Ɖúù 12

Jízɛ̀ po ɔ nyɔ ɓěɔ̀ náún ɓá dyéɖéi-nyu-nyu jè dyí

(Máfíò 10:26-27)

1Ɓó tia ɓaɖaa, nyɔ táázĩ̀ìn kúɖúú ɓě poìn ma dyí. Wa zi ma dyí vòɛ̌n jèɛɛ, wa kpa ma wa mǔè ɓě dyai síɛ̀n. Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo kĩ́ín, ké ɔ ɖá, “Ɓě mɛ ma mú ɓó Fáɖòsíì-nyɔ̀ ɓěɔ̀ bɛɖɛɛ̀-dyáìn-ɖɛ̀ɔ̀ jè. Ɔ xwíníín mɔ̀, ɓě mɛ ma mú ɓó waà dyéɖéi-nyu-nyuɔ̀ jè. 2Ɖɛ séín ɓě ɓɛ́ wa ɓáìn ɖɛ kɔ̃in nyɛɛ, wa mu ɖɛ kɔ̃in sɔ̀ùn, ké vǐè-ɖɛ̀ séín ɓěɔ̀ mu píé wóɖóùn. 3Ɔ jèɛɛ, ɖɛ séín ɓě ɓɛ́ ɓě cɛ̃ ɖé tíe-kpò múɛɛ, wa muɛ wɔ̃́ùn ɓó zɔ̃-zɔ̃-ɓàɖà. Ké ɖɛ séín ɓě ɓɛ́ ɓě pàìn sánáún ɖé nyɔǔn ɖùǔn ɖé gbǒ kã-kã ɓě múɛɛ, wa muɛ zio mú pòìn ɖé gbǒ dúún.

Nyɔ ɓɛ́ nyɔǔn ɓéɖé wa ké dyi fɛ̃̀ìn nyɛ

(Máfíò 10:28-31)

4“Ḿ cɛ̃ɛ ɓě gbo, ḿ ɓǎto ɓě, ɓěǐn ɖá ɓɛ́ ɓě ké nyɔ ɓě ɓɛ́ìn ɓěɛ̀ kpóɖó-dyùàɔ̀ ɖáɓáa, kɛɛ wa seà ɓó ɖɛ ɖò nyuɛ ɓɛ́ìn ɖeɛɛ dyi fɛ̃̀ìn. 5Ní mu nyɔ ɓě ké dyi fɛ̃̀ìn nyɛɛ ɓě da zàìn. Ɓě mɛ fɛ̃̀ìn Gèɖèpɔ́ɔ̀ dyi, sepóɛɖé ɔ mɔ̀ nyɔ ké ɔ ɖǎ nyɔ ɖò ɖáɓáín, ɔ ɓéɖé kpé ɓɛ́ ɔ ké nyɔɔ̀ hɛ́ɛ̀ po ɖekè. Ǹdye, ḿ cɛ̃ɛ ɓě gbo, ɔ mɔ̀ nyɔ ɓě mɛ fɛ̃̀ìn dyi.

6“Má, wa pèɖèìn dyùǐ-dyù hm̀m̌ wíɖí tííwèe? Kɛɛ wa dyúáɖò jè ní sɔ̀ Gèɖèpɔ́ɔ̀ hwìɖǐi. 7Ɔ dyi ɓě mɔ̀ùn jè jǔ ní, Gèɖèpɔ́ɔ̀ ɖǎ mí-wɔ́ɖɔ́ séín nì ɓě dúɛɛ zɛɖɛ nyɛ̀nɛ̀ɛ̀. Ɔ jèɛɛ, ɓěǐn ɖá ɓɛ́ ɓě ké fɛ̃̀ìn. Ɓě kpa ɖɛ mìɔ ké ɓě zi dyùǐ-dyù kúɖúú dyí.

Jízɛ̀ jè mú-wɔ̃́ìn-wɔ̃́ìn kè ɔ ɓɔ́-ɓɔ́

(Máfíò 10:32-33; 12:32; 10:19-20)

8“Ḿ cɛ̃ɛ ɓě gbo, nyɔǔn séín ɓě ɓɛ́ wa wɔ̃́ìn ní jè mú ɖé nyɔǔn ɓě gboɛɛ, mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ mu wa mɔ̀ùn jè mú wɔ̃́ìn ɖekè ɖé Gèɖèpɔ́ɔ̀ ínjà ɓěɔ̀ dyúa. 9Kɛɛ nyɔǔn séín ɓě ɓɛ́ wa doìn ní jè mú ɖé nyɔǔn ɓě gboɛɛ, mɔ́ún mu wa mɔ̀ùn jè mú doìn ɖekè ɖé Gèɖèpɔ́ɔ̀ ínjà ɓěɔ̀ dyúa.

