Jɔ̃́ɔ́ 12

Meɖé po Jízɛ̀ cáná bũ̌ ɖé Bɛ́fènì-hwɔ̀ɖɔ̀ɔ̀ mú

(Máfíò 26:6-13; Máà 14:3-9)

1Ti ɔ sèǎ wé mɛ̀nɛ̌ìn-ɖò ɓɛ́ Júù-nyɔ̀ ɓěɔ̀ ké waà Zĩ̀ìn-Kɔ̃in-hwɔ̀ɔ̀ paa, Jízɛ̀ mu ma ɖé Bɛ́fènì-hwɔ̀ɖɔ̀ɔ̀ mú. Ɔ mɔ̀ dɛ̀ ɓɛ́ Ɖázɛ̀ɖɛ̀ ɓɛ́ ɔ zà ma kà gĩɔ kɛɛ cĩ́ ma kà kɛ. 2Ké wa nyu ma ɖé ɔ bìì ɖii-ɖɛ̀. Matá po ma ɖii-ɖɛ̀ɔ̀ téɓèɖè kɔ̃, ké Ɖázɛ̀ɖɛ̀ kè Jízɛ̀ kò ma ɓó téɓèɖèɔ̀ gbɔi. 3Ké Meɖé ɖú ma cáná nɔ̀mɔ̀ nyɔ́ún ɓɛ́ wa ɖáìn náà kɛɛ kópò-wè sɔ̃́ dyí, ké ɔ poɛ ma Jízɛ̀ ɓoi, ké ɔ tìnììn ma ɓó ɔ míɔ̀ dyi. Cánáɔ̀ kpa ma wíɖí pàɖǎ mìɔ, ké ɔ nyɔ́ɔ̀ dyíìn ma gbǒɔ̀ múin. 4Kɛɛ Júdà Ɛ́sìkáɖìɔ̀ ɓɛ́ ɔ mɔ̀ ma Jízɛ̀ɛ̀ ɖeín-nà-nyɔ̀ ɓěɔ̀ ɖò, ɓɛ́ ɔ mu ma kà ɔ mú-nyɛ́-nyɔ̀ ɓěɔ̀ xwáɖáún zàìn nyɛɛ cɛ̃ɛ ma, ké ɔ ɖá, 5“Ɖɛ́ kɔ̃̀ jè à se ma cáná nìà kɛ peɖe, ɓɛ́ à kéɛ wíɖí mɔ̀à nyɔ nì kũ̀à nyuɛń nyɛɛ zɔ̃ gànáà pɛ́ɛ̀-wìɖìɛɛ kɔ̃ún dyé, ɓɛ́ à ké wíɖíɔ̀ gǎ-dyé-nyɔ̀ ɓěɔ̀ nyíɛ́?” 6Ɔ se ma ná gǎ-dyé-nyɔ̀ ɓěɔ̀ jè gbo kɔ̃̀ cá jè, ɓɛ́ ɔ ké ma kà ɖɛa cɛ̃ kɛ̀. Kɛɛ ɔ cɛ̃ɛ ma, sepóɛɖé ɔ mɔ̀ ma dyíɖíí-nyɔ̀. Wíɖí-ɓɔ̀ɔ̌ nì ma ɔ xwa, ké ɔ ɖɛ̀ɓɛ̀ ɓɛ́ ɔ ké ma wíɖíɔ̀ ɖò ɖi.

7Ti Júdà dè ma wuɖuiɛɛ, Jízɛ̀ cɛ̃ɛ ma wa gbo, ké ɔ ɖá, “Ɓě táà màaɔ̀ dyi. Ɖɛ ɔ ɓéɖéà kɛɛ, ɔ mɛ dèɛ̀ dyi, ɓɛ́ ní dyóɖóún-zà-tìɔ̀ ké dyi. 8Gǎ-dyé-nyɔ̀ ɓěɔ̀ nì dà ɓě gbo tee, kɛɛ ḿ se dà ɓě gbo nìɛ̌ mu tee.”

