Jɛ́nɛ́sì 35
35
Jékɔ̀ jàɖàìn ɖé Bɛ́fèò-hwɔ̀ɖɔ̀ɔ̀ mú ɖe
1Hwɛ̀ ké Gèɖèpɔ́ɔ̀ cɛ̃ɛ ma Jékɔ̀ gbo, ké ɔ ɖá, “Sɔ̀ dyí, ɓɛ́ m̀ ké ɖé Bɛ́fèò-hwɔ̀ɖɔ̀ɔ̀ mú mu, ɓɛ́ m̀ ké ɖé cĩ́, ɓɛ́ m̀ ké ɖé sáa-kɔ̃-zàìn-gbàà ɖò po ɓó ḿ bìì. Mɔ̄ mɔ̀ nyɔ wóɖóìn ma kà m̀ dyí ti ɓɛ́ m̀ nì ma kà m̀ ɖíí-gàà Íìsɔ́ɔ̀ xwaún xwáɖáún kpáuń wɛ̃.”
2Ɔ jèɛɛ, Jékɔ̀ cɛ̃ɛ ma ɔ gbǒ-xwíníín-nyɔ̀ ɓěɔ̀ gbo, ké ɔ ɖá, “Ɓě po gèɖèpɔ́ɔ̀ kò-kò séín ɓě ɓéɖéɛɛ xwáɖáún, ɓɛ́ ɓě ké ɓě mìɔùn mú hwɔ, ɓɛ́ ɓě ké ɓěɛ̀ ɖɔ ɓěɔ̀ gbo zĩàìn.#35:2 Ɖɛ ɓě nìà kɛ xwíníín mɔ̀, ɓɛ́ wa kéɛ nyɔǔn dyí tɛ̀mɛ̀ìn kà wa ɖǎ gèɖèpɔ́ɔ̀ kò-kò ɓěɔ̀ kɔ̃ín pòìn nyɛ. 3Sɔ̀ìn ɓóɛ gboɛɛ, nìí, ɓɛ́ ɓěà ké dyí sɔ̀, ɓɛ́ ɓěà ké ɖé Bɛ́fèò-hwɔ̀ɖɔ̀ɔ̀ mú mu. Ɖéɛ̀ ní mu sáa-kɔ̃-zàìn-gbàà ɖò poùn ɓó Gèɖèpɔ́ɔ̀ mɔ̀ nyɔ jǔ ma kà ní ɓaà-wùɖùɔ̀ gɔ̃̌ ɖé ní fũ̀à-fṹá-tìɔ̀ múɛɛ bìì. Ɔ nì ɓó ḿ gbo dɛ̀ séín ɓɛ́ ní mu kɛ.” 4Hwɛ̀ ké wa zà ma ɖé gèɖèpɔ́ɔ̀ kò-kò séín wa ɓéɖé ma kɛ kè waà ɖùǔn-po-ɖɛ̀ ɓě ɓáà waà gèɖèpɔ́ɔ̀ kò-kò ɓěɔ̀ jè dyíɛ, ké wa nyíɛ ma Jékɔ̀. Ké Jékɔ̀ po ma wa ɓóɖóún ɖé cu vɛ̀nɛ̀ ɖò nì ma ɖé Sɛ́kɛ̃̀ìn-hwɔ̀ɖɔ̀ɔ̀ múɛɛ xwíɖíi.
5Ti Jékɔ̀ kè ɔ gbǒ-xwíníín-nyɔ̀ ɓěɔ̀ nì ma muɛń nyɛɛ, Gèɖèpɔ́ɔ̀ nyuɛ ké díɖí kpɔ̃ ma hwɔɖɔ ɓě nì ma ɓó wa ɖeiɛɛ nyɔ ɓěɔ̀ kɔ̃, ké waà nyɔ ɖò se ma wa kíɖíí kpá. 6Hwɛ̀ ké Jékɔ̀ kè ɔ nyɔ séín ɓěɔ̀ nyini ma Ɖúzì-hwɔ̀ɖɔ̀ mɔ̀à Bɛ́fèò, nìà ɖé Kénà-ɓòɖòɔ̀ kɔ̃ɛɛ mú. 7Ɖéɛ̀ ɔ po ma sáa-kɔ̃-zàìn-gbàà ɖò, ké ɔ jǔìn ma páɔ̀ Ɛ̀-Bɛ́fèò-nyɛ̀nɛ̀ kɔ̃̀ xwíníín mɔ̀à Gèɖèpɔ́ɔ̀ gbǒ kɛ, sepóɛɖé ɖéɛ̀ Gèɖèpɔ́ɔ̀ tɛ̀mɛ̀ìn ma ɔ mìɔùn Jékɔ̀ dyí, ti ɓɛ́ ɔ nì ma kà ɔ ɖíí-gààɔ̀ xwaún xwáɖáún kpáuń wɛ̃. 8Púɛɛ, Dìbówàɖà mɔ̀ ma kà Wìɖìbɛ́kɔ̀ɛ̀ gmɛ̀ìn-ɖèɔ̀ kɛɛ mɛ́ ma, ké wa zà ma ɔ dyóɖóún ɖé cu vɛ̀nɛ̀ ɖò xwíɖíi hwɔ ɖé Bɛ́fèò-hwɔ̀ɖɔ̀ɔ̀ ɓíɖíi dyí. Ɔ jèɛɛ, wa jǔìn ma páɔ̀ Áɖòùn-Bákù-nyɛ̀nɛ̀ kɔ̃̀ xwíníín mɔ̀à vĩ̌ìn-naín-cù vɛ̀nɛ̀ kɛ.
