛ̃ɛ ma náa, sepóɛɖé ɔ seɛ ma dyuò kà ɓɛ́ Wéɖécà ɖǎ ma kũùn-kpò ɓěɔ̀ dyíɖí kɛ.
33Hwɛ̀ ké Ɖéɓɛ̀ìn ɖú ma ɔ kũùn-kpò ɓěɔ̀ dyi mɔ́ kpàǐ. Ɔ mu ma ɖé Jékɔ̀ nììn jàɖàìn-gbòɔ̀ mú kè ɖé Ɖéà nììn jàɖàìn-gbòɔ̀ mú ɔ kè ɖé gbo-nì-màà sɔ̃́ ɓěɔ̀ nììn jàɖàìn-gbòɔ̀ mú, kɛɛ ɔ se ma ɖé kũùn-kpò ɓěɔ̀ dyé. Hwɛ̀ ké ɔ mu ma ɖé Wéɖécà nììn jàɖàìn-gbòɔ̀ mú. 34Ɓó tia ɓaɖaa, Wéɖécà ɖǎ ma kũùn-kpò ɓěɔ̀ dyí ɖú, ké ɔ ɖǎ wa ɖé kɔ̃-kò-ɖɛ̀ nì ma ɓó ɔ sǒ-nì-gbu-kɔ̃únɔ̀ kɔ̃ún wɛ̃ɛ xwíɖíi po, ké ɔ kò ma wa kɔ̃. Ɔ jèɛɛ, Ɖéɓɛ̀ìn gmɔìn ma gbǒɔ̀ múin dà séín, kɛɛ ɔ se ma wa dyé. 35Púɛɛ, Wéɖécà cɛ̃ɛ ma ɔ ɓǎ gbo, ké ɔ ɖá, “Ɓɔ̌ɔ̀, ɓɔ́ ḿ dyoɖoún kpáìn kà ɓɛ́ ḿ se dyí sɔ̀ kɛɛ jè, sepóɛɖé màa ɓěɛ̀ tiɔ̀ nì ḿ kɔ̃.” Ké Ɖéɓɛ̀ìn gmɔìn ma dà séín dyi, kɛɛ ɔ se ma ɔ kũùn-kpò ɓěɔ̀ dyé.
36Hwɛ̀ ké Jékɔ̀ kpáìn ma Ɖéɓɛ̀ìn dyoɖoún, ké ɔ ɖá, “Ɖɛ́ mɔ̀ ɖɛ gbà ḿ nyu m̀ bũ̌ kɛ́? Ɖɛ́ ḿ nyu ɓɛ́ m̀ dyià ḿ kíɖíí kpá kɛ́? 37Kà ɓɛ́ m̀ ɖǎà ní kɔ̃̀ɔ̀-ɖɛ̀ séín ɓěɔ̀ múin gmɔìn nyɛɛ, ɖɛ́ mɔ̀ nì kɔ̃̀ɔ̀-ɖɛ̀ ɓɛ́ m̀ dyé ɖé kɛ́? Dyàà, ɓɛ́ m̀ kéɛ dà níǐn ɖíí ɓěɛ̀ kè nììn ɖíí ɓěɛ̀ dyúa dyi pɛ̃́ìn, ɓɛ́ wa ké zaaɔ̀ wɔ̃ po ɓó à sɔ̃́ɔ̀ pṹa. 38Ḿ nyuá m̀ gbo zɔ̃ kpáɖá-nyɔ, ké ɓó ti séín ɓěa múɛɛ, xwíɖí séè nì ɓáɖáá nyɔ́nɔ́ ɓěɔ̀ kè nì gbǎà nyɔ́nɔ́ ɓěɔ̀ ɖò wɔ̃ sɔ̀ ɖò. Ké ḿ séè nì ɓáɖáá ɓíɔ́ ɓěɔ̀ ɖò tà ɖò.