Ɖúù 9

Jízɛ̀ ɖoɓo ɖeín-nà-nyɔ̀ ɓaɖa-bùè sè sɔ̃́ ɓěɔ̀

(Máfíò 10:5-15; Máà 6:7-13)

1Sɔ̀ìn ɓóɛ gboɛɛ, Jízɛ̀ ɖá ma ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀, ké ɔ nyí ma wa kpé, ɓɛ́ wa ké zùù gbà séín ɓě kè wɛ́-dù kò-kò ɓě wɔ̃ zi, ɓɛ́ wa ké nyɔǔn dyi kánáìn. 2Ké ɔ ɖoɓo ma wa, ɓɛ́ wa ké ma Gèɖèpɔ́ɔ̀ kã́á-ɓòɖòɔ̀ jè zio po, ɔ kè ɓɛ́ wa ké wɛ́-nyɔ̀ ɓě dyi kánáìn. 3Ɔ cɛ̃ɛ ma wa gbo, ké ɔ ɖá, “Ɓě dyi muɛń nìǐn, ɓěǐn ɖá ɓɛ́ ɓě ké ɖɛ ɖò kpa. Ɓě ní kpa kùì-kpà ɖò mɔɔ ɓɔ̀ɔ̌ ɖò mɔɔ bɛɖɛɛ̀ ɖò mɔɔ wíɖí ɖò. Ɓě ní ɖá ɓɛ́ ɓě ké wáɖá-ɖɔ̀ sɔ̃́ kpa. 4Wa dyi ɓě jè dyi kpɔ̃ ɖé gbǒ ɖò mú ní, nìí, ɖéɛ̀ ɓě mɛ gã̀ dyi tee, ɓɛ́ ɓě ké hwɔɖɔɔ̀ mú sɔ̀ hwɛ̀. 5Ké dà séín ɓɛ́ wa se ɓě jè dyi kpɔ̃ɔ́ muɛɛ, ɓě dyiá ɓó sɔ̀ǔn nìǐn, nìí, ɓě mɛ ɓaɖa ɓoún, ɓɛ́ ɓóɖó nì ɓě ɓo xwíɖíiɛɛ ké dyi wáɖáìn, ɓɛ́ ɔ ké wa zaa kpɔ̃̀ìn.”

6Ké wa mu ma, ké wa kpa ma bɔ̃̌ nɔ̀mɔ̀ dyíinɔ̀ cɛ̃ɛ, ké wa kpa ma nyɔǔn dyi kánáìn ɖé hwɔɖɔ ɓěɔ̀ mú dà séín.

Ɖɛ Hɛ́wɔ̀ɖɔ̀ cɛ̃ ma kɛ

(Máfíò 14:1-12; Máà 6:14-29)

7Ɓó tia ɓaɖaa, Hɛ́wɔ̀ɖɔ̀ mɔ̀à Gáɖàɖíì-ɓòɖòɔ̀ nàìn-nyɔ̀ɔ̀ kɛɛ wɔ̃́ ma ɖɛ séín ɓě ɓɛ́ Jízɛ̀ nì ma nyuɛń nyɛ, ké wa kpèìn ma ɔ hwìɖǐi, sepóɛɖé nyɔ ɖíɛ́ ɓě cɛ̃ɛ ma kà ɓɛ́ Jɔ̃́ɔ́ nyɔ-níɔ-po-nyɔ̀ɔ̀ ɖǎ ma gĩɔ wóɖóɛ, 8ké nyɔ ɖíɛ́ ɓě ɖá Ìɖáájɔ̀ ɖǎ xwáɖáún wóɖó, ké ɖíɛ́ ɓě ɖá kpáá-ɖɛ̀-cɛ̃-nyɔ̀ ɓě nìǒ zɔ̃̌ɔ̀ kɛɛ ɖò ɖǎ ma gĩɔ wóɖó. 9Ké Hɛ́wɔ̀ɖɔ̀ ɖá, “Ḿ zà ma Jɔ̃́ɔ́ dúí, kɛɛ nìí, gàaɔ̀ nyɛ́ kɔ̃̀ bɔ̃̌ ḿ wɔ̃́à kà kɛ́?” Ké ɔ vɔ̃ ɓɛ́ ɔ ké ma Jízɛ̀ dyé.

