Jɔ̃́ɔ́ 19

1Ké Páɖè ɖú ma Jízɛ̀ dyí, ké ɔ nyuɛ ké ɔ sójà ɓěɔ̀ ɓàɖàìn ma ɔ gbàtò. 2Ké wa fíá ma wí-gbɛ̌ɛ̀ ɖò, ké wa dèɛ̀n ma ɔ dú, ké wa gba ma ɔ ɖɔ dyéɖé ɖàɓàìn kpèɛ̀ ɖò kɔ̃in. 3Wa mu ma ɔ gbo, ké wa ɖá, “Júù-nyɔ̀ ɓěɔ̀ kã́á, m̀ mɛ kɔ̃̀ à wuɖuí kánáá pū.” Ké wa taɓa ma ɔ kpá.

4Sɔ̀ìn ɓóɛ gboɛɛ, Páɖè sí ma píé ɖe, ké ɔ cɛ̃ɛ ma nyɔ kúɖúú ɓěɔ̀ gbo, ké ɔ ɖá, “Ɓě gmɔ̀ nɔ̄, ní mu ɔ nɔ̄ ɓě gbo síìn, ɓɛ́ ɓě ké ɔ dyé kà ɓɛ́ ḿ se ɔ ɖɛ gbà ɖò mú dyéɛ.” 5Ɔ jèɛɛ, Jízɛ̀ sí ma. Wí-gbɛ̌ɛ̀ɔ̀ nì ma ɔ dú, ké ɖɔ dyéɖé ɖàɓàìn kpèɛ̀ɔ̀ nì ma ɔ mú ke. Páɖè cɛ̃ɛ ma wa gbo, ké ɔ ɖá, “Ɓě gmɔ̀ nɔ̄, gbɛ̀ kà gàaɔ̀ nìɛ.”

6Ti ɓɛ́ sáa-zà-nyɔ̀ kpa ɖɛ ɓěɔ̀ kè sójà ɓěɔ̀ dyé ma ɔ kɛɛ, wa páná ma mú, ké wa ɖá, “Kɔ̀ìn ɔ kɔ́ɖɔ́sì kɔ̃in! Kɔ̀ìn ɔ kɔ́ɖɔ́sì kɔ̃in!”

Púɛɛ, Páɖè cɛ̃ɛ ma wa gbo, ké ɔ ɖá, “Ɓě mìɔùn mɛ kpa ɔ, ɓɛ́ ɓě ké ɔ kɔ́ɖɔ́sì kɔ̃in kɔ̀ìn. Ḿ se ɔ ɖɛ gbà ɖò mú dyé.”

7Ké Júù-nyɔ̀ ɓěɔ̀ zà ma ɖé wuɖu, ké wa ɖá, “À ɓéɖé gma ɖò, ké gmaɔ̀ ɖá ɔ ɓéɖé ɓɛ́ ɔ ké mɛ́, sepóɛɖé ɔ ɖá ɔ mɔ̀ Gèɖèpɔ́ɔ̀ Dyú-gààɔ̀.”

8Ti Páɖè wɔ̃́ ma wa ɖɛa cɛ̃ɛ kɛɛ, ɔ zi ma fɛ̃̀ǐn mìɔ. 9Ké ɔ mu ma ɖé gɔ̌mànà-gbòɔ̀ mú ɖe, ké ɔ diè ma Jízɛ̀ dyi, ké ɔ ɖá, “Dɛ̌ m̀ sɔ̀ɛ́?”

Kɛɛ Jízɛ̀ se ma wùɖù. 10Ɔ jèɛɛ, Páɖè diè ma ɔ dyi, ké ɔ ɖá, “M̀ se ḿ gbo wùɖùɛ̀ mɔ́ɔ̀? M̀ seɛ dyuò kà ḿ ɓéɖé kpé ɓɛ́ ḿ ké m̀ buɛ̀, ké ḿ ɓéɖé kpé ɓɛ́ ḿ ké m̀ kɔ́ɖɔ́sì kɔ̃in kɔ̀ìn nyɛɛ̀?”

11Ké Jízɛ̀ ɖá, “M̀ seɔ́ ḿ kpé kɔ̃ún ɓéɖéɛ mu pū, kɛɛ Gèɖèpɔ́ɔ̀ mɔ̀ nyɔ nyí m̀ kpéɔ̀. Ɔ jèɛɛ, gàa ɓɛ́ ɔ zàìn kà ḿ m̀ xwáɖáún wɛ̃ɛ, nàmàǔn kɔ̃̀ zaa kpɔ̃à ɔ kɛɛ ɓúá dyí, ké ɔ zi m̀ nììnɔ̀ dyí.”

