Jɛ́nɛ́sì 32
32
Jékɔ̀ nì ti dyéɛń ɓó ɔ kè Íìsɔ́ɔ̀ gmɔ̌ìn jè
1Hwɛ̀ ké Jékɔ̀ mɔ̀ùn kpá ma hwìè kɔ̃ ɖe. Ti ɔ nì ma hwìèɔ̀ kɔ̃ɛɛ, ɔ dyɛ̀ìn ma Gèɖèpɔ́ɔ̀ ínjà ɖíɛ́ ɓě. 2Ti ɓɛ́ ɔ dyé ma ínjà ɓěɔ̀ kɛɛ, ɔ ɖá, “Dà ɓó mɔ̀ Gèɖèpɔ́ɔ̀ ínjà ɓěɔ̀ jàɖàìn-hwɔ̀ɖɔ̀ wà!” Ɔ jèɛɛ, ɔ jǔìn ma páɔ̀ Máhànáì-nyɛ̀nɛ̀ kɔ̃̀ xwíníín mɔ̀à jàɖàìn-hwɔ̀ɖɔ̀ sɔ̃́ kɛ.#32:2 Ɔ xwíníín mɔ̀ Jékɔ̀ nììn jàɖàìn-hwɔ̀ɖɔ̀ɔ̀ nì ma ɓó ɖekè.
3Ké Jékɔ̀ ɖoɓo ma kíá ɖé dyúa ɖé ɔ ɖíí-gàà Íìsɔ́ɔ̀ gbo ɖé Íɖɔ̀ùn-ɓòɖò kɔ̃̀ nyɛ́nɛ́ ɖò mɔ̀à Séìɛɛ kɔ̃. 4Ɔ cuò ma wa, ké ɔ ɖá, “Ɓě mɛ cɛ̃ɛ ní gbo-nì-ɓǎ Íìsɔ́ɔ̀ gbo, ɓɛ́ ɓě ké níiń, ‘Nì gbo-nì-nyɔ̀ Jékɔ̀ ɖá ɔ mu ma ɖé Ɖéɓɛ̀ìn gbo, ké ɔ nì ma ɖé tee, ké ɔ nìǎ ɖe dyiɛń. 5Ké ɓó kàǔn wɛ̃ɛ, ɔ ɖǎ ɓìɖǐ kè jǎkasì kè ɓáɖáá kè wiɖi kè gǐì-gàà ɔ kè gǐì-màà ɓáún-ɓáún ɓéɖé. Ɔ jèɛɛ, ɔ ɖǎ à ɖoɓo nɔ̄ mɔ̀ mɔ̀à ɔ gbo-nì-ɓǎ kɛɛ gbo, ɓɛ́ nì hwòɖǒ ké dyi dè ɓá ɔ jè dyí.’ ”
6Ti ɓɛ́ kíá ɓěɔ̀ dyi ma Jékɔ̀ gbo ɖeɛɛ, wa ɖá, “À kpa ma bɔ̃̌ɔ̀ m̀ ɖíí-gàà Íìsɔ́ɔ̀ gbo, ké ɔ kè gàa hɔ̃dɛ̀ɖɛ̀ hĩinyɛ nì m̀ hwìǐ dyiɛń.” 7Púɛɛ, Jékɔ̀ kpá ma fã̀àǔn mìɔ cá, ké ɔ hwòɖǒ gbǎìn ma dyií. Ɔ jèɛɛ, ɔ ge ma ɔ nyɔ ɓěɔ̀ kè ɓáɖáá kè wiɖi kè ɓìɖǐ ɔ kè sǒ-nì-gbu-kɔ̃ún ɓěɔ̀ dú sɔ̃́ mú. 8Sepóɛɖé ɔ hwòɖǒ ɖá, “Ɔ jǔ ké Íìsɔ́ɔ̀ dyi dyi, ké ɔ dyi nyɔ kĩ́ín-kĩ́ín ɓěɔ̀ ɖáɓá ní, nìí, nyɔ ɓě sèà ɓóɛɛ mu gbǔùn.”
