Jɔ̃́ɔ́ 13

Jízɛ̀ dèɖè ɔ ɖeín-nà-nyɔ̀ ɓěɔ̀ ɓoi

1Ti ɓɛ́ ɔ sèǎ ma wé dyúáɖò hwɛ̀ ɓɛ́ Júù-nyɔ̀ ɓěɔ̀ ké ma waà Zĩ̀ìn-Kɔ̃in-hwɔ̀ɔ̀ paa, Jízɛ̀ dyuò kà ɓɛ́ ti ɓɛ́ ɔ ké ma ɓóɖó-kpàà kɔ̃ sɔ̀, ɓɛ́ ɔ ké ma ɖé Ɓǎɔ̀ gbo muɛɛ ɖǎ ma dyiɛ. Ɔ ɖɛ̀ɓɛ̀ ma nyɔ ɓě ɓɛ́ wa mɔ̀ ma ɔ nyɔ ɓě nɔ̄ ɓóɖó-kpàà kɔ̃ɛɛ mú kánáá pū, ké ɔ gã̀ ma wa mú ɖɛ̀ɓɛ̀ǐn dyi tee ké tiɔ̀ nyini ma.

2Ɓó tia ɓaɖaa, Jízɛ̀ kè ɔ ɖeín-nà-nyɔ̀ ɓěɔ̀ nì ma hwìo-ɖɛ̀ ɖiɛń. Púɛɛ, Nɔɔ́-nàmàǔn ɖǎa ma Júdà mɔ̀à Sã́ɓò Ɛ́sìkáɖìɔ̀ dyú-gààɔ̀ kɛɛ xwíníín po, kà ɓɛ́ ɔ ké ma Jízɛ̀ ɔ mú-nyɛ́-nyɔ̀ ɓěɔ̀ xwáɖáún zàìn nyɛ. 3Jízɛ̀ dyuòɛ̀ ma kà ɓɛ́ Ɓǎɔ̀ ɖǎ ma ɔ ɖɛ séín xwa nyíɛ. Ɔ dyuòɛ̀ kà ɔ sɔ̀ìn ma ɖé Gèɖèpɔ́ɔ̀ gbo, ké ɔ nì ma ɖé ɔ gbo muɛń nyɛ. 4Ɔ jèɛɛ, Jízɛ̀ sɔ̀ ma ɓó téɓèɖèɔ̀ gbɔ dyí, ké ɔ zà ma ɔ mú-po-ɖɔ̀ɔ̀ nyɔ nì ma ɓó kɔ̃in nyɛɛ mú, ké ɔ jìnììn ma táɓà-kpàǎ ɖò gbo. 5Ké ɔ po ma ní ɖò páni mú, ké ɔ ɖú ma ɖeín-nà-nyɔ̀ ɓěɔ̀ ɓoi dèɖè kpàǐ. Ké ɔ sámáìn ma táɓà-kpàǎ ɓɛ́ ɔ jìnììn ma kà gboɛɛ wa ɓoi. 6Ti ɔ dyɛ̀ìn ma Sã́ɓò Píɖɛ̀ kɛɛ, Píɖɛ̀ diè ma ɔ dyi, ké ɔ ɖá, “Bounɓo, mɔ̀ mɔ̀ nyɔ ké ḿ ɓoi dèɖèè?”

7Ké Jízɛ̀ zà ma ɖé wuɖu, ké ɔ ɖá, “M̀ se ɖɛ ḿ nìà nyuɛń nyɛɛ dyí dyuò kàǔn, kɛɛ nì muɛ dyí dyuòùn ɖé dyúa.”

8Kɛɛ Píɖɛ̀ cɛ̃ɛ ma ɔ gbo, ké ɔ ɖá, “M̀ se ḿ ɓoi dèɖèɛ̌ mu sɔ̃̀ùn.”

Ké Jízɛ̀ zà ma ɖé wuɖu, ké ɔ ɖá, “Ḿ se m̀ ɓoi dèɖè ní, nìí, ḿ kè mɔ̀ se mú naǐn mu ɖe.”

9Púɛɛ, Sã́ɓò Píɖɛ̀ ɖá, “Bounɓo, ɓɔ́ ní ɓoɔ̀ ɖòùn dyi dèɖèɛ̀, kɛɛ m̀ mɛ dèɖè ḿ dúi, ɓɛ́ m̀ ké ní sɔ̃ ɓěɔ̀ dyi dèɖè ɖekè.”

