Ɖúù 10
10
Jízɛ̀ ɖoɓo nyɔ-kpò kpáɖá-nyɔ tã ɓaɖa-bùè sè sɔ̃́
1Sɔ̀ìn ɓóɛ gboɛɛ, Bounɓoɔ̀ gã ma nyɔ-kpò kpáɖá-nyɔ tã ɓaɖa-bùè sè sɔ̃́ ɖe, ké ɔ ɖoɓo ma wa sɔ̃́-sɔ̃́ ɖé ɔ dyúa, ɖé hwɔɖɔ séín ɔ kè dà séín ɓɛ́ ɔ mìɔùn mu ma mùìn nyɛ. 2Ké ɔ cɛ̃ɛ ma wa gbo, ké ɔ ɖá, “Mɔɔ́ ɖǎà kɔ́ɛɛ vò dyí mìɔ, kɛɛ ɔ cɛ̃-nyɔ̀ ɓěɔ̀ se dyí vò. Ɓě mɛ ɓaà nyɔ kɔ̃̀à geɖeɔ̀ wuɖuíɛ, ɓɛ́ ɔ ké kũ̀à-nyɔ̀ ɓáún-ɓáún tò, ɓɛ́ wa ké ɔ mɔɔ́ɔ̀ cɛ̃. 3Ɓě mɛ muá. Gmɔ̀ nɔ̄, ḿ nì ɓě tòɛ̌n kà nyɔ tòà ɓáɖáá-dyù ɓě ji ɓě hwìɛ̀ kɛ. 4Ɓěǐn ɖá ɓɛ́ ɓě ké wíɖí-mú-po-ɖɛ̀ kè ɓɔ̀ɔ̌ ɔ kè bǎ ɖò kpa. Ɓěǐn ɖá ɓɛ́ ɓě ké nyɔ ɖò nyíɔún zà ɓó hwìèɔ̀ kɔ̃. 5Ɓě dyi gbǒ ɖò zɔ̃̌ muín, ɖɛ kĩ́ín-kĩ́ín ɓě mɛ cɛ̃ɛ, ɔ kɛ̀. Ɓě mɛ ɖá, ‘Gìɖìǐ mɛ nì ɓě kɔ̃.’ 6Ɔ jǔ ké nyɔ ɖɛ̀ɓɛ̀ gìɖìǐ múɛɛ ɖò dyi ɖé gbǒɔ̀ mú nìǐn, nìí, gìɖìǐ mɛ sè ɓó ɔ gbo. Ɔ se ná nìǐn, gìɖìǐ mɛ ɓɔ́ ɓó ɔ gbo nìɛ̀. 7Ɓě mɛ sè gbǒ dyúáɖò mú. Ɓě mɛ ɖi ɖɛ ɓě ɓɛ́ wa nyí ɓěɛ, ké ɓě mɛ ná ɖɛ ɓě ɓɛ́ wa nyí ɓěɛ. Sepóɛɖé kũ̀à-nyu-nyɔ̀ɔ̀ ɓéɖé ɓɛ́ ɔ ké ɔ pɛ́ɛ̀-ɖɛ̀ dyé. Ɓěǐn ɖá ɓɛ́ ɓě ké gbǒ kà kò ɖò ɓě mú pɛ̃́ɛ kpa. 8Ɓě dyi hwɔɖɔ ɖò mú mu, ké wa dyi ɓě jè dyi kpɔ̃ ní, nìí, ɓě mɛ ɖi ɖɛ ɓě, ɓɛ́ wa mu ɓě dyúa dyàùn wɛ̃. 9Ɓě mɛ kánáìn ɖé wɛ́-nyɔ̀ ɓěɔ̀ dyi, ɓɛ́ ɓě kéɛ wa gbo cɛ̃, ɓɛ́ ɓě ké níiń, ‘Gèɖèpɔ́ɔ̀ kã́á-ɓòɖòɔ̀ ɖǎ ɓě bũ̌in xwɛ̃́ìn.’ 10Kɛɛ ɔ jǔ ké ɓě dyi hwɔɖɔ ɖò dyá, ké wa se ɓě jè dyi kpɔ̃ ní, nìí, ɓě mɛ mu ɖé hwɔɖɔɔ̀ píé hwòɖǒǔn, ɓɛ́ ɓě ké níiń, 11‘À ɓaɖa ɓoún, ɓɛ́ ɓóɖó nì à ɓo xwíɖíiɛɛ ké dyi wáɖáìn, ɓɛ́ ɔ ké ɓě zaa kpɔ̃̀ìn. Kɛɛ ɖɛ ɓě mɛ dyuò dyíɛɛ kɛà kɛ̀. Gèɖèpɔ́ɔ̀ kã́á-ɓòɖòɔ̀ ɖǎ ɓě bũ̌in xwɛ̃́ìn.’ 12Ḿ cɛ̃ɛ ɓě gbo, ɔ mu póɖó zàùn ɓó Sáɖɔ̀ùn-hwɔ̀ɖɔ̀ɔ̀ bìì ɓó wéa ɓaɖa, ké ɔ mu hwɔɖɔɔ̀ mɔ̀ùn jè dyí ziìn.
