TI GƐ́Ɛ́ HAÍTII 13
13
Tí Bánabani ngaa Sɔ́ɔ lɔveni
1Átiyɔ taí h̃uu Yála fɛli mbélaitii su Ngalá ndaa háá lé mbélaitii ti ɣɛ́i na kpahangɔ́ kaamɔítii mba. Aáva ti ɣɛ́i ngáá Bánaba, ɛ́ɣɛ Símiyɔ lɛ́i tɔ́ɔ́ tolí ngáá Nuu W̃áá Lɛingí, ɛ́ɣɛ Lúsɔ lɛ́i í gúlani taí sí h̃u taá naa lolí ngáá Saílini, ɛ́ɣɛ Manééyɔ lɛ́i taá Masangí Hɛ́lɔdi Átipa ti ɣɛ́i ngáá mbala lopo, ɛ́ɣɛ Sɔ́ɔ. 2Ná ti ɣɛ́i taá Ndemɔí Ngalá fɛ́li táá súngi hóu, Hɛ́ɛ́ma Ỹínangi i ɣɛ ta, “A Bánabani ngaa Sɔ́ɔ gula naa wa léélaa mbɛ́ ngengengí sí hááw̃a ngí lókolongɔ ti wa ngáá tí mbo.” 3Faalɔ, ná ti súngi hóuni, tí Ngala fɛ́li, tí loko vɛ́lɛ Bánabani ngaa Sɔ́ɔ w̃a, tí Ngala fɛ́li ti w̃a, tí ti lɔ́ve.
Bánabani ngaa Sɔ́ɔ tí liiní Sáipulɔ
4Hɛ́ɛ́ma Ỹínangi i kɛní naa ngáá háwu tí li taa walái sí h̃u taa náa lolí ngáá Sɛlusíya. Ti vílini naá kelé ngwálai h̃u tí li ndɔwɔlɔí sí h̃u taa naa lolí ngáá Sáipulɔ maayele mbélengɔ ngáá njɛí. 5Ná ti folóni taí sí h̃u taa naa lolí ngáá Sálame, tí Ngalá ndaa wói lení Júsuai ti Yalá fɛ́li máákpɔ wotaítii mbu. Aáva Njɔú Máa i ɣɛi ti wa ngáá ti bɔ́mba w̃ɔɔ.
6Ti lɔvé tɔvéni Sáipulɔ língi ná kpɛ́lɛɛ sú í ló su tí foló tái sí h̃u taa naa lolí ngáá Páfɔ. Naa lɔ tí Júsu w̃ɔɔ yiláá mááleni na lɛ́i í ɣɛ́i ngáá sukɛ gula mɔ́i ta. Ná vólu, ɔ́ɔ́ kula ngáá aá lɔ ngáá Ngalá ndaa háá lé mɔ́ɔ kɛ́ aa ɣɛi ngaa tɔɔỹáá. Ndaahéingi i ɣɛi ngáá Bajísu. 7Lóómi w̃asangí sí taa ɣɛ́ ma Sɛ́jiya Pɔ́ɔ́lɔ lɛ́i í ɣɛ́i tataí ná w̃ááh̃u, Bajísu mbála vandá i ɣɛi la. Masangí sí i ɣɛ́i ngáá ki maa gulá w̃ɔ́ɔ aáva i keelá lóni Bánabani ngaa Sɔ́ɔ wa ngáá ti vá ngele, bɔw̃álale i ɣɛi loní í Ngalá ndaa wói ỹɛ́ni. 8Kɛ́ Bajísu í ɣɛ́i ngáá sukɛ gula mɔ́i sí, ndaahéi kpútei i ɣɛ ngáá Ɛ́lemɔ Gilísi woí h̃u, i ɣɛi áá Sɔ́ɔni ngaa Bánaba w̃aaɣaalí aáva áá pele wɔlí mba ngáá í kɛ ngáá háwu masangí álaa lá ngáá Jísu. 9Kɛ́ Sɔ́ɔ, lɛ́i taa mɔ́ɔ ɣɛ ma Pɔ́ɔ, Hɛ́ɛ́ma Ỹínangi i ɣɛi polú. I wɔlɛní Ɛ́lemɔ yaah̃ú tííŋ, i ɣɛ ma, 10“Yá lɔ ngáá Ngutuwɔ́ Ỹína Nyɔí lóu. Ná vólu, faa fíli í ngáá tɔɔỹáá haa, yá ɣɛ́ ngáá mbaahílima w̃ɔ́ɔ. I h̃úúlaahengɔɔ lé ngáá ndɛɛ híí gɛvɛlɛ kɛvɛlɛ fíli ɛ́ɣɛ ngakpolówa faítii. Yá lɔ nɔ́ɔ fɔ́ Ndemɔí Ngalángi lɔ́ɔ́ỹaa veleítii potemá ngáá ndɛɛ́. 11Kɛ kíya suu í na, Ndemɔí Ngalá toko í fóloa i w̃á aáva yá lɔɔ wóle náa í ló su kpóloo kuu tá í lɔ́ve. Ná vólu, yɛ́i ɣɛ yáá fóloi lɔ.”
