Ɖúù 11

Jízɛ̀ tɛ̀mɛ̀ìn nyɔǔn ɖɛ ɓá ɓaà jè dyíɛ

(Máfíò 6:9-13; 7:7-11)

1Ti ɖòɛ̀ ɓaɖaa, Jízɛ̀ nì ma ɓaàǔn dà ɖò, ké ti ɔ ɖǎ ma hwɛ̀ɛ, ɔ ɖeín-nà-nyɔ̀ ɓěɔ̀ dyúáɖò cɛ̃ɛ ma ɔ gbo, ké ɔ ɖá, “Bounɓo, tɛ̀mɛ̀ìn à kà à ké ɓaà nyu kà ɓɛ́ Jɔ̃́ɔ́ tɛ̀mɛ̀ìn ma kà ɔ ɖeín-nà-nyɔ̀ ɓěɔ̀ kɛ.”

2Ké Jízɛ̀ cɛ̃ɛ ma wa gbo, ké ɔ ɖá, “Ɓě dyi ɓaà ní, kǎà ɓě mɛ nyu kà ɓaà. Ɓě mɛ ɖá,

‘À Ɓǎ, nì nyɛ́nɛ́ɔ̀ hwɛ̀ mú.

Nì kã́á-ɓòɖòɔ̀ mɛ dyi.

3Nyí à ɖii-ɖɛ̀ ɓɛ́ à kɔ̃̀ à ké ɖi ɓó wé séín nyɛ.

4M̀ mɛ zĩ̀ìn à nàmàǔn ɓěɔ̀ kɔ̃in,

sepóɛɖé à zĩ̀ìn ɖɛ gbà séín ɓɛ́ nyɔ ɓě nyu à bũ̌ɛɛ kɔ̃in.

Mɔ̀ǔn kpàìn à mú-dɔ̃̌-dɔ̃̌ mú.’ ”

5Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo ɖe, ké ɔ ɖá, “Ɔ nì kà ɓě ɖò muɔ́ kà ɔ ɓǎto ɖò ɓíɖí-taún ɓó máaún hwuɖu hwìɛ̀ǐn, ké ɔ cɛ̃ɛ ɔ gbo, ké ɔ ɖá, ‘Ḿ ɓǎto, nyí kà ḿ bɛɖɛɛ̀-kpò tã wè, 6sepóɛɖé ḿ ɓǎto ɓɛ́ ɔ nì dà ɖò muɛń nyɛɛ dyììn ɖé ḿ gbo, ké ḿ se ɖii-ɖɛ̀ ɖò ɓéɖé, ɓɛ́ ḿ kéɛ ɔ nyí.’ 7Nìí, ɔ ɓǎto ɓɛ́ ɔ muà gboɛɛ mu ɖé gbǒɔ̀ xwíníín nììn, ɓɛ́ ɔ ké ɖé wuɖu zà, ɓɛ́ ɔ ké níiń, ‘Ɓɔ́ ḿ fũ̀à-fṹá nyùɛ̀n. Ḿ ɖǎ ní gbǒɔ̀ gbǎ, ké ḿ kè ní dyú ɓěɔ̀ ɖǎ dyi pɛ̃́. Ḿ se dyí sɔ̀ɔ̀ ɓɛ́ìn, ɓɛ́ ḿ ké m̀ ɖɛ ɖò nyí.’ 8Ḿ cɛ̃ɛ ɓě gbo, ɔ mɔ̀ ɔ ɓǎto dyɛo, kɛɛ ɔ seɔ́ dyí sɔ̀ɔ̌ mu, ɓɛ́ ɔ kéɔ́ má ɔ bɛɖɛɛ̀ɔ̀ nyí, kɛɛ sepóɛɖé ɔ kã̀ ɖùǔn, ké ɔ nìɛ̀ zɔ̀ǔn kánáá pū jèɛɛ, ɔ mu dyí sɔ̀ùn, ɓɛ́ ɔ ké ɖɛ ɔ mɔ́à kɛɛ ɔ nyí.

