Ɖúù 16
16
Nɔ́ɔ́ ɓá gbo-nì-nyɔ̀ ɓɛ́ ɔ cɛ̃̀ xwíníín dyiɛɛ jè dyíɛ
1Hwɛ̀ ké Jízɛ̀ po ma ɔ ɖeín-nà-nyɔ̀ ɓěɔ̀ nɔ́ɔ́ ɖò gbo ɖe, ké ɔ ɖá, “Bã-gàà ɖò nì ma ɓó. Ɔ sè ma ɔ gbo-nì-nyɔ̀ ɖò ɖɛ gbo. Ké wa cɛ̃ɛ ma bã-gààɔ̀ gbo kà gbo-nì-nyɔ̀ ɓɛ́ ɔ sè ma kà ɖɛ gboɛɛ nì ma ɔ wíɖí ɓěɔ̀ mú gbɔɔ̀ǔn wɛ̃. 2Ké bã-gààɔ̀ ɖá ma gbo-nì-nyɔ̀ɔ̀, ké ɔ diè ma ɔ dyi, ké ɔ ɖá, ‘Ɖɛ́ ḿ wɔ̃́à ɓá m̀ dyíɛ́? M̀ mɛ zaìn ɖɛ séín ɓě ɓɛ́ m̀ ɖǎ ní kɔ̃̀ɔ̀-ɖɛ̀ ɓěɔ̀ mú nyùìn nyɛɛ ḿ gbo kɔ̃in, sepóɛɖé ḿ se m̀ ɖɛ ɖò gbo sèɛ̀ ɓɛ́ìn ɖe.’ 3Ké gbo-nì-nyɔ̀ɔ̀ cɛ̃ɛ ma ɖé ɔ mìɔùn mú, ké ɔ ɖá, ‘Ní ɓǎɔ̀ mɔ́ ɓɛ́ ɔ kéá ḿ kũ̀à kɔ̃ún zà. Ɖɛ́ ḿ ɓɛ́ìn nyuɛ kɛ́? Ḿ se kpé ɓɛ́ìn ɓɛ́ ḿ ké ɓí ɓúɖú, ké dɛ̃ nyu ḿ, ɓɛ́ ḿ ké ɖɛ zɔ̀. 4Ḿ dyuò ɖɛ ḿ ké nyuɛ. Nìí, ɔ dyi ḿ kũ̀à kɔ̃ún zàǐn, ní mu nyɔ ɓě ɓɛ́ wa mu ḿ jè dyi kpɔ̃ùn ɖé wa ɓíɖí-taún wɛ̃ɛ ɓéɖéìn.’ 5Ɔ jèɛɛ, ɔ ɖá ma nyɔ séín ɓě ɓɛ́ wa kpɔ̃ ma ɔ gbo-nì-ɓǎɔ̀ ɖɛ ɓěɔ̀ kpaún wɛ̃. Ɔ diè ma nyɔ kĩ́ín-kĩ́ínɔ̀ dyi, ké ɔ ɖá, ‘Ní ɓǎà ɖɛ ɓěɔ̀ jĩ̀ xwɛ̌ nì m̀ múɛ́?’ 6Ké ɔ ɖá, ‘Ɔ mɔ̀ cáná-dɔ̀nɔ̀ùn hɔ̃dɛ̀ɖɛ̀ ɖò.’ Ké gbo-nì-nyɔ̀ɔ̀ ɖá, ‘Nì kpa-cèè-ɖɛ̀ɔ̀ kɛ̀. Ɖúɛ dyí, ɓɛ́ m̀ ké dyi kò, ɓɛ́ m̀ ké kpáɖá-nyɔ sɔ̃́ ɓaɖa-bùè ɓíɖíi céè.’ 7Ké gbo-nì-nyɔ̀ɔ̀ diè ma kpa-nyɔ̀ɔ̀ ɖò dyi ɖe, ké ɔ ɖá, ‘Jĩ̀ xwɛ̌ nìà mɔ̀ùn múɛ́?’ Ké ɔ ɖá, ‘Ɔ mɔ̀ hwítì-ɓɔ̀ɔ̌ táázĩ̀ìn ɖò.’ Ké gbo-nì-nyɔ̀ɔ̀ ɖá, ‘Nì kpa-cèè-ɖɛ̀ɔ̀ kɛ̀. Ɖúɛ dyí, ɓɛ́ m̀ ké hɔ̃dɛ̀ɖɛ̀ mɛ̀nɛ̌ìn-tã ɓíɖíi céè.’ 8Ti ɓɛ́ gbo-nì-ɓǎɔ̀ wɔ̃́ɔ ma kɛɛ, ɔ ɓàìn ma gbo-nì-nyɔ̀ mɔ̀ gbá-gbá-nyɔ̀ɔ̀ kɛɛ ɓó ɔ hwòɖǒ-fɔ̀nɔ̀-ɖɛ̀ ɓěɔ̀ jè. Sepóɛɖé ɓóɖó nìà kɛ nyɔ ɓě dyuò wa mǔè ɓě kpɔ̃ɔ nɔ̀mɔ̀ dyíin, ké wa zi nyɔ ɓě ɓɛ́ wa mɔ̀ùn mɔ̀à ceɔ̀ mú-nì-nyɔ̀ kɛɛ dyí.