12Ti Páɖè wɔ̃́ ma ɖɛa kɛɛ, ɔ vɔ̃ ɓɛ́ ɔ ké ma Jízɛ̀ buɛ̀. Kɛɛ Júù-nyɔ̀ ɓěɔ̀ páná ma mú, ké wa ɖá, “Ɔ jǔ ké m̀ dyi ɔ buɛ̀ ní, nìí, m̀ se Síízɛ̀ mɔ̀à Wóɖóùn-kã̀ǎɔ̀ kɛɛ ɓǎto. Nyɔ mɔ̀ nyɔ cɛ̃ɛ kà ɓɛ́ ɔ mɔ̀ kã́á kɛɛ vɔ̃ Síízɛ̀ gbo.”

13Ti Páɖè wɔ̃́ ma ɖɛa kɛɛ, ɔ síìn ma Jízɛ̀ píé, ké ɔ kò ma ɖé ɔ zaa-cɛ̃̀ìn-naín ɓɛ́ ɔ nì ɖé pá wa ɖáìn Sɔ́ɔ́-kpò-pà kɛ múɛɛ dyi. Ɖé Híìbúɖúù-wùɖù múɛɛ, wa ɖáìn páɔ̀ Gàbátà. 14Ɔ ɓɛ́ìn ma dyóɖó-kò-dú-hwìɛ̀ jǔɛ ɓó wé kɔ ma ɓó Zĩ̀ìn-Kɔ̃in-hwɔ̀ɔ̀ gboíɛ. Páɖè cɛ̃ɛ ma Júù-nyɔ̀ ɓěɔ̀ gbo, ké ɔ ɖá, “Gbɛ̀ kà ɓěɛ̀ kã́áɔ̀ nìɛ.”

15Ké wa páná ma mú, ké wa ɖá, “Ɖáɓá ɔ! Ɖáɓá ɔ! Kɔ̀ìn ɔ kɔ́ɖɔ́sì kɔ̃in!”

Ké Páɖè diè ma wa dyi, ké ɔ ɖá, “Ɓě mɔ́ ɓɛ́ ḿ ké ɓěɛ̀ kã́áɔ̀ kɔ́ɖɔ́sì kɔ̃in kɔ̀ìnǹ?”

Ké sáa-zà-nyɔ̀ kpa ɖɛ ɓěɔ̀ zà ma ɖé wuɖu, ké wa ɖá, “Kã́á dyúáɖò ɓɛ́ à ɓéɖé kɛɛ mɔ̀ Síízɛ̀.”

16Púɛɛ, Páɖè nyí ma wa Jízɛ̀, ɓɛ́ wa ké ma ɔ kɔ́ɖɔ́sìɔ̀ kɔ̃in kɔ̀ìn.

Wa kɔ̀ìn Jízɛ̀ kɔ́ɖɔ́sìɔ̀ kɔ̃in

(Máfíò 27:32-44; Máà 15:21-32; Ɖúù 23:26-43)