10“Nyɔǔn séín ɓɛ́ wa cɛ̃ wuɖu gbà ɖò mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ kɔ̃ún wɛ̃ɛ, Gèɖèpɔ́ɔ̀ mu wa kɔ̃in zĩ̀ìn. Kɛɛ nyɔ mɔ̀ nyɔ ɓɛ́ ɔ cɛ̃ ɖɛ gbà Zùù Hwɛ̀ǐn-hwɛ̀ǐnɔ̀ kɔ̃ún wɛ̃ɛ, Gèɖèpɔ́ɔ̀ se ɔ kɔ̃in zĩ̀ɛ̌n mu fɔɔ cá.

11“Ɔ jǔ ké wa dyi ɓě ɖé Júù-nyɔ̀ ɓěɔ̀ cɔ́cì-gbò ɓěɔ̀ mú kpa, mɔɔ wa dyi ɓě gɔ̌mànà-nyɔ̀ ɓěɔ̀ dyúa kpa, ɓɛ́ wa ké ɓěɛ̀ zaa wɔ̃ po ní, nìí, ɓěǐn ɖá ɓɛ́ ɓě ké hwìɖǐi poìn ɓó kà ɓě ké ɓě mìɔùn jè kɔ̃in zaìn nyuɛɛ jè, ɔ kè ɖɛ ɓě mu wa gɔ̃̌ jǔìn nyɛɛ jè, 12sepóɛɖé Zùù Hwɛ̀ǐn-hwɛ̀ǐnɔ̀ mu ɖɛ jɛ́ɛ́ ɓě ké cɛ̃ ɓó tia ɓaɖaa ɓě tɛ̀mɛ̀ìn.”

Nɔ́ɔ́ ɓá bã-gàà zuɖu-zuɖu ɖò jè dyíɛ

13Ké gàa ɖò ɓɛ́ ɔ nì ma ɓó nyɔ kúɖúú ɓěɔ̀ hwìɛ̀ kɛɛ cɛ̃ɛ ma Jízɛ̀ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, cɛ̃ɛ ḿ ɖíí-gààɔ̀ gbo, ɓɛ́ ɔ ké ɖɛ ɓɛ́ à ɓǎ sè ma à gboɛɛ geìn.”

14Ké Jízɛ̀ zà ma ɖé wuɖu, ké ɔ ɖá, “Gàa wè, nyɛ́ nyu ḿ tɔ̀ɔ̀ mɔɔ ɖɛ-geìn-nyɔ̀ mú ɓó ɓě bììɛ́?” 15Ké Jízɛ̀ cɛ̃ɛ ma nyɔ ɓěɔ̀ gbo, ké ɔ ɖá, “Ɓě mɛ ma mú ɓó ɖɛ séín mɔ́ jè, sepóɛɖé nyɔ ɖòɛ̀ fɛ̀ɛ̀ jɛ́ɛ́ se ɖɛ jĩ̀ kà ɓɛ́ ɔ ɓéɖéɛɛ dyí ɓá.”