Wa sɔ́ Ɖázɛ̀ɖɛ̀

9Ɓó tia ɓaɖaa, Júù-nyɔ̀ ɓěɔ̀ pàɖǎ wɔ̃́ɔ ma kà ɓɛ́ Jízɛ̀ nì ma ɖé Bɛ́fènì-hwɔ̀ɖɔ̀ɔ̀ múɛ. Ɔ jèɛɛ, wa mu ma ɖé. Wa se ma ɖé mu ɓó Jízɛ̀ jè ɖòùn, kɛɛ wa mu, ɓɛ́ wa ké ma Ɖázɛ̀ɖɛ̀ mɔ̀ nyɔ ɓɛ́ Jízɛ̀ ɖǎ ma kà gĩɔ zà kɛɛ dyé. 10Ɔ jèɛɛ, sáa-zà-nyɔ̀ kpa ɖɛ ɓěɔ̀ poìn wuɖuí, ɓɛ́ wa ké ma Ɖázɛ̀ɖɛ̀ mɔ̀ùn ɖáɓá ɖekè, 11sepóɛɖé Júù-nyɔ̀ ɓěɔ̀ ɓáún-ɓáún nì ma muɛń, ké wa nì ma Jízɛ̀ hwìɖǐǐ taɓauń ɓó Ɖázɛ̀ɖɛ̀ jè.

Jízɛ̀ dyá Jùɖúsɛ̀ɖɛ̀ìn-hwɔ̀ɖɔ̀ɔ̀ to-ɖu-kà

(Máfíò 21:1-11; Máà 11:1-11; Ɖúù 19:28-40)

12Wéɔ̀ nyɔ kɔ ma ɓó dyíɛɛ, nyɔ kúɖúú ɓě ɓɛ́ wa ɖǎ ma kà hwɔɔ̀ kɔ̃ dyiɛɛ wɔ̃́ɔ ma kà ɓɛ́ Jízɛ̀ nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyiɛń nyɛ. 13Ɔ jèɛɛ, wa ɖú ma hwɛ̃-mì ɓě dyí, ké wa mu ma ɔ hwìǐ kpɔ̃uń. Ké wa páná ma mú, ké wa ɖá, “Ɓěà ɓàìn Gèɖèpɔ́ɔ̀. Mana mɛ nì nyɔ ɓɛ́ ɔ dyi ɖé Bounɓoɔ̀ nyɛ́nɛ́ɔ̀ múɛɛ kɔ̃.” 14Jízɛ̀ dyé ma jǎkasì ɖò, ké ɔ kòɛ̀ ma kɔ̃ún. Ɔ mɔ̀ kà ɓɛ́ Gèɖèpɔ́ɔ̀-cèè-ɖɛ̀ɔ̀ nyuà cɛ̃ɛ, ké ɔ dyià níiń,

15“Zádyɔún-nyɔ̀ ɓě, ɓě ɓɔ́ fɛ̃̀ìn.

Ɓě gmɔ̀ ɖéa, kà ɓěɛ̀ kã́áɔ̀ nì dyiɛń nyɛ.

Ɔ kò jǎkasì gmɔ̀ ɖò kɔ̃ún.”

16Ɓó tia ɓaɖaa, Jízɛ̀ɛ̀ ɖeín-nà-nyɔ̀ ɓěɔ̀ se ma wuɖu ɓěa múin wɔ̃́. Kɛɛ ti ɓɛ́ Jízɛ̀ ɖǎ ma dyií mu, ɓɛ́ ɔ ké ma dĩ́ín-dĩ̀ìn ɓéɖéɛɛ, wuɖu ɓě ɓɛ́ wa ɖǎ zɔ̃̌ɔ̀ kà céè ɓá ɔ dyíɛɛ dyi ma wa hwìɖǐi, ké ɔ dyi ma wa hwìɖǐi kà ɓɛ́ ɖɛ ɓě nìà kɛ ɖǎ ma Jízɛ̀ gbo kpáa.