17Ti ɖɛ ɓěɛ̀ ɖǎ ma dyi ziɛɛ, wa kpɔ̃ ma Jízɛ̀, ké ɔ ɓéɖé ma ɔ mìɔùn nììn kɔ́ɖɔ́sìɔ̀. Ké wa nyini ma ɖé pá wa ɖáìn “Nyɔǔn-dù-kpà” kɛɛ mú. Ɖé Híìbúɖúù-wùɖù múɛɛ, wa ɖáìn páɔ̀ Gɔ̀gɔ́tà. 18Wa kɔ̀ìn ma ɖé ɔ kɔ́ɖɔ́sìɔ̀ kɔ̃in. Ké wa kɔ̀ìn ma gàa sɔ̃́ ɓě kɔ́ɖɔ́sì ɓě kɔ̃in ɖekè. Ɖò nì ma Jízɛ̀ wáká ɖò kɔ̃, ké ɖò nì ma ɔ wáká tɔ̀ɔ̀ kɔ̃. Jízɛ̀ nì ma ɓó wa hwòɖǒǔn. 19Páɖè céè ma céè-ɖɛ̀ ɖò, ké wa poɛ ma ɓóɛ Jízɛ̀ɛ̀ kɔ́ɖɔ́sìɔ̀ dyéɖéín. Céè-ɖɛ̀ɔ̀ wuɖu ɖá, “Nyɔ nìà kɛ mɔ̀ Jízɛ̀ sɔ̀à Názɛ̀ɖɛ̀-hwɔ̀ɖɔ̀ɔ̀ mú, ɓɛ́ ɔ mɔ̀à Júù-nyɔ̀ ɓěɔ̀ kã́áɔ̀ kɛ.” 20Júù-nyɔ̀ ɓáún-ɓáún zà ma ɖɛa wuɖuún, sepóɛɖé dɛ̀ wa kɔ̀ìn ma kà Jízɛ̀ kɔ́ɖɔ́sìɔ̀ kɔ̃in nyɛɛ xwɛ̃́ìn ma hwɔɖɔɔ̀ bũ̌in. Wa céè ma céè-ɖɛ̀ɔ̀ ɖé Híìbúɖúù-wùɖù kè Ɖátììn-wùɖù ɔ kè Gíɖíì-wùɖù mú. 21Sáa-zà-nyɔ̀ kpa ɖɛ ɓěɔ̀ cɛ̃ɛ ma Páɖè gbo, ké wa ɖá, “Mɔ̀ǔn ɖá ɓɛ́ m̀ kéɛ céè, ɓɛ́ m̀ ké níiń, ‘Nyɔ nìà kɛ mɔ̀ Júù-nyɔ̀ ɓěɔ̀ kã́áɔ̀.’ Kɛɛ m̀ mɛ céèɛ̀, ɓɛ́ m̀ ké níiń, ‘Gàa nìà kɛ ɖá ɔ mɔ̀ Júù-nyɔ̀ ɓěɔ̀ kã́áɔ̀.’ ”

22Ké Páɖè zà ma ɖé wuɖu, ké ɔ ɖá, “Ɖɛ ḿ ɖǎà céèɛɛ, ḿ ɖǎa céè kánáá pū.”

23Ti sójà ɓěɔ̀ ɖǎ ma Jízɛ̀ kɔ́ɖɔ́sìɔ̀ kɔ̃in kɔ̀ìn nyɛɛ, wa ɖú ma ɔ ɖɔ ɓěɔ̀ dyí, ké wa geɛ ma dú hĩinyɛ mú. Sójà dyúáɖò ní, ɔ mɔ̀ùn kpa dú dyúáɖò. Wa ɖú ma ɔ wáɖá-ɖɔ̀ zɛinɔ̀ dyí ɖekè. Ɔ mɔ̀ ma ɖɔ ɖaɓa-ɖaɓa dyúáɖò, ké ɔ se ma gma-dyèɖè ɖò ɓéɖé. 24Sójà ɓěɔ̀ cɛ̃ìn cɛ̃̀ìn ma gbo, ké wa ɖá. “Ɓěà ní fáìn dyi. Ɓěà mɛ nyu gbo-ɖàɓàìn-ɖɛ̀, ɓɛ́ ɓěà ké nyɔ mu ɔ kpaùn wɛ̃ɛ dyé.” Ɖɛ nìà kɛ kpá ma, ɓɛ́ ɖɛ Gèɖèpɔ́ɔ̀-cèè-ɖɛ̀ɔ̀ cɛ̃à kɛɛ ké jǎà kpá. Ɖɛ ɔ cɛ̃ kɛɛ kɛà kɛ̀. Ɔ ɖá,

“Kà wa nyu ma ní mú-po-ɖɔ̀ɔ̀ geɛ̀n nyɛɛ mɔ̀,

wa nyu gbo-ɖàɓàìn-ɖɛ̀ ɓóɛ jè.”

Ɔ jèɛɛ, sójà ɓěɔ̀ nyu ma kà ɖɛa kɛ̀.

25Nyɔ ɖíɛ́ ɓě nyànà ma ɓó Jízɛ̀ɛ̀ kɔ́ɖɔ́sìɔ̀ dyéɖé zɔ̃̌ dyi. Wa mɔ̀ ma ɔ ɖe kè ɔ ɖeɛ̀ ɖíí-màà kè Meɖé ɓɛ́ ɔ mɔ̀ ma Kɔ́ɖɔ́pàà gmàà kɛ ɔ kè Meɖé sɔ̀à ɖé Máɖèɖà-hwɔ̀ɖɔ̀ɔ̀ múɛ. 26Jízɛ̀ dyé ma ɔ ɖe kè ɔ ɖeín-nà-nyɔ̀ ɓɛ́ ɔ ɖɛ̀ɓɛ̀ ma kà múɛɛ ɓó. Ɔ jèɛɛ, ɔ cɛ̃ɛ ma ɔ ɖe gbo, ké ɔ ɖá, “Noò, nì dyú-gààɔ̀ nìàǒ wɛ̀.”