10Ké Jízɛ̀ cɛ̃ɛ ma ɔ gbo, ké ɔ ɖá, “Nyɔ mɔ̀ nyɔ ɓɛ́ ɔ ɖǎ dèɖèɛɛ, ɔ ɖǎ mú hwɛ̀ gàná, ké ɔ se ɓéɖé ɓɛ́ ɔ ké dèɖè ɖe, ɔ sèìn ɔ ɓo ɓěɔ̀ ɖòùn. Ɓě ɖǎ mú hwɛ̀, kɛɛ ɔ se ɓě séín.” 11Jízɛ̀ dyuò ma nyɔ mu ma kà ɔ ɔ mú-nyɛ́-nyɔ̀ ɓěɔ̀ xwáɖáún zàìn nyɛɛ dyí. Ɖɛa kɔ̃̀ jè, ɔ cɛ̃ɛ ma kà ɓɛ́ wa séín ɖǎ ma kà mú hwɛ̀, kɛɛ ɔ se ma kà wa séín cáà.

12Ti ɓɛ́ Jízɛ̀ ɖǎ ma wa ɓoi dèɖèɛ̀ hwɔɛɛ, ɔ po ma ɔ ɖɔɔ̀ mú ɖe, ké ɔ mu ɓó ɔ nììn páɔ̀ mú ɓó téɓèɖèɔ̀ gbɔ ɖe. Hwɛ̀ ké ɔ diè ma wa dyi, ké ɔ ɖá, “Ɓě dyuò ɖɛ ḿ ɖǎà ɓě bũ̌ nyuɛɛ xwíníínǹ? 13Ɓě ɖá ḿ mɔ̀ ɓěɛ̀ ɖɛ-tɛ̀mɛ̀ìn-nyɔ̀ kè ɓěɛ̀ wuɖuí-kɔ̃̀-nyɔ̀. Ɓě cɛ̃ jǎà, sepóɛɖé ḿ mɔ̀ ɔ mɔ̀ jǎà. 14Nìí, ɔ jǔ ké mɔ̄ mɔ̀à ɓěɛ̀ wuɖuí-kɔ̃̀-nyɔ̀ kè ɓěɛ̀ ɖɛ-tɛ̀mɛ̀ìn-nyɔ̀ kɛɛ dyi ɓě ɓoi dèɖèǐn, nìí, ɓě mɔ̀ùn ɓéɖé ɓɛ́ ɓě ké ɓoi deɖeìn dèɖèìn ɖekè. 15Ḿ ɖǎ ɓě hwìèɔ̀ da zàìn, ɓɛ́ ɓě mɔ̀ùn ké ɖɛ ḿ ɖǎà ɓě bìì nyuɛɛ ɖò nyu. 16Ḿ cɛ̃ ɓě jǎà gbo, gǐì ɖò se ɖɛ kpa, ɓɛ́ ɔ ké ɔ kɔ̃̀-nyɔ̀ɔ̀ dyí zi. Ké kíá ɖò se ɖɛ kpa, ɓɛ́ ɔ ké nyɔ ɖoɓoà ɔ kɛɛ dyí zi. 17Ɓě dyuò ɖɛ ɓě nìà kɛ dyí kàǔn. Ɓě dyi wa nyuín, mana mu ɓě kɔ̃ nììn.

18“Ḿ se ɓě séín jè cɛ̃iń nì. Ḿ dyuò nyɔ ɓɛ́ ḿ ɖǎ gã kɛɛ dyí. Kɛɛ Gèɖèpɔ́ɔ̀-cèè-ɖɛ̀ɔ̀ dɛ̀ ɓɛ́ ɔ cɛ̃à, ɓɛ́ ɔ dyià níiń, ‘Nyɔ ɓɛ́ ḿ kèɔ̀ kè ɖi ɖɛ ɓó dà dyúáɖòɛɛ ɖǎ ní gbo-vɔ̃-nyɔ̀ mú zɛ̃̀ìn’ nyɛɛ ɓéɖé ɔ ké jǎà kpá. 19Ḿ cɛ̃ɛ ɓě gbo kàǔn, hwɛ̀ ɓɛ́ ɔ ké kpá, ɓɛ́ ɔ jǔ ké ɔ dyi ná kpáín, ɓě kéɛ jǎà po kà mɔ̄ mɔ̀ nyɔ ḿ jǔɛɛ ɔɔ̀ ḿ jǔɛ. 20Ḿ cɛ̃ ɓě jǎà gbo, nyɔ mɔ̀ nyɔ kpɔ̃ nyɔ ɓɛ́ ḿ ɖoɓoɛɛ jè dyiɛɛ kpɔ̃ mɔ́ún jè dyi ɖekè, ké nyɔ mɔ̀ nyɔ kpɔ̃ ní jè dyiɛɛ kpɔ̃ nyɔ ɖoɓoà ḿ wɛ̃ɛ jè dyi.”

