Jɔ̃́ɔ́ 9

Jízɛ̀ kánáìn dyéɖéín-dyi-kpè-gàà ɖò dyi

1Ti ɓɛ́ Jízɛ̀ nì ma muɛń nyɛɛ, ɔ dyé ma gàa ɖò ɓɛ́ ɔ kpè ma dyéɖéín dyi ké ɔ wóɖó maa. 2Ké Jízɛ̀ɛ̀ ɖeín-nà-nyɔ̀ ɓěɔ̀ diè ma ɔ dyi, ké wa ɖá, “Nyɔ-ɖɛ-tɛ̀mɛ̀ìn-nyɔ̀, nyɛ́ nyu nàmàǔn kɔ̃̀ jè gàa nìà kɛ kpèà dyéɖéín dyi ké ɔ wóɖóà kɛ́? Ɔ mìɔùn nyu nàmàǔn, mɔɔ ɔ mɔ̀ ɔ wóɖóìn-nyɔ̀ ɓěè?”

3Ké Jízɛ̀ jǔ ma wa gɔ̃̌, ké ɔ ɖá, “Ɔ se ɖɛ ɓɛ́ gàa nìà kɛ mɔɔ ɔ wóɖóìn-nyɔ̀ ɓě ké nàmàǔn nyu jèɛ. Kɛɛ ɔ nì ná, ɓɛ́ nyɔǔn ké Gèɖèpɔ́ɔ̀ kpéɔ̀ kũ̀à nyuɛ dyé ɖé ɔ mú. 4Kà ɓɛ́ zɔ̃ zɔ̃à keɛɛ, à ɓéɖé ɓɛ́ à ké nyɔ mɔ̀ nyɔ ɖoɓoà ḿ wɛ̃ɛ kũ̀à ɓě nyu tee. Tíe mu kpɔ̃ùn, ké nyɔ ɖò se kũ̀à nyuɛ ɓɛ́ǐn mu. 5Kà ɓɛ́ ḿ nìà ɓóɖó-kpàà kɔ̃ɛɛ, ḿ mɔ̀ ɓóɖó-kpàà nyɔ ɓěɔ̀ ce.”

6Ti ɓɛ́ Jízɛ̀ ɖǎ ma ɖɛa cɛ̃ɛ hwɔɛɛ, ɔ po ma tɔ̃ɔ ɓíɖíi, ké ɔ nyu ma pɔ̃, ké ɔ tìnììn ma pɔ̃ɔ̀ gàaɔ̀ dyéɖéɔ̀ kɔ̃in. 7Ké ɔ cɛ̃ɛ ma ɔ gbo, ké ɔ ɖá, “Mu, ɓɛ́ m̀ ké dyúa dyi dèɖè ɖé dòùnɓìǎ mɔ̀à Sàɖóà kɛɛ mú.” (Sàɖóà-nyɛ̀nɛ̀ɔ̀ xwíníín mɔ̀ “Ɖoɓoɛ.”) Ɔ jèɛɛ, gàaɔ̀ mu ma, ké ɔ dèɖè ma dyúa dyi, ké ɔ dyé ma dyi, ké ɔ kɔ́ìn ma ɖe.

8Ké ɔ mǔè ɓěɔ̀ kè nyɔ ɓě ɓɛ́ wa ɖǎ ma ɔ ɖɛ zɔ̀ɔ̀ dyé kĩ́ín nyɛɛ diè ma ɖɛi, ké wa ɖá, “Gàa ɖɛ̀ɓɛ̀ ɓɛ́ ɔ ké ma kà dyi kò, ɓɛ́ ɔ ké ma kà ɖɛ zɔ̀ɛɛ seà nì kɛɛ̀?”

9Ké nyɔ ɖíɛ́ ɓě ɖá, “Ɔ mɔ̀ ɔ mɔ̀.”

Ké wa ɖíɛ́ ɓě ɖá, “Gbào, ɔ se ɔ mɔ̀, kɛɛ ɔ kèɔ̀ kè hwɔìn ní.”

Kɛɛ gàaɔ̀ mìɔùn cɛ̃ɛ ma, ké ɔ ɖá, “Ḿ mɔ̀ ɔ mɔ̀.”

10Ké wa diè ma ɔ dyi, ké wa ɖá, “Xwɛ̌ nì dyéɖé ɓěɔ̀ nyu ma kaà kɛ́?”