16Ké Jízɛ̀ po ma wa nɔ́ɔ́ nìà kɛ gbo, ké ɔ ɖá, “Bã-gàà ɖò ɓéɖé ma geɖe ɖò, ké ɔ geɖeɔ̀ zi ma bãuń mìɔ. 17Ɔ poìn ma hwìɖǐi, ké ɔ ɖá, ‘Ḿ se pá ɖò ɓéɖé ɓɛ́ ḿ ké ɖé ní ɖɛ séín ɓěɔ̀ dyi dèìn. Ɖɛ́ ḿ mɛ nyuɛ́?’ 18Ké ɔ cɛ̃ɛ ma ɔ mìɔùn gbo, ké ɔ ɖá, ‘Ɖɛ ní mu nyuùn wɛ̃ɛ kɛà kɛ̀. Ní mu ní sáɖá ɓěɔ̀ wáɖáùn, ké ní mu ɔ vɛ̀nɛ̀-vɛ̀nɛ̀ ɓě poùn. Ké ɖéɛ̀ ní mu ní mɔɔ́ séín ɓěɔ̀ ɔ kè ní ɖɛ tɔ̀ɔ̀ ɓěɔ̀ hwùɖǔìn. 19Ɔ ɖǎ ná nìǐn, ní muɛ ḿ mìɔùn gbo cɛ̃ìn, ɓɛ́ ḿ ké níiń, “Gàa wè, m̀ ɖǎ ɖɛ pàɖǎ ɓɛ́ nì mu mɔ́ùn ɓó zɔ̃ pàɖǎ xwíníín nyɛɛ dyi dè wà! Kò dyi, ɓɛ́ m̀ kéá fɔ̀. Ɖi ɖɛ, ɓɛ́ m̀ ké ná, ɓɛ́ m̀ ké múàǔn kpá.” ’ 20Kɛɛ Gèɖèpɔ́ɔ̀ cɛ̃ɛ ma ɔ gbo, ké ɔ ɖá, ‘M̀ zuɖu ní. Máaǔn nìà kɛɛ, ní mu nì fɛ̀ɛ̀ɔ̀ m̀ xwa zàùn. Ké nìí, ɖɛ séín ɓě ɓɛ́ m̀ ɖǎà dyi dè ɓó m̀ mìɔùn bììɛɛ, nyɛ́ muá wa kɔ̃̀ùn wɛ̃́?’ ”

21Ké Jízɛ̀ cɛ̃ɛ ma ɖe, ké ɔ ɖá, “Kǎà nyɔ ɓě ɓɛ́ wa dèà wa mìɔùn bìì bãa-ɖɛ̀ ɓě dyi, ké wa seà bã ɖé Gèɖèpɔ́ɔ̀ dyéɖéín nyɛɛ jè nyu nìɛ̀.”

Dè Gèɖèpɔ́ɔ̀ hwòɖǒ kɔ̃

(Máfíò 6:25-34)

22Ɔ jèɛɛ, Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ɓěǐn ɖá ɓɛ́ ɓě ké ɖii-ɖɛ̀ ɓɛ́ ɓě ké ɖi, ɓɛ́ ɔ ké nyu ɓɛ́ ɓě ké cĩ́ɛɛ jè hwòɖǒ dyií gbǎìn. Ké ɓěǐn ɖá ɓɛ́ ɓě ké ɖɔ ɓɛ́ ɓě ké mú poɛɛ jè hwòɖǒ dyií gbǎìn. 23Sepóɛɖé fɛ̀ɛ̀ɔ̀ jè kpa ɖɛ mìɔ ké ɔ zi ɖii-ɖɛ̀ jè dyí, ké kpóɖó-dyùàɔ̀ jè kpa ɖɛ mìɔ ké ɔ zi ɖɔ jè dyí. 24Ɓě poìn hwĩ́ín-hwã ɓěɔ̀ jè hwìɖǐi. Wa ní ɓá ɖɛ, ké wa ní poìn ɖii-ɖɛ̀ dyí. Wa ní dè ɖɛ dyi ɖé ɖɛ-dyi-dèìn-naín mɔɔ ɖé sáɖáún. Kɛɛ Gèɖèpɔ́ɔ̀ nyí wa ɖii-ɖɛ̀. Ɓě kpa ɖɛ mìɔ ké ɓě zi naà ɓě dyí. 25Ké ɓěɛ̀ nyɛ́ ɓɛ́ìn ɓěɛ̀ fɛ̀ɛ̀ɔ̀ wé dyúáɖò kɔ̃in poɛ dyììn ɖé ɓěɛ̀ fɛ̀ɛ̀ɔ̀ jè hwìɖǐi-poìn-poìn mú kɛ́? 26Ɔ jǔ ké ɓě se ɖɛ tííwè nìàǒ wɛɛ nyuɛ ɓɛ́ìn ní, nìí, ɖɛ́ kɔ̃̀ jè ɓě poìn kà hwìɖǐi ɓó ɖɛ tɔ̀ɔ̀ ɓě jè kɛ́? 27Ɓě mɛ poìn kà cu-bùè ɓěɔ̀ nyu mɛɛ kɛɛ jè hwìɖǐi. Wa ní nyu kũ̀à, ké wa ní ɖaɓa wa mìɔùn nììn mú-po-ɖɔ̀. Kɛɛ ḿ cɛ̃ɛ ɓě gbo, Sã́ɖómà ɓéɖé ma dĩ́ín-dĩ̀ìn pàɖǎ dyɛo, kɛɛ ɔ mú-po-ɖɔ̀ ɓěɔ̀ se ma kɔ̃in nɔ̀mɔ̀, ɓɛ́ ɔ ké ma cu-bùè ɓěa ɖò dyɛ̀ìn. 28Gèɖèpɔ́ɔ̀ mɔ̀ nyɔ poà pìǐɔ̀ ɖɔún wɛ̃̀. Ké pìǐɔ̀ nì ɖé xwáɖá xwíɖíi ɓó zɛ̃̌ɛ̀, kɛɛ ɔ ɖá ɔ kéá gàɖàà nyu ní, wa ɖǎ ɔ dyéɖé po. Ɔ jǔ ké Gèɖèpɔ́ɔ̀ dyi wa mɔ̀ùn ɖɔ nyí ní, ɔ se ɓě mɔ̀ùn ɖɔ nyíɛ mu mìɔ cáà? Ɓěɛ̀ hwìɖǐǐ-taɓa-taɓaɔ̀ ɓíè dyí mìɔ cá wà!