Jízɛ̀ nyí gàa táázĩ̀ìn hm̀m̌ ɖii-ɖɛ̀

(Máfíò 14:13-21; Máà 6:30-44; Jɔ̃́ɔ́ 6:1-14)

10Ti ɓɛ́ àpɔ́sò ɓěɔ̀ dyi ma Jízɛ̀ gbo ɖeɛɛ, wa zaìn ma ɖɛ séín ɓě ɓɛ́ wa nyu ma kɛɛ jè ɔ gbo kɔ̃in. Ké ɔ kè wa ɖòùn mu ma ɖé hwɔɖɔ ɖò ɓɛ́ wa ɖáìn Bɛ̀séɖà kɛɛ mú. 11Ti ɓɛ́ nyɔ kúɖúú ɓěɔ̀ wɔ̃́ ma ɔ jè kɛɛ, wa sí ma ɔ kíɖíí. Ké Jízɛ̀ kpɔ̃ ma wa jè dyi, ké ɔ cɛ̃ ma Gèɖèpɔ́ɔ̀ kã́á-ɓòɖòɔ̀ jè wa gbo, ké ɔ kánáìn ma nyɔ ɓě mɔ́ ma dyi-káná-káná kɛɛ dyi.

12Ti ɓɛ́ dyóɖóɔ̀ nìǎ ma ziɛń nyɛɛ, ɔ ɖeín-nà-nyɔ̀ ɓaɖa-bùè se sɔ̃́ ɓěɔ̀ dyi ma ɔ gbo, ké wa ɖá, “Ɖoɓo nyɔ ɓěɛ̀ ɖe, ɓɛ́ wa ké hwɔɖɔ ɓě kè hwɔɖɔ-kpàǎ ɓě nìà à ɖeiɛɛ mú mu, ɓɛ́ wa ké waà ɖii-ɖɛ̀ kè pɛ̃́-naín dyi mɔ́, sepóɛɖé nɔ̄ ɖé mɔ̀ dà kpái-kpái.”

13Kɛɛ Jízɛ̀ cɛ̃ɛ ma wa gbo, ké ɔ ɖá, “Ɓě nyí wa ɖɛ ɖò, ɓɛ́ wa kéɛ ɖi.”

Ké wa ɖá, “Ɖɛ à ɓéɖé nyɛ̀nɛ̀ɛ̀ kɛɛ mɔ̀ bɛɖɛɛ̀-kpò hm̀m̌ kè zimii-dyù sɔ̃́, ɔ sèìn m̀ mɔ́ ɓɛ́ à ké ɖii-ɖɛ̀ dɔ̃ɔ́ mu ɓó nyɔ kúɖúú ɓěɛ̀ bìì hwɛ̀.” 14Gàa ɓě nì ma ɓóɛɛ ɓɛ́ìn ma gàa táázĩ̀ìn hm̀m̌ jǔɛ.

Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Wa mɛ kpa kpoo mú kpáa, ɓɛ́ wa ké dyi kò. Kpoo dyúáɖò múín, nyɔ-kpò kpáɖá-nyɔ sɔ̃́ ɓaɖa-bùè mɛ nì ɖé.”

15Ké ɖeín-nà-nyɔ̀ ɓěɔ̀ nyuɛ ma náa. Wa nyuɛ ké nyɔǔn séín kò ma dyi. 16Hwɛ̀ ké Jízɛ̀ ɖú ma bɛɖɛɛ̀-kpò hm̀m̌ɔ̀ kè zimii-dyù sɔ̃́ɔ̀ dyí, ké ɔ gmɔ̀ ma ɖé dyií, ké ɔ po Gèɖèpɔ́ɔ̀ zùo ɓó ɖii-ɖɛ̀ɔ̀ jè. Ké ɔ jaɖaìn bɛɖɛɛ̀-kpò ɓěɔ̀ kpói, ké ɔ nyí ma wa ɖeín-nà-nyɔ̀ ɓěɔ̀, ɓɛ́ wa ké ma wa nyɔ kúɖúú ɓěɔ̀ múin geìn. 17Ké nyɔ ɓěɔ̀ séín ɖi ma ɖɛ, ké wa ɖoɓo ma. Ké wa poìn ma ɖii-ɖɛ̀ɔ̀ nyɔ sè dyiɛɛ dyí, ké ɔ nyu ma tìě-wè ɓaɖa-bùè sè sɔ̃́.