9Hwɛ̀ ké Jékɔ̀ ɓaà ma, ké ɔ ɖá, “Óó, ḿ ɓǎ Ééɓòɖòhɛ̃́ɛ̀ kè Áázèɛ̀ Bounɓo Gèɖèpɔ́ɔ̀, mɔ̀ cɛ̃ɛ ma kà ḿ gbo, ɓɛ́ m̀ dyi níiń, ‘Mu ɖé m̀ ɓíɖí-ɓòɖòɔ̀ kɔ̃, ɖé nì nyɔ ɓěɔ̀ gbo ɖe, ké ní mu m̀ nɔ̀mɔ̀ dyíin dyí nyuùn’ wɛ̃ɛ, 10nì kpeɖeɛ̀-dyíin-nɔ̀mɔ̀-nɔ̀mɔ̀ kè nì jǎà séín ɓě ɓɛ́ m̀ ɖǎà mɔ̄ mɔ̀à nì gbo-nì-nyɔ̀ɔ̀ kɛɛ dyí nyuɛɛ ɓúá kpéín mìɔ ɓó ḿ bìì. Ḿ kè ní kùì-kpà nìà kɛ ɖòùn péɖé ma Jɔ́nì-nìɛ̀, kɛɛ ɓó kàǔn wɛ̃ɛ, ḿ ɖǎ nyɔ-dù sɔ̃́ jǔ. 11Ní ɓaà m̀ ní, póìn ḿ sɔ̀ìn ɖé ḿ ɖíí-gàà Íìsɔ́ɔ̀ xwaún, sepóɛɖé ḿ fɛ̃̀ìn ní ɓó ɔ jè, ɔ ní kɔ̃̀ ɖà dyi, ɔ ní kɔ̃̀ ɖà ḿ kè dyú ɓěɔ̀ ɔ kè wa ɖe ɓěɔ̀ ɖáɓá. 12Má, m̀ cɛ̃ɛ ma ḿ gbo, ké m̀ ɖá, ‘Ní mu m̀ nɔ̀mɔ̀ dyíin dyí nyuùn, ké ní mu nì xwíníín-dyù ɓěɔ̀ nyuùn, ɓɛ́ wa ké jĩ̀ kà pĩ́ɔ nìà dyóóɔ̀ wĩin, ɓɛ́ ɔ seà zɛɖɛɛ ɓɛ́ìn ɓó dyí vò jèɛɛ jĩ̀à kɛe.’ ”
13Ké Jékɔ̀ pɛ̃́ ma ɓó. Ké ɔ zà ma nyíí-ɖɛ̀ ɖé ɔ nyúà-ɖɛ̀ ɓěɔ̀ hwìɛ̀ ɓó ɔ ɖíí-gàà Íìsɔ́ɔ̀ bìì. 14Nyíí-ɖɛ̀ ɓěɔ̀ kɛà kɛ̀. Wa mɔ̀ gbǎà nyɔ́nɔ́ hɔ̃dɛ̀ɖɛ̀ sɔ̃́ kè vã́á kpáɖá-nyɔ kè ɓáɖáá nyɔ́nɔ́ hɔ̃dɛ̀ɖɛ̀ sɔ̃́ kè ɓáɖáá ɓíɔ́ kpáɖá-nyɔ 15kè sǒ-nì-gbu-kɔ̃ún nyɔ́nɔ́ nì dyú gbo kpáɖá-nyɔ ɓaɖa-bùè kè ɓìɖǐ nyɔ́nɔ́ kpáɖá-nyɔ sɔ̃́ kè ɓìɖǐ ɓíɔ́ ɓaɖa-bùè kè jǎkasì nyɔ́nɔ́ kpáɖá-nyɔ ɔ kè jǎkasì ɓíɔ́ ɓaɖa-bùè. 16Ké ɔ po ma nyúà-ɖɛ̀-dù kò-kò ɓěɔ̀ wáká. Ɔ ɖú dú ɖò dyí ní, nìí, ɔ dèɛ̀n gǐì ɖò xwa. Ké ɔ cɛ̃ɛ ma ɔ gǐì ɓěɔ̀ gbo, ké