17Nyɔ kúɖúú ɓě ɓɛ́ wa nì ma kà ɓó Jízɛ̀ gbo, ti ɓɛ́ ɔ ɖá ma kà Ɖázɛ̀ɖɛ̀, ké ɔ zà ma kà ɔ gĩɔ kɛɛ cɛ̃ ma ɔ jè. 18Ɖɛa kɔ̃̀ jè, nyɔ kúɖúú ɓěɔ̀ kpɔ̃ ma kà ɔ hwìǐɛ̀. Sepóɛɖé wa wɔ̃́ɔ kà ɓɛ́ ɔ ɖǎ ma zɛ̃̀ìn-ɖɛ̀ nìà kɛ nyuɛ. 19Púɛɛ, Fáɖòsíì-nyɔ̀ ɓěɔ̀ cɛ̃ìn cɛ̃̀ìn ma gbo, ké wa ɖá, “Ɓě dyéɛ, à se ɖɛ ɖò nyuɛń nì fɔɔ. Ɓě gmɔ̀ ɖéa, ɓóɖó-kpàà nyɔ séín ɓě nì ɔ kíɖíí síɛń wà!”

Gíɖíì-nyɔ̀ ɖíɛ́ ɓě mɔ́ Jízɛ̀ dyéɛ dyi

20Ɓó tia ɓaɖaa, Gíɖíì-nyɔ̀ ɖíɛ́ ɓě nì ma nyɔ ɓě ɓɛ́ wa mu ma kà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ wa ké ma kà Gèɖèpɔ́ɔ̀ ɓiè ɖé hwɔɔ̀ kɔ̃ɛɛ hwìɛ̀. 21Wa mu ma Féɖò ɓɛ́ ɔ sɔ̀ ma ɖé Bɛ̀séɖà-hwɔ̀ɖɔ̀ nìà ɖé Gáɖàɖíì-ɓòɖòɔ̀ kɔ̃ɛ múɛɛ gbo, ké wa ɖá, “Ɓɔ̌ɔ̀, à mɔ́ ɓɛ́ à ké Jízɛ̀ dyé.”

22Ké Féɖò mu, ké ɔ cɛ̃ɛ ma Ã́dòɖò gbo, ké wa sɔ̃́ɔ̀ mu, ké wa cɛ̃ɛ ma Jízɛ̀ gbo. 23Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Tiɔ̀ ɖǎ nyini, ɓɛ́ mɔ̄ Nyɔǔn-dyùɛ̀ Dyú-gààɔ̀ ké dĩ́ín-dĩ̀ìn ɓéɖé. 24Ḿ cɛ̃ ɓě jǎà gbo, mɔɔ́-xwɛ̃̀ mɔ̀ mɔɔ́-xwɛ̃̀ dyúáɖò pū, ɔ kpá dyɛɛ ɓíɖíi, ké ɔ mu ɓóɖóún, ké ɔ mɛ́ dyɛ hwɛ̀. Ɔ dyi mɛ́ín, ɔ zaìn dúún ɓáún-ɓáún. 25Nyɔ mɔ̀ nyɔ ɓɛ́ ɔ ɖɛ̀ɓɛ̀ ɔ fɛ̀ɛ̀ɔ̀ múɛɛ, ɔ fɛ̀ɛ̀ɔ̀ mu ɔ xwa sɔ̀ùn. Nyɔ mɔ̀ nyɔ ɓɛ́ ɔ nyɛ́ ɔ fɛ̀ɛ̀ɔ̀ mú nɔ̄ ɓóɖó-kpàà kɔ̃ɛɛ, ɔ fɛ̀ɛ̀ɔ̀ mu ɔ xwa sèìn, ɓɛ́ ɔ ké cĩ́ ɓó sè-ná-sèɛ̀ tiín. 26Nyɔ mɔ̀ nyɔ ɓɛ́ ɔ mɔ́ ɓɛ́ ɔ ké ḿ bìì kũ̀à nyuɛɛ, ḿ kèɔ̀ kè mɛ naìn mú, ɓɛ́ dɛ̀ ní mu nììn nyɛɛ, ɖéɛ̀ ní gbo-nì-nyɔ̀ɔ̀ ké nì. Ḿ Ɓǎ mu nyɔ mɔ̀ nyɔ ɓɛ́ ɔ nyu ḿ bìì kũ̀à kɛɛ kpéín dyéìn.”

