Jɔ̃́ɔ́ 11

Ɖázɛ̀ɖɛ̀ɛ̀ mɛ́ jè

1Gàa ɖò kɔ̃̀ nyɛ́nɛ́ mɔ̀ ma Ɖázɛ̀ɖɛ̀, ɓɛ́ ɔ cĩ́ ma ɖé Bɛ́fènì-hwɔ̀ɖɔ̀ɔ̀ múɛɛ wɛ́ ma ní. Bɛ́fènì mɔ̀ ma hwɔɖɔ kɔ̃̀ mú ɓɛ́ Meɖé kè ɔ ɖíí Matá cĩ́ ma kɛ. 2Meɖé nìà kɛ mɔ̀ nyɔ po ma kà Bounɓoɔ̀ cáná ɓoi, ké ɔ tìnììn ma kà ɓó ɔ míɔ̀ dyiɛ̀. Ɔ kɔ̃̀ ɖíí-gàà Ɖázɛ̀ɖɛ̀ mɔ̀ nyɔ nì ma kà wɛ́iń nyɛ̀. 3Ɖíí-màà sɔ̃́ ɓěɔ̀ tò ma Jízɛ̀ gbo wuɖu, ké wa ɖá, “Bounɓo, nyɔ ɓɛ́ m̀ ɖɛ̀ɓɛ̀à mú kɛɛ nì wɛ́ińo.”

4Ti Jízɛ̀ wɔ̃́ɔ ma kɛɛ, ɔ cɛ̃ɛ ma, ké ɔ ɖá, “Ɔ se mɛ́-kà wɛ́. Ɖɛ nìà kɛ kpá ɓɛ́ Gèɖèpɔ́ɔ̀ ké ɓàìn-ɓàìn ɓéɖé. Ké ɔ muɛ nyuùn ɓɛ́ mɔ̄ Gèɖèpɔ́ɔ̀ Dyú-gààɔ̀ ké ɓàìn-ɓàìn ɓéɖé ɖekè.”

5Ɔ mɔ̀ jǎà Jízɛ̀ ɖɛ̀ɓɛ̀ ma Matá kè ɔ ɖíí-mààɔ̀ ɔ kè Ɖázɛ̀ɖɛ̀ mú. 6Ti Jízɛ̀ wɔ̃́ɔ ma kà ɓɛ́ Ɖázɛ̀ɖɛ̀ nì ma wɛ́iń nyɛɛ, dɛ̀ ɔ nì ma kà kɛɛ, ɔ nyu ma ɓó wé sɔ̃́ ɖe. 7Púɛɛ, ɔ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ɓěà mu ɖé Júɖìà-ɓòɖòɔ̀ kɔ̃ ɖe.”

8Ké ɖeín-nà-nyɔ̀ ɓěɔ̀ cɛ̃ɛ ma ɔ gbo, ké wa ɖá, “Nyɔ-ɖɛ-tɛ̀mɛ̀ìn-nyɔ̀, Júù-nyɔ̀ ɓěɔ̀ mɔ́ ɓɛ́ wa ké ma m̀ sɔ́ɔ́-kpò dyi taɓaìn, ké ɔ pá séè mú tɔ̀mɔ̀ ke, ké m̀ mɔ́ ɓɛ́ m̀ kéá ɖé mu ɖeè?”

9Ké Jízɛ̀ cɛ̃ɛ ma wa gbo, ké ɔ ɖá, “Má, áɓà ɓaɖa-bùè sè sɔ̃́ nì wé dyúáɖò múe? Gàa ɖò dyi nà ɓó zɔ̃ zɔ̃ ɓàɖàǐn, nìí, ɔ ní gbǒ, sepóɛɖé ɔ dyé ɓóɖó-kpàà ceɔ̀ jè. 10Kɛɛ ɔ jǔ ké ɔ dyi nà máaún-kà ní, ɔ gbǒ ní, sepóɛɖé ce ɖò se ɖé ɔ mú nì.” 11Ti ɓɛ́ Jízɛ̀ ɖǎ ma ɖɛa cɛ̃ɛ, ɔ cɛ̃ɛ ma ɖe, ké ɔ ɖá, “À ɓǎto Ɖázɛ̀ɖɛ̀ ɖǎ nyíɔún kpá, kɛɛ ní mu muùn, ɓɛ́ ḿ ké ɔ túò.”

12Ké ɖeín-nà-nyɔ̀ ɓěɔ̀ cɛ̃ɛ ma ɔ gbo, ké wa ɖá, “Bounɓo, ɔ jǔ ké ɔ dyi mɔ́uń nìǐn, nìí, ɔ mu dyi kánáùn.”