9“Ḿ cɛ̃ɛ ɓě gbo, ɓě zɔ̀ɔ̀, ké ɓě muɛ dyéìn. Ɓě mɔ́ɔ dyi, ké ɓě muɛ dyéìn. Ɓě ɓaɖa gbǒ kɔ̃ún, ké gbǒɔ̀ mu kaàùn ɓó ɓě bìì. 10Sepóɛɖé nyɔ séín ɓě ɓɛ́ wa zɔ̀ɔ̀ kɛɛ, wa muɛ dyéìn. Ké nyɔ mɔ́ɔ dyiɛɛ, ɔ muɛ dyéìn. Ké gbǒ mu kaàùn ɓó nyɔ ɓaɖaa kɔ̃ún wɛ̃ɛ bìì. 11Ɓě mɔ̀ ɓǎ ɓěɛɛ, ɓěɛ̀ dyú ɓěɔ̀ dyi ɓě zimii zɔ̀ìn ní, nìí, ɓě mu wa sɛ nyíìn, ɓɛ́ ɓě ké se wa zimiiɔ̀ nyíì? 12Mɔɔ ɔ jǔ ké wa dyi sòò-gɛ̃̀ zɔ̀ ní, nìí, ɓě mu wa gĩ́á nyíìne? 13Ɓěɛ̀ kpeɖe nyìnììn dyíin dyɛo, kɛɛ ɓě dyuò ɓěɛ̀ dyú ɓěɔ̀ ɖɛ nɔ̀mɔ̀ dyíin nyíɛ. Kà ɔ nìà náa, nìí, Ɓǎ nìà ɖé dyɔún wɛ̃ɛ mu nyɔ ɓě ɓɛ́ wa zɔ̀ Zùù Hwɛ̀ǐn-hwɛ̀ǐnɔ̀ kɛɛ nyíìn.”

Nyɔ ɓěɔ̀ ɖá Jízɛ̀ mɔ̀ Bíɔ̀zɛ́ɓà

(Máfíò 12:22-30; Máà 3:20-27)

14Wé ɖòɛ̀ ɓaɖaa, Jízɛ̀ nì ma zùù gbà ɓɛ́ ɔ nì gàa ɖò mú ké ɔ se wùɖùɛ̀ ɓɛ́ìn nyɛɛ ɔ mú zàǔn. Ti ɓɛ́ zùù gbàɔ̀ ɖǎ ma gàaɔ̀ mú sɔ̀ɛɛ, gàaɔ̀ ɖú ma wùɖù kpàǐ. Ké nyɔ ɓěɔ̀ giniìn ma dyi, 15kɛɛ wa ɖíɛ́ ɓě ɖá, “Bíɔ̀zɛ́ɓà mɔ̀à zùù gbà ɓěɔ̀ ɓǎ vɛ̀nɛ̀ɔ̀ kɛɛ mɔ̀ nyɔ nyí ɔ kpé, ɓɛ́ ɔ ké zùù gbà nyɔǔn mú zà.”