Jízɛ̀ cɛ̃ ɔ mɛ́ jè

27Sɔ̀ìn ɓóɛ gboɛɛ, Jízɛ̀ cɛ̃ɛ ma, ké ɔ ɖá, “Fũ̀à-fṹá nyu ḿ, ké ɖɛ́ ḿ mɛ cɛ̃ɛ́? Ḿ mɛ cɛ̃ɛ, ɓɛ́ ḿ ké níiń, ‘Ḿ Ɓǎ, gǎ-dyé-tì nìà kɛ ní ɖá ɓɛ́ ɔ ké ḿ kɔ̃ dyiì?’ Kɛɛ ɖɛ kɔ̃̀ jè ḿ dyi maa mɔ̀ ɓɛ́ gǎ-dyé-tì nìà kɛ ké ḿ kɔ̃ dyi. 28Ḿ Ɓǎ, m̀ mɛ nyuɛ ɓɛ́ nì nyɛ́nɛ́ɔ̀ ké ɓàìn-ɓàìn ɓéɖé.”

Ké wuɖu ɖò sɔ̀ ma ɖé dyɔún, ké wuɖuɔ̀ ɖá, “Ḿ ɖǎa nyu ɓɛ́ ɔ ké ɓàìn-ɓàìn ɓéɖé, ké ní muɛ náa nyuùn ɖe.”

29Ké nyɔ kúɖúú ɓě ɓɛ́ wa nyànà ma ɓó dyiɛɛ wɔ̃́ ma wuɖuɔ̀, ké wa ɖá, “Zɛ páná ma ní.”

Kɛɛ nyɔ ɖíɛ́ ɓě ɖá, “Ínjà ɖò wùɖù ɔ gbo.”

30Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Ɖɛ kɔ̃̀ jè wuɖuɔ̀ dyià kɛɛ, ɔ se ní jè, kɛɛ ɔ mɔ̀ ɓó ɓě jè. 31Tiɔ̀ ɖǎ dyi, ɓɛ́ wa ké ɓóɖó-kpàà nyɔ ɓěɔ̀ zaa wɔ̃ po. Kàǔn wɛ̃ɛ, wa mu ɓóɖó-kpà nìà kɛ wuɖuí-kɔ̃̀-nyɔ̀ɔ̀ ɓó zàùn. 32Wa dyi ḿ dyií ɖú nɔ̄ ɓóɖó-kpàà kɔ̃ ní, ní mu nyɔ séín ɓěɔ̀ ḿ mìɔùn gbo dyàùn.” 33Ti ɔ cɛ̃ ma ɖɛ nìà kɛɛ, ɔ nì ma mɛ́-mɛ́ ɓɛ́ ɔ mu ma nyuùn wɛ̃ɛ nyɔ ɓěɔ̀ dyí tɛ̀mɛ̀ǐn.

34Ké nyɔ kúɖúú ɓěɔ̀ zà ma ɖé wuɖu, ké wa ɖá, “À gma-cèè-ɖɛ̀ɔ̀ ɖá, ‘Kɛ́ɖɛ́ìɔ̀ mu cĩ́ìn kánáá pū.’ Xwɛ̌ m̀ ɓɛ́ìn cɛ̃ɛ kà ɓɛ́ wa ɓéɖé ɓɛ́ wa ké Nyɔǔn-dyùɛ̀ Dyú-gààɔ̀ dyií ɖúɛ́? Nyɛ́ mɔ̀ Nyɔǔn-dyùɛ̀ Dyú-gàà kɔ̃̀ jè m̀ nìà cɛ̃iń nyɛ́?”

