Jɔ̃́ɔ́ 8
8
1Kɛɛ Jízɛ̀ mu ma ɖé Ɔ́ɖè-tòɖòɔ̀ dya. 2Wéɔ̀ nyɔ kɔ ma ɓó dyíɛɛ, gànà-kṹún-kà kɛɛ, ɔ mu ma ɖé Gèɖèpɔ́ɔ̀ gbǒɔ̀ mú ɖe. Nyɔ kúɖúú ɓě mu ma ɔ gbo, ké ɔ kò ma dyi, ké ɔ tɛ̀mɛ̀ìn ma wa ɖɛ. 3Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ kpa ma màa ɖò ɓɛ́ wa kpɔ̃̀ìn ma gmaɖe poɛ kɛɛ ɔ gbo, ké wa nyànàìn ma ɔ ɓó nyɔ ɓěɔ̀ hwìɛ̀ dyi. 4Ké wa cɛ̃ɛ ma Jízɛ̀ gbo, ké wa ɖá, “Nyɔ-ɖɛ-tɛ̀mɛ̀ìn-nyɔ̀, à kpɔ̃̀ìn màa nìà kɛ gmaɖe poɛ. 5Ɖé à gma-cèè-ɖɛ̀ɔ̀ múɛɛ, Mózè cɛ̃ɛ à gbo kà ɓɛ́ à mɛ taɓaìn nyɔ nyu ɖɛ nì kà kɛɛ sɔ́ɔ́-kpò dyi, ɓɛ́ ɔ ké mɛ́ɛ. Xwɛ̌ mɔ̀ùn ɖá kɛ́?” 6Wa cɛ̃ ma ɖɛ nìà kɛ, ɓɛ́ wa ké ma ɔ mú dɔ̃̌, ɓɛ́ wa ké ma ɖɛ wa ké ma ɔ kɔ̃ún cɛ̃ɛ ɓéɖé. Jízɛ̀ kíɖí ma, ké ɔ ɖú ma ɔ jìì-dyùà ɓó ɓíɖíi céèìn kpàǐ.
7Ké wa nì ma ɔ dyi dièɛ̌n kánáá pū, ké Jízɛ̀ sɔ̀ ma dyí, ké ɔ cɛ̃ɛ ma wa gbo, ké ɔ ɖá, “Ɓěɛ̀ nyɔ séè nàmàǔn nyu ɖòɛɛ, ɔ mɛ mɔ̀ nyɔ kĩ́ín-kĩ́ín ké ɔ sɔ́ɔ́-kpò taɓa kɛ.” 8Ké ɔ kíɖí ma ɖe, ké ɔ ɖú ma céè kpàǐ ɖe. 9Ti wa wɔ̃́ ɖɛ ɔ cɛ̃ ma kà wa gboɛɛ, wa séín sɔ̀ ma ɓó dyí ɖò-ɖò. Nyɔ vɛ̀nɛ̀-vɛ̀nɛ̀ ɓěɔ̀ mu ma kĩ́ín. Jízɛ̀ ɖòùn sè ma ɓó, ké màaɔ̀ nyànà ma ɓó dyi ke. 10Jízɛ̀ ɖú ma dú dyií, ké ɔ diè ma màaɔ̀ dyi, ké ɔ ɖá, “Noò, dɛ̌ nyɔ ɓěɔ̀ nìɛ́? Nyɔ ɖò se dà sè, ɓɛ́ ɔ ké m̀ zaa kpɔ̃̀ìn ɖeè?”
11Ké màaɔ̀ ɖá, “Ɓɔ̌ɔ̀, nyɔ ɖò se dà sèo.”
Ké Jízɛ̀ ɖá, “Mɔ́ún se m̀ zaa kpɔ̃̀ìn. Mu m̀ ɖɛ. Kɛɛ mɔ̀ǔn ɖá ɓɛ́ m̀ ké nàmàǔn nyu ɖeo.”]