9Ti ɓɛ́ Jékɔ̀ nì ma ɖé Bɛ́fèò-hwɔ̀ɖɔ̀ɔ̀ múɛɛ, Gèɖèpɔ́ɔ̀ wóɖóìn ma ɔ dyí ɖe, ké ɔ po ma ɔ mana kɔ̃. 10Ké ɔ cɛ̃ ma Jékɔ̀ ɖɛ dyúáɖò ɔ cɛ̃ zɔ̃̌ɔ̀ kà ɔ gbo kĩ́ín nyɛɛ gbo ɖe, ké ɔ ɖá, “Nì nyɛ́nɛ́ mɔ̀ Jékɔ̀, kɛɛ sɔ̀ìn ɓó zɛ̃̌ɛ̀ gboɛɛ, nì nyɛ́nɛ́ se Jékɔ̀ jǔɛ mu ɖe. Ɔ muá Éézùɖùɛ̀ jǔùn.” Ɔ jèɛɛ, ɔ jǔìn ma ɔ Éézùɖùɛ̀-nyɛ̀nɛ̀. 11Ɓó kɔ̃in ɖeɛɛ, Gèɖèpɔ́ɔ̀ cɛ̃ɛ ma ɔ gbo, ké ɔ ɖá, “Mɔ̄ mɔ̀ kpé-séín-ɓéɖé-Gèɖèpɔ́ɔ̀. Nì mu dúún zaìn, ɓɛ́ m̀ ké dyí vò. Ɓóɖó-dù kò-kò ɓě mu ɖé m̀ mú sɔ̀ùn, ké kã́á ɓě mu ɖé m̀ mú sɔ̀ùn ɖekè. 12Ɓóɖó ɓɛ́ ḿ nyí ma kà Ééɓòɖòhɛ̃́ɛ̀ kè Áázèɛɛ, ní muɛ m̀ nyíìn, ké ní muɛ nì xwíníín-dyù ɓěɔ̀ nyíìn ɖekè.” 13Hwɛ̀ ké Gèɖèpɔ́ɔ̀ sɔ̀ ma ɓó pá kɔ̃̀ mú ɓɛ́ ɔ wùɖù ma kà Jékɔ̀ gboɛ, ké ɔ mu ma dyɔún ɖe. 14Púɛɛ, Jékɔ̀ nyànàìn ma nyɔ-ɖɛ-hwìɖǐi-dyàìn-sɔ̀ɔ̌-kpò ɖò ɓó pá kɔ̃̀ mú ɓɛ́ Gèɖèpɔ́ɔ̀ wùɖùìn ma kà ɔ gboɛɛ dyi, ké ɔ púèɛ̀ ma wã́ìn dúún ɓó Bounɓoɔ̀ bìì, ké ɔ púè ɓó cáná ɖekè. 15Kǎà ɔ nyu ma pá kɔ̃̀ mú ɓɛ́ Gèɖèpɔ́ɔ̀ wùɖùìn ma kà ɔ gboɛɛ Bɛ́fèò-nyɛ̀nɛ̀ jǔɛ̀n.
Wéɖécà kè Áázèɛ̀ mɛ́ jè
16Hwɛ̀ ké Jékɔ̀ kè ɔ gbǒ-xwíníín-nyɔ̀ ɓěɔ̀ sɔ̀ ma ɓó Bɛ́fèò-hwɔ̀ɖɔ̀ɔ̀ mú dyí, ké wa nì ma ɖé Ɛ́fàɖà mɔ̀à Bɛ́fèɖèhɛ̃́ɛ̀-hwɔ̀ɖɔ̀ɔ̀ kɛɛ mú muɛń. Ti ɓɛ́ wa nì ma hwìè-kpàɔ̀ xwíníín, ké wa séè ma Ɛ́fàɖà-hwɔ̀ɖɔ̀ɔ̀ bũ̌in xwɛ̃́ìn keɛɛ, púɛɛ, Wéɖécàà póó-xwìɖì ɖú ma puà kpàǐ ɓó hwìèɔ̀ kɔ̃. Ɔ ku ma wɔ̃ mìɔ cá. 17Ké ti ɓɛ́ ɔ nì ma ti kàmàǔn-kàmàǔn ɓéɖéɛń ɓó dyúɔ̀ wóɖóìn jèɛɛ, gbǒ-ɖeín-zòǒɔ̀ cɛ̃ɛ ma ɔ gbo, ké ɔ ɖá, “Nì hwòɖǒ mɛ dè dyi, sepóɛɖé m̀ ɖǎ gàa-dyù ɖò wóɖóìn ɖe.” 18Ti ɔ nìǎ ma ɖé fɛ̀ɛ̀ zàǔn wɛ̃ɛ, ɔ jǔìn ma ɔ dyúɔ̀ Bɛ̃̀nɔ́nì-nyɛ̀nɛ̀ kɔ̃̀ xwíníín mɔ̀à fũ̀à-fṹá kɛ, ké ɔ mɛ́ ma. Kɛɛ dyúɔ̀ ɓǎ jǔìn ma ɔ Bɛ̃́címà-nyɛ̀nɛ̀ kɔ̃̀ xwíníín mɔ̀à mana kɛ.