35Ké Jízɛ̀ cɛ̃ɛ ma wa gbo, ké ɔ ɖá, “Ceɔ̀ mu ɓě fã̀ìn ɓó ti tííwè xwíníín ke. Ɓě mɛ nà kà ɓɛ́ ɓě ɓéɖéà ceɔ̀ keɛ, ɓɛ́ tíe ní kɔ̃̀ ɖà ɓě kpɔ̃̀ìn. Nyɔ mɔ̀ nyɔ nà tíe-kpò múɛɛ se dɛ̀ ɔ muɛɛ dyuò. 36Kà ɓɛ́ ɓě ɓéɖéà ceɔ̀ keɛɛ, ɓě dè ceɔ̀ hwòɖǒ kɔ̃, ɓɛ́ ɓě ké nyɔ ɓě mɔ̀ nyɔ nì ceɔ̀ múɛɛ jǔ.”

Nyɔ ɓěɔ̀ se Jízɛ̀ hwìɖǐǐ taɓa

Ti ɓɛ́ Jízɛ̀ ɖǎ ma ɖɛa cɛ̃ɛ hwɔɛɛ, ɔ mu, ké ɔ vǐè ma ɔ mìɔùn wa dyí. 37Ɔ ɖǎ ma zɛ̃̀ìn-ɖɛ̀ pàɖǎ nyu ɓó wa dyéɖé waí dyɛo, kɛɛ wa se ma ɔ hwìɖǐǐ taɓa, 38ɓɛ́ ɖɛ ɓɛ́ kpáá-ɖɛ̀-cɛ̃-nyɔ̀ Àzédyà cɛ̃ zɔ̃̌ɔ̀ kɛɛ ké jǎà kpá. Ɖɛ ɔ cɛ̃ ma kɛɛ kɛà kɛ̀. Ɔ ɖá,

“Nyɛ́ mɔ̀ nyɔ ɖǎ à bɔ̃̌ɔ̀ jè dyi kpɔ̃ dyɛ mɔ̀ùn wɛ̃́?

Nyɛ́ mɔ̀ nyɔ ɖǎ Bounɓoɔ̀ kpéɔ̀ dyé ɖé ɖɛ nìà kɛ mú kɛ́?”

39Ɖɛa kɔ̃̀ jè, wa se ma hwìɖǐǐ-taɓa-taɓa ɓéɖéɛ ɓɛ́ìn, sepóɛɖé Àzédyà cɛ̃ɛ ma ɖe, ké ɔ ɖá,

40“Gèɖèpɔ́ɔ̀ ɖǎa nyu ɓɛ́ waà dyéɖé ɓěɔ̀ ké kɔ̃in kpè,

ɓɛ́ waà hwòɖǒ-dyùà ké kùmù,

ɓɛ́ wa ní kɔ̃̀ ɖà waà dyéɖéɔ̀ dyi dyéìn,

waà hwòɖǒ-dyùàɔ̀ ní kɔ̃̀ ɖà ɖɛ múin wɔ̃́,

wa ní kɔ̃̀ ɖà ḿ gbo gmɔ̀ìn,

mɔ́ún kɔ̃̀ ɖà wa dyi kánáìn.”

41Àzédyà cɛ̃ ma ɖɛ nìà kɛ, sepóɛɖé ɔ dyé ma Jízɛ̀ɛ̀ dĩ́ín-dĩ̀ìnɔ̀, ké ɔ cɛ̃ ma Jízɛ̀ jè.

