Jɔ̃́ɔ́ 7
7
Jízɛ̀ kè ɔ ɖíí-gàà ɓěɔ̀ jè
1Ti ɖɛ nìà kɛ ɖǎ ma dyi ziɛɛ, Jízɛ̀ té ma ɖé Gáɖàɖíì-ɓòɖòɔ̀ kɔ̃ dyi. Ɔ se mɔ́ ɓɛ́ ɔ ké ma ɖé Júɖìà-ɓòɖòɔ̀ kɔ̃ mu ɖe, sepóɛɖé Júù-nyɔ̀ ɓě nì ma ɖéɛɛ mɔ́ ma ɔ ɖáɓáa dyi. 2Ɔ mɔ̀ ma ti ɓɛ́ Júù-nyɔ̀ ɓěɔ̀ ké ma waà Ɓeè-Dyù-hwɔ̀ɔ̀ pa. 3Ɔ jèɛɛ, Jízɛ̀ɛ̀ ɖíí-gàà ɓěɔ̀ cɛ̃ɛ ma ɔ gbo, ké wa ɖá, “Sɔ̀ dà ɓó dyí, ɓɛ́ m̀ ké ɖé Júɖìà-ɓòɖòɔ̀ kɔ̃ mu, ɓɛ́ nì ɖeín-nà-nyɔ̀ ɓěɔ̀ ké kũ̀à ɓě ɓɛ́ m̀ nìà nyuɛń nyɛɛ dyé. 4Nyɔ ɖò dyi mɔ́ ɓɛ́ nyɔǔn ɓě ké ɔ dyí dyuò ní, nìí, ɔ ní nyùìn ɖɛ ɖò gã gbo. Kà m̀ nìà ɖɛ ɓě nìà kɛ nyuɛń nyɛɛ, m̀ mɛ tɛ̀mɛ̀ìn m̀ mìɔùn ɓóɖó-kpà gànáà dyí.” 5Jízɛ̀ɛ̀ ɖíí-gàà ɓěɔ̀ se ma ɔ hwìɖǐǐ taɓa dyɛ mɔ̀ùn.
6Ké Jízɛ̀ cɛ̃ɛ ma wa gbo, ké ɔ ɖá, “Ɔ séè ní tiɔ̀ ke. Kɛɛ ɔ mɔ̀ ɓě nììn ti kánáá pū. 7Ɓóɖó-kpàà nyɔ ɓěɔ̀ se ɓě mú nyɛ́ɛ ɓɛ́ìn, kɛɛ wa nyɛ́ ḿ mú, sepóɛɖé ḿ cɛ̃ɛ wa gbo tee kà ɓɛ́ ɖɛ ɓě ɓɛ́ wa nyuɛɛ mɔ̀ ɖɛ gbà kɛ. 8Ɓě mɔ̀ùn mɛ mu hwɔɔ̀ kɔ̃. Ḿ se hwɔɔ̀ kɔ̃ muɛń nì, sepóɛɖé ɔ séè ní tiɔ̀ ke cá.” 9Ɔ cɛ̃ ma wa ɖɛa gbo, ké ɔ sè ma ɖé Gáɖàɖíì-ɓòɖòɔ̀ kɔ̃.
Jízɛ̀ mu Ɓeè-Dyù-hwɔ̀ɔ̀ kɔ̃
10Ti ɓɛ́ Jízɛ̀ɛ̀ ɖíí-gàà ɓěɔ̀ ɖǎ ma hwɔɔ̀ kɔ̃ muɛɛ, ɔ mɔ̀ùn mu ma ɖekè. Ɔ se ma mu ɓɛ́ nyɔǔn séín ké ma ɔ dyé, kɛɛ ɔ mu ma vǐè-kà. 11Júù-nyɔ̀ ɓěɔ̀ nì ma ɔ dyi mɔ́uń ɖé hwɔɔ̀ kɔ̃. Wa diè ɖɛi, ké wa ɖá, “Dɛ̌ ɔ nìɛ́?”