ɔ ɖá, “Ɓě mu dyúa. Kà ɓě mu muɛń nììn nyɛɛ, ɓě mɛ sè pá ɓó nimii-dù kò-kò ɓěɔ̀ pṹa.” 17Hwɛ̀ ké ɔ po ma nyɔ nì ma ɖé dyúa kɛɛ náún, ké ɔ ɖá, “Ɔ jǔ ké m̀ kè ḿ ɖíí-gàà Íìsɔ́ɔ̀ dyi gmɔ̌ìn, ké ɔ dyi m̀ dyi diè, ké ɔ dyi níiń, ‘Nyɛ́ mɔ̀ nì gbo-nì-ɓǎ kɛ́, ké dɛ̌ m̀ nì muɛń nyɛ́, ké nyɛ́ kɔ̃̀ nyúà-ɖɛ̀ ɓě nìà m̀ dyúa kɛɛ́?’ ní, 18nìí, m̀ mɛ cɛ̃ɛ, ɓɛ́ m̀ ké níiń, ‘Nì gbo-nì-nyɔ̀ Jékɔ̀ kɔ̃̀ wa. Wa mɔ̀ nyíí-ɖɛ̀ ɓó mɔ̀ mɔ̀à ɔ gbo-nì-ɓǎ kɛɛ bìì. Ɔ mìɔùn nì à ɖeín, ké ɔ nì dyiɛń.’ ” 19Ké ɔ cuòìn ma wuɖu dyúáɖòɔ̀ gǐì sɔ̃́ nììnɔ̀ kè ɔ tã nììnɔ̀ ɔ kè nyɔ séín kɔ ma ɓó wa ɖeín dyíɛɛ mú. Ɔ ɖá, “Ɓě séín mɛ cɛ̃ ɖɛ dyúáɖòɔ̀ Íìsɔ́ɔ̀ gbo, ti ɓě kèɔ̀ kè mu gmɔ̌ìn nyɛ. 20Ké ɓě mɛ cɛ̃ɛ ɔ gbo wɛ̃́ɛ́, ɓɛ́ ɓě ké níiń, ‘Nì gbo-nì-nyɔ̀ Jékɔ̀ nì à ɖeín.’ ” Sepóɛɖé Jékɔ̀ cɛ̃ɛ ɖé ɔ hwòɖǒ bũ̌, ké ɔ ɖá, “Ní mu ɔ hwòɖǒ dyi dèìn dyììn ɖé nyíí-ɖɛ̀ ɓě ɓɛ́ ḿ ɖoɓoà dyúa kɛɛ mú, hwɛ̀ ɓɛ́ ḿ ké ɔ dyúa dyé. Ti ɖíɛ́ ɓě ní, ɔ mu ḿ jè dyi kpɔ̃ùn.” 21Ɔ jèɛɛ, ɔ ɖoɓo ma nyíí-ɖɛ̀ ɓěɔ̀ dyúa, kɛɛ ɔ mìɔùn pɛ̃́ ma ɓó páɔ̀ mú.
Jékɔ̀ kè Gèɖèpɔ́ɔ̀ vɔ̃ gbàà-pɛ̀ɛ̀
22Púɛɛ, ɓó máaún-hwùɖù dyúáɖòɔ̀ múɛɛ, Jékɔ̀ sɔ̀ ma dyí, ké ɔ ɖú ma ɔ gmàà sɔ̃́ ɓěɔ̀ kè ɔ gbo-nì-màà sɔ̃́ ɓěɔ̀ kè ɔ dyú-gàà ɓaɖa-bùè sè dyúáɖò ɓěɔ̀ dyí, ké ɔ péɖéìn ma wa Jáɓò-nìɔ̀. 23Ké sɔ̀ìn ɓóɛ gboɛɛ, ɔ péɖéìn ma ɔ kɔ̃̀ɔ̀-ɖɛ̀ séín ɓěɔ̀ ɖekè, 24kɛɛ ɔ ɖòùn sè ma ɖé ɖe.