Hwɔɖɔ ɓě kɔ̃̀ mú ɓɛ́ nyɔ ɓě se jǎà poɛ
(Máfíò 11:20-24)
13“Kɔ̀wáɖázììn-hwɔ̀ɖɔ̀ɔ̀ nyɔ ɓě, gboò-wùɖù nì ɓě kɔ̃. Bɛ̀séɖà-hwɔ̀ɖɔ̀ɔ̀ nyɔ ɓě, gboò-wùɖù nì ɓě kɔ̃. Ɔ jǔ ké nyɔ ɓě nì ma kà ɖé Táà-hwɔ̀ɖɔ̀ɔ̀ kè Zíɖɔ̀ùn-hwɔ̀ɖɔ̀ɔ̀ múɛɛ dyi ma zɛ̃̀ìn-ɖɛ̀ jĩ̀ kà dyí ɓɛ́ ɓě dyéà nɔ̄ ɓěɛ̀ hwɔɖɔ ɓěɔ̀ múɛɛ dyé ní, nìí, wa muɔ́ má waà nàmàǔn-kpèɖè ɓěɔ̀ dyi táàùn. Wa muɔ́ má ɖɔ-zɔ̃̀ ɓě mú poùn, ké wa muɔ́ má tĩ́ɔ-pɛ̀ɛ̀ mú dyi kòùn. 14Gèɖèpɔ́ɔ̀ mu Táà-hwɔ̀ɖɔ̀ɔ̀ kè Zíɖɔ̀ùn-hwɔ̀ɖɔ̀ɔ̀ nyɔ ɓěɔ̀ wìì kɔ̃ ɓéɖéìn ɓó zaa-wɔ̃-po-wèɔ̀ ɓaɖa, ké ɔ mu ɓě mɔ̀ùn dyí ziìn. 15Ɓě mɔ̀ Kɔ̀pánìà-nyɔ̀ ɓěɛɛ, ɓěɛ̀ hwòɖǒ ɖá ɓě ɓɛ́ìn ɓě mìɔùn dyií ɖúɛ, ɓɛ́ ɓě ké ɖé dyɔún nyini, kɛɛ Gèɖèpɔ́ɔ̀ mu ɓě ɓíɖíi poùn ɖé dɛ̀ ɓɛ́ nyɔ ɓě ɖǎà mɛ́ɛ nìà kɛ.
16“Ní ɖeín-nà-nyɔ̀ ɓě, nyɔ séín ɓě tò ɓěɛ̀ wuɖuɔ̀ ɖùǔ gboɛɛ, wa tò ní wuɖuɔ̀ ɖùǔ gbo. Nyɔ séín ɓě ɓɔ́ ɓěɛɛ, wa ɓɔ́ ḿ, ké nyɔ séín ɓě ɓɔ́ ḿ wɛ̃ɛ ɓɔ́ nyɔ ɖoɓoà ḿ wɛ̃ɛ ní.”
Nyɔ-kpò kpáɖá-nyɔ tã ɓaɖa-bùè sè sɔ̃́ ɓěɔ̀ kɔ́ìn ɖe
17Ti ɓɛ́ nyɔ-kpò kpáɖá-nyɔ tã ɓaɖa-bùè sè sɔ̃́ ɓěɔ̀ kɔ́ìn ma ɖeɛɛ, wa kpá ma múàǔn, ké wa ɖá, “Bounɓo, zùù gbà ɓěɔ̀ mɔ̀ùn nyu à wuɖu ɖé nì nyɛ́nɛ́ɔ̀ mú ɖekè.”