Píɖɛ̀ cɛ̃ɛ kà Jízɛ̀ mɔ̀ Kɛ́ɖɛ́ìɔ̀ kɛ

(Máfíò 16:13-19; Máà 8:27-29)

18Ti ɖòɛ̀ ɓaɖaa, Jízɛ̀ ɖòùn nì ma ɓaàǔn. Ɔ ɖeín-nà-nyɔ̀ ɓěɔ̀ nì ma ɓó ɔ gbo, ké Jízɛ̀ diè ma wa dyi, ké ɔ ɖá, “Nyɔǔn ɓě dyi ní jè cɛ̃ín, nìí, nyɛ́ wa ɖá ḿ jǔɛ́?”

19Ké wa cɛ̃ɛ ma ɔ gbo, ké wa ɖá, “Nyɔ ɖíɛ́ ɓě ɖá m̀ mɔ̀ Jɔ̃́ɔ́ nyɔ-níɔ-po-nyɔ̀ɔ̀. Ɖíɛ́ ɓě mɔ̀ùn ɖá m̀ mɔ̀ Ìɖáájɔ̀, ké ɖíɛ́ ɓě ɖá m̀ mɔ̀ kpáá-ɖɛ̀-cɛ̃-nyɔ̀ ɓě nìǒ zɔ̃̌ɔ̀ kɛɛ ɖò, ké m̀ ɖǎ gĩɔ wóɖó.”

20Hwɛ̀ ké Jízɛ̀ diè ma wa mɔ̀ùn dyi, ké ɔ ɖá, “Nyɛ́ ɓě mɔ̀ùn ɖá ḿ jǔ kɛ́?”

Ké Píɖɛ̀ zà ma ɖé wuɖu, ké ɔ ɖá, “M̀ mɔ̀ Kɛ́ɖɛ́ì ɓɛ́ Gèɖèpɔ́ɔ̀ ɖoɓoà kɛ.”

Jízɛ̀ cɛ̃ɛ ɔ ɖeín-nà-nyɔ̀ ɓěɔ̀ gbo kà ɔ mu gǎ dyéìn ɓɛ́ ɔ ké mɛ́ kɛ

(Máfíò 16:20-28; Máà 8:30–9:1)

21Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo kóɖó-kóɖó, ɓɛ́ wa ní kɔ̃̀ɔ̀ ɖà nyɔ ɖò gbo cɛ̃. 22Ké ɔ ɖá, “Mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ, ḿ ɓéɖé ḿ ké gǎ pàɖǎ dyé. Júù-nyɔ̀ vɛ̀nɛ̀ ɓěɔ̀ kè sáa-zà-nyɔ̀ kpa ɖɛ ɓěɔ̀ ɔ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ mu ḿ ɓɔ́ùn, ké wa mu ḿ ɖáɓáùn. Kɛɛ ní mu gĩɔ wóɖóùn ɓó wéɔ̀ tã nììnɔ̀ xwíníín.”

23Hwɛ̀ ké Jízɛ̀ cɛ̃ɛ ma nyɔ séín ɓěɔ̀ gbo, ké ɔ ɖá, “Nyɔ ɖò dyi mɔ́ ɓɛ́ ḿ kè ɔ ké mú naìn ní, nìí, ɔ mɛ táà ɔ hwòɖǒɛ̀-mɔ́ɔ́-ɖɛ̀ dyi, ké ɔ mɛ ɖú ɔ kɔ́ɖɔ́sìɔ̀ dyí wé séín, ɓɛ́ ɔ ké ḿ kíɖíí sí. 24Nyɔ mɔ̀ nyɔ ɓɛ́ ɔ kàmà ɔ fɛ̀ɛ̀ɔ̀ jè kɛɛ, ɔ fɛ̀ɛ̀ɔ̀ mu ɔ xwa sɔ̀ùn. Ké nyɔ mɔ̀ nyɔ ɓɛ́ ɔ fɛ̀ɛ̀ɔ̀ mu ɔ xwa sɔ̀ùn ɓó ní jèɛɛ, ɔ muɛ póìn. 25Nyɔ ɖò dyi ɖɛ séín nì ɓóɖó-kpà gànáà kɔ̃ɛɛ kɔ̃̀, ké ɔ dyi ɔ mìɔùn ɓóɖóɔ̀ dyí tò, ké ɔ dyi xwáɖáún sèǐn, nìí, ɖɛ́ mɔ̀ kpáná ɖò ɔ muɛ kɔ̃ún dyéìn nyɛ́? 26Ní jè kè ní wuɖuɔ̀ jè dyi nyɔ ɖò dɛ̃ nyùìn ní, nìí, dɛ̃ mu mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ nyuùn ɓó nyɔɔ̀ mɔ̀ùn jè ɖekè, ti ɓɛ́ ní muà ní dĩ́ín-dĩ̀ìnɔ̀ kè ḿ Ɓǎà dĩ́ín-dĩ̀ìnɔ̀ ɔ kè ínjà hwɛ̀ǐn-hwɛ̀ǐn ɓěɔ̀ dĩ́ín-dĩ̀ìnɔ̀ mú dyììn nyɛ. 27Ḿ cɛ̃ ɓě jǎà gbo, nyɔ ɖíɛ́ ɓě nì dà ɓě hwìɛ̀, ké wa se gĩɔ muɛ́ mu, ké wa mu Gèɖèpɔ́ɔ̀ kã́á-ɓòɖòɔ̀ dyéìn hwɛ̀.”