12Nyɔ kúɖúú ɓěɔ̀ nì ma sáná pauń ɓá ɔ dyí. Nyɔ ɖíɛ́ ɓě ɖá, “Ɔ kpeɖe nɔ̀mɔ̀ dyíin.” Ké ɖíɛ́ ɓě mɔ̀ùn ɖá, “Gbào, ɔ nì nyɔ ɓěɔ̀ cáuń.” 13Kɛɛ nyɔ ɖò se ma ɔ jè cɛ̃ ɓó nyɔǔn hwìɛ̀, sepóɛɖé wa fɛ̃̀ìn ma Júù-nyɔ̀ ɓěɔ̀ dyi.
14Ti wa ɖǎ ma hwɔɔ̀ pa-pa hwìɛ̀ ɓɛ́ìn nyɛɛ, Jízɛ̀ mu ma ɖé Gèɖèpɔ́ɔ̀ gbǒɔ̀ mú, ké ɔ tɛ̀mɛ̀ìn ma nyɔ ɓěɔ̀ ɖɛ. 15Ké Júù-nyɔ̀ ɓěɔ̀ zi ma dyi giniɛ̌n mìɔ, ké wa ɖá, “Gàa nìà kɛ séè ɖɛ cɛ̃́ ɖò, kɛɛ xwɛ̌ ɔ nyuà kà hwòɖǒ fɔ̀nɔ̀ɔ̀ kɛ́?”
16Ké Jízɛ̀ cɛ̃ɛ ma wa gbo, ké ɔ ɖá, “Ɖɛ ḿ tɛ̀mɛ̀ìn kà nyɔǔn wɛ̃ɛ se ḿ mìɔùn mú sɔ̀ìn, kɛɛ ɔ sɔ̀ìn Gèɖèpɔ́ɔ̀ mɔ̀ nyɔ ɖoɓoà ḿ wɛ̃ɛ mú. 17Nyɔ mɔ̀ nyɔ ɓɛ́ ɔ wɔ̃́ ɓɛ́ ɔ ké ɖɛ Gèɖèpɔ́ɔ̀ mɔ́ɔ nyu kɛɛ muɛ dyí dyuòùn kɛbì ɖɛ ḿ tɛ̀mɛ̀ìn kà nyɔǔn wɛ̃ɛ sɔ̀ìn ɖé Gèɖèpɔ́ɔ̀ gbo, mɔɔ ḿ wùɖù ɖé ḿ mìɔùn nììn kpé múín. 18Nyɔ mɔ̀ nyɔ wùɖùà ɖé ɔ mìɔùn nììn kpé múɛɛ, ɔ nì vɔ̃uń ɓɛ́ nyɔǔn-dyù ké ɔ ɓàìn. Kɛɛ nyɔ ɓɛ́ ɔ vɔ̃ ɓɛ́ nyɔǔn-dyù ké nyɔ ɖoɓoà ɔ kɛɛ ɓàìn nyɛɛ mɔ̀ jǎà-nyɔ̀. Ɖɛ se jǎà kɛɛ ɖò se ɖé ɔ mú nì. 19Má, Mózè nyí ma ɓě gmaɔ̀e? Kɛɛ ɓě dyúáɖò se gmaɔ̀ dyi kpɔ̃ dyɛ mɔ̀ùn. Ɖɛ́ kɔ̃̀ jè ɓě mɔ́à ḿ ɖáɓáa dyiɛ́?”
20Ké nyɔ ɓěɔ̀ zà ma ɖé wuɖu, ké wa ɖá, “Zùù gbà nì m̀ mú. Nyɛ́ nì vɔ̃uń ɓɛ́ ɔ ké m̀ ɖáɓáá?”
21Hwɛ̀ ké Jízɛ̀ zà ma ɖé wuɖu, ké ɔ ɖá, “Ḿ nyu ma kũ̀à vɛ̀nɛ̀ ɖò, ké ɓě séín giniìn ma dyi. 22Mózè ɖá ɓě mɛ ɖáɓá ma ɓěɛ̀ dyú ɓěɔ̀ sàà. Mózè seɛ ma gbɔ dè, kɛɛ ɓě ɓǎ nììn ɓǎ ɓěɔ̀ dèɛ̀ zɔ̃̌ɔ̀ gbɔ. Ké ɓě ɖáɓá nyɔǔn sàà ɓó Gèɖèpɔ́ɔ̀ fɔ̀-wèɔ̀ ɓaɖa. 23Ɔ jǔ ké ɓě dyi gàa-dyù ɖò sàà ɖáɓá ɓó Gèɖèpɔ́ɔ̀ fɔ̀-wèɔ̀ ɓaɖa, ɓɛ́ ɓě ní kɔ̃̀ ɖà Mózèɛ̀ gmaɔ̀ wáɖá jè ní, nìí, ɖɛ́ kɔ̃̀ jè ɓě kpáìn ḿ dyoɖoún, sepóɛɖé ḿ kánáìn gàa ɖò dyi gàná cá ɓó Gèɖèpɔ́ɔ̀ fɔ̀-wèɔ̀ ɓaɖa jè kɛ́? 24Ɓěǐn ɖá ɓɛ́ ɓě ké ɖɛ ɖò wɔ̃ po ɓó kà ɓě nyuɛ dyéɛ kɛ, kɛɛ ɓě mɛ po ɖɛ wɔ̃ dyí-sɛ́ɖɛ́ìn-kà.”