9“Ḿ cɛ̃ɛ ɓě gbo, ɓě mɛ ɖú ɓóɖó-kpàà bã-ɖɛ̀ ɓěɔ̀ dyí, ɓɛ́ ɓě ké wa ɓěɛ̀ ɓǎto ɓě dyi mɔ́ìn, ɓɛ́ bã-ɖɛ̀ ɓěɔ̀ jè ɖǎ dyi ziín, ɓɛ́ ɓě ké ɓě nììn pá ɓéɖé ɖé sè-ná-sèɛ̀ cĩ́-naínɔ̀. 10Nyɔ ɓɛ́ wa ɓɛ́ìn hwòɖǒ kɔ̃ dèɛ̀ ɖé ɖɛ tííwè múɛɛ, wa ɓɛ́ìn ɔ hwòɖǒ kɔ̃ dèɛ̀ ɖé ɖɛ vɛ̀nɛ̀ mú ɖekè. Ké nyɔ ɓɛ́ ɔ nyu gbá-gbá ɖé ɖɛ tííwè múɛɛ, ɔ mu gbá-gbá nyuùn ɖé ɖɛ vɛ̀nɛ̀ mú ɖekè. 11Ɔ jèɛɛ, ɔ jǔ ké ɓě se hwòɖǒ-kɔ̃-dè-nyɔ̀ ɖé ɓóɖó-kpàà bã-ɖɛ̀ ɓěɔ̀ múín, nìí, nyɛ́ ɓɛ́ìn ɓě hwòɖǒ kɔ̃ dèɛ̀, ɓɛ́ ɔ ké ɓě ɖɛ ɓě ɓɛ́ wa mɔ̀ bã-ɖɛ̀ jɛ́ɛ́ kɛɛ nyíɛ́? 12Ké ɔ jǔ ké ɓě se ma hwòɖǒ-kɔ̃-dè-nyɔ̀ ɖé nyɔ ɖòɛ̀ kɔ̃̀ɔ̀-ɖɛ̀ múín, nìí, nyɛ́ ɓɛ́ìn ɓě ɖɛ ɓě kɔ̃̀ kɛɛ nyíɛ kɛ́?
13“Nyɔ ɖò se wuɖuí-kɔ̃̀-nyɔ̀ sɔ̃́ gǐì jǔɛ ɓɛ́ìn. Ɔ mu dyúáɖò mú nyɛ́ìn, ɓɛ́ ɔ ké nyɔ tɔ̀ɔ̀ mú ɖɛ̀ɓɛ̀. Mɔɔ ɔ mu dyúáɖò jè dyi kpɔ̃ùn, ɓɛ́ ɔ ké se nyɔ tɔ̀ɔ̀ ɖɛ ɖá. Ɓě se Gèɖèpɔ́ɔ̀ gǐì jǔɛ ɓɛ́ìn, ɓɛ́ ɓě ké bã-ɖɛ̀ ɓě nììn gǐì jǔ ɖekè.”