13Kɛɛ Jízɛ̀ nì ma Ɖázɛ̀ɖɛ̀ mɛ́ jè cɛ̃iń, ké wa ɖáìn ɔ mɔ̀ ma mɔ́-mɔ́ fóɖóún pū. 14Ɔ jèɛɛ, Jízɛ̀ cɛ̃ɛ ma wa gbo wáɖáá, ké ɔ ɖá, “Ɖázɛ̀ɖɛ̀ ɖǎ mɛ́. 15Ḿ kpá múàǔn ɓó ɓě jè kà ɓɛ́ ḿ se ma mú nìɛ, ɓɛ́ ɓě ké hwìɖǐǐ-taɓa-taɓa ɓéɖé. Ɓěà mu ɖé ɔ gbo.”

16Púɛɛ, Tɔ̀mɔ́sì ɓɛ́ wa ɖáìn Ní-zèɖěɛɛ cɛ̃ɛ ma ɔ mǔè ɖeín-nà-nyɔ̀ ɓěɔ̀ gbo, ké ɔ ɖá, “Ɓěà kèɔ̀ kè mɛ mu, ɓɛ́ à kèɔ̀ kè ké mɛ́.”

Jízɛ̀ mɔ̀ gĩɔ-wóɖó-wóɖó kè fɛ̀ɛ̀

17Ti Jízɛ̀ nyini ma ɖéɛɛ, ɔ dyéɛ ma kà ɓɛ́ Ɖázɛ̀ɖɛ̀ ɖǎ ma mɛ́, ké wa ɖǎ ma ɔ dyóɖóún zà, ké ɔ ɖǎ ma wé hĩinyɛ nyuɛ. 18Sɔ̀ Jùɖúsɛ̀ɖɛ̀ìn-hwɔ̀ɖɔ̀ɔ̀ mú ké Bɛ́fènì-hwɔ̀ɖɔ̀ɔ̀ mú muɛɛ se ma máa sɔ̃́ nyuɛ ɓɛ́ìn. 19Júù-nyɔ̀ pàɖǎ ɓě ɖǎ ma dyi, ɓɛ́ wa ké ma Matá kè Meɖé hwòɖǒ dyi dè ɓó waà ɖíí-gààɔ̀ jè.

20Ti Matá wɔ̃́ɔ ma kà ɓɛ́ Jízɛ̀ nì ma dyiɛń nyɛɛ, ɔ mu ma ɔ hwìǐ. Meɖé mɔ̀ùn sè ma ɖé taún. 21Matá cɛ̃ɛ ma Jízɛ̀ gbo, ké ɔ ɖá, “Bounɓo, ɔ jǔ ké m̀ dyiɔ́ má nɔ̄ nìǐn, nìí, ní ɖíí-gààɔ̀ seɔ́ má mɛ́ɛ mu. 22Kɛɛ ḿ dyuò kà ɓɛ́ ɖɛ séín nì mu Gèɖèpɔ́ɔ̀ zɔ̀ìn kàǔn wɛ̃ɛ, ɔ muɛ m̀ nyíìn nyɛ.”

23Ké Jízɛ̀ cɛ̃ɛ ma ɔ gbo, ké ɔ ɖá, “Nì ɖíí-gààɔ̀ mu gĩɔ wóɖóùn.”

24Hwɛ̀ ké Matá cɛ̃ɛ ma ɔ gbo, ké ɔ ɖá, “Ḿ dyuò kà ɔ mu gĩɔ wóɖóùn ɖé nyɔǔn-gĩɔ-wóɖó-tì ɓɛ́ ɔ muà nììn ɖé wé hwɛ̀ìn-gbɔɔ̀ múɛɛ mú kɛ.”

25Ké Jízɛ̀ cɛ̃ɛ ma ɔ gbo, ké ɔ ɖá, “Mɔ̄ mɔ̀ nyɔ ɓě ɖǎ ma mɛ́ɛ gĩɔ-wóɖó-wóɖó kè fɛ̀ɛ̀. Nyɔ mɔ̀ nyɔ ɓɛ́ ɔ taɓa ḿ hwìɖǐǐɛɛ mu cĩ́ìn, kɛbì ɔ mɛ ɖǎ ma mɛ́ɛ. 26Ké nyɔǔn séín ɓě ɓɛ́ wa mu cĩ́ìn, ké wa mu ḿ hwìɖǐǐ taɓaùn wɛ̃ɛ se mɛ́ɛ mu fɔɔ. M̀ poɛ náa jǎà?”