16Ké nyɔ ɖíɛ́ ɓě mɔ̀ùn mɔ́ ɓɛ́ wa ké ma Jízɛ̀ mú dɔ̃̌. Ɔ jèɛɛ, wa cɛ̃ɛ ma ɔ gbo, ɓɛ́ ɔ ké ma ɖàɓàìn-ɖɛ̀ ɖò sɔ̀ìn ɖé dyɔún wɛ̃ɛ wa dyí tɛ̀mɛ̀ìn. 17Jízɛ̀ dyuò ma waà hwìɖǐi-poìn-ɖɛ̀ ɓěɔ̀ dyí jèɛɛ, ɔ cɛ̃ɛ ma wa gbo, ké ɔ ɖá, “Kã́á-ɓòɖò ɖò dyi ɔ mìɔùn gbo vɔ̃ ní, nìí, ɔ mu wáɖáùn. Ké gbǒ-xwíníín ɖò dyi gbo vɔ̃ìn ní, nìí, ɔ mu wáɖáùn. 18Ké Nɔɔ́-nàmàǔn kpéɔ̀ dyi mú ge ní, nìí, xwɛ̌ ɔ kã́á-ɓòɖòɔ̀ ɓɛ́ìn dúi kuɛ kɛ́? Ɓě ɖá ḿ zà nyɔǔn zùù gbà mú, sepóɛɖé Bíɔ̀zɛ́ɓà nyí ḿ kpéɔ̀, ɓɛ́ ḿ kéɛ náa nyu jè. 19Ɔ jǔ ké Bíɔ̀zɛ́ɓà mɔ̀ nyɔ dyi ḿ kpé nyí, ɓɛ́ ḿ ké zùù gbà nyɔǔn mú zà ní, nìí, xwɛ̌ ɓě nììn nyɔ ɓěɔ̀ nyu zùù gbà nyɔǔn mú zàà kɛ́? Wa mɔ̀ nyɔ muɛ nyɔǔn dyí tɛ̀mɛ̀ìn kà ɓɛ́ ɓě bĩ ɖɛ xwaa. 20Kɛɛ ɔ jǔ ké Gèɖèpɔ́ɔ̀ mɔ̀ nyɔ dyi ḿ kpé nyí, ɓɛ́ ḿ ké zùù gbà nyɔǔn mú zà ní, nìí, Gèɖèpɔ́ɔ̀ kã́á-ɓòɖòɔ̀ ɖǎ ɓě gbo dyi nɔ̀ɔ̀.

21“Gana-nyɔ̀ ɖò ɓɛ́ ɔ ɓéɖé ɔ vɔ̃̀ìn-ɖɛ̀ séín ɓó ɔ mìɔùn gboɛɛ dyi ɔ mìɔùn nììn gbǒɔ̀ dyí gmɔ̀ ní, nìí, ɔ ɖɛ séín ɓěɔ̀ ɖɛ ɖò se wa nyuɛ́ mu. 22Kɛɛ ɔ jǔ ké gàaɔ̀ nyɔ ku dyi ké ɔ zi ɔ mɔ̀ùn dyíɛɛ dyi ɔ gbo vɔ̃, ké ɔ dyi ɔ ɖu ní, nìí, ɔ kpa vɔ̃̀ìn-ɖɛ̀ séín ɓě ɓɛ́ gàaɔ̀ dèà hwòɖǒ kɔ̃, ɓɛ́ ɔ dyià ɖɛ séín ɓě ɓɛ́ ɔ dyíɖíà kɛɛ geìn nyɛɛ ní.

23“Nyɔ mɔ̀ nyɔ ɓɛ́ ɔ se ní wáká kɔ̃ nìɛɛ, ɔ vɔ̃ ḿ gbo. Ké nyɔ mɔ̀ nyɔ ɓɛ́ ɔ se ḿ gbo kpá, ɓɛ́ à ké ɖɛ dyí poìn nyɛɛ, ɔ ɓeìn ɖɛ dyi.

Zùù gbà ɖe-dyi-dyi

(Máfíò 12:43-45)

24“Ɔ jǔ ké zùù gbà ɖò dyi nyɔ ɖò mú sɔ̀ ní, nìí, zùù gbàɔ̀ kpa cĩ́-naín dyi mɔ́ɔ, dɛ̀ ɓɛ́ ní se nìɛ. Ɔ jǔ ké ɔ se cĩ́-naín ɖò dyé ní, nìí, ɔ cɛ̃ɛ ɔ mìɔùn gbo, ké ɔ ɖá, ‘Ní mu dɛ̀ ḿ sɔ̀ ma kà kɛɛ ɖe muùn.’ 25Ɔ jèɛɛ, ɔ mu ɖe, ké ɔ dyɛ̀ìn ɔ cĩ́-naínɔ̀ dyi. Ké ɔ dyéɛ kà nyɔ ɖò ɖǎ ɖé dyi wúò, ké ɖɛ séín kpá páún wɛ̃. 26Nìí, ɔ mu ɖe, ké ɔ dyà zùù gbà mɛ̀nɛ̌ìn-sɔ̃́ ɓɛ́ wa nyìnììn kpeɖeín ké wa zi ɔ dyíɛ. Ké ɔ kè wa cĩ́ ɖé. Ɔ ɖǎ ná nìǐn, nìí, nyɔɔ̀ jè mu wìì-ɖɛ̀ jǔùn mìɔ, ɓɛ́ ɔ ké kà ɔ jè nyu ma nìɛ̀ kĩ́ín nyɛɛ dyí zi.”