29“Ɔ jèɛɛ, ɓě ní ɖá ɓɛ́ ɓě ké hwìɖǐi poìn ɓó ɖɛ ɓě ké ɖiɛ, mɔɔ ɓó ɖɛ ɓě ké náa jè. 30Nyɔ ɓě ɓɛ́ wa se Gèɖèpɔ́ɔ̀ dyí dyuò wɛɛ nì ɖɛ ɓěɛ̀ jè kíɖíí mìɔ. Ɓě Ɓǎ nìà ɖé dyɔún wɛ̃ɛ dyuòɛ̀ dyí kà ɓɛ́ ɓě kɔ̃̀ ɓɛ́ ɓě ké wa ɓéɖéɛ. 31Kɛɛ ɖɛ mɛ kpɔ̃ ɓě hwòɖǒɛɛ mɛ mɔ̀ Gèɖèpɔ́ɔ̀ kã́á-ɓòɖòɔ̀, ké ɔ mu ɓě ɖɛ ɓě nìà kɛ nyíìn.

Dyi-dè-ɖɛ̀ nì ɖé dyɔún wɛ̃ɛ jè

(Máfíò 6:19-21)

32“Ní ɓáɖáá xwéɖé wè, ɓěǐn ɖá ɓɛ́ ɓě ké fɛ̃̀ìn, sepóɛɖé ɓě Ɓǎɔ̀ hwòɖǒ dè dyi, ɓɛ́ ɔ ké ɓě kã́á-ɓòɖòɔ̀ nyí. 33Ɓě peɖe ɓěɛ̀ kɔ̃̀ɔ̀-ɖɛ̀ séín ɓěɔ̀, ɓɛ́ ɓě ké wíɖíɔ̀ gǎ-dyé-nyɔ̀ ɓěɔ̀ nyí. Ɓě mɛ po ɓěɛ̀ wíɖíɔ̀ wíɖí-mú-po-ɖɛ̀ ɓě ɓɛ́ wa se dyíin nyìnìɛ̀n ɓɛ́ìn nyɛɛ mú, ké ɓě mɛ dèìn ɓěɛ̀ bã-ɖɛ̀ ɓěɔ̀ ɖé dyɔún dyi. Wa se ɖé kɔ̃ sɔ̀ɔ̌ mu, sepóɛɖé dyíɖíí-nyɔ̀ ɖò se ɖé muɛ ɓɛ́ìn, ké nyaa-ɓéɖé ɖò se wa dyíin nyìnìɛ̀n ɓɛ́ìn. 34Sepóɛɖé ɓěɛ̀ hwòɖǒ mu dɛ̀ ɓɛ́ ɓěɛ̀ bã-ɖɛ̀ ɓě nìɛɛ nììn tee.