11Ké ɔ zà ma ɖé wuɖu, ké ɔ ɖá, “Gàa kɔ̃̀ nyɛ́nɛ́ mɔ̀à Jízɛ̀ kɛɛ nyu pɔ̃, ké ɔ tìnìɛ̀n ní dyéɖé ɓěɔ̀ kɔ̃in, ké ɔ cɛ̃ɛ ḿ gbo, ké ɔ ɖá, ‘Mu ɖé Sàɖóà Dòùnɓìǎɔ̀ kɔ̃, ɓɛ́ m̀ ké dyúa dyi dèɖè.’ Ɔ jèɛɛ, ḿ mu, ké ḿ dèɖè dyúa dyi, ké ḿ dyéà dyiɛ̀.”

12Ké wa diè ma ɔ dyi ɖe, ké wa ɖá, “Dɛ̌ ɔ nìɛ́?”

Ké ɔ ɖá, “Ḿ se dyuò.”

Fáɖòsíì-nyɔ̀ ɓěɔ̀ diè ɖɛi ɓá gàaɔ̀ dyi káná jè dyí

13Sɔ̀ìn ɓóɛ gboɛɛ, wa kpa ma gàa ɓɛ́ ɔ kpè ma kà dyéɖéín dyiɛɛ Fáɖòsíì-nyɔ̀ ɓěɔ̀ gbo. 14Ti ɓɛ́ Jízɛ̀ nyu ma kà pɔ̃ɔ̀, ké ɔ kaà ma kà gàaɔ̀ dyéɖéɔ̀ kɛɛ mɔ̀ ma Gèɖèpɔ́ɔ̀ fɔ̀-wèɔ̀ ɓaɖa. 15Ɔ jèɛɛ, Fáɖòsíì-nyɔ̀ ɓěɔ̀ diè ma gàaɔ̀ dyi ɖe ɓó ɔ dyi káná jèɔ̀.

Ké ɔ cɛ̃ɛ ma wa gbo, ké ɔ ɖá, “Ɔ po pɔ̃ ní dyéɖéɔ̀ kɔ̃, ké ḿ dèɖè dyúa dyi, ké ḿ dyéà dyiɛ̀.”

16Ké Fáɖòsíì-nyɔ̀ ɓěɔ̀ ɖíɛ́ ɓě ɖá, “Gàa nìà kɛ se Gèɖèpɔ́ɔ̀ gbo sɔ̀ìn, sepóɛɖé ɔ se Gèɖèpɔ́ɔ̀ fɔ̀-wèɔ̀ dyi kpɔ̃.”

Kɛɛ wa ɖíɛ́ ɓě ɖá, “Xwɛ̌ gàa ɓɛ́ ɔ mɔ̀ nàmàǔn-nyɔ̀ kɛɛ ɓɛ́ìn zɛ̃̀ìn-ɖɛ̀ ɓě nì kà ɓěa kɛɛ nyuɛ kɛ́?” Ké nyɔ ɓěɔ̀ ge ma mú.

17Ɔ jèɛɛ, Fáɖòsíì-nyɔ̀ ɓěɔ̀ diè ma gàaɔ̀ dyi ɖe, ké wa ɖá, “M̀ ɖá ɔ kaà nì dyéɖéɔ̀. Xwɛ̌ m̀ ɖá ɓó ɔ jèɛ́?”

Ké gàaɔ̀ ɖá, “Ɔ mɔ̀ kpáá-ɖɛ̀-cɛ̃-nyɔ̀ ɖò.”

18Kɛɛ Júù-nyɔ̀ ɓěɔ̀ seɛ ma jǎà poɛ ɓɛ́ìn kà ɓɛ́ ɔ kpè ma dyéɖéín dyi kĩ́ín, ké ɔ nìǎ dyi dyéɛń kàǔn wɛ̃, wa ɓéɖé ɓɛ́ wa ké ma ɔ wóɖóìn-nyɔ̀ ɓě ɖá hwɛ̀. 19Wa diè ma wa dyi, ké wa ɖá, “Ɓěɛ̀ dyú-gàà kɛà kɛ̀ɛ̀? Ɓě ɖá ɔ kpè ma dyéɖéín dyi ké ɔ wóɖó maà? Nìí, xwɛ̌ ɔ nyuà dyi dyéɛ kàǔn wɛ̃́?”