Jízɛ̀ zĩàìn gbo

(Máfíò 17:1-8; Máà 9:2-8)

28Ti ɓɛ́ Jízɛ̀ ɖǎ ma ɖɛ ɓěa cɛ̃, ké wé mɛ̀nɛ̌ìn-tã ɖǎ ma ziɛɛ, ɔ ɖú ma Píɖɛ̀ kè Jɔ̃́ɔ́ ɔ kè Jĩ́ìn dyí, ké ɔ mu ma ɖé toɖo ɖò dya, ɓɛ́ ɔ ké ma ɓaà. 29Ti ɓɛ́ ɔ nì ma ɓaàǔn wɛ̃ɛ, ɔ dyúa-kpàɔ̀ zàìn ma dyí, ké ɔ ɖɔ ɓěɔ̀ nì ma púú séɖéé. 30Wàɖà cá kɛɛ, gàa sɔ̃́ ɓě nì ma ɓó Jízɛ̀ gbo, ké wa kè Jízɛ̀ nì ma wùɖùɛ̌n. Wa mɔ̀ ma Mózè kè Ìɖáájɔ̀. 31Ti wa wóɖó ma xwáɖáún wɛ̃ɛ, wa ɖei dà séín fã ma ní. Wa kè Jízɛ̀ nì ma kà ɓɛ́ ɔ mu ma ɖɛ ɓɛ́ Gèɖèpɔ́ɔ̀ hwòɖǒɔ̀ po ma gbɔɔ nyuɛń fṹàùn wɛ̃ɛ jè cɛ̃iń. Ɔ mɔ̀, kà ɓɛ́ ɔ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú mɛ́ìn nyɛ. 32Píɖɛ̀ kè ɔ mǔè ɓě nì ma kà ɓó ɔ gboɛɛ nì ma mɔ́uń mìɔ. Ké wa wóɖó ma nyíɔún, ké wa dyé ma Jízɛ̀ɛ̀ fã-fãɔ̀ ɔ kè gàa sɔ̃́ ɓě nyànà ma kà ɓó ɔ gbo dyiɛ. 33Ti ɓɛ́ gàa sɔ̃́ ɓěɔ̀ nìǎ ma ɓó sɔ̀ǔn wɛ̃ɛ, Píɖɛ̀ cɛ̃ɛ ma Jízɛ̀ gbo, ké ɔ ɖá, “Bounɓo, ɔ nɔ̀mɔ̀ dyíin ɓɛ́ à ké dà nì. À mɛ po ɓeè-dyù tã, mɔ̀ùn ké dyúáɖò kɔ̃̀, ɓɛ́ Mózè ké dyúáɖò kɔ̃̀, ɓɛ́ Ìɖáájɔ̀ mɔ̀ùn ké dyúáɖò kɔ̃̀.” Píɖɛ̀ se ma ɖɛ ɔ cɛ̃ ma kà kɛɛ dyí dyuò cá.