Púɛɛ, ɔ kè gàa ɖò ɖú ma gbàà-pɛ̀ɛ̀ vɔ̃ kpàǐ. Wa gã̀ ma vɔ̃uń dyi tee, ké zɔ̃ nìǎ ma zɔ̃uń. 25Ti gàaɔ̀ dyéɛ kà ɓɛ́ ɔ se ma Jékɔ̀ ɖuɛ ɓɛ́ìn nyɛɛ, púɛɛ, ɔ tĩ́ ma ɔ gbùà-kpàɔ̀, ké Jékɔ̀ɛ̀ gbùàɔ̀ sɔ̀ìn ma kò-naín, ti ɓɛ́ ɔ kè gàaɔ̀ nì ma gbàà-pɛ̀ɛ̀ɔ̀ vɔ̃uń wɛ̃. 26Hwɛ̀ ké gàaɔ̀ ɖá, “Táà ḿ dyi, ɓɛ́ ḿ ké mu, sepóɛɖé zɔ̃ nìǎ zɔ̃uń.”
Kɛɛ Jékɔ̀ ɖá, “Ḿ se m̀ dyi táǎ mu ké m̀ po dyɛ ḿ mana kɔ̃ hwɛ̀.”
27Ké gàaɔ̀ ɖá, “Xwɛ̌ nì nyɛ́nɛ́ jǔɛ́?”
Ɔ ɖá, “Ní nyɛ́nɛ́ mɔ̀ Jékɔ̀.”
28Hwɛ̀ ké gàaɔ̀ ɖá, “Nì nyɛ́nɛ́ se Jékɔ̀ jǔɛ mu ɖe, kɛɛ ɔ muá Éézùɖùɛ̀ jǔùn,#32:28 Éézùɖùɛ̀-nyɛ̀nɛ̀ɔ̀ xwíníín mɔ̀ nyɔ kè Gèɖèpɔ́ɔ̀ vɔ̃ kɛ. sepóɛɖé m̀ vɔ̃ Gèɖèpɔ́ɔ̀ kè nyɔǔn-dyù gbo, ké nì sɔ̃ ɖǎ ɖé kɔ̃in nì.”
29Púɛɛ, Jékɔ̀ diè ma gàaɔ̀ dyi, ké ɔ ɖá, “Xwɛ̌ nììn nyɛ́nɛ́ jǔɛ́?”
Kɛɛ gàaɔ̀ ɖá, “M̀ se ɓéɖé m̀ kéɔ́ ní nyɛ́nɛ́ jè dyi diè.” Ké ɔ pòìn ma ɓó Jékɔ̀ mana kɔ̃.
30Ɔ jèɛɛ, Jékɔ̀ jǔìn ma páɔ̀ Pɛ̀níè-nyɛ̀nɛ̀ kɔ̃̀ xwíníín mɔ̀à Gèɖèpɔ́ɔ̀ dyúa kɛ, sepóɛɖé ɔ ɖá, “Ḿ kè Gèɖèpɔ́ɔ̀ ɖǎ dyéɖéín gmɔìn, ké ḿ nì cĩ́ɛń ke.” 31Ti ɓɛ́ ɔ sɔ̀ ma Pɛ̀níè-pàɔ̀ múɛɛ, púɛɛ, dyóɖóɔ̀ wóɖó ma xwáɖáún, ké Jékɔ̀ nì ma gbùàǔn nàǐn ɓó tĩ́ ɓɛ́ gàaɔ̀ tĩ́ ma kà ɔ kɛɛ jè. 32Ɔ jèɛɛ, sɔ̀ìn ɓó tia gboɛɛ, Éézùɖùɛ̀-nyɔ̀ ɓěɔ̀ ní ɖi suaɖɛ̀ɛ̀ tɛ̃̀ìn nìà ɓóɛ gbùà-kpàɔ̀ kɔ̃ɛɛ ɖe fɔɔ cá, sepóɛɖé ɓóɛ̀ gàaɔ̀ tĩ́ìn ma Jékɔ̀ɛ̀ gbùàɔ̀ kò-naínɔ̀.
Currently Selected:
Jɛ́nɛ́sì 32: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