Gbo-nì-nyɔ̀ nì ɓɛ́ɖɛ́ kɔ̃ɛ

35“Ɓě mɛ nì ɓɛ́ɖɛ́ kɔ̃. Ɓě mɛ jìnììn, ké ɓěɛ̀ ɖáùnpò ɓěɔ̀ mɛ nì wãuń. 36Ɓě mɛ nì kà gbo-nì-nyɔ̀ ɓě ɓɛ́ wa nì waà gbo-nì-ɓǎɔ̀ fòèɛ̌n, ɓɛ́ ɔ kéà nyɔ́nɔ́-dyi-kpɔ̃-hwɔ̀ɔ̀ kɔ̃ sɔ̀, ɓɛ́ ɔ kéà taún dyiɛɛ nìà kɛ. Ɔ jǔ ké ɔ dyi dyi, ké ɔ dyi gbǒɔ̀ kɔ̃ún ɓaɖa ní, nìí, wa mu gbǒɔ̀ kaàùn wàɖà cá. 37Mana nì gbo-nì-nyɔ̀ ɓě ɓɛ́ waà gbo-nì-ɓǎɔ̀ dyi dyiín, ɔ mu wa ɓɛ́ɖɛ́ kɔ̃ dyi dyɛ̀ìn nyɛɛ kɔ̃. Ḿ cɛ̃ ɓě jǎà gbo, waà gbo-nì-ɓǎɔ̀ mu jìnììn, ké ɔ mu wa téɓèɖèɔ̀ gbɔ kpaùn, ké ɔ mu wa ɖii-ɖɛ̀ téɓèɖè kɔ̃ poùn. 38Kɛbì ɔ mɛ dyi ɓó máaún hwuɖu hwìɛ̀ǐn, mɔɔ kɛbì ɔ mɛ dyi hwɛ̀ ɓɛ́ zɔ̃ ké zɔ̃ɛɛ, mana nì gbo-nì-nyɔ̀ ɓě ɓɛ́ ɔ mu wa ɓɛ́ɖɛ́ kɔ̃ dyi dyɛ̀ìn nyɛɛ kɔ̃. 39Ɖɛ nìà kɛ mɛ nì ɓě hwìɖǐi. Ɔ jǔ ké gbǒ-kɔ̃̀-nyɔ̀ɔ̀ dyiɔ́ ti jɛ́ɛ́ ɓɛ́ dyíɖíí-nyɔ̀ muɔ́ dyiìn nyɛɛ dyí dyuò ní, nìí, ɔ seɔ́ wɔ̃́ɔ mu ɓɛ́ dyíɖíí-nyɔ̀ɔ̀ kéɔ́ ɔ gbǒɔ̀ wa. 40Ké ɓě mɔ̀ùn mɛ nì ɓɛ́ɖɛ́ kɔ̃, sepóɛɖé mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ mu dyiìn ti ɓɛ́ ɓě se ní jè hwìɖǐi dèɛ̌ muɛ.”

Gbo-nì-nyɔ̀ ɓɛ́ nyɔ ɓɛ́ìn hwòɖǒ kɔ̃ dèɛ̀ kɛ ɔ kè gbo-nì-nyɔ̀ ɓɛ́ nyɔ se hwòɖǒ kɔ̃ dèɛ̀ ɓɛ́ìn nyɛ

(Máfíò 24:45-51)

41Hwɛ̀ ké Píɖɛ̀ diè ma Jízɛ̀ dyi, ké ɔ ɖá, “Bounɓo, m̀ pòìn à nɔ́ɔ́ nìà kɛ dyiì, mɔɔ ɔ mɔ̀ ɓó nyɔ séín bìì?”