34Ti ɓɛ́ ɔ nì ma wùɖùɛ̌n keɛɛ, púɛɛ, ní-kpò ɖò wóɖó ma xwáɖáún, ké ɔ ɓáìn ma wa kɔ̃in. Ti ɓɛ́ ní-kpòɔ̀ nì ma wa kɔ̃in dyiɛń nyɛɛ, ɖeín-nà-nyɔ̀ ɓěɔ̀ fɛ̃̀ìn ma ní. 35Ké wuɖu ɖò sɔ̀ìn ma ɖé ní-kpòɔ̀ mú, ké wuɖuɔ̀ ɖá, “Nyɔ nìà kɛ mɔ̀ ní Dyú-gàà ɓɛ́ ḿ ɖǎ gã kɛ. Ɓě mɛ tò ɔ gbo ɖùǔ.”

36Ti wuɖuɔ̀ kã́ ma dyíɛɛ, Jízɛ̀ ɖòùn nì ma ɓó. Ké ɖeín-nà-nyɔ̀ ɓěɔ̀ nì ma gìɖìǐ, ké wa se ma ɖɛ ɓě wa ɖǎ ma kà dyéɛɛ ɖò nyɔ ɖò gbo cɛ̃.

Jízɛ̀ zà zùù gbà gàa-dyù-gbɔ́ɔ́ ɖò mú

(Máfíò 17:14-18; Máà 9:14-27)

37Wéɔ̀ nyɔ kɔ ma ɓó dyíɛɛ, Jízɛ̀ kè ɔ ɖeín-nà-nyɔ̀ ɓěɔ̀ sɔ̀ ma ɖé toɖoɔ̀ dya, ké nyɔ kúɖúú ɓě kè Jízɛ̀ gmɔ̌ìn ma. 38Púɛɛ, gàa ɖò ɓɛ́ ɔ nì ma ɖé nyɔ kúɖúú ɓěɔ̀ hwìɛ̀ kɛɛ páná ma mú, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, ní ɓaà m̀ ní, dyé ní dyú-gààe. Ɔ mɔ̀ ní dyú-kpò dyúáɖò kpeé-kpeé. 39Zùù gbà ɖò nì ɔ mú. Zùù gbàɔ̀ ɖu ɔ, ké ɔ nyuɛ ké dyúɔ̀ páná mú, ké ɔ kpá kṹún, ké ɔ ɖu vúú. Ɔ puà dyúɔ̀ kánáá pū, ké ɔ se ɔ mú sɔ̀ɔ̀ mɔ́. 40Ḿ ɓaà má nì ɖeín-nà-nyɔ̀ ɓěɔ̀, ɓɛ́ wa kéɔ́ má zùù gbàɔ̀ ní dyúɔ̀ mú zà, kɛɛ wa seɛ nyuɛ ɓɛ́ìn.”

41Ké Jízɛ̀ zà ma ɖé wuɖu, ké ɔ ɖá, “Kē! Ɓě mɔ̀à nyɔ ɓě seà hwìɖǐǐ-taɓa-taɓa ɓéɖé, ké ɓě mɔ̀à hwòɖǒ-kɔ̃in-nyìnììn-nyɔ̀ ɓěɛɛ, xwɛ̌ ḿ mɛ nyuá ɓě gbo hwèɖèɛ̀n nyɛ́? Xwɛ̌ ḿ mɛ nyuá ɓěɛ̀ kpeɖe hwìɖǐi kùɛ̀n nyɛ́? Dyà nɔ̄ nì dyúɔ̀ ḿ gbo.”

42Ti ɓɛ́ dyúɔ̀ nì ma ɔ gbo dyiɛń nyɛɛ, zùù gbàɔ̀ ɖu ma dyúɔ̀, ké ɔ po ma ɔ kṹún. Kɛɛ Jízɛ̀ wùɖù ma zùù gbàɔ̀ gbo gana-kà, ké ɔ kánáìn ma dyúɔ̀ dyi, ké Jízɛ̀ nyí ma dyúɔ̀ ɔ ɓǎ ɖe. 43Ké nyɔ séín ɓěɔ̀ giniìn ma dyi ɓó Gèɖèpɔ́ɔ̀ kpé vɛ̀nɛ̀ɔ̀ jè.