Jízɛ̀ mɔ̀ Kɛ́ɖɛ́ìɔ̀ɔ̀?
25Ɓo tia ɓaɖaa, nyɔ ɓě ɓɛ́ wa nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ ɖíɛ́ ɓě ɖá, “Má, gàa ɓɛ́ wa mɔ́ ɓɛ́ wa kéà ɖáɓáa kɛà kɛ̀e? 26Ké gmɔ̀ ɖéa, ɔ nì nyɔǔn ɓě gbo wùɖùɛ̌n ɖé nyɔǔn séín dyéɖé waí, ké nyɔ ɖò se ɔ ɖɛ ɖò gbo cɛ̃ɛ ɓɛ́ìn. Nyɔ vɛ̀nɛ̀ ɓěɔ̀ ɓɛ́ìn dyí dyuòɛ̀ kà ɓɛ́ ɔ mɔ̀ Kɛ́ɖɛ́ìɔ̀ jǎà kɛɛ̀? 27Kɛɛ ɔ jǔ ké Kɛ́ɖɛ́ìɔ̀ dyi dyiín, nyɔ ɖò se dɛ̀ ɔ sɔ̀ kɛɛ dyí dyuòɛ̌ mu. Kɛɛ à séín dyuò dɛ̀ ɓɛ́ gàa nìà kɛ sɔ̀ìn nyɛ.”
28Ti ɓɛ́ Jízɛ̀ nì ma nyɔ ɓěɔ̀ ɖɛ tɛ̀mɛ̀ǐn ɖé Gèɖèpɔ́ɔ̀ gbǒɔ̀ múɛɛ, ɔ kpa ma wuɖu dyií, ké ɔ ɖá, “Ɓě dyuò ḿ dyí, ké ɓě dyuò dɛ̀ ḿ sɔ̀ìn nyɛ. Kɛɛ ḿ se ma ḿ mìɔùn ɖoɓo. Nyɔ mɔ̀ nyɔ ɖoɓoà ḿ wɛ̃ɛ mɔ̀ jǎà-nyɔ̀. Kɛɛ ɓě se ɔ dyí dyuò. 29Kɛɛ ḿ dyuò ɔ dyí, sepóɛɖé ḿ sɔ̀ìn ɖé ɔ gbo, ké ɔ ɖoɓo ḿ.”
30Púɛɛ, wa mɔ́ ɓɛ́ wa ké ma ɔ kpɔ̃, kɛɛ nyɔ ɖò se ma ɔ sɔ̃ dya po, sepóɛɖé ɔ séè ma ɔ tiɔ̀ ke. 31Kɛɛ nyɔ kúɖúú ɓěɔ̀ pàɖǎ taɓa ma ɔ hwìɖǐǐ. Wa ɖá, “Ti Kɛ́ɖɛ́ìɔ̀ mu dyiìn nyɛɛ, ɔ mu zɛ̃̀ìn-ɖɛ̀ pàɖǎ nyuùn, ɓɛ́ wa ké nyɔ ɓě ɓɛ́ gàa nìà kɛ ɖǎà nyuɛɛ dyí ziì?”