Jízɛ̀ mɔ̀ ɓóɖó-kpàà ce
12Sɔ̀ìn ɓóɛ gboɛɛ, Jízɛ̀ wùɖù ma Fáɖòsíì-nyɔ̀ ɓěɔ̀ gbo ɖe, ké ɔ ɖá, “Mɔ̄ mɔ̀ ɓóɖó-kpàà ce. Nyɔ mɔ̀ nyɔ ɓɛ́ ḿ kèɔ̀ kè naìn múɛɛ, ɔ mu fɛ̀ɛ̀-cè ɓéɖéìn, ké ɔ se tíe-kpòǔn nàǎ mu.”
13Ké Fáɖòsíì-nyɔ̀ ɓěɔ̀ cɛ̃ɛ ma ɔ gbo, ké wa ɖá, “M̀ nì m̀ mìɔùn nììn zàse nyuɛń. Nyɔ ɖò se ɖɛ m̀ nìà cɛ̃iń nyɛɛ dyi kpɔ̃ɔ ɓɛ́ìn.”
14Ké Jízɛ̀ cɛ̃ɛ ma wa gbo, ké ɔ ɖá, “Ḿ nì ḿ mìɔùn nììn zàse nyuɛń dyɛo, kɛɛ ɖɛ ḿ cɛ̃à kɛɛ mɔ̀ jǎà, sepóɛɖé ḿ dyuò dɛ̀ ḿ sɔ̀ kɛ, ké ḿ dyuò dɛ̀ ḿ nì muɛń nyɛ. Ɓě mɔ̀ùn se dɛ̀ ḿ sɔ̀à kɛ kè dɛ̀ ḿ nìà muɛń nyɛɛ dyuò. 15Ɓě po ɖɛ wɔ̃ kà nyɔǔn-dyù poà ɖɛ wɔ̃ɛ. Mɔ́ún po nyɔ ɖòɛ̀ zaa wɔ̃. 16Kɛɛ ḿ dyiɔ́ nyɔ ɖòɛ̀ zaa wɔ̃ po ní, nìí, ní ɖɛ-wɔ̃-po-poɔ̀ muɔ́ jǎà jǔùn, sepóɛɖé ḿ ɖòǔn se ɖɛɔ̀ wɔ̃ poɛń nì. Ɓǎ mɔ̀ nyɔ ɖoɓoà ḿ wɛ̃ɛ nì ɓó ḿ gbo ɖekè. 17Ɔ céè ɖé ɓěɛ̀ gma-cèè-ɖɛ̀ɔ̀ mú kà ɓɛ́ ɔ jǔ ké nyɔ sɔ̃́ dyi ɖɛ ɖòɛ̀ zàse nyuín, nìí, ɖɛ wa cɛ̃à kɛɛ mɔ̀ jǎà kɛ. 18Ḿ nyu ḿ mìɔùn nììn zàse, ké Ɓǎ mɔ̀ nyɔ ɖoɓoà ḿ wɛ̃ɛ nyu ní zàse ɖekè.”
19Ɔ jèɛɛ, wa diè ma ɔ dyi, ké wa ɖá, “Dɛ̌ nì Ɓǎɔ̀ nìɛ́?”
Ké Jízɛ̀ zà ma ɖé wuɖu, ké ɔ ɖá, “Ɓě se ḿ dyí dyuò, ké ɓě se ní Ɓǎɔ̀ dyí dyuò. Ɓě dyiɔ́ má ḿ dyí dyuò ní, nìí, ɓě muɔ́ má ní Ɓǎɔ̀ dyí dyuòùn ɖekè.”
20Jízɛ̀ cɛ̃ ma ɖɛ séín ɓě nìà kɛ, ti ɓɛ́ ɔ nì ma nyɔ ɓěɔ̀ ɖɛ tɛ̀mɛ̀ǐn ɖé Gèɖèpɔ́ɔ̀ gbǒɔ̀ mú, ɖé dɛ̀ ɓɛ́ nyɔ ɓěɔ̀ po ma wíɖí kɛ. Ké nyɔ ɖò se ma ɔ kpɔ̃, sepóɛɖé ɔ séè ma ɔ tiɔ̀ ke.