Jízɛ̀ cɛ̃ ɔ mɛ́ jèɔ̀ ɖe

(Máfíò 17:22-23; Máà 9:30-32)

Ti ɓɛ́ nyɔ ɓěɔ̀ nì ma Jízɛ̀ɛ̀ nyuu-ɖɛ̀ ɓěɔ̀ jè hwìɖǐi poɛ̌n keɛɛ, ɔ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, 44“Wuɖu ɓě nìà kɛ mɛ kpá ɓě ɖùǔn. Wa mu mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ nyɔ ɓěɔ̀ xwaún dyi poùn.” 45Kɛɛ wa se ma ɖɛ ɓɛ́ ɔ cɛ̃ ma kà kɛɛ múin wɔ̃́, sepóɛɖé ɔ gàìn ma wa dyí, ɓɛ́ wa ní kɔ̃̀ ɖà ɔ múin wɔ̃́. Ké wa fɛ̃̀ìn ma ɓɛ́ wa ké ma ɔ ɖɛ nìà kɛ jè dyi diè.

Nyɔ mɔ̀ nyɔ kpa ɖɛ kɛ

(Máfíò 18:1-5; Máà 9:33-37)

46Wé ɖòɛ̀ ɓaɖaa, ɖeín-nà-nyɔ̀ ɓěɔ̀ ɖúɛ ma cɛ̃ kpàǐ ɖé wa mìɔùn hwìɛ̀, ɓá wa nyɔ mɔ̀ nyɔ kpa ɖɛ ké ɔ zi wa séín dyíɛɛ jè dyí. 47Kɛɛ Jízɛ̀ dyuò ma ɖɛ wa nì ma kà cɛ̃iń nyɛɛ dyí. Ɔ jèɛɛ, ɔ dyà ma dyú-gbɔ́ɔ́ ɖò, ké ɔ nyànàìn ma ɔ ɓó ɔ wáún dyi, 48ké ɔ cɛ̃ɛ ma wa gbo, ké ɔ ɖá, “Nyɔ mɔ̀ nyɔ ɓɛ́ ɔ kpɔ̃ dyú-gbɔ́ɔ́ nì kà kɛɛ jè dyi ɓó ní nyɛ́nɛ́ɔ̀ jèɛɛ, nìí, ɔ kpɔ̃ ní jè dyi. Ké nyɔ mɔ̀ nyɔ ɓɛ́ ɔ kpɔ̃ ní jè dyiɛɛ, ɔ kpɔ̃ nyɔ tòà ḿ wɛ̃ɛ jè dyi ɖekè. Sepóɛɖé nyɔ mɔ̀ nyɔ se ɖɛ kpa ɖé ɓě hwìɛ̀ kɛɛ, ɔ mɔ̀ nyɔ kpa ɖɛɔ̀.”

Nyɔ mɔ̀ nyɔ se ɓě gbo vɔ̃ɛɛ mɔ̀ ɓěɛ̀ nyɔ

(Máà 9:38-40)

49Wé ɖòɛ̀ ɓaɖaa, Jɔ̃́ɔ́ cɛ̃ɛ ma Jízɛ̀ gbo, ké ɔ ɖá, “Bounɓo, à dyé gàa ɖò, ké ɔ nì nyɔ ɖò zùù gbà mú zàǔn ɖé nì nyɛ́nɛ́ɔ̀ mú, ké à po ɔ ɓɔ́í ɔ ní kɔ̃̀ɔ̀ ɖà náa nyu, sepóɛɖé ɔ se à ɖò.”

50Kɛɛ Jízɛ̀ cɛ̃ɛ ma ɔ gbo, ké ɔ ɖá, “Ɓě ɓɔ́ ɔ ɓɔ́í poɛ. Ɔ mɛ nyuɛ, sepóɛɖé nyɔ mɔ̀ nyɔ ɓɛ́ ɔ se ɓě gbo vɔ̃ɛɛ mɔ̀ ɓěɛ̀ nyɔ.”