Jízɛ̀ cɛ̃ɛ kà ɓɛ́ nyɔ ɖò mu ɔ ɔ mú-nyɛ́-nyɔ̀ ɓěɔ̀ xwáɖáún zàìn nyɛ

(Máfíò 26:20-25; Máà 14:17-21; Ɖúù 22:21-23)

21Ti ɓɛ́ Jízɛ̀ cɛ̃ ma ɖɛ nìà kɛɛ, fũ̀à-fṹá nyu ma ɔ, ké ɔ cɛ̃ɛ wáɖáá, ké ɔ ɖá, “Ḿ cɛ̃ ɓě jǎà gbo, ɓě dyúáɖò mu ḿ xwáɖáún zàùn ɖé ní mú-nyɛ́-nyɔ̀ ɓěɔ̀ gbo.”

22Ké ɔ ɖeín-nà-nyɔ̀ ɓěɔ̀ gmɔìn gmɔ̀ìn ma dya. Hwòɖǒ kpèìn ma wa kɔ̃in ɓó nyɔ kɔ̃̀ jè ɔ nì ma kà cɛ̃iń nyɛɛ jè. 23Jízɛ̀ɛ̀ ɖeín-nà-nyɔ̀ ɓěɔ̀ nyɔ ɓɛ́ ɔ ɖɛ̀ɓɛ̀ ma kà múɛɛ nì ma ɓó Jízɛ̀ gbìǐ. 24Ɔ jèɛɛ, Sã́ɓò Píɖɛ̀ ɖáìn ma ɔ sɔ̃, ké ɔ ɖá, “Diè ɔ dyi ɓó nyɔ kɔ̃̀ jè ɔ nìà cɛ̃iń nyɛɛ jè.”

25Ɔ jèɛɛ, ɖeín-nà-nyɔ̀ɔ̀ xwɛ̃́ìn ma Jízɛ̀ bũ̌in, ké ɔ diè ma ɔ dyi, ké ɔ ɖá, “Bounɓo, ɔ mɔ̀ nyɛ́ɛ̀?”

26Ké Jízɛ̀ zà ma ɖé wuɖu, ké ɔ ɖá, “Ní mu bɛɖɛɛ̀ɔ̀ ɖé ɖɛ-fùùɔ̀ mú taɓaùn. Nyɔ ɓɛ́ ní muà nyíìn nyɛɛ mɔ̀ ɔ mɔ̀.” Ɔ jèɛɛ, ɔ ɖú ma bɛɖɛɛ̀ɔ̀ dyí, ké ɔ taɓaa ma ɖɛ-fùùɔ̀ mú, ké ɔ nyíɛ ma Júdà mɔ̀à Sã́ɓò Ɛ́sìkáɖìɔ̀ɛ̀ dyú-gààɔ̀ kɛ. 27Ti ɓɛ́ Júdà kpɔ̃ ma bɛɖɛɛ̀ɔ̀ nyɛ̀nɛ̀ɛ̀ kɛɛ, Sétɔ̃̀ dyá ma ɔ hwòɖǒ-dyùàɔ̀ mú. Ké Jízɛ̀ cɛ̃ɛ ma ɔ gbo, ké ɔ ɖá, “Fṹà ɓɛ́ m̀ ké ɖɛ m̀ kéà nyuɛɛ nyu wàɖà.” 28Nyɔ ɓě nì ma ɓó téɓèɖèɔ̀ gbɔɛɛ ɖò se ɖɛ ɓɛ́ Jízɛ̀ cɛ̃ ma kà ɔ gboɛɛ múin wɔ̃́. 29Wíɖí-ɓɔ̀ɔ̌ nì ma Júdà xwa jèɛɛ, ɖeín-nà-nyɔ̀ ɓěɔ̀ ɖíɛ́ ɓě ɖáìn Jízɛ̀ cɛ̃ɛ ma ɔ gbo, ɓɛ́ ɔ ké ma mu, ɓɛ́ ɔ ké ɖii-ɖɛ̀ ɓɛ́ wa mɔ́ ma ɓɛ́ wa ké ma hwɔɔ̀ paa dɔ̃, mɔɔ ɓɛ́ ɔ ké ma ɖɛ ɖò gǎ-dyé-nyɔ̀ ɓěɔ̀ nyí.