Ɓě se ɖé dɛ̀ ḿ nìà muɛń nyɛɛ muɛ ɓɛ́ìn
21Sɔ̀ìn ɓóɛ gboɛɛ, Jízɛ̀ cɛ̃ɛ ma Júù-nyɔ̀ ɓěɔ̀ gbo ɖe, ké ɔ ɖá, “Ní mu muùn, ké ɓě mu ḿ dyi mɔ́ùn, kɛɛ ɓě mu ɓěɛ̀ nàmàǔn ɓěɔ̀ mú mɛ́ìn. Ɓě se dɛ̀ ḿ nìà muɛń nyɛɛ muɛ ɓɛ́ìn.”
22Púɛɛ, Júù-nyɔ̀ ɓěɔ̀ ɖá, “Ɔ ɖá, ‘Ɓě se dɛ̀ ḿ nìà muɛń nyɛɛ muɛ ɓɛ́ìn.’ Ɔ xwíníín mɔ̀, ɔ mu ɔ mìɔùn ɖáɓáùne?”
23Ké Jízɛ̀ cɛ̃ɛ ma wa gbo, ké ɔ ɖá, “Ɓě sɔ̀ nɔ̄ ɓíɖíi, kɛɛ ḿ sɔ̀ ɖé dyií. Ɓě mɔ̀ ɓóɖó-kpàà nyɔ ɓě, kɛɛ mɔ́ún se ɓóɖó-kpàà nyɔ. 24Ɖɛ kɔ̃̀ jè ḿ cɛ̃à kà ɓě muà ɓěɛ̀ nàmàǔn ɓěɔ̀ mú mɛ́ìn nyɛɛ nìàǒ wɛ̀. Ɓě seɛ jǎà po kà ɓɛ́ ḿ mɔ̀ nyɔ ḿ jǔà kɛɛ ní, nìí, ɓě mu ɓěɛ̀ nàmàǔn ɓěɔ̀ mú mɛ́ìn.”
25Ké wa diè ma ɔ dyi, ké wa ɖá, “Nyɛ́ m̀ jǔɛ́?”
Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Ɔ mɔ̀ ɖɛ ḿ cɛ̃ ma ɓě gbo sɔ̀ìn ɖé ɖɛ dè gbɔɔ̀ múɛ. 26Ḿ ɓéɖé ɖɛ pàɖǎ ɓɛ́ ḿ kéɛ cɛ̃, ɔ kè ɓɛ́ ḿ kéɛ wɔ̃ po ɓá ɓě dyí. Kɛɛ nyɔ mɔ̀ nyɔ ɖoɓoà ḿ wɛ̃ɛ mɔ̀ jǎà-nyɔ̀, ké ɖɛ ḿ wɔ̃́ ɔ wĩín nyɛɛ, ɖéɛ̀ ḿ cɛ̃ nyɔ ɓě nì ɓóɖó-kpàà kɔ̃ɛɛ gbo.”
27Kɛɛ wa seɛ ma múin wɔ̃́ kà ɓɛ́ ɔ nì ma Ɓǎɔ̀ jè wa gbo cɛ̃iń nyɛ. 28Ɔ jèɛɛ, Jízɛ̀ cɛ̃ɛ ma wa gbo, ké ɔ ɖá, “Ti ɓě mu mɔ̄ Nyɔǔn-dyùɛ̀ Dyú-gààɔ̀ dyií ɖúùn wɛ̃ɛ, ɓě mu nyɔ ḿ jǔɛɛ dyí dyuòùn. Ɓě muɛ dyí dyuòùn kà ḿ ɖòǔn ní nyu ɖɛ ɖòɛ, ké ɓě muɛ dyí dyuòùn kà ḿ cɛ̃ ɖɛ ɓě ɓɛ́ Ɓǎɔ̀ ɖǎ ma ḿ tɛ̀mɛ̀ìn nyɛɛ ɖòùn wɛ̃. 29Ké nyɔ mɔ̀ nyɔ ɖoɓoà ḿ wɛ̃ɛ nì ɓó ḿ gbo. Ɔ se ḿ gbo sɔ̀, sepóɛɖé ḿ nyu ɖɛ dè ɔ hwìɖǐiɛɛ tee.”