Wa tò nyɔ ɓě ké Jízɛ̀ kpɔ̃ɛ
32Ti ɓɛ́ Fáɖòsíì-nyɔ̀ ɓěɔ̀ wɔ̃́ ma nyɔ kúɖúú ɓěɔ̀ sáná ɓěɔ̀ paa ɓá Jízɛ̀ jè dyíɛɛ, wa kè sáa-zà-nyɔ̀ kpa ɖɛ ɓěɔ̀ tò ma sójà ɓě, ɓɛ́ wa ké ma ɔ kpɔ̃. 33Ké Jízɛ̀ ɖá, “Ní mu dà ɓě gbo nììn ke kpã́ún, nìí, ní mu nyɔ ɓɛ́ ɔ ɖoɓoà ḿ wɛ̃ɛ gbo ɖe muùn. 34Ɓě mu ḿ dyi mɔ́ùn, kɛɛ ɓě se ḿ dyéɛ mu, sepóɛɖé dɛ̀ ní muà nììn nyɛɛ, ɓě se ɖé muɛ ɓɛ́ìn.”
35Ké Júù-nyɔ̀ ɓěɔ̀ cɛ̃ɛ ma wa mìɔùn múin, ké wa ɖá, “Dɛ̌ gàa nìà kɛ kéà mu, ɓɛ́ nyɔ ɖò ké seà ɔ dyé ɖeɛ́? Ɔ mu ɖé Gíɖíì-ɓòɖòɔ̀ kɔ̃ muùn, dɛ̀ ɓɛ́ Júù-nyɔ̀ ɓěɔ̀ cĩ́à kɛ, ɓɛ́ ɔ ké Gíɖíì-nyɔ̀ ɓěɔ̀ ɖɛ tɛ̀mɛ̀ìnǹ? 36Ɔ ɖá, ‘Ɓě mu ḿ dyi mɔ́ùn, kɛɛ ɓě se ḿ dyéɛ mu,’ ɔ kè, ‘Ɓě se dɛ̀ ɓɛ́ ní muà nììn nyɛɛ muɛ ɓɛ́ìn.’ Ɖɛ́ mɔ̀ɔ̀ xwíníín nyɛ́?”
Nyɔ-fɛ̀ɛ̀-nyí-nì ɓě
37Hwɔɔ̀ wé hwɛ̀ìn-gbɔɔ̀ mɔ̀ ma hwɔɔ̀ wé kpa ɖɛɔ̀. Ɓó wéa ɓaɖaa, Jízɛ̀ nyànà ma dyi, ké ɔ páná ma mú, ké ɔ ɖá, “Nyɔ ɓě ɓɛ́ ní-ná-tò nyu kɛɛ, wa mɛ dyi ḿ gbo, ɓɛ́ wa ké ní ná. 38Kà Gèɖèpɔ́ɔ̀-cèè-ɖɛ̀ɔ̀ nyuà cɛ̃ɛ kɛɛ, ɔ kɛà kɛ̀. Ɔ ɖá, ‘Nyɔ ɓě ɓɛ́ wa taɓa ḿ hwìɖǐǐɛɛ, nyɔ-fɛ̀ɛ̀-nyí-nì ɓě mu ɖé wa mú sɔ̀ùn.’ ” 39Jízɛ̀ cɛ̃ ma ɖɛa ɓá Zùù ɓɛ́ nyɔ ɓě taɓaà ɔ hwìɖǐǐ kéà ɓéɖéɛɛ jè dyí. Ɓó tia ɓaɖaa, Gèɖèpɔ́ɔ̀ séè ma Zùùɔ̀ tò ke, sepóɛɖé Jízɛ̀ séè ma dyií mu, ɓɛ́ ɔ ké ma dĩ́ín-dĩ̀ìn ɓéɖé ke.
Nyɔ ɓěɔ̀ ge mú
40Ti ɓɛ́ nyɔ ɓěɔ̀ pàɖǎ wɔ̃́ ma ɔ ɖɛa cɛ̃ɛ kɛɛ, wa ɖá, “Gàa nìà kɛ mɔ̀ kpáá-ɖɛ̀-cɛ̃-nyɔ̀ jǎà.”
41Ké nyɔ ɖíɛ́ ɓě ɖá, “Ɔ mɔ̀ Kɛ́ɖɛ́ìɔ̀.”