Ngamá nɔ́ɔ kɛ ngaah̃úitii maa í bindínga aáva i ɣɛi náa áá lɔ́ve tíɣili tíɣili áá nuu wɔ́li ngáá maa w̃ɔ́ɔ́ í sóu tokoí wa, í híya la. 12Ná Lóómi w̃asangí ná í fái sí ŋál̃a lɔní í ɣɛ́ni, kindáá vílingɔ i ɣɛi la kɔwɔ́ato Ndemɔí Ngalángi gálambongi wa, aáva i laní náa ngáá Ndemɔí Jísu.
Bánabani ngaa Pɔ́ɔ tí liiní Átiyɔ
13Ná Pɔ́ɔni ngaa ngi mbála hiyá polu yeláitii ti gúlani tai sí h̃u taa naa lolí ngáá Páfɔ ti víli keléngi h̃u, tí li taí sí h̃u taa naa lolí ngáá Pɛ́ga í P̃ɛɛfíliya lɔwɔlɔí h̃u. Naa lɔ Njɔú Máa í ti loní na ngáá í yangáima Jɛlúsɛl̃ɛ taa h̃u. 14Ná naa ti gúlani Pɛ́ga wá, tí lií naá taa walái sí h̃u taa naa lolí ngáá Átiyɔ, í Pesedíya lataí h̃u. Ná Júsuaitii ti Lɛ́ɛ́lɛmbo Ngála Fɛ́li Fóloi í folóni ma, tí lií Ngala fɛ́li máákpɔ wotaí wu, ti héi na. 15Ná ti vílani ỹandái tá galáma Ngala sávai h̃u í féni Muusé yáá taá Ngalá ndaa háá lé mbélaitii ti gɔ́lɔ vɔnɛngɔ́i ta, Ngala fɛ́li máákpɔ wotaí w̃aa wútuwɔaitii tí keelá loni Pɔ́ɔni ngaa Bánaba wá, ti ɣɛ́ ti w̃a, “Mu mbálangaa, ná wɔ́li ngoo vilí ngóó áá ɣɛ́ wú yáá nungáitii fááw̃a sí áá nduwúh̃ulɛ ngáá nuu yé, kɛ a nde kái.”
16Kɛ Pɔ́ɔ i wuyoɣénga, í ló, í lokoí lɛ ngeleya, i ɣɛ ti w̃a, “Wɛ́i kínɛi wú ngáá Ísulɔ yeláitii ɛ́ɣɛ wɛ́i wáá ngáá Júsua kɛ́ wáá Ngalá fɛ́li, a wolílo má! 17Ísulɔ yeláitii ni Yálangi sí náa fɛ́li, laá lɔ í lókolongɔ ni káwalani mba aáva i kɛ ngáá háwu ti kulasuunúma w̃aahɔ́lɔ naa h̃u ti ɣɛ́i Íjepi lɔwɔlɔí h̃u. I ti gúlani Íjepi wa ngáá ngi yákpangi, 18i ti gɛɛhɔ́ngi gúmboni h̃ú fowó vúú nááningɔ hááw̃a naa h̃u ti ɣɛ́i ngaalaí h̃u. 19I kɛ́ni ngáá háwu híí ngɔ́felangɔ wu ndaa í víli Kééna lataí h̃u, í maa lɔ́wɔlɔi hé ngí vóngai Ísulɔ yeláitii ngeyá ngáá ti ndá. 20Faí sí kpɛ́lɛɛ pa i hiyaní fowó hɔ́ndɔ nááningɔ fowó vúú ndɔ́ɔ́lungɔ laa lówah̃u.