#31:38 Ɓó wé ɓěa ɓaɖaa, nyúà-ɖɛ̀-dyí-gmɔ̀-nyɔ̀ɔ̀ ɓɛ́ìn ma ɓáɖáá ɓíɔ́ ɓěɔ̀ ɖò tàà ɓó ti ɖòɛ̀ ɓaɖa, ké ɔ se zaa kɔ̃̀. 39Ɔ jǔ ké xwáɖá-xwíɖíi-nìmìì dyi ɖò kpɔ̃ ní, mɔ́ún dyàà m̀ gbo. Mɔ̄ mɔ̀ nyɔ poɛ bɛ̃̌ǐn ɖe. Kɛbì nyɔ ɖò mɛ dyíɖíɛ ɓó máaún mɔɔ ɓó dyóɖóaún wɛ̃ɛ, m̀ kpɔ̃ ḿ dyi, ké ḿ pɛ́ɛ̀ jè. 40Kà ḿ nyu ma nìɛ̀ kɛɛ, ɔ kɛà kɛ̀. Ḿ nì zùzùɔ̀ mú ɓó dyóɖóaún, ké ḿ nì sɔ̃̀ɔ̀ mú ɓó máaún, ké mɔ́ún mɔ́. 41Kǎà ḿ nyu ma nìɛ̀ ɓó zɔ̃ kpáɖá-nyɔ xwíníín ɖé m̀ ɓíɖí-taún. Ḿ nì m̀ gbo ɓó zɔ̃ ɓaɖa-bùè sè hĩinyɛ ɓó nì dyú-màà sɔ̃́ ɓěɔ̀ jè kè zɔ̃ mɛ̀nɛ̌ìn-ɖò ɓó nì nyúà-ɖɛ̀ ɓěɔ̀ jè. Ké ɓó tia múɛɛ, m̀ ɓɛ́ìn ní pɛ́ɛ̀-ɖɛ̀ɔ̀ dyí-zàìn-kpà ɓaɖa-bùè nyuɛ. 42Ɔ jǔ ké ḿ ɓǎ ɓěɛ̀ Gèɖèpɔ́ɔ̀ mɔ̀à Ééɓòɖòhɛ̃́ɛ̀ Gèɖèpɔ́ɔ̀, ɓɛ́ Áázè ɓièà kɛɛ seɔ́ má ɓó ḿ gbo nì ní, nìí, nì muɔ́ má ḿ xwa fɔ̀nɔ̀ìn jǎà cá, ɓɛ́ m̀ kéɔ́ má ḿ ɖe ɖoɓo. Kɛɛ Gèɖèpɔ́ɔ̀ dyé ma ní gǎ-dyé-dyéɔ̀ kè ní sɔ̃ɔ̀ nyuu-kũ̀àɔ̀ ní. Ɔ jèɛɛ, ɔ ɓàɖàìn m̀ dyí ɓó máaǔn wɛ̃̀.”
Jékɔ̀ kè Ɖéɓɛ̀ìn dè wuɖu
43Hwɛ̀ ké Ɖéɓɛ̀ìn cɛ̃ɛ ma Jékɔ̀ gbo, ké ɔ ɖá, “Màa ɓěɛ̀ mɔ̀ ní dyú-màà ɓě, wa nììn dyú ɓěɛ̀ mɔ̀ ní dyú ɓě, ké nyúà-ɖɛ̀ ɓěɛ̀ mɔ̀ ní nyúà-ɖɛ̀ ɓě. Ɖɛ séín m̀ dyéà dà kɛɛ, mɔ̄ kɔ̃̀ wa. Kɛɛ ɓó kàǔn wɛ̃ɛ, ḿ se ɖɛ ɖò nyuɛ ɓɛ́ìn, ɓɛ́ ní dyú-màà ɓěɛ̀ mɔɔ wa nììn dyú ɓě wa ɖǎà wóɖóìn nyɛɛ ké ḿ ɓíɖí-taún sè. 44Ɔ jèɛɛ, ɓó kàǔn wɛ̃ɛ, dyi, ɓɛ́ ḿ kè mɔ̀ ké wuɖu-ɖi-ɖi ɖò nyu, ɓɛ́ ɔ ké zàse jǔ ɓó à pṹa.”