Kɛɛ nyɔ ɖíɛ́ ɓě ɖá, “Kɛ́ɖɛ́ìɔ̀ ɓɛ́ìn ɖé Gáɖàɖíì-ɓòɖòɔ̀ kɔ̃ sɔ̀ɔ̀e? 42Gèɖèpɔ́ɔ̀-cèè-ɖɛ̀ɔ̀ ɖá, ‘Kɛ́ɖɛ́ìɔ̀ mu Dèɓéɛ̀ nyúà-dyú ɓěɔ̀ ɖò jǔùn, ké ɔ mu wóɖóùn ɖé Bɛ́fèɖèhɛ̃́ɛ̀-hwɔ̀ɖɔ̀ kɔ̃̀ mú ɓɛ́ Dèɓé cĩ́ zɔ̃̌ɔ̀ kà kɛ.’ ” 43Ɔ jèɛɛ, nyɔ kúɖúú ɓěɔ̀ ge ma mú ɓó ɔ jè. 44Nyɔ ɖíɛ́ ɓě mɔ́ ɓɛ́ wa ké ma ɔ kpɔ̃, kɛɛ nyɔ ɖò se ma ɔ sɔ̃ dya po.
Júù-nyɔ̀ ɓěɔ̀ nyɔ vɛ̀nɛ̀ ɓěɔ̀ se Jízɛ̀ hwìɖǐǐ taɓa
45Ti ɓɛ́ sójà ɓěɔ̀ mu ma ɖé sáa-zà-nyɔ̀ kpa ɖɛ ɓěɔ̀ kè Fáɖòsíì-nyɔ̀ ɓěɔ̀ gboɛɛ, wa diè ma sójà ɓěɔ̀ dyi, ké wa ɖá, “Ɖɛ́ kɔ̃̀ jè ɓě se ɔ dyà kɛ́?”
46Ké sójà ɓěɔ̀ jǔ ma wa gɔ̃̌, ké wa ɖá, “Nyɔ ɖò séè wùɖù ɖò kà gàa nìà kɛ wùɖùà kɛ.”
47Ké Fáɖòsíì-nyɔ̀ ɓěɔ̀ diè ma wa dyi, ké wa ɖá, “Ɔ ɖǎ ɓě mɔ̀ùn cá ɖekèè? 48Nyɔ vɛ̀nɛ̀ ɓěɔ̀ kè Fáɖòsíì-nyɔ̀ ɓěɔ̀ ɖò ɖǎ ɔ hwìɖǐǐ taɓaà? 49Nyɔ kúɖúú ɓě nìà kɛ se Mózèɛ̀ gmaɔ̀ dyí dyuò. Ɔ jèɛɛ, Gèɖèpɔ́ɔ̀ gboò-wùɖù nì wa kɔ̃.”
50Ɓó tia ɓaɖaa, Nìkòdímà mɔ̀ ma Fáɖòsíì-nyɔ̀ ɓě ɓɛ́ wa nì ma kà ɓóɛɛ dyúáɖò. Ɔ mɔ̀ nyɔ mu ma kà Jízɛ̀ dyéìn kĩ́ín nyɛ̀. Ɔ diè ma wa dyi, ké ɔ ɖá, 51“Ɓá à gmaɔ̀ dyíɛɛ, à ɓɛ́ìn gàa ɖò zaa kpɔ̃̀ìn kĩ́ín hwɛ̀ ɓɛ́ à ké ɔ zaaɔ̀ múin gmɔìn, ɓɛ́ à ké ɖɛ ɔ ɖǎà nyuɛɛ dyéè?”
52Ké wa jǔ ma ɔ gɔ̃̌, ké wa ɖá, “Mɔ̀ùn sɔ̀ ɖé Gáɖàɖíì-ɓòɖòɔ̀ kɔ̃ ɖekèè? M̀ mɛ gmɔìn Gèɖèpɔ́ɔ̀-cèè-ɖɛ̀ ɓěɔ̀ múin. Nìí, nì muɛ dyéìn kà ɓɛ́ kpáá-ɖɛ̀-cɛ̃-nyɔ̀ ɖò se ɖé Gáɖàɖíì-ɓòɖòɔ̀ kɔ̃ sɔ̀ɔ̀ ɓɛ́ìn nyɛ.”
Màa ɓɛ́ wa kpɔ̃̀ìn gmaɖe poɛ kɛ
[ 53Púɛɛ, nyɔǔn séín mu ma wa ɓíɖí ɖe.
Currently Selected:
Jɔ̃́ɔ́ 7: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