Ná sí í gúlani su, Ngalá ngí loí náa masa séi má ti w̃ááh̃u í ló su í foló Ngalá ndaa háá lé mɔ́i Sámiỹɔ ndá yéteyangi h̃uu w̃á. 21Nungáitii tí Ngalá mɔ́ɔ́ni ngáá í ti wɔ ngáá masa ngwála, aáva Ngalá ngí Kési h̃íỹɛndou loí Sɔ́ɔ hení ti yaá. I ɣɛi ngáá Bɛ́njimai le kpambii h̃uu w̃ɔ́i ta. I kɛní masandái h̃u ngáá fowó vúú nááningɔ. 22Ná naa Ngalá ngí Sɔ́ɔ gulaní masandái h̃u, kɛ Ngalá ngi Deevé ɣɛ́a ngáá masa ngwálai ti w̃ááh̃u. Ngalá ngi ngoo lení kɔwɔ́ato Masangí Deevé wá. I ndení, i ɣɛ ta, ‘Ngi Jɛɛ́se h̃íỹɛndou loí Deevé ɣɛ́ kíli lɔ́nga, laa lɔ í ngáá ndíívo mɔ́ɔ́. Aá lɔɔ vá fái kpɛ́lɛɛ kɛ́ma ndóngɔ í kɛ.’ 23Maa Déévei sí ngi lé kpámbii h̃uu lɔ́ Ngalá ngí Ngumaawó Mɔ́i Jísu gulaní na, í tɔve Ísulɔ yeláitii ngelé kɛ kíya nɔ́ɔ í maa gɛ́lɛ ngeɣéni. 24Kɛ́ Jísu ɔ́ɔ́ ɣɛ́ p̃ɛ́ɛ́ í vá, Njɔú i keela woó léni kɔwɔ́ato nuu vólu yaféndai wa faa ỹɔ́i wa ɛ́ɣɛ ngúya wondái wa ngáá Ísulɔ yeláitii kpɛ́lɛɛ. 25Ná naá Njɔú í ɣɛ́i áá víla ngi yéngengi wóma, i ndení, i ɣɛ ta, ‘Aá lɔ wú gí ma ngáá kɛ ele wáá ngáá nge? Aá ɣéle p̃ɛ́ɛ́ nyá lɔ́ɔ ndé wú w̃a ngáá nuí sí wú gí ngí mba aá laa ngáá ngé. Kɛ́ laá lɔɔ vá vaamá pólu véle, lɛ́i kɔwɔ́ ya kɔ́ɔ́vai ɣéle tɔ ngáá kula ɣɛí ngáá ndaahúlo mɔ́ɔ.’ ”
26Pɔ́ɔ í mɔ́ɔ ɣɛ ta, “Mu mbálangaa, muỹɛ́i mu ngáá Lébilah̃au laala lengáitii ɛ́ɣɛ wɛ́i wáá ngáá Júsua kɛ́ wáá Ngala fɛ́li, a muỹá lɔ ti keela woí sí léi mu yɛ kɔwɔ́ato ngumaawóngi wa, tí tɔvengɔ́ mu yelé. 27Aáva Jɛlúsɛl̃ɛ yélaitii ɛ́ɣɛ naa wutúwɔaitii taá ɣɛ́i kɔlɔ́ ngáá ele wáá ngáá Jísu kɛlaa tɔɔ́ Ngalá ndaa háá lé mbélaitii ndaa wói yatɔ́ mba, nuu áá kalá Júsuai ti Lɛ́ɛ́lɛmbo Ngála Fɛ́li Fóloi fíli ma. Ná fíli sú, tí kɛ́ni ngáá háwu Ngalá ndaa háá lé mbélai ti laa wói í hítɛnga ngáá pelé lálai tí kulaní lá, tí páa. 28Kɛ kíya bɛ́lɛ faa ỹɔ́u fíli áá ɣɛ́i su, kɛlaa kule ɔ́ɔ́ ɣɛ́ ma tɔɔ́ paa faaw̃a, ná fíli sú, tí ndéni nɔ́ɔ Páilɛɛ w̃a ngáá ná í paa. 29Kɛ́ laa vá sí kínɛi pɔnɛngɔ́ í ɣɛ́i lá Ngala Kɔ́lɔi h̃u kɔwɔ́ato Jísu wá ná ti vílani kpɛ́lɛɛ kɛ́ ma lá, tí kulaní naá kulɔ́sii w̃a, tí nda kɔtu wokó kambái h̃u. 30Kɛ́ Ngalá ngí mbuyoɣéni sái h̃u. 31Aáva foló bih̃íw̃aa laa lówah̃u, taá sítii tɔ́ɔ́ ɣɛ́ síya polúi w̃a í síɣe Galéli lataí h̃u í foló Jɛlúsɛl̃ɛ taa h̃u, nátii tí tɔ́ni, tiyá va tɔ náa taá maa hééle woo le faaw̃a a mu vóngai ma. 32Niỹá lɔ́ɔ keela woó vánda lé wú w̃á ngáá sí Ngalá ngí maa gɛ́lɛ ngeɣéni ni káwalani ngeyá. 