Ɖɛ ɓě ɓɛ́ Jízɛ̀ cɛ̃ɛ ɖíɛ́ ɓě ɖe
(Máfíò 11:12-13; 5:31-32; Máà 10:11-12)
14Ti ɓɛ́ Fáɖòsíì-nyɔ̀ ɓěɔ̀ wɔ̃́ ma ɖɛ séín ɓěɛ̀ kɛɛ, wa ɓaɖa ma Jízɛ̀ dyɔ́, sepóɛɖé wa ɖɛ̀ɓɛ̀ ma wíɖí mú. 15Ké Jízɛ̀ cɛ̃ɛ ma wa gbo, ké ɔ ɖá, “Ɓě mɔ̀ nyɔ nyu ɓě mìɔùn, ɓɛ́ ɓě ké dyí sɛ́ɖɛ́ìn ɖé nyɔǔn dyéɖéín, kɛɛ Gèɖèpɔ́ɔ̀ dyuò ɓěɛ̀ hwòɖǒ-dyùà ɓěɔ̀ dyí. Sepóɛɖé ɖɛ nyɔǔn-dyù ɖáìn ɖɛ kpa ɖɛ mìɔ kɛɛ, ɔ mɔ̀ Gèɖèpɔ́ɔ̀ dyi-nyàìn-ɖɛ̀.
16“Mózèɛ̀ gmaɔ̀ kè ɖɛ ɓě ɓɛ́ kpáá-ɖɛ̀-cɛ̃-nyɔ̀ séín ɓěɔ̀ cɛ̃ maa kpa ma ɖɛ tee, ké Jɔ̃́ɔ́ dyi ma hwɛ̀. Sɔ̀ìn ɓó tia gboɛɛ, nyɔǔn ɓě nì bɔ̃̌ nɔ̀mɔ̀ dyíin ɓá Gèɖèpɔ́ɔ̀ kã́á-ɓòɖòɔ̀ jè dyíɛɛ wɔ̃́uń, ké wa nì vɔ̃uń cá, ké wa nì ɖé pá dyéɛń. 17Kɛɛ ɔ kàmà mú ɓɛ́ gmaɔ̀ dà tííwè ɖò ké ɖɛ fóɖóún jǔ, ké ɔ zi ɓɛ́ dyɔɔ̀ kè ɓóɖó-kpàà jè ké dyi ziɛɛ dyí.
18“Nyɔ mɔ̀ nyɔ ɓɛ́ ɔ ɓɔ́ ɔ gmàà, ké ɔ kpɔ̃ màa kà kò ɖò dyiɛɛ, ɔ po gmaɖe. Ké nyɔ mɔ̀ nyɔ ɓɛ́ ɔ kpɔ̃ màa ɓɛ́ ɔ kè ɔ dyú-ɓǎ ɓɔ́ìn nyɛ dyiɛɛ, ɔ po gmaɖe ɖekè.
Ɖɛ ɓá bã-gààɔ̀ kè Ɖázɛ̀ɖɛ̀ jè dyíɛ
19“Bã-gàà ɖò nì ma ɓó. Ɔ po ma ɖɔ zi ɖɛ kpauń ɓě mú, ké ɔ pa ma hwɔ wé séín ɓaɖa. 20Ké gǎ-dyé-gàà ɖò kɔ̃̀ nyɛ́nɛ́ mɔ̀ ma Ɖázɛ̀ɖɛ̀ kɛɛ nì ma ɓó ɖekè. Ɔ ɓéɖé ma jě pàɖǎ. Wa pɛ̃́ìn ma ɔ ɖé bã-gààɔ̀ gbǒɔ̀ píé dyi tee. 21Ɔ dèɛ̀ ma hwòɖǒ kɔ̃, ɓɛ́ ɔ ké ma ɖii-ɖɛ̀-bùǒ ɓě ɓɛ́ wa wáɖáìn ma ɓó bã-gààɔ̀ téɓèɖèɔ̀ gbɔiɛɛ ɖi. Gbe ɓěɔ̀ mɔ̀ùn dyi ma, ké wa ɓɛ ma ɔ jě ɓěɔ̀ dyíin. 22Wé ɖòɛ̀ ɓaɖaa, gǎ-dyé-gààɔ̀ mɛ́ ma, ké ínjà ɓě kpa ma ɔ ɖé Ééɓòɖòhɛ̃́ɛ̀ wáún. Bã-gààɔ̀ mɔ̀ùn mɛ́ ma ɖekè, ké wa zà ma ɔ dyóɖóún. 