Sɛ̀mɛ́ɖìà-nyɔ̀ ɖíɛ́ ɓě ɓɔ́ Jízɛ̀

51Ti ɓɛ́ ɔ nìǎ ma ti nyuɛń ɓɛ́ Jízɛ̀ ké ma ɖé dyɔún muɛɛ, ɔ nyu ma hwòɖǒ, ké ɔ ɖú ma Jùɖúsɛ̀ɖɛ̀ìn-hwɔ̀ɖɔ̀ɔ̀ mú mu kpàǐ. 52Ɔ tò ma kíá ɓě ɖé ɔ dyúa. Ké wa mu ma, ké wa dyá ma Sɛ̀mɛ́ɖìà-nyɔ̀ ɓěɔ̀ hwɔɖɔ ɓěɔ̀ ɖò, ɓɛ́ wa ké ma ɖé ɖɛ séín ti dyéìn ɓó ɔ bìì. 53Kɛɛ nyɔ ɓě nì ma ɖéɛɛ se ma ɔ dyi kpɔ̃ɔ mɔ́, sepóɛɖé ɔ nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛń jè. 54Ti ɓɛ́ ɔ ɖeín-nà-nyɔ̀ Jĩ́ìn kè Jɔ̃́ɔ́ dyé ma ɖɛ nìà kɛɛ, wa ɖá, “Bounɓo, m̀ mɔ́ ɓɛ́ à ké ɖá, ɓɛ́ nyɛ ké ɖé dyɔún sɔ̀, ɓɛ́ ɔ ké wa ɖáɓáà.”

55Kɛɛ Jízɛ̀ cɛ́ɛ̀ ma xwa, ké ɔ po ma wa ɓɔ́í. [Ɔ ɖá, “Ɓě se zùùɔ̀ nyɔ kɔ̃̀ ɓě wuɖuíɛɛ dyí dyuò. Sepóɛɖé mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ se dyi, ɓɛ́ ḿ ké nyɔǔn fɛ̀ɛ̀ mú gbɔɔ̀, kɛɛ ɓɛ́ ḿ ké wa póìn.”] 56Ké wa mu ma ɖé hwɔɖɔɔ̀ ɖò mú ɖe.

Nyɔ ɓě mɔ́ Jízɛ̀ ɖeín nàà dyiɛ

(Máfíò 8:19-22)

57Ti ɓɛ́ wa nì ma muɛń nyɛɛ, gàa ɖò cɛ̃ɛ ma Jízɛ̀ gbo, ké ɔ ɖá, “Ḿ kè mɔ̀ mu dɛ̀ kã̀ìn séín nì mu muùn wɛ̃ɛ muùn.”

58Ké Jízɛ̀ cɛ̃ɛ ma ɔ gbo, ké ɔ ɖá, “Tĩ̌ɔ̀-wè ɓě ɓéɖé wa mìɔùn nììn ɓí, ké naà ɓě ɓéɖé waà téɖé ɓě, kɛɛ mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ, ḿ se dɛ̀ ḿ ké ní dú dyi dèɛɛ ɓéɖé fóɖóún.”

59Jízɛ̀ cɛ̃ɛ ma gàa ɖò gbo ɖe, ké ɔ ɖá, “Sí ḿ kíɖíí.”

Kɛɛ gàaɔ̀ ɖá, “Ɓɔ̌ɔ̀, tòɛ̀ ɓɛ́ ḿ ké mu, ɓɛ́ ḿ ké ḿ ɓǎ dyóɖóún zà hwɛ̀.”

60Ké Jízɛ̀ cɛ̃ɛ ma ɔ gbo, ké ɔ ɖá, “Nyɔ ɓě seà fɛ̀ɛ̀ ɓéɖéɛɛ mɛ zà wa nììn nyɔ ɓě ɖǎà mɛ́ɛ dyóɖóún. Kɛɛ mɔ̀ùn mɛ mu, ɓɛ́ m̀ ké Gèɖèpɔ́ɔ̀ kã́á-ɓòɖòɔ̀ jè zio po.”

61Ké gàa ɖò mɔ̀ùn ɖá, “Ɓɔ̌ɔ̀, ní mu m̀ kíɖíí síìn, kɛɛ kĩ́ín-kĩ́ín nyɛɛ, tòɛ̀ ɓɛ́ ḿ ké ní nyɔ ɓě cuòɛ̌ mu hwɛ̀.”

62Ké Jízɛ̀ cɛ̃ɛ ma ɔ gbo, ké ɔ ɖá, “Nyɔ séín ɓɛ́ wa ɖú káɖá dyí, ké wa dè mɔɔ́ poɛ gbɔ, ké wa gmɔ̀ ɖe kánáá pūɛɛ, wa se Gèɖèpɔ́ɔ̀ kã́á-ɓòɖòɔ̀ bìì ɖɛ ɖò nyuɛ ɓɛ́ìn.”

Currently Selected:

Ɖúù 9: ƁB02

Highlight

Copy