19Ti ɓɛ́ Wéɖécà mɛ́ìn ma ɓó Ɛ́fàɖà mɔ̀à Bɛ́fèɖèhɛ̃́ɛ̀ kɛɛ hwìèɔ̀ kɔ̃ɛɛ, wa zà ma ɔ dyóɖóún. 20Ké Jékɔ̀ nyànàìn ma sɔ́ɔ́-kpò ɖò ɓó Wéɖécà xwɛ́-gmààɔ̀ kɔ̃ dyi, ké ɔ mɔ̀ ɔ xwɛ́-gmààɔ̀ da-zàìn-ɖɛ̀ ke ɓó zɛ̃̌ɛ̀. 21Hwɛ̀ ké Éézùɖùɛ̀ mu ma dyúa ɖe, ké ɔ nyànàìn ma ɔ jàɖàìn-gbò ɓěɔ̀ ɖé Míɖàò-Éɖɛ̀-hwɔ̀ɖɔ̀ɔ̀ ɖeín dyi. 22Ti ɓɛ́ Éézùɖùɛ̀ kè ɔ gbǒ-xwíníín-nyɔ̀ ɓěɔ̀ nì ma ɖé páɔ̀ múɛɛ, Wuɖuɓíín dyá ma Wéɖécàà gbo-nì-ɓà mɔ̀à Bíóhà kɛɛ gbo gbǒǔn, ké Éézùɖùɛ̀ wɔ̃́ɔ ma jè.
Jékɔ̀ ɓéɖé ma gàa-dyù ɓaɖa-bùè sè sɔ̃́. 23Ɖéà nììn dyú ɓěɔ̀ kɛà kɛ̀. Ɔ kè Jékɔ̀ɛ̀ nyíɔ́-dyùɔ̀ mɔ̀ Wuɖuɓíín. Dyúɔ̀ nyɔ ɓě kɔ ɓó dyíɛɛ mɔ̀ Símìɔ̀ kè Ɖíìváà kè Júɖà kè Ɛ́sàkà ɔ kè Zɛ́ɓíúɖɔ̀ùn. 24Wéɖécà nììn dyú ɓěɔ̀ kɛà kɛ̀: Jòsé kè Bɛ̃́címà. 25Wéɖécàà gbo-nì-màà mɔ̀à Bíóhà kɛɛ nììn dyú ɓěɔ̀ kɛà kɛ̀: Dɛ̃́ìn kè Náfátàɖì. 26Ɖéàà gbo-nì-màà mɔ̀à Zíópà kɛɛ nììn dyú ɓěɔ̀ kɛà kɛ̀: Gáà kè Ásè. Kǎà gàa-dyù ɓě ɓɛ́ Jékɔ̀ wóɖóìn ma ɖé Páɖàùn-Áwàɖàùn-ɓòɖòɔ̀ kɔ̃ɛɛ nyu ma jĩ̀ɛ̀.
27Hwɛ̀ ké Jékɔ̀ nyini ma ɖé ɔ ɓǎ Áázè gbo ɖé Máwèɖè ɓíɖí-hwɔ̀ɖɔ̀ nìà ɖé Kíjà-Áɓà mɔ̀à Hɛ́bɔ̀nɔ̀-hwɔ̀ɖɔ̀ɔ̀ kɛɛ wáún wɛ̃ɛ mú. Ɔ mɔ̀ dà dyúáɖò ɓɛ́ Ééɓòɖòhɛ̃́ɛ̀ cĩ́ ma kà kɛ. 28-29Ti ɓɛ́ ɔ nyini ma ɔ ɓǎ Áázè gboɛɛ, púɛɛ, Áázè zà ma ɖé fɛ̀ɛ̀. Ɔ mɛ́ ma, ké ɔ mu ma ɔ nyɔ ɓěɔ̀ gbo. Ɔ nyɛ ma, ké ɔ zɔ̃ zi ma dyí vòɛ̌n mìɔ. Ɔ nyu ma zɔ̃ hɔ̃dɛ̀ɖɛ̀ ɖò kè kpáɖá-nyɔ hĩinyɛ, hwɛ̀ ké ɔ mɛ́ ma. Púɛɛ, ɔ dyú-gàà sɔ̃́ ɓě mɔ̀à Íìsɔ́ɔ̀ kè Jékɔ̀ kɛɛ zà ma ɔ dyóɖóún.
Currently Selected:
Jɛ́nɛ́sì 35: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