23Kɛɛ ɔ nì ma gǎ dyéɛń mìɔ ɖé hɛ́ɛ̀. Púɛɛ, ɔ gmɔ̀ ma dyií, ké ɔ dyé ma Ééɓòɖòhɛ̃́ɛ̀ ɖé nya vɛ̃in, ké Ɖázɛ̀ɖɛ̀ nì ma ɓó Ééɓòɖòhɛ̃́ɛ̀ wáún. 24Ké ɔ páná ma mú, ké ɔ ɖá, ‘Ḿ ɓǎ Ééɓòɖòhɛ̃́ɛ̀, dyé ḿ wìǐn. Ɖoɓo Ɖázɛ̀ɖɛ̀, ɓɛ́ ɔ ké ɔ jìì-dyùàɔ̀ ní tóìn, ɓɛ́ ɔ kéɛ ḿ miɔ kɔ̃ téìn, sepóɛɖé ḿ nì gǎ dyéɛń mìɔ nɔ̄ nyɛ-ɓɔ́ɔ́ nìà kɛ mú.’ 25Kɛɛ Ééɓòɖòhɛ̃́ɛ̀ ɖá, ‘Ní dyú, ɔ mɛ nì m̀ hwìɖǐi kà ɓɛ́ m̀ dyé ma ɖɛ nɔ̀mɔ̀ kɔ̃in ɓě dyí, ti ɓɛ́ m̀ nì ma cĩ́ɛń nyɛ, ké Ɖázɛ̀ɖɛ̀ mɔ̀ùn nì ma ɖɛ nyìnììn kɔ̃in dyí dyéɛń nyɛ. Kɛɛ kàǔn wɛ̃ɛ, ɔ mɔ̀ùn nìǎ nɔ̄ múà mú, ké mɔ̀ùn nì gǎ dyéɛń. 26Ké ɓó ɖɛ séín ɓěa wáún wɛ̃ɛ, ɓí vɛ̀nɛ̀ ɖò nì ɓó ɓěà pṹa, ɓɛ́ nyɔ kã̀ìn séín ɓě ɓɛ́ wa mɔ́ ɓɛ́ wa kéɔ́ nɔ̄ sɔ̀, ɓɛ́ wa kéɔ́ ɓíɔ̀ péɖé, ɓɛ́ wa kéɔ́ ɖé ɓě gbo dyiɛɛ ké seɛ nyuɛ ɓɛ́ìn. Ké nyɔ ɖò se ɖé ɓě mɔ̀ùn gbo sɔ̀ɔ̀ ɓɛ́ìn, ɓɛ́ ɔ ké nɔ̄ à mɔ̀ùn gbo dyi.’ 27Ké bã-gààɔ̀ ɖá, ‘Ḿ ɓǎ, ní ɓaà m̀ ní, ɖoɓo Ɖázɛ̀ɖɛ̀ ɖé ḿ ɓǎ ɓíɖí-taún. 28Ḿ ɓéɖé ɖé ɖíí-gàà hm̀m̌. Ɔ mɛ mu, ɓɛ́ ɔ ké wa náún po, ɓɛ́ wa mɔ̀ùn ní kɔ̃̀ ɖà nɔ̄ gǎ-dyé-dà nìà kɛ dyi.’ 29Kɛɛ Ééɓòɖòhɛ̃́ɛ̀ ɖá, ‘Nì ɖíí-gàà ɓěɔ̀ ɓéɖé Mózè kè kpáá-ɖɛ̀-cɛ̃-nyɔ̀ ɓěɔ̀ wuɖu ɓěɔ̀ ɖé wa gbo. Wa mɛ tò waà wuɖu ɓěɔ̀ ɖùǔ gbo.’ 30Ké bã-gààɔ̀ ɖá, ‘Gbào, ḿ ɓǎ Ééɓòɖòhɛ̃́ɛ̀. Dyéɛ, ɔ jǔ ké nyɔ ɖò dyi gĩɔ sɔ̀, ké ɔ dyi ɖé wa gbo muín, nìí, wa mu waà nàmàǔn-kpèɖè ɓěɔ̀ dyi táàùn.’ 31Kɛɛ Ééɓòɖòhɛ̃́ɛ̀ ɖá, ‘Ɔ jǔ ké wa se Mózè kè kpáá-ɖɛ̀-cɛ̃-nyɔ̀ ɓěɔ̀ wuɖu ɓěɔ̀ ɖùǔ gbo tòǐn, wa se jǎà poɛ́ mu, kɛbì nyɔ ɖò mɛ sɔ̀ gĩɔ, ɓɛ́ ɔ ké wa gbo muɛ.’ ”
Currently Selected:
Ɖúù 16: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