30Ké nyɔ pàɖǎ ɓě ɓɛ́ wa wɔ̃́ ma Jízɛ̀ ɖɛa cɛ̃ɛ kɛɛ taɓa ma ɔ hwìɖǐǐ.
Gǐì kè buɛ̀-nyɔ̀
31Púɛɛ, Jízɛ̀ cɛ̃ɛ ma Júù-nyɔ̀ ɓě ɓɛ́ wa taɓa ma kà ɔ hwìɖǐǐɛɛ gbo, ké ɔ ɖá, “Ɓě dyi ní wuɖu ɓěɔ̀ nyuín, nìí, ɓě mɔ̀ ní ɖeín-nà-nyɔ̀ ɓě jɛ́ɛ́. 32Ké ɓě mu jǎà dyí dyuòùn, ké jǎàɔ̀ mu ɓě buɛ̀ìn.”
33Ké wa zà ma ɖé wuɖu, ké wa ɖá, “À mɔ̀ Ééɓòɖòhɛ̃́ɛ̀ nyúà-dyú ɓě. À séè nyɔ ɖòɛ̀ gǐì jǔ ɖò. Xwɛ̌ m̀ nyuà cɛ̃ɛ, ké m̀ dyi níiń, à mu buɛ̀ìn nyɛ́?”
34Ké Jízɛ̀ cɛ̃ɛ ma wa gbo, ké ɔ ɖá, “Ḿ cɛ̃ ɓě jǎà gbo, nyɔǔn séín ɓɛ́ wa nyu nàmàǔn wɛ̃ɛ, wa mɔ̀ nàmàǔn gǐì. 35Gǐì ní sè nyɔ kɔ̃̀ gǐì ɔ jǔà kɛɛ ɓíɖí-gbǒ xwíníín kánáá pū, kɛɛ gàaɛ̀ dyú-gàà mɔ̀ ɔ ɓǎà ɓíɖí-gbǒ-xwíníín-nyɔ̀ kánáá pū. 36Ɔ jǔ ké Dyú-gààɔ̀ dyi ɓě buɛ̀ ní, nìí, ɓě mu buɛ̀ìn jɛ́ɛ́. 37Ḿ dyuò kà ɓě mɔ̀ Ééɓòɖòhɛ̃́ɛ̀ nyúà-dyú ɓě kɛ. Kɛɛ ɓě mɔ́ ḿ ɖáɓáa dyi, sepóɛɖé ní wuɖuɔ̀ se pá ɓéɖé ɖé ɓě mú. 38Ḿ cɛ̃ ɖɛ ḿ Ɓǎ ɖǎ ma ḿ dyí tɛ̀mɛ̀ìn nyɛɛ jè ɓě gbo, kɛɛ ɓě mɔ̀ùn nyu ɖɛ ɓɛ́ ɓě ɓǎ cɛ̃ ɓě gboɛ.”
39Ké wa zà ma ɖé wuɖu, ké wa ɖá, “Ééɓòɖòhɛ̃́ɛ̀ mɔ̀ à ɓǎ.”
Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Ɓě dyiɔ́ Ééɓòɖòhɛ̃́ɛ̀ dyú ɓě jǔǐn, nìí, ɓě muɔ́ kũ̀à ɓě ɓɛ́ ɔ nyuà kɛɛ nyuùn. 40Ɖɛ ɓɛ́ ḿ ɖǎà nyu kɛɛ, ɔ mɔ̀, ɓɛ́ ḿ ké ɖɛ ɓě mɔ̀ jǎà, ké Gèɖèpɔ́ɔ̀ cɛ̃ ma ḿ gboɛɛ ɓě gbo cɛ̃. Kɛɛ ɓě mɔ́ ḿ ɖáɓáa dyi. Ééɓòɖòhɛ̃́ɛ̀ se ma ɖɛ nì kà ɓěa nyu. 41Ɓě nì ɖɛ ɓɛ́ ɓě ɓǎ nyu ma kɛɛ nyuɛń.”