Nyɔ ɓě ɓɛ́ mana nì kɔ̃ɛ

27Ti ɓɛ́ Jízɛ̀ ɖǎ ma ɖɛa cɛ̃ɛ, màa ɖò ɓɛ́ ɔ nì ma ɖé nyɔ kúɖúú ɓěɔ̀ hwìɛ̀ kɛɛ páná ma mú, ké ɔ ɖá, “Mana nì màa ɓɛ́ ɔ wóɖóìn m̀, ké ɔ nyáìn m̀ wɛ̃ɛ kɔ̃.”

28Kɛɛ Jízɛ̀ zà ma ɖé wuɖu, ké ɔ ɖá, “Ɔ nyɔ m̀ mɛ cɛ̃ɛ mɔ̀, mana nì nyɔ ɓě ɓɛ́ wa wɔ̃́ Gèɖèpɔ́ɔ̀-wùɖùɔ̀, ké wa nyuɛ kɛɛ kɔ̃.”

Júù-nyɔ̀ ɓěɔ̀ nyɔ vɛ̀nɛ̀ ɓěɔ̀ mɔ́ ɖàɓàìn-ɖɛ̀ dyéɛ dyi

(Máfíò 12:38-42)

29Ti ɓɛ́ nyɔ kúɖúú ɓěɔ̀ poìn ma Jízɛ̀ ɖei dyíɛɛ, ɔ mu ma dyúa, ké ɔ ɖá, “Ɓě mɔ̀à kpeɖeín-nyìnììn-nyɔ̀ ɓěɛɛ, ɓě mɔ̀ ɖàɓàìn-ɖɛ̀ dyi-mɔ́-nyɔ̀. Ɖàɓàìn-ɖɛ̀ nyɛ̀nɛ̀ɛ̀ ɓɛ́ Gèɖèpɔ́ɔ̀ mu ɓě dyí tɛ̀mɛ̀ìn nyɛɛ hwɔìn ɖɛ ɓɛ́ ɔ nyu zɔ̃̌ɔ̀ kà kpáá-ɖɛ̀-cɛ̃-nyɔ̀ Jónà bũ̌ kɛ. 30Kà ɓɛ́ Jónà mɔ̀ ma dyí-tɛ̀mɛ̀ìn-ɖɛ̀ ɓó Nínívà-nyɔ̀ ɓěɔ̀ bììɛɛ, kà dyúáɖòɔ̀ kǎà mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ mu dyí-tɛ̀mɛ̀ìn-ɖɛ̀ jǔùn ɓó ɓě bìì. 31Ɓó zaa-wɔ̃-po-wèɔ̀ ɓaɖaa, kã́á-màà ɓɛ́ ɔ sɔ̀ìn zɔ̃̌ɔ̀ kà ɖé Síɓà-ɓòɖòɔ̀ kɔ̃ɛɛ mu dyi nyànàùn, ɓɛ́ ɔ ké ɓě zaa dúún wáɖá. Sepóɛɖé ɔ sɔ̀ìn ma ɓóɖó-kpàà sèìn-naín, ké ɔ dyi ma, ɓɛ́ ɔ ké ma Sã́ɖómàà hwòɖǒ-fɔ̀nɔ̀-wùɖù ɓěɔ̀ gbo ɖùǔ tò. Kɛɛ gmɔ̀ nɔ̄, nyɔ ɓɛ́ ɔ kpa ɖɛ ké ɔ zi Sã́ɖómà dyíɛɛ nì dà. 32Ɓó zaa-wɔ̃-po-wèɔ̀ ɓaɖaa, Nínívà-nyɔ̀ ɓěɔ̀ mu dyi nyànàùn, ɓɛ́ wa ké ɓě zaa dúún wáɖá. Sepóɛɖé ti wa wɔ̃́ ma Jónàà Gèɖèpɔ́ɔ̀-wùɖù wáɖá-wáɖáɔ̀ kɛɛ, wa táà ma waà nàmàǔn-kpèɖè ɓěɔ̀ dyi. Kɛɛ gmɔ̀ nɔ̄, nyɔ ɓɛ́ ɔ kpa ɖɛ ké ɔ zi Jónà dyíɛɛ nì dà.