42Ké Bounɓoɔ̀ jǔ ma ɔ gɔ̃̌, ké ɔ ɖá, “Nyɛ́ mɔ̀ gbo-nì-nyɔ̀ ɓɛ́ ɔ fɔ̀nɔ̀ hwòɖǒ, ké nyɔ ɓɛ́ìn ɔ hwòɖǒ kɔ̃ dèɛ̀ kɛ́? Ɔ mɔ̀ nyɔ ɓɛ́ ɔ gbo-nì-ɓǎɔ̀ mu ɔ gbo-nì-nyɔ̀ ɓě nì ɖé ɔ ɓíɖí-gbǒ xwíníín nyɛɛ ɔ gbo sèìn, ɓɛ́ ɔ ké wa ɖii-ɖɛ̀ nyí ɓó ti wa ɓéɖé ɓɛ́ wa kéɛ dyéìn nyɛ. 43Gbo-nì-nyɔ̀ nìà kɛɛ, ɔ gbo-nì-ɓǎɔ̀ dyi dyi, ké ɔ dyi ɔ ɖɛ nìà kɛ nyuɛ dyi dyɛ̀ìn ní, nìí, mana nì ɔ kɔ̃. 44Ḿ cɛ̃ ɓě jǎà gbo, gbo-nì-ɓǎɔ̀ mu ɔ ɖɛ séín ɓěɔ̀ gbo-nì-nyɔ̀ɔ̀ xwaún dyi poùn. 45Kɛɛ ɔ jǔ ké gbo-nì-nyɔ̀ɔ̀ dyiɛ ɔ mìɔùn gbo cɛ̃, ké ɔ dyi níiń, ‘Ní gbo-nì-ɓǎɔ̀ se dyiɛ́ mu ɓó kàǔn,’ ké ɔ dyi ɔ mǔè gbo-nì-gàà kè gbo-nì-màà ɓěɔ̀ ɓaɖa kpàǐ ɖú, ké ɔ dyi ɖɛ ɖi, ké ɔ dyi ná, ké náá-ɖɛ̀ɔ̀ dyi ɔ nyu ní, 46nìí, ɔ gbo-nì-ɓǎɔ̀ mu dyiìn ɓó wé kɔ̃̀ xwíníín ɓɛ́ ɔ seà ɔ gbo-nì-ɓǎɔ̀ jè hwìɖǐi dèɛ̌ muɛ. Ké ɔ gbo-nì-ɓǎɔ̀ mu ɔ gǎ kɔ̃ tòùn, ké ɔ mu ɔ nììn pá ɖé nyɔ ɓě ɓɛ́ wa seà ɔ wuɖu nyuɛɛ hwìɛ̀ nyuùn.

47“Gbo-nì-nyɔ̀ mɔ̀ nyɔ dyuò kà ɔ gbo-nì-ɓǎɔ̀ mɔ́ɔ́-ɖɛ̀ dyí, ké ɔ seà ɔ mìɔùn ti dyéìn ɓɛ́ ɔ kéà ɔ mɔ́ɔ́-ɖɛ̀ɔ̀ nyu kɛɛ, nìí, wa mu ɔ gbàtò ɓàɖàìn. 48Kɛɛ gbo-nì-nyɔ̀ mɔ̀ nyɔ seà ɔ gbo-nì-ɓǎɔ̀ mɔ́ɔ́-ɖɛ̀ dyí dyuòɛɛ dyi ɖɛ kɔ̃̀ jè ɔ ɓéɖé ɓɛ́ ɔ ké ɓaɖa-ɓaɖa dyéɛɛ nyuín, wa mu ɔ ɓaɖaùn ɖɛ wè pū. Nyɔ ɓɛ́ wa nyí pàɖǎ kɛɛ, wa mɔ́ ɔ pàɖǎ xwa. Ké nyɔ ɓɛ́ wa sèà ɖɛ pàɖǎ gboɛɛ, wa mu ɔ ɖɛ pàɖǎ xwai mɔ́ùn ɖe.

Jízɛ̀ dyà mú-ge-ge

(Máfíò 10:34-36)

49“Ḿ ɖǎ dyi, ɓɛ́ ḿ ké ɓóɖó-kpàà nyɛ kɔ̃ po, ké nyɛ́ ɖá nyɛɔ̀ ɖǎ má dyí kpɔ̃ nɔ̀ɔ̀ kɛ́? 50Ḿ ɓéɖé níɔ-kpá-kpá ɖò, ɓɛ́ ḿ kéɛ nyu. Ké ɔ nì ḿ fũ̀à-fṹá nyùɛ̌n cá, ɔ hwɛ̀ dyɛ ḿ bũ̌ hwɛ̀. 51Ɓěɛ̀ hwòɖǒ ɖá ḿ dyi ma ɓóɖó-kpàà kɔ̃, ɓɛ́ ḿ ké ma gìɖìǐ dyàe? Gbào, ḿ cɛ̃ɛ ɓě gbo, ḿ se gìɖìǐ dyàǔn dyi, kɛɛ ḿ dyà mú-ge-ge. 52Sɔ̀ìn dà ké dyúa muɛɛ, ɖé gbǒ dyúáɖò xwíníín ní, nyɔ-kpò hm̀m̌ mu ɖé mú geìn. Nyɔ-kpò tã mu nyɔ-kpò sɔ̃́ gbo vɔ̃ùn, ké nyɔ-kpò sɔ̃́ mu nyɔ-kpò tã gbo vɔ̃ùn. 53Nyɔ ɓěɔ̀ mu mú geìn. Ɓǎ ɓě mu waà dyú-gàà ɓě gbo vɔ̃ùn, ké dyú-gàà ɓě mu wa ɓǎ ɓě gbo vɔ̃ùn. Ɖe ɓě mu waà dyú-màà ɓě gbo vɔ̃ùn, ké dyú-màà ɓě mu wa ɖe ɓě gbo vɔ̃ùn. Dà ɓě mu waà dyúɛ̀ gmàà ɓě gbo vɔ̃ùn, ké dyúɛ̀ gmàà ɓě mu waà dà ɓě gbo vɔ̃ùn.”