20Ké ɔ nyɔ ɓěɔ̀ zà ma ɖé wuɖu, ké wa ɖá, “À dyuò kà ɔ mɔ̀ à dyú-gààɔ̀ kɛ. Ké à dyuò kà ɔ kpè ma dyéɖéín dyi ké ɔ wóɖó ma kɛ. 21Kɛɛ à se dyuò kà ɓɛ́ ɔ kéà nyu ɓɛ́ ɔ kéà dyi dyé ɓó kàǔn wɛ̃. Ké à se nyɔ kéà ɔ dyéɖéɔ̀ kaà kɛɛ dyí dyuò. Ɓě diè ɔ dyi. Ɔ ɖǎ gàa hwɛ̀. Ɔ ɓɛ́ìn wùɖùɛ̀ ɓó ɔ mìɔùn bìì.” 22Ɔ nyɔ ɓěɔ̀ cɛ̃ɛ ma náa, sepóɛɖé wa fɛ̃̀ìn ma Júù-nyɔ̀ ɓěɔ̀ dyi jè. Ɓó tia ɓaɖaa, Júù-nyɔ̀ ɓěɔ̀ ɖǎ ma wuɖu táí po kà ɓɛ́ nyɔ ɖò dyiɛ ma cɛ̃, ké ɔ dyi níiń, Jízɛ̀ mɔ̀ ma Kɛ́ɖɛ́ìɔ̀ ní, wa mu ma ɔ ɖé Júù-nyɔ̀ ɓěɔ̀ cɔ́cì-gbòɔ̀ mú dyi kúmúùn wɛ̃. 23Ɖɛa kɔ̃̀ jè ɔ nyɔ ɓěɔ̀ cɛ̃ɛ ma kà, ké wa ɖá, ɔ ɖǎ ma kà gàa hwɛ̀, ké wa mɛ diè ma kà ɔ dyiɛ̀.

24Ɔ jèɛɛ, wa ɖá ma gàa kpè ma kà dyéɖéín dyi ké ɔ wóɖó ma kà kɛɛ ɖe, ké wa cɛ̃ɛ ma ɔ gbo, ké wa ɖá, “Cɛ̃ jǎà ɓó Gèɖèpɔ́ɔ̀ dyúa. À dyuò kà gàa nìà kɛ mɔ̀ nàmàǔn-nyɔ̀ kɛ.”

25Ké gàa kpè dyéɖéín dyiɔ̀ zà ma ɖé wuɖu, ké ɔ ɖá, “Ḿ se dyuò kɛbì ɔ mɔ̀ nàmàǔn-nyɔ̀ ní. Ɖɛ dyúáɖò ḿ dyuò dyíɛɛ, ɔ mɔ̀, ḿ kpè ma dyéɖéín dyi kĩ́ín, kɛɛ ḿ ɓɛ́àìn dyi dyéɛ kàǔn.”

26Ké wa cɛ̃ɛ ma ɔ gbo, ké wa ɖá, “Ɖɛ́ ɔ nyu m̀ bũ̌ɛ́? Xwɛ̌ ɔ nyu nì dyéɖéɔ̀ kaà kɛ́?”

27Hwɛ̀ ké gàaɔ̀ zà ma ɖé wuɖu, ké ɔ ɖá, “Ḿ ɖǎa ma ɓě gbo cɛ̃ kĩ́ín, kɛɛ ɓě se ma ɖùǔ tòɛ̀ mɔ́. Ɖɛ́ kɔ̃̀ jè ɓě mɔ́ ɓɛ́ ɓě kéà wɔ̃́ ɖe ɖieɛ́? Ɓě mɔ́ ɓɛ́ ɓě ké ɔ ɖeín-nà-nyɔ̀ ɓě jǔ ɖekèè?”

28Púɛɛ, wa po ma ɔ wuɖu dyíin, ké wa ɖá, “Mɔ̀ mɔ̀ ɔ ɖeín-nà-nyɔ̀, kɛɛ à mɔ̀ùn mɔ̀ Mózèɛ̀ ɖeín-nà-nyɔ̀ ɓě. 29À dyuò kà Gèɖèpɔ́ɔ̀ wùɖù ma Mózè gboɛ. Kɛɛ ɔ dyi gàa nìà kɛ mɔ̀ùn jè jǔǐn, à se ɔ sɔ̀-naín dyuò.”