Ké wa cɛ̃ɛ ma ɔ gbo, ké wa ɖá, “À se gbàɖàùn-màà dyú ɓě. À ɓéɖé Ɓǎ dyúáɖò, ké ɔ mɔ̀ Gèɖèpɔ́ɔ̀ ɖòùn.”
42Ké Jízɛ̀ cɛ̃ɛ ma wa gbo, ké ɔ ɖá, “Gèɖèpɔ́ɔ̀ dyiɔ́ ɓě ɓǎ jǔ jɛ́ɛ́ ní, nìí, ɓě muɔ́ má ḿ mú ɖɛ̀ɓɛ̀ìn, sepóɛɖé ḿ sɔ̀ ma ɖé Gèɖèpɔ́ɔ̀ gbo, ké ḿ nìà nɔ̄ kàǔn wɛ̃̀. Ḿ se ma ḿ mìɔùn nììn kpé mú dyììn, kɛɛ ɔ ɖoɓo ma ḿ. 43Ɖɛ́ kɔ̃̀ jè ɓě ní wɔ̃́à ɖɛ ḿ cɛ̃à kɛɛ múin nyɛ́? Ɔ mɔ̀, ɓě se ní wuɖuɔ̀ ɖùǔ gbo tòɛ̀ mɔ́ fɔɔ jè. 44Ɓě mɔ̀ ɓě ɓǎ mɔ̀à Nɔɔ́-nàmàǔn wɛ̃ɛ dyú ɓě, ké ɓě mɔ́ ɓɛ́ ɓě ké ɖɛ kɔ̃̀ tó nyu ɓě ɓǎɔ̀ kɛɛ nyu. Ɔ mɔ̀ kú-ɖáɓá-nyɔ̀ sɔ̀ìn ɖé ɖɛ dè gbɔɔ̀ mú. Ɔ peɖe jǎàɔ̀ dyi, sepóɛɖé ɖɛ mɔ̀ jǎà kɛɛ ɖò se ɔ mú nì. Ɔ dyi se tɔ́mɔ́ ní, nìí, ɔ nyuɛ náa, sepóɛɖé kǎà ɔ nyu nìɛ̀. Ɔ mɔ̀ se-tɔ́mɔ́-nyɔ̀, ké ɔ mɔ̀ seɛ̀ ɓǎ. 45Ḿ cɛ̃ ɓě jǎà gbo jèɛɛ, ɓě se ní wuɖuɔ̀ jǎà po. 46Ɓěɛ̀ nyɛ́ ɓɛ́ìn ḿ nàmàǔn nyu jè kpɔ̃ɔ kɛ́? Ɔ jǔ ké ḿ dyi jǎàɔ̀ cɛ̃ín, nìí, ɖɛ́ kɔ̃̀ jè ɓě se ní wuɖuɔ̀ jǎà poɛ́? 47Nyɔ mɔ̀ nyɔ ɓɛ́ ɔ sɔ̀ ɖé Gèɖèpɔ́ɔ̀ gboɛɛ, ɔ tò Gèɖèpɔ́ɔ̀ wuɖu ɓěɔ̀ gbo ɖùǔ. Kɛɛ ɓě mɔ̀ùn se ɖé Gèɖèpɔ́ɔ̀ gbo sɔ̀ìn. Ɖɛa kɔ̃̀ jè, ɓě seà ɖùǔ tòɛ̀ mɔ́ɛ̀.”
Jízɛ̀ kè Ééɓòɖòhɛ̃́ɛ̀ jè
48Ké Júù-nyɔ̀ ɓěɔ̀ diè ma Jízɛ̀ dyi, ké wa ɖá, “Ti ɓɛ́ à cɛ̃ɛ ma kà, ké à dyi ma kà níiń, m̀ mɔ̀ Sɛ̀mɛ́ɖìà-nyɔ̀, ké zùù gbà nì m̀ múɛɛ, à se ma jǎà cɛ̃ɛ̀?”