27Ké ɔ cɛ̃ɛ ma ɖeín-nà-nyɔ̀ɔ̀ gbo, ké ɔ ɖá, “M̀ ɖe nìàǒ wɛ̀.” Sɔ̀ìn ɓó tia gboɛɛ, ɖeín-nà-nyɔ̀ɔ̀ kpa ma ɔ ɖé ɔ ɓíɖí-taún, ɓɛ́ ɔ ké ma ɖé nì.

Jízɛ̀ɛ̀ mɛ́ jè

(Máfíò 27:45-56; Máà 15:33-41; Ɖúù 23:44-49)

28Ɓó tia múɛɛ, Jízɛ̀ dyuòɛ̀ ma dyí kà ɓɛ́ ɖɛ séín ɖǎ ma gbɔ hwɛ̀ kɛ. Ɖɛ ɓɛ́ Gèɖèpɔ́ɔ̀-cèè-ɖɛ̀ɔ̀ cɛ̃ maa ké jǎà kpá jèɛɛ, ɔ ɖá, “Ní-ná-tò nyu ḿ ní.”

29Ɖɛ-fùù ɖò nì ma ɓó, ké náá-ɖɛ̀ nya-nya ɖò nì ma ɖéɛ mú. Wa ɖú ma ɖɛ fɔ̀ì-fɔ̀ì ɖò dyí, ké wa dyíìn ma náá-ɖɛ̀ nya-nyaɔ̀ ɖɛ fɔ̀ì-fɔ̀ìɔ̀ mú, ké wa poɛ ma hésɔ̀-cù ɖò mánáín, ké wa tòɛ̀ ma Jízɛ̀ wĩín. 30Ké Jízɛ̀ nyɔ́ɔ ma mú, ké ɔ ɖá, “Ɔ ɖǎ hwɛ̀.” Ké ɔ taɓa ma dú hwuɖu, ké ɔ mɛ́ ma.

Wa taɓa Jízɛ̀ ɖí wáún

31Púɛɛ, Júù-nyɔ̀ ɓěɔ̀ diè ma Páɖè dyi, ɓɛ́ wa ké ma nyɔ ɓě ɓɛ́ wa ɖǎ ma kà beè kɛɛ ɓo ɓěɔ̀ jaɖa, ɓɛ́ wa ké ma wa kɔ́ɖɔ́sì ɓěɔ̀ kɔ̃ zà. Wa nyuɛ ma náa, sepóɛɖé ɔ mɔ̀ ma Gèɖèpɔ́ɔ̀ fɔ̀-wèɔ̀ jè naɓaà-tì, ké wa se mɔ́ ɓɛ́ xwɛ́ ɓěɔ̀ ké ma kɔ́ɖɔ́sì ɓěɔ̀ kɔ̃ sè, ɓɛ́ Gèɖèpɔ́ɔ̀ fɔ̀-wèɔ̀ ké ma dyi. Sepóɛɖé Gèɖèpɔ́ɔ̀ fɔ̀-wè ɓɛ́ ɔ nì ma kà dyiɛń nyɛɛ kpa ma ɖɛ mìɔ. 32Ké sójà ɓěɔ̀ mu ma gàa ɓě ɓɛ́ wa kɔ̀ìn ma kà wa kè Jízɛ̀ kɔ́ɖɔ́sì ɓěɔ̀ kɔ̃in nyɛɛ gbo. Ké wa jaɖa ma nyɔ kĩ́ín-kĩ́ínɔ̀ ɓo, ké wa jaɖa ma nyɔ tɔ̀ɔ̀ ɓo ɖekè. 33Kɛɛ ti ɓɛ́ wa dyɛ̀ìn ma Jízɛ̀ kɛɛ, wa dyéɛ ma kà ɔ ɖǎ ma mɛ́ɛ. Ɔ jèɛɛ, wa se ma ɔ ɓo jaɖa. 34Kɛɛ sójà ɓěɔ̀ ɖò taɓa ma Jízɛ̀ ɖí wáún. Ké wàɖà cá kɛɛ, ní kè nyɔmɔɔ sɔ̀ ma ɔ mú. 35Nyɔ dyé ma kà ɖɛ nìà kɛ kpáa kɛɛ cɛ̃ ma ɔ jè. À dyuò kà ɖɛ ɔ cɛ̃ ma kɛɛ mɔ̀ jǎà kɛ. Ké ɔ mɔ̀ùn dyuòɛ̀ dyí kà ɓɛ́ ɔ cɛ̃ jǎà kɛ, ɓɛ́ ɓě mɔ̀ùn ké hwìɖǐǐ-taɓa-taɓa ɓéɖé. 36Ɖɛ nìà kɛ kpá ma, ɓɛ́ ɖɛ ɓɛ́ Gèɖèpɔ́ɔ̀-cèè-ɖɛ̀ɔ̀ cɛ̃à kɛɛ ké jǎà kpá. Ɖɛ ɔ cɛ̃ maa, ɔ kɛ̀. Ɔ ɖá, “Ɔ kpá ɖò se jɛ̀ɖɛ̀ɛ̌ mu dyɛ mɔ̀ùn.” 37Ké Gèɖèpɔ́ɔ̀-cèè-ɖɛ̀ɔ̀ dà ɖò cɛ̃ɛ ɖe, ké ɔ ɖá, “Wa mu nyɔ ɓɛ́ wa taɓa ɖíɛɛ dya gmɔ̀ùn.”