Kpóɖó-dyùàɔ̀ ce

(Máfíò 5:15; 6:22-23)

33“Nyɔ ɖò ní kpɔ̃̀ìn ɖáùnpò dyí, ké ɔ ní vǐèɛ̀, ké ɔ ní dèɛ̀ gbǎ-wĩín xwíɖíi. Kɛɛ ɔ dèɛ̀ ɖáùnpò-kɔ̃-dè-ɖɛ̀ɔ̀ kɔ̃, ɓɛ́ nyɔ ɓě ɓɛ́ wa dyá gbǒɔ̀ múɛɛ ké ce dyé. 34Nì dyéɖéɔ̀ nì kà ɖáùnpò nìà kɛɛ ɓó nì kpóɖó-dyùàɔ̀ bìì. Ɔ jǔ ké nì dyéɖé-dyùàɔ̀ dyi dyíin nɔ̀mɔ̀ ní, nìí, nì kpóɖó-dyùà gànáɔ̀ ɓéɖé ce. Kɛɛ ɔ jǔ ké nì dyéɖé-dyùàɔ̀ dyi dyíin nyìnììn ní, nìí, nì kpóɖó-dyùà gànáɔ̀ mu tíe-kpò mú nììn. 35Ɔ jèɛɛ, m̀ mɛ ma mú, ɓɛ́ ce nìà ɖé m̀ múɛɛ ní kɔ̃̀ ɖà tíe-kpò mú zɛ̃̀ìn. 36Ɔ jǔ ké nì kpóɖó-dyùà gànáɔ̀ dyi ce ɓéɖé, ké ɔ dà ɖò se tíe-kpò mú nìǐn, ceɔ̀ mu ɔ dà séín fã̀ìn, ké ɔ mu nììn kà ɖáùnpòɛ̀ ce fã̀ìn nyɔ kɛ.”

Jízɛ̀ po nyɔ ɓěɔ̀ náún ɓá Fáɖòsíì-nyɔ̀ ɓěɔ̀ kè nyɔ-gma-tɛ̀mɛ̀ìn-nyɔ̀ ɓěɔ̀ jè dyí

(Máfíò 23:1-36; Máà 12:38-40)