49Ké Jízɛ̀ jǔ ma wa gɔ̃̌, ké ɔ ɖá, “Zùù gbà ɖò se ḿ mú nì. Ḿ dyé ḿ Ɓǎ kpéín, kɛɛ ɓě se mɔ́ún kpéín dyé. 50Ḿ se ɓàìn-ɓàìn dyi mɔ́uń nì. Kɛɛ nyɔ ɖò nìɛ̀ dyi mɔ́uń, ké ɔ mɔ̀ ɖɛ-wɔ̃-po-nyɔ̀ɔ̀. 51Ḿ cɛ̃ ɓě jǎà gbo, nyɔ ɖò dyi ní wuɖuɔ̀ nyuín, nìí, ɔ se mɛ́ɛ mu fɔɔ.”
52Hwɛ̀ ké Júù-nyɔ̀ ɓěɔ̀ cɛ̃ɛ ma ɔ gbo, ké wa ɖá, “À ɖǎa dyí dyuò kàǔn kà ɓɛ́ zùù gbà nì m̀ múɛ. Ééɓòɖòhɛ̃́ɛ̀ mɛ́ ma, ké kpáá-ɖɛ̀-cɛ̃-nyɔ̀ ɓěɔ̀ mɛ́ ma. Kɛɛ mɔ̀ùn ɖá, nyɔ ɖò dyi nì wuɖu nyuín, nìí, ɔ se mɛ́ɛ mu fɔɔ. 53À ɓǎ Ééɓòɖòhɛ̃́ɛ̀ mɛ́ ma ní. M̀ kpa ɖɛ ké m̀ zi ɔ dyíì? Ké kpáá-ɖɛ̀-cɛ̃-nyɔ̀ ɓěɔ̀ mɛ́ ma ɖekè. Nì hwòɖǒ ɖá nyɛ́ m̀ jǔ kɛ́?”
54Ké Jízɛ̀ zà ma ɖé wuɖu, ké ɔ ɖá, “Ḿ dyiɔ́ má ḿ mìɔùn ɓàìn ní, nìí, ní ɓàìn-ɓàìnɔ̀ seɔ́ ɖɛ kpaá mu. Nyɔ mɔ̀ nyɔ ɓàìn ḿ wɛ̃ɛ, ɔ mɔ̀ ḿ Ɓǎ. Ɔ mɔ̀ nyɔ ɓɛ́ ɓě ɖá ɔ mɔ̀à ɓěɛ̀ Gèɖèpɔ́ɔ̀ kɛ. 55Ɓě se ɔ dyí dyuò, kɛɛ ḿ dyuò ɔ dyí. Ḿ dyiɔ́ máa cɛ̃, ké ḿ dyiɔ́ níiń, ḿ se ɔ dyí dyuò ní, nìí, ḿ muɔ́ se-tɔ́mɔ́-nyɔ̀ jǔùn kà ɓě mɔ̀ùn nìà kɛ. Kɛɛ ḿ dyuò ɔ dyí, ké ḿ nyu ɔ wuɖu. 56Ɓě ɓǎ Ééɓòɖòhɛ̃́ɛ̀ kpá ma múàǔn, sepóɛɖé ɔ mu ma ní wéɔ̀ jè dyuòùn. Ɔ dyéɛ ma ní, ké ɔ kpá ma múàǔn.”
57Ké Júù-nyɔ̀ ɓěɔ̀ cɛ̃ɛ ma ɔ gbo, ké wa ɖá, “M̀ séè zɔ̃ kpáɖá-nyɔ sɔ̃́ ɓaɖa-bùè nyu ke dyɛ mɔ̀ùn, ké m̀ ɖǎ Ééɓòɖòhɛ̃́ɛ̀ dyéè?”
58Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Ḿ cɛ̃ ɓě jǎà gbo, hwɛ̀ ɓɛ́ Ééɓòɖòhɛ̃́ɛ̀ ké ma nìɛɛ, ḿ nì ma.”
59Ké wa ɖú ma sɔ́ɔ́-kpò dyí, ɓɛ́ wa kéɛ ma ɔ dyi taɓaìn. Kɛɛ Jízɛ̀ vǐè ma ɔ mìɔùn, ké ɔ sɔ̀ ma ɖé Gèɖèpɔ́ɔ̀ gbǒɔ̀ mú.
Currently Selected:
Jɔ̃́ɔ́ 8: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