18Ké Jízɛ̀ cɛ̃ɛ ma wa gbo, ké ɔ ɖá, “Ḿ dyéɛ ké Nɔɔ́-nàmàǔn ɓuɖu ma ɖé dyɔún. Ɔ ɖé ɓuɖu-ɓuɖuɔ̀ nì ma kà wɛ́ɖɛ́-wɛ́ɖɛ́ poà kɛ. 19Gmɔ̀ nɔ̄, ḿ ɖǎ ɓě kpé nyí, ɓɛ́ ɓě ké sɛ kè gĩ́á ɓě kɔ̃ sí. Ḿ ɖǎ ɓě kpé nyí ɖé Nyɔ-mú-nyɛ́-nyɔ̀ɔ̀ kpé séín ɓěɔ̀ kɔ̃in. Ɖɛ ɖò se ɓě puàǎ mu fɔɔ. 20Kɛɛ kà ɓɛ́ zùù gbà ɓěɔ̀ nyuà ɓě wuɖuɛɛ, ɔ ní ɖá ɓɛ́ ɔ ké ɓě múàǔn po. Ɖɛ mɛ po ɓě múàǔn wɛ̃ɛ, ɔ mɔ̀ kà ɓɛ́ ɓěɛ̀ nyɛ́nɛ́ ɖǎ céè ɖé dyɔún wɛ̃.”
Jízɛ̀ kpá múàǔn
(Máfíò 11:25-27; 13:16-17)
21Ɓó tia ɓaɖaa, Zùù Hwɛ̀ǐn-hwɛ̀ǐnɔ̀ nyuɛ ké Jízɛ̀ kpá ma múàǔn, ké ɔ ɖá, “Ḿ Ɓǎ, mɔ̀ mɔ̀ nyɔ kɔ̃̀à dyɔɔ̀ kè ɓóɖó-kpàà wuɖuíɛɛ, ḿ po m̀ zùo, sepóɛɖé ɖɛ ɓě ɓɛ́ m̀ vǐè ma nyɔ ɓě ɓɛ́ wa dyuò céè-ɖɛ̀ pàɖǎ kɛ kè hwòɖǒ-fɔ̀nɔ̀-nyɔ̀ ɓěɔ̀ dyíɛɛ, m̀ ɖǎ wa nyɔ ɓě se ɖɛ dyuò wɛɛ dyí tɛ̀mɛ̀ìn. Ǹdye, ḿ Ɓǎ, m̀ mìɔùn nììn hwòɖǒ wɔ̃́, ké m̀ nyuɛ ma náa.
22“Ḿ Ɓǎ ɖǎ ḿ ɖɛ séín xwáɖáún zàìn. Nyɔ ɖò se mɔ̄ mɔ̀à Dyúɔ̀ kɛɛ dyí dyuò, ɔ sèìn Ɓǎɔ̀ ɖòùn. Ké nyɔ ɖò se Ɓǎɔ̀ dyí dyuò, ɔ sèìn mɔ̄ mɔ̀à Dyúɔ̀ kɛ kè nyɔ ɓě ɓɛ́ mɔ̄ mɔ̀à Dyúɔ̀ kɛɛ mɔ́ ɓɛ́ ḿ ké ɔ dyí tɛ̀mɛ̀ìn nyɛɛ ɖòùn.”
23Hwɛ̀ ké Jízɛ̀ gmɔ̀ìn ma ɖé ɖeín-nà-nyɔ̀ ɓěɔ̀ gbo, ké ɔ cɛ̃ɛ ma wa gbo nyàà, ké ɔ ɖá, “Mana nì ɓě kɔ̃ ɓó ɖɛ ɓě ɓɛ́ ɓě dyéà kɛɛ jè, 24sepóɛɖé ḿ cɛ̃ɛ ɓě gbo kà kpáá-ɖɛ̀-cɛ̃-nyɔ̀ pàɖǎ kè kã́á pàɖǎ mɔ́ ɓɛ́ wa ké ma ɖɛ ɓě ɓɛ́ ɓě mɔ̀ùn dyéà kɛɛ dyéɛ, kɛɛ wa seɛ ma dyé. Ké wa mɔ́ ɓɛ́ wa ké ma ɖɛ ɓě ɓɛ́ ɓě mɔ̀ùn wɔ̃́à kɛɛ wɔ̃́, kɛɛ wa seɛ ma wɔ̃́.”