33Aáva i sitɛ ngá nga mu yɛ muỹɛ́i mu ngáá ti láála lengáitii. Ná wáá ngáá, sí í Jísu wuyoɣéni sái h̃u kɛ kíya pɔnɛngɔ́i ngulei héle kélei h̃u í Ngala Fɛ́li Ngúlei Gɔlɔí h̃u. Sí vá pɔnɛngɔ́i su aá wáa ngáá sí,
‘Yá lɔ yí ngáá ní H̃íỹɛndou Loí
í séi hááwɔ w̃a, ngí ɣɛ́a ngáá í Kɛ́ɛ́ɣɛ.’
34Í lí náá bɛ́lɛ í tó sí wa Jísu áá lúúlani Ngalá ngí mbuyoɣéni sái h̃u, ngoo vɔ́nɛngɔɔ lé kɔwɔ́ato mba. Maa wói pɔnɛngɔ́i aá waa ngáá sí,
‘Tɔɔỹáá haaw̃a, nyá ngáá nɛ́ɛ́ma yéi wú w̃a ngáá hɛ́ɛ́ma gúúlongi
sítii ngí mbóngɔ ngáá Masangí Deevé.’
35Ngimɔ́ɔ́ nɔ́ɔ múl̃ɔ pɔnɛngɔ́i ỹanda veka Ngala Kɔ́lɔi h̃u. Sí va pɔnɛngɔ́i aá wáá ngáá sí,
‘Yɛ́i belé bé í Hɛ́ɛ́ma W̃ɔ́i wa ɔ́ɔ́ lúúla.’ ”
36Kɛ Pɔ́ɔ i mɔɔ ndengá i ɣɛ ta, “Masangí Deevé ndá táingi h̃ú sí Ngalá ngi kpatɛní laá Deevé haáw̃a ngáá í kɛ Ngalá mbɛ, i kɛní p̃ɛ́ɛ́ ɔ́ɔ́ ɣɛ́a ha. Tí kpɔluní mbéi tí ngi káwalani kpɔluní na. Laáva í luuláni. 37Kɛ́ nuí sí Ngalá ngí mbuyoɣéni sái h̃u, aa luuláni. 38-39Faalɔ, mu mbálangaa, ndóngɔɔ lé wú ɣɛ́ kɔlɔ́ ngáá kɛ Jísu laá maa véle w̃á lɔ í kɛ́a keela woí sí áá lé wú w̃á kɔwɔ́ato faa ỹɔ́u h̃uuhaalóndai wa. Laá maa véle w̃á, nuí fíli áá lá la, maa w̃ɔ́i h̃úúhaalongɔ aa ɣɛ lá faí kpɛ́lɛɛ sú, maa haa ɛ́i belé lo su savaí w̃á Ngalá ngí féni Muusé yáá. 40A w̃aah̃ú belé ngáá sí Ngalá ndaa háá lé mbélaitii tí ndengá ɔ́ɔ́ ɣɛ́ ngáá wú ye, sí ti ɣɛ́i ta,
41‘A wolílo wɛ́i wáá Ngalá ndaa wói waa gúla ỹɔu, a gíndaa víli, wú há,
bɔw̃álale nyáá ngaá vá faa tá ɣɛ́ma wú yéteyangi sí h̃u
ngáá kúnafɔ wɛ́i la lá bele bɛ́lɛ nuu áá nde wú w̃a.’ ”
42Ná Pɔ́ɔni ngaa Bánaba ti ɣɛ́i taa gúla Júsuai ti Yála fɛli máákpɔ wotaí wuu wá, nungái tí ndéni ti w̃a ngáá ti vá kái múl̃ɔ volú Ndɛɛlɛmbó Ngála Fɛ́li Fólo vekaí w̃a tí ndi ngu ma ngáá Ngala ngói sí léndaa. 43Ná naa nungáitii tí gúlani maakpɔ́i h̃u, Júsuai kpih̃íw̃aa ɛ́ɣɛ sítii taa ɣɛ́i ngáá Júsua tí bih̃íw̃aa ti ɣɛ́i náa lokohéini Ngalá sávaitii mbu ti hítɛ Pɔ́ɔni ngáá Bánaba volú. Aáva nátii ti yɛ́pɛni ti yelé tí nduwúh̃ulɛ ngáá ti ye kɛinɔɔ́ tí ndi ngu ma ngáá ndángi Ngalá fái h̃u, ti ɣɛ́ Ngalángi háá bɔwɔí h̃u.