Tiɔ̀ jè múin-wɔ̃́-wɔ̃́

(Máfíò 16:2-3)

54Ké Jízɛ̀ cɛ̃ɛ ma nyɔ ɓěɔ̀ gbo ɖe, ké ɔ ɖá, “Ɔ jǔ ké ɓě dyiɛ dyé, ké níɔ̀ dyi dyi kpɔ̃ ɖé dyóɖó-dyi-kpáìn-naínɔ̀ ní, nìí, ɓě cɛ̃ɛ wàɖà cá, ké ɓě ɖá, ‘Ní nì ɖaɓauń dyiɛń.’ Ké ɔ kpá ná. 55Ké pìɔ̌ ɓɛ́ ɔ sɔ̀ìn ɖé ɓóɖó nìà zɔ̃̌in-wàkáɔ̀ kɔ̃ɛɛ kɔ̃ kɛɛ dyi ɓě ɓaɖauń nìǐn, ɓě ɖá, ‘Dyóɖóɔ̀ mu fãùn mìɔ.’ Ké ɔ kpá ná. 56Ɓě mɔ̀ dyéɖéi-nyu-nyɔ̀ ɓě. Ɓě dyi ɓóɖó-kpàà kè dyɔɔ̀ dya gmɔ̀ ní, nìí, ɓě ɓɛ́ìn ɖɛ mɔ̀ ɔ xwíníín nyɛɛ cɛ̃ɛ. Kɛɛ ɖɛ́ kɔ̃̀ jè ɓě seà ti à nìà mú ɓó kàǔn wɛ̃ɛ xwíníín dyuò wɛ́?

Zĩ̀ìn zaa nì ɓó m̀ kè nyɔ ɖò pṹa kɛɛ dyi

(Máfíò 5:25-26)

57“Ɖɛ́ kɔ̃̀ jè ɓě mìɔùn ní poìn ɖɛ mɔ̀ dyí-sɛ́ɖɛ́ìn-ɖɛ̀ ɓɛ́ ɓě ké nyuɛɛ jè hwìɖǐi kɛ́? 58Nyɔ ɖò dyi m̀ súù, ké ɔ dyi m̀ zɔ̃́ín-wɔ̃-pòìn-naín kpauń nìǐn, nìí, m̀ mɛ nyuɛ ɓɛ́ gìɖìǐ ké ɓó ɓě pṹa dyi ɓó hwìèɔ̀ kɔ̃, hwɛ̀ ɓɛ́ ɓě ké ɖé zɔ̃́ín-wɔ̃-pòìn-naínɔ̀ nyini. Sepóɛɖé ɔ jǔ ké ɓě dyi ɖé nyiniín, ɔ mu m̀ tɔ̀ɔ̀ ɓěɔ̀ xwáɖáún zàìn, ké tɔ̀ɔ̀ ɓěɔ̀ mu m̀ sójà ɓěɔ̀ xwáɖáún zàìn, ké wa mu m̀ kpɔɖɔ ɖeín poùn. 59Ḿ cɛ̃ɛ ɓě gbo, nyɔɔ̀ mu kpɔɖɔ ɖeín dyi gã̀ùn tee, ɓɛ́ ɔ ké wíɖí ɓɛ́ ɔ kéɔ́ kà pɛ́ɛ̀ kɛɛ pã́-pã́ séín pɛ́ɛ̀ hwɔ hwɛ̀.”

Currently Selected:

Ɖúù 12: ƁB02

Highlight

Copy