27Ké Matá cɛ̃ɛ ma ɔ gbo, ké ɔ ɖá, “Ǹdye, Bounɓo. Ḿ poɛ jǎà kà m̀ mɔ̀ Kɛ́ɖɛ́ì mɔ̀à Gèɖèpɔ́ɔ̀ Dyú-gàà mɔ̀ nyɔ ké ma kà ɓóɖó-kpàà kɔ̃ dyiɛ.”

Jízɛ̀ vĩ̌ ní

28Ti ɓɛ́ Matá ɖǎ ma ɖɛa cɛ̃ɛ, ɔ mu ma ɖe, ké ɔ ɖá ma ɔ ɖíí-màà Meɖé nyàà, ké ɔ cɛ̃ɛ ma ɔ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀ɔ̀ ɖǎ dyi, ké ɔ nì m̀ ɖáuń.” 29Ti Meɖé wɔ̃́ ma ɖɛa kɛɛ, ɔ sɔ̀ ma dyí wàɖà, ké ɔ mu ma Jízɛ̀ hwìǐ. 30Jízɛ̀ séè ma ɖé hwɔɖɔɔ̀ mú nyini ke. Ɔ nì ma dɛ̀ ɓɛ́ ɔ kè Matá dyéìn ma kà kɛ. 31Júù-nyɔ̀ ɓě ɓɛ́ wa nì ma kà ɖé gbǒɔ̀ mú, ké wa nì ma kà Meɖé hwòɖǒ dyi dèɛ̌n nyɛɛ sí ma Meɖé kíɖíí, ti ɓɛ́ wa dyéɛ, ké ɔ sɔ̀ ma ɖé gbǒɔ̀ mú wàɖà kɛ. Wa mɔ̀ùn ɖáìn ɔ nì ma ɖé xwɛ́-ɓìɔ̀ wĩín muɛń, ɓɛ́ ɔ ké ɖé kpé po.

32Ti ɓɛ́ Meɖé nyini ma dɛ̀ ɓɛ́ Jízɛ̀ nì ma kà kɛ, ké ɔ dyé ma ɔ kɛɛ, ɔ ɓùɖùìn ma ɓó ɔ ɓo zɔ̃̌, ké ɔ ɖá, “Bounɓo, ɔ jǔ ké m̀ dyiɔ́ má nɔ̄ nìǐn, nìí, ní ɖíí-gààɔ̀ seɔ́ má mɛ́ɛ mu.”

33Ti ɓɛ́ Jízɛ̀ dyé ma ɔ kè Júù-nyɔ̀ ɓě ɓɛ́ wa kèɔ̀ kè mu ma kà kɛɛ vĩ̌ɛ kɛɛ, ɔ hwòɖǒ-dyùàɔ̀ síà ma, ké fũ̀à-fṹá nyu ma ɔ ní. 34Hwɛ̀ ké ɔ diè ma wa dyi, ké ɔ ɖá, “Dɛ̌ ɓě zàìn ɔ dyóɖóún wɛ̃́?”

Ké wa cɛ̃ɛ ma ɔ gbo, ké wa ɖá, “Ɓɔ̌ɔ̀, dyi, ɓɛ́ m̀ ké ɖé dyé.”

35Púɛɛ, Jízɛ̀ vĩ̌ ma ní. 36Ɔ jèɛɛ, Júù-nyɔ̀ ɓěɔ̀ ɖá, “Dyé kà ɔ zi ɔ mú ɖɛ̀ɓɛ̀ǐn mìɔ kɛ.”

37Kɛɛ wa ɖíɛ́ ɓě cɛ̃ɛ ma, ké wa ɖá, “Má, ɔ kaà ma dyéɖéín-dyi-kpè-nyɔ̀ɛ̀ dyéɖée? Ɔ se ma nyuɛ ɓɛ́ìn ɓɛ́ Ɖázɛ̀ɖɛ̀ ké seɔ́ má mɛ́ɛ̀?”

Ɖázɛ̀ɖɛ̀ wóɖó gĩɔ

38Ké Jízɛ̀ hwòɖǒ-dyùàɔ̀ síà ma ɖe, ké ɔ mu ma xwɛ́-ɓìɔ̀ wĩín. Ɔ mɔ̀ ma ɓí ɖò, ké sɔ́ɔ́-kpò ɖò ɓáìn ma ɔ wĩín. 39Jízɛ̀ ɖá, “Ɓě zà sɔ́ɔ́-kpòɔ̀ ɓó.”