42Kɛɛ wɛ̃́ɛ́ kɛɛ, Júù-nyɔ̀ ɓěɔ̀ nàìn-nyɔ̀ pàɖǎ taɓa ma Jízɛ̀ hwìɖǐǐ, kɛɛ wa seɛ ma cɛ̃ ɓɛ́ nyɔǔn séín keɛ ma wɔ̃́ ɓó Fáɖòsíì-nyɔ̀ ɓěɔ̀ jè, ɓɛ́ wa ní kɔ̃̀ ɖà wa cɔ́cì-gbòɔ̀ mú dyi kúmú. 43Wa ɖɛ̀ɓɛ̀ ɓɛ́ nyɔǔn-dyùɛ̀ hwòɖǒ ké wa múin dèìn, ké ɔ zi ɓɛ́ Gèɖèpɔ́ɔ̀ hwòɖǒ ké wa múin dèìn nyɛɛ dyí.

Jízɛ̀ wuɖu ɓěɔ̀ mu nyɔǔn zaa kpɔ̃̀ìn

44Sɔ̀ìn ɓóɛ gboɛɛ, Jízɛ̀ páná ma mú, ké ɔ ɖá, “Nyɔ mɔ̀ nyɔ ɓɛ́ ɔ taɓa ḿ hwìɖǐǐɛɛ, ɔ se ḿ ɖòǔn hwìɖǐǐ taɓa, kɛɛ ɔ taɓa nyɔ ɓɛ́ ɔ ɖoɓoà ḿ wɛ̃ɛ hwìɖǐǐ ɖekè. 45Nyɔ ɓɛ́ ɔ ɖǎ ḿ dyéɛɛ ɖǎ nyɔ ɓɛ́ ɔ ɖoɓoà ḿ wɛ̃ɛ dyé ɖekè. 46Ḿ dyi ɓóɖó-kpàà kɔ̃, ɓɛ́ ḿ ké ɓóɖó-kpàà ce jǔ, ɓɛ́ nyɔ ɓě ɓɛ́ wa taɓa ḿ hwìɖǐǐɛɛ ké se tíe-kpòɔ̀ mú sè. 47Nyɔ ɓě ɓɛ́ wa wɔ̃́ ní wuɖuɔ̀ ké wa seɛ nyuɛɛ, ḿ se wa zaa wɔ̃ poɛ́ mu. Ḿ se ma dyi, ɓɛ́ ḿ ké ɓóɖó-kpàà nyɔ ɓě zaa kpɔ̃̀ìn. Ḿ dyi, ɓɛ́ ḿ ké wa póìn. 48Nyɔ mɔ̀ nyɔ ɓɛ́ ɔ ɓɔ́ ḿ, ké ɔ se ní wuɖu ɓěɔ̀ dyi kpɔ̃ɛɛ ɓéɖé nyɔ ké ɔ zaa kpɔ̃̀ìn nyɛ. Wuɖu ɓě ɓɛ́ ḿ ɖǎà cɛ̃ kɛɛ mu ɔ zaa kpɔ̃̀ìn ɖé wé hwɛ̀ìn-gbɔɔ̀ mú. 49Sepóɛɖé wuɖu ɓě ɓɛ́ ḿ cɛ̃à kɛɛ se ɖé ḿ mìɔùn mú sɔ̀ìn. Kɛɛ Ɓǎ mɔ̀ nyɔ ɖoɓoà ḿ wɛ̃ɛ ɖǎ ɖɛ ḿ ké cɛ̃ɛ kè ɖɛ kɔ̃̀ jè ḿ ké wùɖù kɛɛ ḿ gbo cɛ̃. 50Ké ḿ dyuò kà ɖɛ ɓɛ́ ɔ cɛ̃à kɛɛ dyà sè-ná-sèɛ̀ fɛ̀ɛ̀ kɛ. Ɔ jèɛɛ, ɖɛ ḿ cɛ̃à kɛɛ mɔ̀ ɖɛ ɓɛ́ Ɓǎɔ̀ ɖá ḿ mɛ cɛ̃ɛ.”

Currently Selected:

Jɔ̃́ɔ́ 12: ƁB02

Highlight

Copy