44Ná í ɣɛ́i ngáá Ndɛɛlɛmbó Ngála Fɛ́li Fólo vekaí w̃a, taí ná h̃u yélaitii ti híka w̃aa tí yatɛ́ni mba ỹanda yiláá ngáá tí Ndemɔí Ngalá ndaa wói ỹɛ́ni. 45Ná Júsuaitii tí faŋaí ya tɔ́i, tí tolóma batɛní naa liítii su aáva ti ɣɛ́i náá taá njɛpɛ ỹɔú ỹɔ́ungaa le kɔwɔ́ato sí wá Pɔ́ɔ ɣɛ́i áá nde. 46Kɛ Pɔ́ɔni ngaa Bánaba tí tí woo yápotenga ngáá ndiibá, ti ɣɛ́ ti w̃a, “Kule í ɣɛ́ngɔ ni w̃a ngáá ní Ngalá ndaa wói le wú w̃á hése. Kɛ́ ná wáá lokohéingɔ mbu, aáva wáá bɔwɔ́ yeɣé ngáá kɛ wú gúla ɣɛngɔ láá le kúnafɔ lɛ́ɛ́h̃ui w̃aahɔ́lɔ fááw̃a, faalɔ, ni vótenga naa sítii ngéle péle taa ngáá Júsua, 47sífaa, Ndemɔí Ngalá ngí faa léngɔ ni w̃a ngáá sí, i ɣɛ ta,
‘Ngí í ɣɛa ngáá lámbo fo kɛ kíli sítii faaw̃a taa ngáá Júsua
kɛinɔɔ́ yí vá ngáá ngumaawóngi
yí fólo lá ndɔwɔlɔ́i kpɛ́lɛɛ su.’ ”
48Ná sítii taa ngáá Júsua ti sí ỹɛ́nini, ti góóh̃unɛɛngɔ i ɣɛi lá. Ná vólu, tí wúfeni Ndemɔí Ngalá ndaa wói w̃a. Sítii pa Ngalá ngí ɣɛ́i lokoloní ti wa kúnafɔ lɛ́ɛ́h̃ui w̃aahɔ́lɔ fááw̃a, tí lái ngáá faí sítiini kɔwɔ́ato Jísu wa.
49Ndemɔí Ngalá ndaa wói i hiya hiyáni tataí ná h̃u kpɛ́lɛɛ. 50Ná Júsuaitii tí tɔwɔ́ mba yélaitii toní faa ỹɔ́u ɣɛ fááw̃a kpahangɔ́ nyah̃ái sítii kele tɔ mba Ngala ndúwambai í ɣɛ́i ti h̃u aáva ti ngáá tɔwɔ́ mba yélaa, ti ɣɛ́i náa taá faa bángaitii nda Pɔ́ɔni ngaa Bánaba w̃a, tí tí bɛ́ na. 51Faalɔ, Pɔ́ɔni ngaa Bánaba tí ỹandái ná w̃aa lútuwangi bɛ́kpɛlɛni gɔwɔ́ yá ngakɛ́ fááw̃a ngáá nungái nátii ngáá ti bɔwɔ́ háá ỹɔí lɔɔ ló ngáá ti ye. Tiyá vá tí lííni naá Ekóniya taa h̃u. 52Jísu Kílisitii volú yélaitii pa ti ɣɛ́i Átiyɔ, ti h̃úúlaahengɔ i ɣɛi lá ngáá kooh̃unɛ́i ɛ́ɣɛ Hɛ́ɛ́ma Ỹínangi í vú ti h̃u.
Currently Selected:
TI GƐ́Ɛ́ HAÍTII 13: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000