Wa zà Jízɛ̀ dyóɖóún

(Máfíò 27:57-61; Máà 15:42-47; Ɖúù 23:50-56)

38Ti ɖɛa ɖǎ ma dyi ziɛɛ, Jòsé sɔ̀à Áɖémàtíà-hwɔ̀ɖɔ̀ɔ̀ múɛɛ zɔ̀ ma Jízɛ̀ɛ̀ xwɛ́ɔ̀ ɖé Páɖè gbo. Jòsé mɔ̀ ma Jízɛ̀ɛ̀ ɖeín-nà-nyɔ̀ ɓěɔ̀ ɖò, kɛɛ ɔ seɛ ma nyɔ ɖò gbo cɛ̃, sepóɛɖé ɔ fɛ̃̀ìn ma Júù-nyɔ̀ ɓěɔ̀ dyi. Páɖè wɔ̃́ ɓɛ́ ɔ ké ma xwɛ́ɔ̀ kpa. Ɔ jèɛɛ, Jòsé mu ma, ké ɔ kpa ma ɔ. 39Nìkòdímà ɓɛ́ ɔ mu ma kà Jízɛ̀ dyéìn ɓó máaún-kà ɖòɛ kè Jòsé mu ma. Ɔ kpa ma cáná nɔ̀mɔ̀ nyɔ́ún ɓě ɓɛ́ wa mɔ̀ mɛ́ɛ̀ kè ááɖò kɛɛ pṹá hɔ̃dɛ̀ɖɛ̀ ɖò. 40Gàa sɔ̃́ ɓěɔ̀ kpa ma Jízɛ̀ɛ̀ xwɛ́ɔ̀, ké wa poɛ ma cáná nɔ̀mɔ̀ nyɔ́ún ɓěɔ̀ bũ̌in, ké wa bĩìn ma ɔ ɖénì-ɖɔ̀ ɖò dyi. Ɔ mɔ̀ ma Júù-nyɔ̀ ɓěɔ̀ xwɛ́-dyóɖóún-zà-kpèɖè. 41Ɓáá-ɖɛ̀-gbǎ ɖò nì ma ɖé dɛ̀ ɓɛ́ wa kɔ̀ìn ma kà Jízɛ̀ kɔ́ɖɔ́sìɔ̀ kɔ̃in nyɛ. Ké ɖé ɓáá-ɖɛ̀-gbǎɔ̀ múɛɛ, ɓí kɔ̃̀ mú ɓɛ́ wa séè ma xwɛ́ po ɖòɛɛ nì ma ɓó. 42Ɔ mɔ̀ ma Gèɖèpɔ́ɔ̀ fɔ̀-wèɔ̀ jè naɓaà-tìɔ̀, ké xwɛ́-ɓìɔ̀ xwɛ̃́ìn ma ɓó dyi jèɛɛ, wa pɛ̃́ìn ma Jízɛ̀ɛ̀ xwɛ́ɔ̀ ɖé dyi.

Currently Selected:

Jɔ̃́ɔ́ 19: ƁB02

Highlight

Copy