Sɛ̀mɛ́ɖìà-gàà kpeɖe nɔ̀mɔ̀ dyíinɔ̀ jè
25Wé ɖòɛ̀ ɓaɖaa, nyɔ-gma-tɛ̀mɛ̀ìn-nyɔ̀ ɖò dyi ma, ɓɛ́ ɔ ké ma Jízɛ̀ mú dɔ̃̌, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, ɖɛ́ ḿ mɛ nyu, ɓɛ́ ḿ ké sè-ná-sèɛ̀ fɛ̀ɛ̀ ɓéɖéɛ́?”
26Ké Jízɛ̀ diè ma ɔ dyi, ké ɔ ɖá, “Ɖɛ́ céè ɖé Gèɖèpɔ́ɔ̀ gma-cèè-ɖɛ̀ɔ̀ múɛ́? M̀ dyi wa wuɖuún zàǐn, xwɛ̌ nì nyuɛ múin wɔ̃́ɔ kɛ́?”
27Ké gàaɔ̀ ɖá, “M̀ mɛ ɖɛ̀ɓɛ̀ Bounɓo mɔ̀à nì Gèɖèpɔ́ɔ̀ kɛɛ mú hwòɖǒɛ̀-ɖé-hwɛ̀-kà ɖé nì kpé séín mú ɔ kè ɖé nì hwìɖǐi-poìn-ɖɛ̀ séín mú. Ké m̀ mɛ ɖɛ̀ɓɛ̀ m̀ mǔè ɖò mú kà m̀ ɖɛ̀ɓɛ̀à m̀ mìɔùn múɛ.”
28Ké Jízɛ̀ ɖá, “M̀ ɖǎ ɖé wuɖu zà nɔ̀mɔ̀ dyíin. Nyu ɖɛ nìà kɛ, ké nì mu cĩ́ìn.”
29Kɛɛ gàaɔ̀ mɔ́ ɓɛ́ ɔ kéɛ nyɔǔn dyí tɛ̀mɛ̀ìn kà ɓɛ́ ɔ nyuu-ɖɛ̀ sɛ́ɖɛ́ìn ma dyíɛ. Ɔ jèɛɛ, ɔ diè ma Jízɛ̀ dyi, ké ɔ ɖá, “Nyɛ́ mɔ̀à ḿ mǔèɔ̀ kɛ́?”
30Ké Jízɛ̀ zà ma ɖé wuɖu, ké ɔ ɖá, “Gàa ɖò sɔ̀ìn ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké ɔ nì ma ɖé Jɛ́ɖèkóò-hwɔ̀ɖɔ̀ɔ̀ mú muɛń. Ké nyɔ-ɖɛ-gana-xwa-zàìn-nyɔ̀ ɓě wáɖá ma ɔ kɔ̃. Wa zà ma ɔ ɖɔún, ké wa ɓaɖa ma ɔ. Ɔ táà ma mɛ́ɛ, ké wa sè ma ɓó ɔ, ké wa mu wa ɖɛ. 31Ɔ nì ma náa, sáa-zà-nyɔ̀ ɖò nì ma hwìèɔ̀ kpauń. Ti ɔ dyé ma gàaɔ̀ kɛɛ, ɔ zĩ̀ìn ma ɖé hwìè-pĩ̀à tɔ̀ɔ̀ kɔ̃. 32Ké kǎà Ɖíìváà-gàà ɖò mɔ̀ùn nyini ma ɓó. Ɔ mu, ké ɔ ɓɛ̀ɖɛ̀ ma gàaɔ̀ kɔ̃in, ké ɔ zĩ̀ìn ma hwìè-pĩ̀à tɔ̀ɔ̀ kɔ̃. 33Kɛɛ Sɛ̀mɛ́ɖìà-gàà ɖò ɓɛ́ ɔ nì ma hwìèɔ̀ kpauń wɛ̃ɛ mu ma dɛ̀ ɓɛ́ gàaɔ̀ pɛ̃́ ma kà dyiɛ. Ti ɔ dyé ma gàaɔ̀ kɛɛ, wìì nyu ma ɔ mìɔ. 34Ɔ jèɛɛ, ɔ mu ma ɓó gàaɔ̀ gbo, ké ɔ po ma ɔ ɓaɖa-bɛ̃̀ ɓěɔ̀ cáná kè wã́ìn dyí, ké ɔ bĩìn ma ɔ ɖɔ dyi. Ké ɔ kòìn