30Ti ɓɛ́ Júdà kpɔ̃ ma bɛɖɛɛ̀ɔ̀ kɛɛ, ɔ sí ma wàɖà. Ɔ mɔ̀ ma máaún-kà.

Gma ɖìè

31Ti ɓɛ́ Júdà ɖǎ ma síɛɛ, Jízɛ̀ cɛ̃ɛ ma, ké ɔ ɖá, “Nyɔǔn-dyù ɓɛ́ìn mɔ̄ Nyɔǔn-dyùɛ̀ Dyú-gààɔ̀ dĩ́ín-dĩ̀ìnɔ̀ dyéɛ kàǔn. Nyɔǔn-dyù ɓɛ́ìn Gèɖèpɔ́ɔ̀ dĩ́ín-dĩ̀ìnɔ̀ dyéɛ dyììn ɖé ḿ mú. 32Ɔ jǔ ké nyɔǔn-dyù dyi Gèɖèpɔ́ɔ̀ dĩ́ín-dĩ̀ìnɔ̀ dyéɛ ɓɛ́ìn dyììn ɖé ḿ mú ní, nìí, Gèɖèpɔ́ɔ̀ mìɔùn mu mɔ̄ Nyɔǔn-dyùɛ̀ Dyú-gààɔ̀ dĩ́ín-dĩ̀ìnɔ̀ nyɔǔn dyí tɛ̀mɛ̀ìn, ké ɔ muɛ náa nyuùn wàɖà. 33Ní dyú ɓě, ḿ nì ɓě gbo ti tííwè xwíníín pū. Ɓě mu ḿ dyi mɔ́ùn, kɛɛ ní mu ɖɛ ḿ cɛ̃ ma Júù-nyɔ̀ ɓěɔ̀ gboɛɛ ɓě mɔ̀ùn gbo cɛ̃ìn ɖekè. Ɖɛ ḿ cɛ̃ maa mɔ̀, ‘Ɓě se dɛ̀ ḿ nìà muɛń nyɛɛ muɛ ɓɛ́ìn.’ 34Ḿ nì ɓě gma ɖìè ɖò nyíɛń. Ɔ mɔ̀, ɓě mɛ ɖɛɓɛìn ɖɛ̀ɓɛ̀ìn mú. Kà ɓɛ́ ḿ ɖǎà ɓě mú ɖɛ̀ɓɛ̀ɛ, kǎà ɓě mɛ ɖɛ̀ɓɛ̀ ɓě mǔè ɓě mú. 35Ɓě dyi mú ɖɛɓɛìn ɖɛ̀ɓɛ̀ìn ní, nìí, nyɔǔn séín muɛ dyí dyuòùn kà ɓɛ́ ɓě mɔ̀ ní ɖeín-nà-nyɔ̀ ɓěɛ.”

Jízɛ̀ cɛ̃ɛ kà Píɖɛ̀ mu ɔ jè mú doìn nyɛ

(Máfíò 26:31-35; Máà 14:27-31; Ɖúù 22:31-34)

36Ɓó tia múɛɛ, Sã́ɓò Píɖɛ̀ diè ma ɔ dyi, ké ɔ ɖá, “Bounɓo, dɛ̀ m̀ nìà muɛń nyɛ́?”

Ké Jízɛ̀ jǔ ma ɔ gɔ̃̌, ké ɔ ɖá, “Dɛ̀ ḿ nìà muɛń nyɛɛ, m̀ se ḿ kíɖíí síɛ ɓɛ́ìn, ɓɛ́ m̀ ké ɖé mu kàǔn. Kɛɛ nì mu ḿ kíɖíí síìn ɖé dyúa.”

37Ké Píɖɛ̀ cɛ̃ɛ ma ɔ gbo, ké ɔ ɖá, “Bounɓo, ɖɛ́ kɔ̃̀ jè ḿ seà m̀ kíɖíí síɛ ɓɛ́ìn kàǔn wɛ̃́? Ḿ ɖǎ ti dyé ɓɛ́ ḿ ké m̀ bìì mɛ́.”

38Hwɛ̀ ké Jízɛ̀ cɛ̃ɛ ma ɔ gbo, ké ɔ ɖá, “M̀ ɖǎ ti dyé ɓɛ́ m̀ ké ḿ bìì mɛ́ jǎà? Ḿ cɛ̃ m̀ jǎà gbo, hwɛ̀ ɓɛ́ sòò ké wuɖu poɛɛ, nì mu ní jè mú-doìn-kpà tã nyuùn.”

Currently Selected:

Jɔ̃́ɔ́ 13: ƁB02

Highlight

Copy