37Ti Jízɛ̀ hwɔ ma wùɖùɛ̀ kɛɛ, Fáɖòsíì-gàà ɖò ɖá ma ɔ, ɓɛ́ ɔ kèɔ̀ kè ké ma ɖɛ ɖi. Ɔ jèɛɛ, ɔ mu ma ɖé gàaɔ̀ ɓíɖí-taún, ké ɔ kò ma dyi, ɓɛ́ ɔ ké ma ɖɛ ɖi. 38Ké Fáɖòsíì-gààɔ̀ giniìn ma dyi ti ɓɛ́ ɔ dyéɛ ma kà Jízɛ̀ se ma xwai dèɖè, ké ɔ ɖi ma ɖɛ kɛ. 39Ké Bounɓoɔ̀ cɛ̃ɛ ma ɔ gbo, ké ɔ ɖá, “Ɓě mɔ̀à Fáɖòsíì-nyɔ̀ ɓěɛɛ, ɓě hwɔìn kópò kè péɖétè ɓɛ́ ɓě wɔɔ̀ kɔ̃ún dyiɛ, kɛɛ ɖé ɓě xwíníín nyɛɛ, dyíɖí-dyíɖí kè ɖɛ gbà ɓě dyíìn ɖé dyi. 40Ɓě zuɖuín. Nyɔ ɓɛ́ ɔ nyuà nyɔǔn-dyùɛ̀ ku kɔ̃in nyɛɛ, ɔ se waà xwíníín ɓěɔ̀ nyu ɖekèè? 41Kɛɛ ɓě mɛ tò ɖɛ nì ɖé ɓěɛ̀ kópò ɓěɔ̀ kè ɓěɛ̀ péɖétè ɓěɔ̀ xwíníín nyɛɛ gǎ-dyé-nyɔ̀ ɓěɔ̀ dyí, ké ɖɛ séín mu mú hwɛ̀ìn ɓó ɓě bìì.

42“Kɛɛ Fáɖòsíì-nyɔ̀ ɓě, gboò-wùɖù nì ɓě kɔ̃. Ɓě nyí Gèɖèpɔ́ɔ̀ ɓěɛ̀ cɔ́ɔ́-zɔ̃̌ìn-ɖɛ̀ ɓě mɔ̀à vàǎ-dù kò-kò ɓěɔ̀ kɛɛ ɓàɖàìn-bùè, kɛɛ ɓě wã̀ìn jǎà-ɖɛ̀ kè Gèɖèpɔ́ɔ̀ mú ɖɛ̀ɓɛ̀ jè dyéɖé kɔ̃in. Gma ɓě nìà kɛ kè gma tɔ̀ɔ̀ ɓěɔ̀, ɖéɛ̀ ɓě ɓéɖé ɓě kéɔ́ dyi kpɔ̃.

43“Fáɖòsíì-nyɔ̀ ɓě, gboò-wùɖù nì ɓě kɔ̃. Ɓě ɖɛ̀ɓɛ̀ ɓɛ́ ɓě ké dà kpa ɖɛ ɓě nì ɖé ɓěɛ̀ cɔ́cì-gbò ɓěɔ̀ múɛɛ kò. Ɓě ɖɛ̀ɓɛ̀ ɓɛ́ nyɔǔn ké ɓě nyíɔún zà ɖé kpéín-dyé-dyé mú ɖé ɖɛ-pèɖèìn-naín ɓěɔ̀. 44Gboò-wùɖù nì ɓě kɔ̃. Ɓě nì kà xwɛ́-gmàà ɓě ɓɛ́ nyɔǔn seà da dyuò, ké wa nàà kɔ̃in, ké wa seà dyí dyuò wɛɛ nìà kɛ.”

45Púɛɛ, nyɔ-gma-tɛ̀mɛ̀ìn-nyɔ̀ ɓěɔ̀ ɖò cɛ̃ɛ ma Jízɛ̀ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, m̀ dyi ɖɛa cɛ̃ ní, nìí, m̀ zàìn à zùǔn ɖekè.”