ma gàaɔ̀ ɔ mìɔùn nììn jǎkasìɔ̀ kɔ̃ún, ké ɔ kpa ma ɔ ɖé ɖéè-gbò ɖò zɔ̃̌, ké ɔ gmɔ̀ ma ɔ dyí. 35Wéɔ̀ nyɔ kɔ ma ɓó dyíɛɛ, ɔ ɖú ma séɓàɖà-pĩ̀à sɔ̃́ dyí, ké ɔ nyíɛ ma ɖéè-gbòɔ̀ dyí-gmɔ̀-nyɔ̀ɔ̀. Ké ɔ cɛ̃ɛ ma ɔ gbo, ké ɔ ɖá, ‘Gmɔ̀ ḿ bìì gàa nìà kɛ dyí. Ké ti ní mu nɔ̄ ɖe dyiìn nyɛɛ, ní mu ɖɛ séín ɓě ɓɛ́ m̀ peɖe ɓó nyɔ nìà kɛ kɔ̃in ɖeɛɛ ɖe tòùn.’ ”
36Hwɛ̀ ké Jízɛ̀ diè ma ɔ dyi, ké ɔ ɖá, “M̀ poìn hwìɖǐiɛɛ, nyɔ tã ɓě nìà kɛ, waà nyɛ́ mɔ̀ ma gàa ɓɛ́ nyɔ-ɖɛ-gana-xwa-zàìn-nyɔ̀ ɓěɔ̀ wáɖá ma kà kɔ̃ɛɛ mǔè kɛ́?”
37Ké gàaɔ̀ ɖá, “Ɔ mɔ̀ nyɔ dyé ma kà ɔ wìǐn nyɛ.”
Ké Jízɛ̀ cɛ̃ɛ ma ɔ gbo, ké ɔ ɖá, “Mu, ɓɛ́ m̀ ké ɖɛ dyúáɖòɔ̀ nyu ɖekè.”
Jízɛ̀ té Matá kè Meɖé gboi
38Ti ɓɛ́ Jízɛ̀ kè ɔ ɖeín-nà-nyɔ̀ ɓěɔ̀ nì ma muɛń nyɛɛ, wa dyá ma hwɔɖɔ ɖò. Ké màa ɖò kɔ̃̀ nyɛ́nɛ́ mɔ̀ ma Matá kɛɛ kpɔ̃ ma Jízɛ̀ jè dyi ɖé ɔ ɓíɖí-taún. 39Matá ɓéɖé ma ɖíí-màà ɖò kɔ̃̀ nyɛ́nɛ́ mɔ̀ ma Meɖé kɛ. Meɖé kò ma Bounɓoɔ̀ ɓo zɔ̃̌ dyi, ké ɔ tò ma ɔ wuɖu ɓěɔ̀ ɖùǔ gbo. 40Ɓó tia ɓaɖaa, fũ̀à-fṹá nì ma Matá nyuɛń ɓó kũ̀à kúɖúú ɓě ɓɛ́ ɔ ɓéɖé ɓɛ́ ɔ ké ma nyuɛɛ jè. Ké ɔ mu ma Jízɛ̀ gbo, ké ɔ ɖá, “Bounɓo, dyé kà ḿ ɖíí-mààɔ̀ ɖǎ ḿ dyi táà ɓɛ́ ḿ ɖòǔn kéá kũ̀à séín ɓěɔ̀ nyuɛ. M̀ seɛ ɖéɛ jè gbo kɔ̃̀ɔ̀? Cɛ̃ɛ ɔ gbo, ɓɛ́ ɔ ké ḿ gbo kpáuń dyi.”
41Kɛɛ Bounɓoɔ̀ zà ma ɖé wuɖu, ké ɔ ɖá, “Matá, Matá, nì hwòɖǒɔ̀ gbǎìn dyií, ké fũ̀à-fṹá nyu m̀ ɓó ɖɛ ɓáún-ɓáún jè. 42Kɛɛ ɖɛ m̀ kɔ̃̀ ɓɛ́ m̀ ké ɓéɖéɛɛ mɔ̀ ɖɛ dyúáɖò nyɛ̀nɛ̀ɛ̀. Meɖé ɖǎ ɖɛ nɔ̀mɔ̀ dyíinɔ̀ gã, ké nyɔ ɖò seɛ ɔ xwa zàà ɓɛ́ìn.”
Currently Selected:
Ɖúù 10: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