45Hwɛ̀ ké Jékɔ̀ ɖú ma sɔ́ɔ́-kpò ɖò dyí, ké ɔ nyànàìn maa dyi, ɓɛ́ ɔ ké zàse jǔ. 46Ké Jékɔ̀ cɛ̃ɛ ma ɔ ɖíí ɓěɔ̀ gbo, ké ɔ ɖá, “Ɓě gbǒìn sɔ́ɔ́ dyí.” Ké wa cɛ̃́ ma sɔ́ɔ́, ké wa gbǒìn ma sɔ́ɔ́-kòò ɖò dyí. Ké wa séín ɖììn ma ɓóɛ wáún ɖɛ. 47Ké Ɖéɓɛ̀ìn jǔìn ma páɔ̀ Jégà-Sáhàdúfà-nyɛ̀nɛ̀, kɛɛ Jékɔ̀ mɔ̀ùn jǔɛ̀n ma Gáɖèè-nyɛ̀nɛ̀.#31:47 Nyɛ́nɛ́ sɔ̃́ ɓěɔ̀ xwíníín mɔ̀ zàse-sɔ̀ɔ̌-kòò, kɛɛ wa sɔ̀ wuɖu-dù kò-kò sɔ̃́ mú. 48Ké Ɖéɓɛ̀ìn ɖá, “Sɔ́ɔ́-kòò nìà kɛ mɔ̀ zàse ɓó ḿ kè mɔ̀ bìì.” Ɔ jèɛɛ, Jékɔ̀ jǔɛ̀n ma kà Gáɖèè-nyɛ̀nɛ̀ɔ̀ kɛ̀. 49Wa jǔìn ma ɓó Mípà-nyɛ̀nɛ̀ kɔ̃̀ xwíníín mɔ̀à dyéɖé-gbo-dèìn-naín nyɛɛ ɖekè. Sepóɛɖé Ɖéɓɛ̀ìn ɖá, “Bounɓoɔ̀ mu ɓó ḿ kè mɔ̀ pṹa dyi dyéìn, ti ɓɛ́ à mu bũ̌ sɔìn nyɛ. 50Ɔ jǔ ké m̀ dyi ní dyú-màà ɓěɛ̀ xwa nyìnììn, mɔɔ ké m̀ dyi nyɔ́nɔ́ kà kò ɖò dyi kpɔ̃ ɓó wa wáún ní, kɛbì nyɔ ɖò mɛ se ɓó à pṹa dyi dyéɛɛ, ɔ mɛ nì m̀ hwìɖǐi kà Gèɖèpɔ́ɔ̀ dyé ɓó ḿ kè mɔ̀ pṹa dyi kɛ.” 51Ké Ɖéɓɛ̀ìn cɛ̃ɛ Jékɔ̀ gbo ɖe, ké ɔ ɖá, “Dyé sɔ́ɔ́-kòò kè sɔ́ɔ́-kpò ɓɛ́ ḿ nyànàìn dà à pṹa dyiɛ. 52Sɔ́ɔ́-kòò nìà kɛ kè sɔ́ɔ́-kpò nyànàà dyiɛɛ mɔ̀ zàse kà mɔ́ún se wa dyíin ziɛ́ mu, ɓɛ́ ḿ ké mɔ̀ùn ɖɛ gbà ɖò bũ̌ nyuɛń dyi, mɔɔ ké mɔ̀ùn se wa dyíin ziɛ́ mu, ɓɛ́ m̀ ké mɔ́ún ɖɛ gbà ɖò bũ̌ nyuɛń dyiɛ. 53Ééɓòɖòhɛ̃́ɛ̀ Gèɖèpɔ́ɔ̀ kè Néhɔ̀ɛ̀ Gèɖèpɔ́ɔ̀ mɔ̀à wa ɓǎà Gèɖèpɔ́ɔ̀ kɛɛ mɛ po à zaaɔ̀ wɔ̃.” Ɔ jèɛɛ, Jékɔ̀ ɖi ma wuɖu dyììn ɖé Gèɖèpɔ́ɔ̀ ɓɛ́ ɔ ɓǎ Áázè ɓièà kɛɛ nyɛ́nɛ́ɔ̀ mú. 54Ké ɔ zàìn ma ɓó toɖoɔ̀ dya sáa. Ké ɔ ɖá ma ɔ ɖíí ɓěɔ̀, ké wa kè Ɖéɓɛ̀ìn kè ɔ nììn ɖíí ɓěɔ̀ ɖi ma ɖɛ. Ké wa nyu ma máaún-hwùɖù gànáɔ̀ ɓó toɖoɔ̀ dya. 55Ti ɓɛ́ zɔ̃ ɖǎ ma zɔ̃ɛɛ, gànà-kṹún mɛ̀nɛ̀ɛ̀ kɛɛ, Ɖéɓɛ̀ìn sɔ̀ ma dyí, ké ɔ nyá ma ɔ nyúà-dyú ɓěɔ̀ kè ɔ dyú-màà ɓěɔ̀ wɔ̃, ké ɔ po ma wa mana kɔ̃. Hwɛ̀ ké ɔ kpá ma hwìè xwíníín, ké ɔ mu ma ɔ ɓíɖí ɖe.
Currently Selected:
Jɛ́nɛ́sì 31: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