Púɛɛ, Matá mɔ̀à nyɔ mɛ́à kɛɛ ɖíí-mààɔ̀ kɛɛ cɛ̃ɛ ma ɔ gbo, ké ɔ ɖá, “Bounɓo, ɔ ɖǎ nyɔ́ po tiɛ̀ǐn, sepóɛɖé à ɖǎ ma ɔ dyóɖóún zàa, ɔ ɖǎ wé hĩinyɛ zĩ̀ìn.”

40Ké Jízɛ̀ cɛ̃ɛ ma ɔ gbo, ké ɔ ɖá, “Ḿ seɔ́ máa m̀ gbo cɛ̃ kà m̀ dyi hwìɖǐǐ-taɓa-taɓa ɓéɖéín, nì mu Gèɖèpɔ́ɔ̀ dĩ́ín-dĩ̀ìnɔ̀ dyéìn nyɛɛ̀?” 41Ké wa zà ma ɓó sɔ́ɔ́-kpòɔ̀. Hwɛ̀ ké Jízɛ̀ gmɔ̀ ma dyií, ké ɔ ɖá, “Ḿ Ɓǎ, ḿ po m̀ zùo kà ɓɛ́ m̀ ɖǎ ní wuɖu wɔ̃́ɛ. 42Ḿ dyuò kà m̀ wɔ̃́ ní wuɖu teeɛ, kɛɛ ḿ cɛ̃ ɖɛa ɓó nyɔ ɓě nìà dà kɛɛ jè, ɓɛ́ wa kéɛ jǎà po kà ɓɛ́ mɔ̀ mɔ̀ nyɔ ɖoɓo ḿ wɛ̃.” 43Ti ɓɛ́ ɔ ɖǎ ma ɖɛa cɛ̃ɛ, ɔ páná ma mú ɖé wuɖu zoo mú, ké ɔ ɖá, “Ɖázɛ̀ɖɛ̀, dyi sí.” 44Púɛɛ, nyɔ ɖǎ ma kà mɛ́ɛ sí ma. Ké xwɛ́-ɖɔ̀ ɓěɔ̀ bĩìn ma ɔ sɔ̃ ɓěɔ̀ kè ɔ ɓo ɓěɔ̀ dyi ke, ké ɖɔ ɖò jìnììn ma ɔ dyúa. Ké Jízɛ̀ cɛ̃ɛ ma wa gbo, ké ɔ ɖá, “Ɓě buɛ̀ ɔ, ɓɛ́ ɔ ké mu.”

Wa sɔ́ Jízɛ̀

(Máfíò 26:1-5; Máà 14:1-2; Ɖúù 22:1-2)

45Júù-nyɔ̀ ɓě ɓɛ́ wa mu ma kà Meɖé gboɛɛ pàɖǎ dyé ɖɛ Jízɛ̀ nyu ma kà kɛ, ké wa taɓa ma ɔ hwìɖǐǐ. 46Kɛɛ wa ɖíɛ́ ɓě kɔ́ìn ma ɖé Fáɖòsíì-nyɔ̀ ɓěɔ̀ gbo ɖe, ké wa cɛ̃ ma ɖɛ ɓɛ́ Jízɛ̀ ɖǎ ma kà nyuɛɛ wa gbo. 47Ɔ jèɛɛ, Fáɖòsíì-nyɔ̀ ɓěɔ̀ kè sáa-zà-nyɔ̀ kpa ɖɛ ɓěɔ̀ poìn ma tɔ̀ɔ̀-ɓìɔ̀ ɓěɔ̀ dyí, ké wa ɖá, “Ɖɛ́ ɓěà mɛ nyuɛ́? Gàa nìà kɛ nì zɛ̃̀ìn-ɖɛ̀ pàɖǎ nyuɛń. 48Ɓěà dyi wɔ̃́ ké ɔ dyi kǎà dyúa muín, nyɔǔn séín mu ɔ hwìɖǐǐ taɓaùn, ké Wóɖóùn-nyɔ̀ ɓěɔ̀ mu dyiìn, ké wa mu à Gèɖèpɔ́ɔ̀ gbǒ nìà kɛ kè à ɓóɖóɛ̀ nyɔ ɓěɔ̀ mú gbɔɔ̀ùn.”