30Ké gàaɔ̀ zà ma ɖé wuɖu, ké ɔ ɖá, “Gmɔ̀ ɓóa wà! Ɖɛ nìà kɛ mɔ̀ ɖɛ dĩ́ín-dĩ̀ìn. Ɓě se dɛ̀ ɔ ké sɔ̀ kɛɛ dyuò, kɛɛ ɔ kaà ní dyéɖéɔ̀ ní. 31À dyuò kà Gèɖèpɔ́ɔ̀ ní tò nàmàǔn-nyɔ̀ wuɖu ɖùǔ gboɛ. Nyɔ ɓě kɔ̃̀ wuɖu ɓɛ́ ɔ tò ɖùǔ gboɛɛ mɔ̀ nyɔ ɓě ɓɛ́ wa ɓiè ɔ, ké wa nyu ɖɛ ɓě ɓɛ́ ɔ mɔ́ ɓɛ́ wa ké nyuɛ. 32Sɔ̀ìn ɓóɖó-kpàà gbɔ-dè-dè múɛɛ, nyɔ ɖò séèɛ̀ wɔ̃́ ɖò kà ɓɛ́ nyɔ ɖò ɖǎǒ nyɔ ɓɛ́ ɔ kpè ma dyéɖéín dyi ké ɔ wóɖó ma kɛɛ dyéɖé kaà ɖòɛ. 33Ɔ jǔ ké gàa nìà kɛ seɔ́ má ɖé Gèɖèpɔ́ɔ̀ gbo sɔ̀ìn ní, nìí, ɔ seɔ́ má ɖɛ ɖò nyuɛ ɓɛ́ǐn mu.”

34Ké wa zà ma ɖé wuɖu, ké wa ɖá, “M̀ wóɖóìn ma ɖé nàmàǔn mú gàná, ké m̀ nì vɔ̃uń ɓɛ́ m̀ ké à ɖɛ tɛ̀mɛ̀ìnǹ?” Ké wa kúmú ma ɔ ɖé cɔ́cì-gbòɔ̀ mú dyi.

Nyɔ ɓě kpè dyéɖéín dyi ɖé zùǔn-wàkáɔ̀ kɔ̃ɛ

35Ti ɓɛ́ Jízɛ̀ wɔ̃́ɔ ma kà ɓɛ́ wa ɖǎ ma gàaɔ̀ kúmúɛɛ, ɔ dyé ma ɔ dà ɖò, ké ɔ ɖá, “M̀ po Nyɔǔn-dyùɛ̀ Dyú-gààɔ̀ jè jǎà?”

36Ké gàaɔ̀ zà ma ɖé wuɖu, ké ɔ ɖá, “Ɓɔ̌ɔ̀, cɛ̃ nyɔ ɔ jǔ kɛɛ jè ḿ gbo, ɓɛ́ ḿ ké ɔ jè jǎà po.”

37Ké Jízɛ̀ cɛ̃ɛ ma ɔ gbo, ké ɔ ɖá, “M̀ ɖǎ ɔ dyé, ké ɔ mɔ̀ nyɔ m̀ kèɔ̀ kè nìà wùɖùɛ̌n kàǔn wɛ̃̀.”

38Ké gàaɔ̀ ɖá, “Ɓɔ̌ɔ̀, ḿ poɛ jǎà.” Ké ɔ ɓiè ma Jízɛ̀.

39Púɛɛ, Jízɛ̀ ɖá, “Ḿ dyi ma ɓóɖó-kpàà kɔ̃, ɓɛ́ ḿ ké ɖɛ wɔ̃ po, ɓɛ́ nyɔ ɓě kpèà dyéɖéín dyiɛɛ ké dyi dyé, ɔ kè ɓɛ́ nyɔ ɓě dyéà dyi kɛɛ ké dyéɖéín dyi kpè.”

40Ti ɓɛ́ Fáɖòsíì-nyɔ̀ ɓě nì ma ɓóɛɛ wɔ̃́ ma ɔ ɖɛa cɛ̃ɛ kɛɛ, wa diè ma ɔ dyi, ké wa ɖá, “À mɔ̀ùn kpè dyéɖéín dyi ɖekèè?”

41Ké Jízɛ̀ cɛ̃ɛ ma wa gbo, ké ɔ ɖá, “Ɓě dyiɔ́ dyéɖéín dyi kpèǐn, zaa seɔ́ ɓě kpɔ̃ɔ́ mu. Kɛɛ kà ɓɛ́ ɓě cɛ̃à, ké ɓě ɖá, ɓě ɓɛ́àìn dyi dyéɛ kɛɛ, ɔ xwíníín mɔ̀ zaa kpɔ̃ ɓě ke.”

Currently Selected:

Jɔ̃́ɔ́ 9: ƁB02

Highlight

Copy