46Ké Jízɛ̀ ɖá, “Nyɔ-gma-tɛ̀mɛ̀ìn-nyɔ̀ ɓě, gboò-wùɖù nì ɓě kɔ̃ ɖekè. Ɓě kpɔ̃̀ìn nyɔǔn ganaún, ɓɛ́ wa ké ɖɛ kàmà múɛɛ nyu, kɛɛ ɓě ní nyu ɖɛ ɖò ɓɛ́ ɔ ké nyɔ ɓěɔ̀ gbo kpá fóɖóún dyɛ mɔ̀ùn ɓó ɖɛ kàmàǔn-kàmàǔnɔ̀ nyu jè. 47Gboò-wùɖù nì ɓě kɔ̃. Ɓě nɔ̀mɔ̀ìn kpáá-ɖɛ̀-cɛ̃-nyɔ̀ ɓěɔ̀ xwɛ́-gmàà ɓěɔ̀ xwa, kɛɛ ɓě ɓǎ nììn ɓǎ ɓěɔ̀ mɔ̀ nyɔ ɖáɓá ma wa. 48Ɖɛ ɓě ɓɛ́ ɓě nyuà kɛɛ tɛ̀mɛ̀ìn nyɔǔn dyí kà ɓɛ́ ɓě wɔ̃́ìn ɖɛ ɓě ɓɛ́ ɓě ɓǎ nììn ɓǎ ɓěɔ̀ nyu ma kɛɛ gboɛ. Sepóɛɖé wa mɔ̀ nyɔ ɖáɓá ma kpáá-ɖɛ̀-cɛ̃-nyɔ̀ ɓěɔ̀, ké ɓě mɔ̀ùn nɔ̀mɔ̀ìn waà xwɛ́-gmàà ɓěɔ̀ xwa. 49Ɔ jèɛɛ, Gèɖèpɔ́ɔ̀ cɛ̃ ma ɖɛ nìà kɛ ɖé ɔ hwòɖǒ-fɔ̀nɔ̀-fɔ̀nɔ̀ɔ̀ mú, ké ɔ ɖá, ‘Ní mu kpáá-ɖɛ̀-cɛ̃-nyɔ̀ ɓě kè àpɔ́sò ɓě wa gbo ɖoɓoùn. Wa mu ɖíɛ́ ɓě ɖáɓáùn, ké wa mu ɖíɛ́ ɓě gǎ dyéìn.’ 50Ɔ nyuɛ náa, ɓɛ́ ɓě ké kpáá-ɖɛ̀-cɛ̃-nyɔ̀ séín ɓě kɔ̃̀ nyɔmɔɔ ɓɛ́ wa wáɖáìn ma dyi sɔ̀ìn ɖé ɓóɖó-kpàà gbɔ-dè-dè múɛɛ kpa dyí ɖú. 51Ɔ mɔ̀ sɔ̀ìn ɖé Éɓò nììn nyɔmɔɔ wáɖáìn zɔ̃̌ɔ̀ kà dyiɛɛ gbo, ɓɛ́ ɔ ké Zɛ́kɔ̀wáɖádyà nììnɔ̀ gbo dyiɛ. Ɔ mɔ̀ nyɔ ɓɛ́ wa ɖáɓáìn zɔ̃̌ɔ̀ kà ɖé sáa-kɔ̃-zàìn-gbààɔ̀ kè Gèɖèpɔ́ɔ̀ gbǒɔ̀ pṹa kɛ. Ǹdye, ḿ cɛ̃ɛ ɓě gbo kà ɓɛ́ ɓě mu waà kpa dyí ɖúùn wɛ̃.

52“Nyɔ-gma-tɛ̀mɛ̀ìn-nyɔ̀ ɓě, gboò-wùɖù nì ɓě kɔ̃. Ɓě ɖǎ kaàìn-ɖɛ̀ ɓɛ́ ɔ kaà fɔ̀nɔ̀-hwòɖǒɛ̀ gbǒ-wɔ̃̀ kɛɛ dyí ɖú. Ɓě mìɔùn se ɖé muɛ ɓɛ́ìn, ké ɓě kpɔ̃ nyɔ ɓě nì vɔ̃uń ɓɛ́ wa ké ɖé dyáa dyí.”

53Ti ɓɛ́ Jízɛ̀ sɔ̀ ma ɓó dyíɛɛ, Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ dè ma ɔ gbo vɔ̃ɔ gbɔ, ké wa diè ma ɔ ɖɛ ɓáún-ɓáún dyi. 54Ɔ nì kà wa gbǎ ma kà xwáɖá, ɓɛ́ wa ké ma kà ɔ kpɔ̃ ɖé ɔ cɛ̃ɛ-ɖɛ̀ ɓěɔ̀ múɛ.

Currently Selected:

Ɖúù 11: ƁB02

Highlight

Copy