49Wa ɖòɛ̀ nyɛ́nɛ́ mɔ̀ ma Kádyáfà. Ɔ mɔ̀ ma sáa-zà-nyɔ̀ vɛ̀nɛ̀ɔ̀ ɓó zɔ̃a xwíníín. Ɔ cɛ̃ɛ ma, ké ɔ ɖá, “Ɓě se ɖɛ ɖò dyí dyuò fɔɔ. 50Ɓě seɛ dyí dyuò kà ɓɛ́ ɔ nɔ̀mɔ̀ dyíin ɓó ɓě bìì, ɓɛ́ nyɔ dyúáɖò ké nyɔ séín ɓěɔ̀ bìì mɛ́, ké ɔ zi ɓɛ́ wa ké ɓóɖóɛ̀ nyɔ séín ɓě mú gbɔɔ̀ kɛɛ dyíɛɛ̀?” 51Ɖɛ ɔ cɛ̃ ma kà kɛɛ se ma ɔ mìɔùn mú sɔ̀ìn. Kɛɛ ɔ mɔ̀ ma sáa-zà-nyɔ̀ vɛ̀nɛ̀ɔ̀ ɓó zɔ̃a xwíníín, ké ɔ nì ma ɖɛ mu ma kpáùn wɛ̃ɛ cɛ̃iń kà ɓɛ́ Jízɛ̀ mu ma ɓóɖóɔ̀ nyɔ ɓěɔ̀ bìì mɛ́ìn nyɛ. 52Ké ɔ se ma ɓóɖóɔ̀ nyɔ ɓěɔ̀ ɖòùn bìì, kɛɛ ɔ mɔ̀ ɓɛ́ ɔ ké ma Gèɖèpɔ́ɔ̀ dyú ɓě ɓɛ́ wa ɖǎ ma kà dyi ɓeìn dà séín nyɛɛ dyí poìn, ɓɛ́ wa ké ma nyɔ-dù dyúáɖò jǔ.

53Ɔ jèɛɛ, sɔ̀ìn ɓó wéa gbo ké dyúa muɛɛ, wa poìn ma wuɖuí, ɓɛ́ wa ké ma Jízɛ̀ ɖáɓá. 54Ɖɛa kɔ̃̀ jè, Jízɛ̀ se ma Júù-nyɔ̀ ɓěɔ̀ hwìɛ̀ mu, ɓɛ́ wa séín ké ma ɔ dyé ɖe. Kɛɛ ɔ sɔ̀ ma dyí, ké ɔ mu ma dà ɖò ɓɛ́ ɔ xwɛ̃́ìn ma ɖé gbǎùn-fúɖúáɔ̀ kɔ̃ dyiɛɛ ɖé hwɔɖɔ ɖò kɔ̃̀ nyɛ́nɛ́ mɔ̀ ma Ífèɖèìn nyɛɛ mú. Ké ɔ kè ɔ ɖeín-nà-nyɔ̀ ɓěɔ̀ nì ma ɖé.

55Ɔ mɔ̀ ma ti pū ɓɛ́ Júù-nyɔ̀ ɓěɔ̀ kéá ma Zĩ̀ìn-Kɔ̃in-hwɔ̀ɔ̀ pa. Nyɔ pàɖǎ ɓě ɓɛ́ wa sɔ̀ìn ma ɖé hwɔɖɔ ɓěɔ̀ múɛɛ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ wa ké ma ɖɛ ɓě ɓɛ́ wa ké ma nyu ɓɛ́ wa ké ma wa mìɔùn mú hwɔɛɛ nyu, hwɛ̀ ɓɛ́ wa ké ma hwɔɔ̀ pa. 56Wa nì ma Jízɛ̀ dyi mɔ́uń, ké ti ɓɛ́ wa nyànà ma ɖé Gèɖèpɔ́ɔ̀ gbǒɔ̀ mú dyiɛɛ, wa dièìn dìèìn ma dyi, ké wa ɖá, “Ɓěɛ̀ hwòɖǒ ɖá ɔ se hwɔɔ̀ kɔ̃ dyiɛ́ muù?” 57Sáa-zà-nyɔ̀ kpa ɖɛ ɓěɔ̀ kè Fáɖòsíì-nyɔ̀ ɓěɔ̀ cɛ̃ɛ ma kà ɓɛ́ nyɔ ɖò dyi ma dɛ̀ ɓɛ́ Jízɛ̀ nì ma kɛɛ dyí dyuò ní, wa mɛ cɛ̃ɛ ma wa gbo, ɓɛ́ wa ké ma ɔ kpɔ̃ kɛ.

Currently Selected:

Jɔ̃́ɔ́ 11: ƁB02

Highlight

Copy